«Pʼil ichneneʼex» ¿Baʼaxten jach unaj k-beetik?

JUNTÉENJEAKEʼ le disipuloʼoboʼ tu kʼáatoʼob tiʼ Jesús: «¿Baʼax chíikulal [kun] eʼesik a taalbal yéetel ken xuʼuluk yóokʼol kaab?» (Mat. 24:3). Jeʼex u yeʼesik Mateo capítulo 24, Marcos capítulo 13 yéetel Lucas capítulo 21, letiʼeʼ tu jach aʼalajtiʼob baʼax chíikulal kun eʼesik. Tsʼoʼoleʼ ka tu yaʼalajtiʼob: «Pʼil ichneneʼex» (Mat. 24:42).

Baʼaleʼ wa jach chíikaʼan kun ilbileʼ, ¿baʼaxten tu yaʼalajtiʼob ka pʼil ichnakoʼob? Maʼ xaaneʼ kaʼapʼéel baʼax oʼolal. Yáaxeʼ, tumen u yojleʼ le baʼaxoʼob yaan teʼ yóokʼol kaabaʼ jeʼel u beetik maʼ u yilik máak le baʼaxoʼob aʼalaʼan u yúuchloʼ, leloʼ jeʼel u beetik u náachtaloʼob tiʼ Dioseʼ yéetel jeʼel u beetik u xuʼulul u pʼil ichoʼobeʼ. U kaʼapʼéeleʼ, wa maʼ tu yilkoʼob u béeytal le chíikulal aʼalaʼan teʼ tuʼux kajaʼanoʼoboʼ maʼ xaaneʼ maʼ ken u yiloʼob u kʼaʼanaʼanil u pʼil ichoʼob. Maʼ xaaneʼ jeʼel u tuklikoʼob yaʼab u bin u yilaʼal le «táaj yaʼab muʼyaj[il]», u tsʼoʼokbal le profecía tu yaʼalaj Jesusoʼ, le oʼolal jeʼel u tuklikoʼob maʼ jach unaj u pʼil ichoʼobiʼ (Mat. 24:21).

«Maʼ tu beetoʼob u cuentail[iʼ]»

Le ka tʼaanaj Jesús yéetel u disipuloʼobeʼ tu chʼaʼchiʼitaj le máaxoʼob kuxlajoʼob le jach taʼaytak u taal le Búulkabaloʼ, baʼaleʼ u maas yaʼabileʼ «maʼ tu beetoʼob u cuentail, [NM]» le baʼaxoʼob aʼalaʼaboʼ. Tsʼoʼoleʼ tu yiloʼob u beetaʼal le nojoch arcaoʼ, u kʼaʼaytaj Noé yéetel u sen beetaʼal loob teʼ kʼiinoʼob jeʼeloʼ (Mat. 24:37-39). Teʼ kʼiinoʼob xanaʼ yaʼab máakeʼ bey xan u beetik ken aʼalaʼak wa baʼax tiʼoʼ. Jeʼex le máakoʼob ku manejaroʼoboʼ u yojloʼob baʼax u kʼáat u yaʼal le letreroʼob ku yeʼesik bukaʼaj chichil unaj u binoʼoboʼ. Baʼaleʼ yaʼab tiʼ letiʼobeʼ maʼatech u beetkoʼob u cuentail. Le oʼolal le autoridadoʼoboʼ ku tsʼáaikoʼob topeʼob utiaʼal u chaanbelkúunsik máak u chichil u bin. Jujuntúul máaxoʼob meyajtik Dioseʼ táan u yilkoʼob u béeytal le baʼaxoʼob aʼalaʼan kun úuchul teʼ tu tsʼook kʼiinoʼobaʼ, kex beyoʼ ku chʼíikiloʼob tiʼ uláakʼ baʼaloʼob, le oʼolal ku xuʼulul u tsʼáaik u yóol u meyajtoʼob Jéeoba. Lelaʼ bey úuchik tiʼ Arielle, juntúul x-chʼúupal kajaʼan África occidental.

