¿Jach wa mejentakoʼob utiaʼal u yokjaʼob?

CARLOS, * kajaʼan Filipinaseʼ, ku yaʼalik: «Jach kiʼimak in wóol, tumen beoraaʼ in hijaeʼ x-jaajkunaj tiʼ Jéeoba, yéetel in wojel letiʼeʼ kiʼimak u yóol xan». Juntúul taatatsil kajaʼan Greciaeʼ ku yaʼalik xan: «Teen yéetel in wataneʼ jach kiʼimak k-óol úuchik u yokjaʼ tu yóoxtúulil k-paalal desde tu mejentakiloʼob. Letiʼobeʼ táan u tsʼáaik u yóoloʼob u meyajtoʼob Jéeoba yéetel jach kiʼimak u yóoloʼob ikil u adorarkoʼob».

Le taatatsiloʼob meyajtik Jéeobaoʼ jach yaan baʼax oʼolal u kiʼimaktal u yóoloʼob ken okjaʼanak u paalaloʼob. Baʼaleʼ yaan kʼiineʼ kex kiʼimak u yóoloʼobeʼ ku chiʼichnaktaloʼob. Juntúul kiikeʼ ku yaʼalik: «Kiʼimak in wóol, baʼaleʼ chiʼichnaken xan, tumen bejlaʼeʼ in wojel in hijo kun kʼubik cuenta tiʼ Jéeoba yoʼolal baʼaxoʼob ku beetik».

Tuláakal le paalaloʼoboʼ unaj u yilik u yokjaʼob. Baʼaleʼ maʼ xaaneʼ, yaan taatatsiloʼobeʼ jeʼel u tuklikoʼobeʼ: «In wojel in hijoeʼ ku tsʼáaik u yóol u meyajt Jéeoba, baʼaleʼ ¿jeʼel wa u chúukpajal u yóol utiaʼal maʼ u lúubul tiʼ núupkʼeban yéetel maʼ u beetik baʼaloʼob kʼaastakeʼ?». Maʼ xaaneʼ uláakʼoʼobeʼ ku tuklikoʼob: «¿Yaan wa u seguer u meyajtaʼal Dios tumen in hijo, wa yaan u bin chéen tu paach ayikʼaliloʼob?». Yoʼolal le baʼaloʼob ku tuklaʼalaʼ, ¿baʼax ku yaʼalik le Biblia jeʼel u yáantik le taatatsil u yil wa jeʼel u páajtal u yokjaʼ u hijoeʼ?

Unaj u beetkubaʼob disipuloil tiʼ Cristo

Le Bibliaoʼ maʼatech u yaʼalik jaypʼéel jaʼab kʼaʼabéet tiʼ máak utiaʼal ka okjaʼanak, baʼaleʼ ku yaʼalik baʼax tuukulil unaj u yantal tiʼ le máaxoʼob ku yokjaʼoboʼ. Jesuseʼ tu yaʼalaj tiʼ u disipuloʼob: «Xeeneʼex túun tiʼ u kajnáaliloʼob tuláakal kaajoʼobeʼ ka a beeteʼexoʼob j-kaanbaloʼob [wa disipuloʼob]; yéetel tsʼaʼex u yokjaʼob» (Mat. 28:19). Le oʼolal chéen le máaxoʼob tsʼoʼok u beetkubaʼob disipuloil tiʼ Cristo unaj u yokjaʼoboʼ.

¿Baʼax u kʼáat u yaʼal u beetkuba máak disipuloil? Le libro Perspicacia para comprender las Escrituras, ku yaʼalik: «Lelaʼ bey u yaʼalaʼal tiʼ le máaxoʼob maʼ chéen ku creertikoʼob le baʼax tu kaʼansaj Cristooʼ, baʼaxeʼ ku tsʼáaikoʼob ichil u kuxtaloʼob». ¿Jeʼel wa u páajtal u beetkuba disipuloil tiʼ Cristo le mejen paalaloʼoboʼ? Juntúul kiik tsʼoʼok maas tiʼ cuarenta jaʼaboʼob joʼopʼok u beetik u misionerail Latinoamericaeʼ, ku yaʼalik: «[Teen yéetel tu kaʼatúulal in kiikoʼobeʼ] kex maʼ jach nuuktakoʼon kaʼacheʼ t-uʼuyaj  taak k-meyajtik Jéeoba yéetel taak k-kuxtal teʼ Paraísooʼ. Le úuchik k-kʼubik k-kuxtal tiʼ letiʼoʼ tu yáantoʼon k-aktáant le túuntaj óolaloʼob ku máansik le táankelem paalaloʼoboʼ. Maʼ yaj t-óol úuchik k-kʼubik k-kuxtal tiʼ Dios desde t-chichniliʼ».

