Kʼáatchiʼob ku beetaʼal

¿Baʼax unaj in beetik wa ku yantalten kʼáatchiʼob yoʼolal le baʼax kin xokik teʼ Biblia wa ken kʼaʼabéetchajakten wa baʼax áantajiloʼ?

Proverbios 2:1 tak 5 ku yaʼaliktoʼon ka k-kaxt bey «ayikʼalil taʼakbesaʼan» le naʼat yéetel le u páajtalil k-kʼaj óoltik le baʼax maʼalob yéetel le baʼax maʼatechoʼ. Ichil lelaʼ táakaʼan u kaxtik máak u núukil le kʼáatchiʼob ku yantaltiʼ ken u xok le Bibliaoʼ, bey xan bix jeʼel u yutskíintik le talamiloʼoboʼ. ¿Bix jeʼel u páajtal a beetkeʼ?

Teʼ táan juʼun 33 tak 38 tiʼ le libro Benefíciese de la Escuela del Ministerio Teocrático, teʼ xook “La investigación eficaz”, ku tsolik bix jeʼel u meyajtoʼon le jóoʼsaʼaniloʼob ku tsʼáaik «le palitsil chúukpajaʼan u yóol yéetel yaan u naʼat[oʼ]» (Mat. 24:45). Le táan juʼun 36 ku tsolik bix jeʼel u meyajtoʼon le Índice de las publicaciones Watch Tower, lelaʼ ku yeʼesik baʼax jóoʼsaʼaniloʼob yéetel uláakʼ tekstoʼob jeʼel u yáantkoʼoneʼ. Jeʼel u béeytal k-ilik le baʼax tʼaanil taak k-maas xakʼaltikoʼ bey xan jeʼel baʼaxak versiculoil utiaʼal k-xokik le baʼax tsolaʼan tu yoʼolaloʼ. Unaj u chúukpajal a wóol a kaxt u núukil le baʼax taak a wojéeltikoʼ. Maʼ u tuʼubultecheʼ táan a kaxtik «ayikʼalil taʼakbesaʼan», le oʼolal maʼ xaaneʼ yaan u bisiktech tiempo yéetel yaan u kʼaʼabéettal u chúukpajal a wóol.

Baʼaleʼ le jóoʼsaʼaniloʼob yaantoʼonoʼ maʼatech u láaj tsolik baʼax u kʼáat u yaʼal le tekstoʼoboʼ mix tech u núukik tuláakal le kʼáatchiʼob ku yantaltoʼonoʼ. Tak le ken u tsol junpʼéel tekstoeʼ, maʼ xaaneʼ maʼ letiʼe jaats kʼaʼabéettoʼon ku tsolikoʼ. Tsʼoʼoleʼ yaan kʼiineʼ yaan baʼax maʼatech k-jach naʼatik, tumen le Bibliaoʼ maʼatech u láaj tsolik le bix úuchik junpʼéel wa baʼaxoʼ. Le oʼolal yaan kʼiineʼ maʼatech k-jáan kaxtik u núukil le kʼáatchiʼob ku yantaltoʼonoʼ. Ken úuchuk beyoʼ, maas maʼalob maʼ k-tuklik baʼax u núukil le baʼaxoʼob maʼatech u tsolik le Bibliaoʼ. Maʼatech u taasik mix junpʼéel utsil u joʼopʼol u tʼaan máak tiʼ baʼaloʼob «ku biskoʼob máak [tiʼ] kunel baʼateltʼaanoʼob» maʼ tiʼ Dios u taaliʼ yéetel baʼaxoʼob maʼatech u maas muʼukʼaʼankúuntik k-fe (1 Tim. 1:4; 2 Tim. 2:23; Tito 3:9). Mix junpʼéel u najil Betel jeʼel u núukik le kʼáatchiʼob maʼ yáax tsolaʼanoʼob teʼ jóoʼsaʼaniloʼoboʼ. Baʼaleʼ unaj u kiʼimaktal k-óol k-ojéeltik le Bibliaoʼ ku tsʼáaiktoʼon le áantaj kʼaʼabéet utiaʼal k-nuʼuktik k-kuxtaloʼ. U jaajileʼ le baʼaxoʼob maʼatech u jach tsolik le Bibliaoʼ ku yáantkoʼon utiaʼal k-maas tsʼáaik k-fe tiʼ le Máax beet u tsʼíibtaʼaloʼ (ilaʼak le táan juʼun 185 yéetel 186 tiʼ le libro Acerquémonos a Jehová).

¿Baʼax unaj a beetik wa tsʼoʼok a wilik a kaxtik u núukil le kʼáatchiʼob ku yantaltech, baʼaleʼ láayliʼ maʼ a jach naʼateʼ? Jeʼel u páajtal a kʼáatik áantaj tiʼ juntúul anciano wa juntúul sukuʼun úuch joʼopʼok u meyajtik Jéeoba ta múuchʼulileʼ. Le sukuʼunoʼobaʼ yaʼab baʼax u yojloʼob tiʼ le Bibliaoʼ bey xan yaʼab baʼax tsʼoʼok u yilkoʼob ichil u kuxtaloʼob. Le baʼax ku yaʼalikoʼoboʼ jach jeʼel u yáantkecheʼ, maases wa le talamil yaan yil yéetel baʼaxoʼob unaj a chʼaʼtuklik ta juunal, tumen maʼ xaaneʼ letiʼobeʼ u yojloʼob baʼax ka muʼyajtik. Tsʼoʼoleʼ maʼ u tuʼubultech a waʼalik ich payalchiʼ le baʼaxoʼob chiʼichnakkúuntikechoʼ. Kʼáat u nuʼuktaj le kiliʼich muukʼoʼ, tumen Jéeobaeʼ ku «tsʼáaik le ojéelajoʼ [...] yéetel le kʼaj óolaloʼ» (Pro. 2:6; Luc. 11:13).