Letiʼeʼ jach uts tu yich le balonmano ku báaxtik le koʼoleloʼoboʼ, cada ken máansaʼak tiʼ televisioneʼ ku chaʼantik. Junpʼéel kʼiineʼ tu yojéeltaj yaan u beetaʼal junpʼéel equipo tu escuela. Letiʼeʼ jach taakchaj u yokol báaxaliʼ ka tu yaʼalaj jeʼel u beetik u porteraileʼ, baʼaleʼ maʼ tu tuklaj wa jeʼel u beetaʼal u xuʼulul u tsʼáaik u yóol u meyajt Dioseʼ. ¿Baʼax túun úuchtiʼ? Letiʼeʼ ku yaʼalik: «U novio jujuntúul tiʼ in wéet báaxaloʼobeʼ ku tsʼuʼutsʼ chamaloʼob yéetel ku drogarkubaʼob. Kex tu sen pʼaʼastenoʼob tumen maʼatech in beetik jeʼex letiʼobeʼ, tin tukleʼ maʼ ken u beetten kʼaas. Kex maʼ tin tsʼáaik cuenta kaʼacheʼ letiʼe báaxal maas beetikten kʼaasoʼ. Tumen tak ken xiʼiken teʼ muchʼtáambaloʼob teʼ Najil Reinooʼ, maʼatech u xuʼulul in tuukul tiʼ le báaxaloʼ. Jach kʼexpaj in kuxtal. Pʼáat maʼ chéen taak in báaxaliʼ, baʼaxeʼ taak in ganar, le oʼolal tin jóoʼsaj yaʼab tiempo utiaʼal in maas kaanbal utiaʼal maʼ in ganartaʼal. Baʼaleʼ tu beetaj in jach estresar. Tsʼoʼoleʼ tin peʼertaj jujuntúul in amigoʼob.

»Juntéenjeak ka tsʼaʼab u páajtalil u chʼiin le uláakʼ equipooʼ, tin tsʼáaj cuenta tsʼoʼok u kʼastal in  tuukul. Baʼax yáax taal tin tuukuleʼ in kʼáatik tiʼ Dios ka u yáanten utiaʼal in kʼamik le bolaoʼ. Teʼ súutuk jeʼeloʼ tin wilaj jach táan in náachtal tiʼ Dios. Baʼaleʼ yaan baʼax áanten in kaʼa natsʼinba tiʼ Jéeoba.

»Kʼaʼajten le baʼax in chaʼantmaj teʼ DVD Los jóvenes preguntan... ¿Qué haré con mi vida? * Tin kaʼa chaʼantaj yéetel jach tuukulnajen tiʼ le baʼax ku yaʼalikoʼ. Tin wileʼ le baʼax ku yúuchultenoʼ bey jeʼex le baʼax úuch tiʼ Andyoʼ. Tuukulnajen tiʼ le baʼax ku yaʼalik Filiposiloʼob 3:8, jeʼex aʼalaʼabiktiʼ tumen le ancianooʼ. Le tekstoaʼ jach tu beetaj in tuukul, ka tin chʼaʼtuklaj u xuʼulul in báaxal ichil le equipooʼ.

»Leloʼ tu péeksen in beet kʼexoʼob ichil in kuxtal. Xuʼul in tuukul chéen tiʼ in ganar ka xuʼul in jach estresar. Tin wuʼuyaj maas kiʼimak in wóol yéetel maas naatsʼ yanilen tiʼ le sukuʼunoʼoboʼ. Joʼopʼ in wilik jatsʼuts in meyajtik Jéeoba. Tumen maas kin chʼenxikintik le baʼax ku yaʼalaʼal teʼ muchʼtáambaloʼoboʼ, maas jatsʼuts in wilik in biniʼ. Tin maas tsʼáaj xan in wóol teʼ kʼaʼaytajoʼ. Bejlaʼeʼ tsʼoʼok u joʼopʼol in beetik in precursora auxiliaril».

