U tsʼáaik u yóol máakeʼ ku taasik utsil

LE ADORACIÓN ICH FAMILIAIL yéetel u xookil le Bibliaoʼ jach ku yáantaj utiaʼal u líiʼsaʼal le paalaloʼob «tiʼ junpʼéel toj kuxtal yéetel tiʼ u kaʼansajil Yuumtsil[oʼ]» (Efe. 6:4). Baʼaleʼ le mejen paalaloʼoboʼ séeb u náakal u yóoloʼob. ¿Bix jeʼel u yáantaʼaloʼob utiaʼal maʼ u náakal u yóoloʼobeʼ? Koʼox ilik baʼax tsʼoʼok u beetik kaʼapʼéel familia kajaʼanoʼob tu luʼumil Estados Unidos.

George, kajaʼan Californiaeʼ, ku yaʼalik: «Kaʼach mejentak in paalaloʼobeʼ, teen yéetel in wataneʼ k-ilik k-beetik le xook junpʼéel bix jeʼel u jatsʼutstal u yilkoʼoboʼ. Yaan kʼiineʼ k-tsʼáaik nookʼ jeʼex le ku takik le máakoʼob úuchjeakil, utiaʼal k-chíikbesik le baʼax tu beetaj jujuntúul máaxoʼob ku chʼaʼchiʼitaʼal tiʼ U libroi tsikbaliloʼob tiʼ le Bibliaoʼ. Yaan kʼiineʼ k-beetik espadaʼob, xóolteʼob yéetel xaakoʼob utiaʼal k-beetik u chan dramail. Yaan kʼiin xaneʼ, juntúul ichiloʼoneʼ ku beetik le baʼax tu beetaj juntúul máax ku chʼaʼchiʼitik le Bibliaoʼ, yéetel u maasileʼ ku yaʼalikoʼob máaxiʼ. T-beetaj xan junpʼéel báaxal ku taasik kʼáatchiʼob chʼaʼan teʼ Bibliaoʼ, yaan talamtakiʼ, yanoʼob xaneʼ maʼatech. Yéetel yaan kʼiineʼ k-beetik jejeláas baʼaloʼob jeʼex le arca tu beetaj Noeoʼ wa k-tsʼíibtik tu tsoolol baʼax kʼiin ka úuch jujunpʼéel baʼaxoʼob ku yaʼalik le Bibliaoʼ. Tsʼoʼoleʼ k-bonik bix le máaxoʼob ku chʼaʼchiʼitik le Bibliaoʼ bey xan uláakʼ baʼaxoʼob ku yaʼalik. Teʼ kʼiinoʼobaʼ táan k-tuklik k-bonik le u nuʼukulil baʼateʼel ku chʼaʼchiʼitik Efesoiloʼob 6:11-17. Ken tsʼoʼokokeʼ cada juntúuleʼ yaan u tsolik baʼax u kʼáat u yaʼal cada jaats. Tuláakal lelaʼ tsʼoʼok u yáantaj utiaʼal u maas jatsʼutstal le xook ich familiailoʼ».

Debi, kajaʼan Michiganeʼ, ku yaʼalik: «Teen yéetel in wíichameʼ jach talam kaʼach k-ilik maʼ u náakal u yóol k-chan hija, óoxpʼéel jaʼaboʼob yaantiʼ. Juntéenjeak, le táan in xokik u yuʼub u tsikbalil Isaak yéetel Rebeca tiʼ U libroi tsikbaliloʼob tiʼ le Bibliaoʼ, taal tin tuukul u meyajten kaʼatúul muñecoʼob utiaʼal in weʼesiktiʼ le baʼax ku yaʼalik le xookoʼ. Ka tin beetaj lelaʼ, joʼopʼ u maas beetik u cuentail baʼax kin waʼalik. Teʼ tuláakʼ mesoʼoboʼ jach meyajnajtoʼon le mejen muñecoʼob utiaʼal k-kaʼansik uláakʼ tsikbaliloʼob tiʼoʼ. Le ken tsʼoʼokok k-xokik junpʼéel tsikbaleʼ, in chan hijaeʼ ku bin u kaxt uláakʼ u báaxaloʼob yéetel uláakʼ baʼaloʼob utiaʼal u beetik le baʼax tu yaʼalaj le xookoʼ. Bey táan kaʼach u kaxtik junpʼéel baʼal jach koʼoj u tojoleʼ. Tak chéen yéetel junpʼéel u cajail xanab bey xan yéetel junpʼéel chak cintaeʼ ku chíikbesik u yotoch Rahab yéetel le suum tu chʼuykíintaj tu ventanail u yotochoʼ. K-bakʼik juntúul kaan de peluche [metroi-medio] chowkil, tu yook junpʼéel míis utiaʼal k-chíikbesik le kaan de cobre ku yaʼalik Números 21:4-9. Tsʼoʼoleʼ k-líiʼsik tuláakal le baʼax ku meyajtoʼon ichil junpʼéel nojoch bolsa de lonaoʼ. Toʼoneʼ jatsʼuts k-ilik bix u xaʼakʼtik k-chan hija le baʼaloʼob yaan ichil le bolsa utiaʼal u kaxtik le baʼaxoʼob kun meyajtiʼ utiaʼal u yeʼesik junpʼéel baʼax ku yaʼalik le Biblia jeʼex u tuklik letiʼeʼ».

U jaajileʼ maʼ chéen chʼaʼabil u líiʼsaʼal le mejen paalaloʼoboʼ, yéetel maʼ chéen juntéen unaj u tsʼaʼabal xook tiʼob cada semana utiaʼal ka taakchajak u meyajtikoʼob Jéeobaiʼ. Baʼaleʼ le adoración ich familiail yéetel u xookil le Bibliaoʼ jach jeʼel u yáantaj utiaʼal u kaʼansaʼaloʼob u meyajtoʼob Dioseʼ. U jaajileʼ u tsʼáaik u yóol máak u beeteʼ ku taasik utsil.