Taatatsileʼex, ¿bix jeʼel a wojéeltikeʼex wa a paalaleʼexeʼ jach tu jaajil u disipuloʼob Cristo? Yoʼolal baʼax ku beetkoʼob. Le Bibliaoʼ ku yaʼalik: «Yéetel baʼaxoʼob ku beetik juntúul táankelem wíinikeʼ ku yojéeltaʼal wa toj u kuxtal» (Pro. 20:11). Le oʼolal unaj a wilkeʼex jujunpʼéel baʼaloʼob jeʼel u yeʼesik wa táan u beetkubaʼob u disipuloʼob Cristoeʼ (1 Tim. 4:15).

Le baʼaxoʼob eʼesik jach tu jaajil disipuloʼoboʼ

¿Ku yuʼubik wa tʼaan? (Col. 3:20.) ¿Ku beetik wa le baʼaxoʼob ku yaʼalaʼaltiʼ ka u beet ichil u yotochoʼ? Le Bibliaoʼ ku yaʼalikeʼ, le ka tu tsʼáaj 12 jaʼaboʼob tiʼ Jesuseʼ jach ku yuʼubik u tʼaan u taataʼob (Luc. 2:51). U jaajileʼ mix juntúul paal beetik jach tuláakal le baʼax ku yaʼalaʼaltiʼ tumen u taataʼoboʼ. Baʼaleʼ tuláakal le máaxoʼob meyajtik Diosoʼ unaj u yilik u beetkoʼob jeʼex Jesuseʼ yéetel «ka [kuxlakoʼob] jeʼel bix kuxlajik letiʼoʼ». Bey túunoʼ, le paal kun okjaʼoʼ unaj tuláakal máax kʼaj óoltmil ku yuʼubik tʼaan (1 Ped. 2:21).

Tuukulneneʼex xan tiʼ le kʼáatchiʼobaʼ: ¿Táan wa u tsʼáaik «táanil u [reino] Jajal Dios» a hijo ikil u tsʼáaik u yóol teʼ kʼaʼaytajoʼ? (Mat. 6:33.) ¿Wa mantatsʼ kʼaʼabéet a waʼaliktiʼ ka jóokʼok yéetel ka tʼaanak teʼ najoʼoboʼ? ¿Ku beetik wa le baʼaxoʼob ku páaʼtaʼal tiʼ le j-kʼaʼaytajoʼoboʼ? ¿Ku yilik wa u suut u kaʼa xíimbalt le máaxoʼob taak u seguer u kaanbaloʼoboʼ? ¿Ku yaʼalik wa tiʼ u yéet xookoʼob yéetel tiʼ u profesor letiʼeʼ j-jaajkunaj tiʼ Jéeoba?

¿Ku yilik wa unaj u bin teʼ muchʼtáambaloʼoboʼ? (Sal. 122:1.) ¿Uts tu tʼaan wa u núukik le kʼáatchiʼob ku beetaʼal teʼ tu Xookil U Pʼíich Tulumil Kanan, tu Xookil le Biblia teʼ Múuchʼulil yéetel u táakpajal teʼ Escuela utiaʼal k-Kaʼansik u Tʼaan Diosoʼ? (Heb. 10:24, 25.)

¿Ku yilik wa maʼ u biskuba yéetel u yéet xookoʼob wa uláakʼ máakoʼob jeʼel u beetik u kʼastal u tuukuleʼ? (Pro. 13:20.) ¿Baʼax paaxiloʼob, peliculaʼob, videojuegoʼob wa uláakʼ baʼaloʼob tiʼ Internet uts tu tʼaan u chaʼantik? ¿Ku yeʼesik wa yéetel baʼax ku yaʼalik bey xan yéetel baʼax ku beetik u kʼáat u beet le baʼax ku yaʼalik le Bibliaoʼ?

¿U kʼaj óol wa tubeel le Bibliaoʼ? ¿Jeʼel wa u páajtal u tsolik ichil u tʼaanoʼob le baʼax ku kanik teʼ Adoración ich familiailoʼ? ¿Jeʼel wa u páajtal u tsolik le baʼaxoʼob maas kʼaʼanaʼantak ku kaʼansik le Bibliaoʼ? (Pro. 2:6-9.) ¿Uts tu tʼaan wa u xokik le Biblia yéetel le jóoʼsaʼaniloʼob ku tsʼáaik le palitsil chúukpajaʼan u yóoloʼ? (Mat. 24:45.) ¿Ku kʼáatik wa ka a tsoleʼextiʼ jujunpʼéel baʼax ku kaʼansik le Bibliaoʼ?