Jeʼex Arielleʼ, wa yaan baʼax beetik maʼ k-tsʼáaik cuenta wa táan u yilaʼal le chíikulal tu yaʼalaj Jesusoʼ, yaan baʼaxoʼob unaj k-beetik. ¿Baʼaxoʼob? Maʼalob ka meyajnaktoʼon le Índice de las publicaciones Watch Tower, lelaʼ bey junpʼéel mapa jeʼel u yáantkoʼon k-kaxt yaʼab ayikʼaliloʼobeʼ. Teʼeloʼ yaan k-ilik maʼalob tsolnuʼukoʼob yéetel le baʼaxoʼob tu beetaj jujuntúul sukuʼunoʼob tsʼoʼok u aktáantkoʼob le talamiloʼob jeʼex le yaantoʼonoʼ. Unaj xan k-bin tiʼ tuláakal le muchʼtáambaloʼoboʼ, k-líiʼsikba yéetel le baʼaxoʼob kun ilbiloʼ yéetel k-tsʼíibtik le baʼaxoʼob k-kanikoʼ. Yanoʼobeʼ maas ku chʼenxikintikoʼob le muchʼtáambaloʼob ken kulakoʼob teʼ sillaʼob yaan táaniloʼ. Uláakʼ baʼax maʼalob ka u beet máakeʼ letiʼe ka u tichʼ u kʼab desde tu káajbal le xook utiaʼal u núukik le kʼáatchiʼob kun beetbiloʼ. Tsʼoʼoleʼ wa k-xokik yéetel k-uʼuyik le noticiaʼob, yéetel wa k-tuukul tiʼ bix u yeʼesik tiaʼanoʼob «tiʼ u tsʼook jaʼaboʼobeʼ», jeʼel u yáantkoʼon k-pʼil ich mantatsʼeʼ (2 Tim. 3:1-5; 2 Ped. 3:3, 4; Apo. 6:1-8).

«Maʼ u náayal a wóoleʼex»

Le baʼaxoʼob ku yilaʼal tiʼ «tuláakal yóokʼol kaab» bejlaʼaʼ ku yeʼesik kuxaʼanoʼon tu tsʼook kʼiinoʼob (Mat. 24:7, 14). Baʼaleʼ kex u millonesil máakoʼob ku muʼyajtikoʼob kʼojaʼaniloʼob, wiʼijiloʼob, u tíitkuba luʼum yéetel uláakʼ talamiloʼob u yaʼalmaj le Bibliaoʼ, yaan xan máakoʼob kajaʼanoʼob tuʼux maʼatech u jach ilaʼal yéetel maʼatech u jach muʼyajtikoʼob le baʼaxoʼob aʼalaʼanoʼ. ¿Bey wa le tuʼux kajaʼanoʼonoʼ? Wa beyoʼ maʼ unaj k-tuklik wa yaʼab u bin utiaʼal le táaj yaʼab muʼyajiloʼ.

Tuukulnakoʼon tiʼ le «wiʼijiloʼob yéetel kʼojaʼaniloʼob» tu yaʼalaj Jesusoʼ (Luc. 21:11). Letiʼeʼ maʼ tu yaʼalaj wa junpuul ken úuchuk tiʼ tuláakal yóokʼol kaabiʼ mix wa junpʼéeliliʼ baʼax kun muʼyajtbiliʼ, baʼaxeʼ tu yaʼaleʼ yaan u yilaʼal «tiʼ jejeláas kúuchiloʼob». Le oʼolal maʼ unaj k-tuklik wa le baʼaxoʼob aʼalaʼan kun úuchloʼ junpuul ken úuchuk tiʼ tuláakal le Luʼumaʼ. Tsʼoʼoleʼ Jesuseʼ tu yaʼaleʼ, teʼ kʼiinoʼob ken yanak wiʼijiloʼ jujuntúul tiʼ u disipuloʼobeʼ maʼ xaaneʼ jeʼel u chʼíikiloʼob chéen tiʼ sen jaanleʼ, letiʼeʼ tu yaʼalajtiʼob: «Ilawileʼex [...] maʼ u chuʼupul a puksiʼikʼaleʼex yéetel patan janal» (Luc. 21:34, Le Tumben Nuptʼan, LTN). Le oʼolal maʼ unaj k-páaʼtik ka k-muʼyajt tuláakal le baʼaxoʼob aʼalaʼan kun úuchloʼ. Kʼaʼajaktoʼoneʼ Jesuseʼ tu yaʼalaj: «Ken a wileʼex táan u yúuchul  le baʼaloʼobaʼ, ojéelteʼex u [reino] Jajal Dioseʼ naatsʼ yanil» (Luc. 21:31). Kex teʼ tuʼux kajaʼanoʼon maʼ táan u muʼyajtaʼal tuláakal le baʼaxoʼob aʼalaʼanoʼ, yoʼolal le baʼaxoʼob k-uʼuyik wa k-chaʼantikoʼ jeʼel u páajtal k-ilik bix táan u béeytaloʼobeʼ.