Le kʼáatchiʼobaʼ jeʼel u yáantkeʼex a wileʼex bix u tsʼáaik u yóol a paalaleʼex u meyajtoʼob Dioseʼ. Ken tsʼoʼokok a xakʼaltikeʼex le kʼáatchiʼobaʼ, maʼ xaaneʼ yaan a wilkeʼex maʼ tu páajtal u jáan okjaʼ a paalaleʼex, tumen yaan  jujunpʼéel baʼaxoʼob unaj u beetkoʼob táanil. Wa maʼ xaaneʼ yaan a wilkeʼexeʼ jeʼel u páajtal u yokjaʼeʼ, tumen tsʼoʼok u kʼubik u kuxtal tiʼ Jéeoba yéetel ku yeʼesik yéetel le baʼaxoʼob ku beetik letiʼeʼ juntúul u disipulo Cristo.

Le táankelem paalaloʼoboʼ jeʼel u páajtal u nojbeʼenkúuntkoʼob Jéeobaeʼ

Yaʼab máaxeʼ desde tu chichniloʼob ka káaj u meyajtikoʼob Dios. Jeʼex tu beetil José, Samuel, Josías yéetel Jesuseʼ (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). Wa jeʼex u hijaʼob Felipeiʼ, tu kantúuliloʼobeʼ ku kʼaʼaytikoʼob kaʼach le maʼalob péektsiloʼ, baʼaleʼ yanchaj u kaʼansaʼaloʼob desde tu mejentakiloʼob (Hch. 21:8, 9).

Juntúul sukuʼun kajaʼan Greciaeʼ ku yaʼalik: «Ka okjaʼanajeneʼ 12 jaʼaboʼob yaanten, mix juntéen yaachajak in wóol úuchik in beetik. Bejlaʼeʼ tsʼoʼok veinticuatro jaʼaboʼob okjaʼanaken yéetel veintitrés joʼopʼok in beetik in precursoril. In yaabilaj tiʼ Jéeobaeʼ tu yáanten utiaʼal maʼ in lúubul tiʼ le túuntaj óolaloʼob anchajten tin táankelmiloʼ. U jaajileʼ yaʼab tiʼ le baʼaxoʼob tsʼoʼok in naʼatik ku kaʼansik le Bibliaoʼ, maʼ in wojeloʼob kaʼach le yaanten 12 jaʼaboʼoboʼ, baʼaleʼ teʼ kʼiinoʼob jeʼeloʼ jach in yaabiltmaj Jéeoba yéetel in kʼáat in meyajt tuláakal u kʼiinil in kuxtal. Jach kin tsʼáaik u nib óolalil tiʼ ikil u yáantken utiaʼal u chúukpajal in wóol in meyajte».

Kex jeʼel jaypʼéel jaʼab yaan tiʼ máakeʼ, wa ku yeʼesik ichil u kuxtal u disipulo Cristoeʼ unaj u yokjaʼ. Pabloeʼ ku yaʼalik: «Yéetel le puksiʼikʼaloʼ ku [yeʼesik yaan u fe] utiaʼal ka tsʼaʼabak máak maʼalob tu táan Jajal Dios, yéetel le chiʼ túunoʼ ku [tʼaan máak tiʼ] Jesucristo utiaʼal ka yanak [salvación] tiʼ» (Rom. 10:10). Taatatsileʼex, le kʼiin ken okjaʼanak a hijoʼexeʼ, tuláakal le familia áantajnaj utiaʼal u béeytaloʼ. Le oʼolal maʼ a chaʼikeʼex tiʼ mix baʼal u beetik maʼ a wuʼuyikeʼex le kiʼimak óolalaʼ.

[Tsolajil]

[U tsolajil le oochel teʼ táan juʼun 5]

Le bix unaj u tuukul máakoʼ

Yaan taatatsiloʼobeʼ ku tuklikoʼobeʼ maʼalob ka okjaʼanak u paalaloʼob, baʼaleʼ ku tuklikoʼob xaneʼ sajbeʼentsil u beetaʼal, jeʼex u jóoʼsik máak u licencia utiaʼal u manejareʼ. Baʼaleʼ ¿jach wa tu jaajil sajbeʼentsil u yokjaʼ máak yéetel u meyajtik Dios? Le Bibliaoʼ ku yaʼalikeʼ maʼatech. Proverbios 10:22 ku yaʼalik: «U [bendición] Yuumtsileʼ ayikʼalil maʼ tu taasik kʼiʼinamil tu yéetel». Pablo xaneʼ tu yaʼalaj tiʼ Timoteo: «Tu jaajileʼ le [fejoʼ] junpʼéel nojoch náajal[,] baʼaleʼ utiaʼal le máax kiʼimak u yóol yéetel le baʼax yaantiʼoʼ» (1 Tim. 6:6).

Leloʼ maʼ u kʼáat u yaʼal wa chéen chʼaʼabil u meyajtaʼal Jéeobaiʼ. Tuukulnakoʼon tiʼ le baʼax úuch tiʼ le profeta Jeremíasoʼ. Letiʼeʼ tu muʼyajtaj yaʼab talamiloʼob teʼ kʼiinoʼob táan u meyajtik Diosoʼ. Baʼaleʼ ¿bix úuchik u yilik u meyajtik Dios? Tu yilaj yéetel kiʼimak óolal, letiʼeʼ ku yaʼalik: «[A tʼaaneʼ] u kiʼ óolal yéetel [u] kiʼimak óolal in puksiʼikʼal, tumen teneʼ a tiaʼalen, Yuumtsil, [Dios] u yuumil tuláakal páajtal[il]» (Jer. 15:16). Jeʼex úuchik u yaʼalik Jeremíasoʼ, u meyajtaʼal Jéeobaeʼ ku taasik kiʼimak óolal. Baʼaleʼ u kʼasaʼan yóokʼol kaab Satanaseʼ chéen ku taasik muʼyajiloʼob. Taatatsileʼex, a meyajeʼexeʼ a kaʼanskeʼex tiʼ a paalaleʼex u yiloʼob u jelaʼanil le kaʼapʼéel baʼaloʼobaʼ (Jer. 1:19).

 [U tsolajil le oochel teʼ táan juʼun 6]

¿Kʼaʼabéet wa u páaʼtik in hijo u maas nojochtal?

Yaan taatatsiloʼobeʼ ku yaʼalikoʼob maʼ tu páajtal u yokjaʼ u paalaloʼob kex táan u beetkoʼob le baʼax ku páaʼtaʼaltiʼoboʼ. Baʼaleʼ ¿baʼaxten ku yaʼalikoʼob maʼ tu páajtal?

«Saajken u yokjaʼ, tumen wa ku lúubul tiʼ kʼebaneʼ jeʼel u jóoʼsaʼal teʼ múuchʼuliloʼ.» ¿Maʼalob wa ka u tukult máak maʼ ken u kʼub cuenta tiʼ Dios chéen tumen maʼ okjaʼanajaʼaniʼ? Salomoneʼ ku yaʼalik tiʼ cada juntúul táankelem paal: «Kʼaʼajak tiʼ techeʼ tu yoʼolal tuláakal leloʼ [Dioseʼ] bíin u kʼáat tiʼ teech baʼax ta beetaj» (Ecl. 11:9). Pablo xaneʼ ku yaʼalik tiʼ tuláakal máak, kex jeʼel jaypʼéel jaʼab yaantiʼeʼ: «Cada juntúul tiʼ toʼoneʼ yaan u tsolik tiʼ Jajal Dios baʼax u beetmaj» (Rom. 14:12).

Tuláakal máax meyajtik Jéeoba, kex okjaʼanajaʼan wa maʼeʼ, yaan u kʼubik cuenta tiʼ letiʼ. Maʼ u tuʼubultoʼoneʼ letiʼeʼ jeʼel u kanáantkoʼobeʼ yéetel «maʼ bíin [u chaʼa] u túuntaʼal [u yóoloʼob] maas tiʼ le ku páajtal [u] muʼyajtik[oʼoboʼ]» (1 Cor. 10:13). Wa ku yilkoʼob maʼ u náayal u yóoloʼob yéetel ku kanáantkoʼob maʼ u lúubloʼob tiʼ baʼax kʼaaseʼ yaan u yáantaʼaloʼob tumen Dios (1 Ped. 5:6-9). Juntúul kiikeʼ ku yaʼalik: «Le mejen paalaloʼob ku yokjaʼoboʼ jach ku kanáantkoʼob maʼ u beetkoʼob baʼax kʼaas. In hijoeʼ 15 jaʼaboʼob yaantiʼ ka okjaʼanaji, letiʼeʼ ku yaʼalikeʼ leloʼ jach ku kanáantik máak. Yéetel ku yaʼalik: “Maʼ tu táabal máak u beet baʼax kʼaas tu táan Jéeoba”. Le okjaʼoʼ ku yáantik máak u bis junpʼéel toj kuxtal».

¿Tsʼoʼok wa a weʼesik tiʼ a hijo bix unaj u meyajtik Jéeoba yéetel tsʼoʼok wa a kaʼansiktiʼ u beet baʼax ku yaʼalik? Wa beyoʼ ken tsʼoʼokok u yokjaʼeʼ yaan u chúukpajal u yóol u meyajt Dios. Proverbios 20:7 ku yaʼalik: «¡Kiʼ yóoloʼob le paalal ku [kaʼansaʼaloʼob] tumen máax kuxlaj toj yéetel tsikbeʼenil!».

«Maas in kʼáat ka u yil u beetik uláakʼ wa baʼax táanil tiʼ u yokjaʼ.» Maʼ xaaneʼ le taatatsiloʼ ku tuklik unaj u maas kaʼantal u xook u hijo. Kex le paalal kʼaʼabéet u kanik u beetoʼob junpʼéel meyaj jeʼel u yáantkoʼob utiaʼal u kaxtik u kuxtaloʼobeʼ, maʼ maʼalob ka beetaʼak u binoʼob tu paach chéen ayikʼaliloʼob wa chéen ka kaʼanchajak u xookoʼob, ke ka áantaʼakoʼob utiaʼal ka u tsʼáa u yóoloʼob u meyajtoʼob Diosiʼ. Kʼaʼajaktoʼoneʼ Jesuseʼ tu yaʼaleʼ yaan baʼaloʼob jeʼel u beetik maʼ u nojochtal le «iʼinaj», wa u maʼalob péektsilil le Reinooʼ: «Le iʼinaj paʼakʼ ich kʼiʼixoʼoboʼ, letiʼ le máaxoʼob ku yuʼubikoʼob le maʼalob péektsiloʼ, baʼaleʼ ku sen tuklikoʼob u baʼaloʼobil le yóokʼol kaabaʼ yéetel ku tuʼusloʼob tumen le ayikʼaliloʼ. Tuláakal lelaʼ ku kupik yiikʼ le maʼalob péektsiloʼ yéetel maʼatan u chaʼik u yichankil» (Mat. 13:22). Jeʼex túun k-ilkoʼ, u tsʼaʼabal táanil u kaxtaʼal ayikʼaliloʼobeʼ, jeʼel u beetik u xuʼulul u tsʼíiboltik máak u meyajtik Dioseʼ.

Le taatatsiloʼob maʼatech u chaʼik u yokjaʼ u paalaloʼob kex minaʼan baʼax oʼolaleʼ, jeʼel u beetik u bin kʼaasil tiʼobeʼ. Juntúul sukuʼun úuch joʼopʼok u beetik u ancianoileʼ, ku yaʼalik: «Wa maʼ u chaʼabal u yokjaʼobeʼ jeʼel u beetik u xuʼulul u tsʼáaik u yóol u meyajtoʼob Dioseʼ». Yéetel juntúul superintendente viajanteiʼ, ku yaʼalik: «Jeʼel u beetik u yuʼubikoʼob maʼ tu páajtal u beetkoʼob mix baʼaleʼ. Maʼ xaaneʼ jeʼel u joʼopʼol u kaxtikoʼob teʼ yóokʼol kaab baʼax jeʼel u béeytal u beetkoʼoboʼ».

[U tsolajil le oochel teʼ táan juʼun 3] I Sin #

Yanoʼobeʼ desde tu chichniloʼob ku yeʼeskoʼob u disipuloʼob Cristo

[U tsolajil le oochel teʼ táan juʼun 3]

Ku líiʼskubaʼob utiaʼal le muchʼtáambaloʼoboʼ yéetel ku táakpajloʼobiʼ

[U tsolajil le oochel teʼ táan juʼun 4]

Ku yuʼubikoʼob u tʼaan u taataʼob

[U tsolajil le oochel teʼ táan juʼun 4]

Ku jóokʼloʼob kʼaʼaytaj

[U tsolajil le oochel teʼ táan juʼun 4]

Ku payalchiʼob tiʼ Jéeoba

[U tsolajil le oochel teʼ táan juʼun 6]

¿Unaj wa u yáax binoʼob xook universidad?