Jéeobaeʼ tsʼoʼok u chʼaʼtuklik jach baʼax kʼiin ken káajak le táaj yaʼab muʼyajiloʼ. Leʼ oʼolaleʼ mix baʼal kun kʼexik le «kʼiin» mix le «hora» ken káajakoʼ (Mat. 24:36).

Jesuseʼ tu yaʼalaj tiʼ u disipuloʼob: «Maʼ u náayal a wóoleʼex» (Mat. 24:44, LTN). Jach mantatsʼ unaj k-ilik maʼ u náayal k-óol. Lelaʼ maʼ u kʼáat u yaʼal wa bul kʼiin yéetel bul áakʼab ken k-beet le meyajoʼob ku beetaʼal utiaʼal u adorartaʼal Diosoʼ. Tumen maʼ k-ojel jach baʼax hora ken káajak le táaj yaʼab muʼyajiloʼ, maʼ xaaneʼ ken taalakeʼ yaʼab tiʼ toʼoneʼ táan u meyaj kʼáax, tu yotoch wa tuláakʼ tuʼux (Mat. 24:40, 41). Le oʼolaleʼ, ¿baʼax túun unaj k-beetik utiaʼal maʼ u náayal k-óol kex jeʼel baʼaxak ka úuchkeʼ?

Tuukulnakoʼon tiʼ baʼax ku beetik Emmanuel yéetel Victorine, u yatan. Letiʼob yéetel seis u túulal u hijaʼobeʼ kajaʼanoʼob tiʼ junpʼéel kaaj tiʼ u luʼumil África, tuʼux maʼatech u jach ilaʼal nukuch talamiloʼob, le oʼolal maʼatech u muʼyajtikoʼob tuláakal le baʼaxoʼob aʼalaʼan kun úuchul teʼ tu tsʼook kʼiinoʼobaʼ. ¿Baʼax ku beetkoʼob utiaʼal maʼ u náayal u yóoloʼob? Letiʼobeʼ sáamsamal ku xakʼalxoktikoʼob le baʼaxoʼob ku kaʼansik le Bibliaoʼ. Emmanueleʼ ku yaʼalik bix u beetkoʼob: «Ka káajeʼ talam úuchik k-kaxtik u yorail k-muchʼikba, baʼaleʼ ka tsʼoʼokeʼ t-chʼaʼtuklaj yaan k-beetik desde las seis tak seis y media jaʼatskab. Yáaxeʼ k-xokik u tekstoil le kʼiinoʼ, tsʼoʼoleʼ k-líiʼsikba yéetel jujunpʼéel xóotʼoloʼob tiʼ le jóoʼsaʼaniloʼob kun ilbil teʼ muchʼtáambaloʼob teʼ semanaoʼ». Le baʼax ku beetkoʼoboʼ ku yáantaj utiaʼal u pʼil ichoʼob mantatsʼ, Emmanueleʼ u coordinadoril le múuchʼ ancianoʼob tiʼ u múuchʼuliloʼ, Victorineeʼ yaan kʼiineʼ ku beetik u precursora auxiliaril yéetel tsʼoʼok u yáantik yaʼab máakoʼob u kanoʼob u jaajil, u hijaʼob xaneʼ táan u maas tsʼáaik u yóol u meyajtoʼob Dios.

Jesuseʼ ku yaʼaliktoʼon: «Pʼil ichneneʼex, paakatneneʼex» (Mar. 13:33). Bey túunoʼ unaj k-kanáantik maʼ u náayal k-óol. Jeʼex tu beetil Arielleʼ, unaj k-tsʼáaik ichil k-kuxtal le tsolnuʼukoʼob ku tsʼaʼabal teʼ jóoʼsaʼaniloʼob yéetel teʼ muchʼtáambaloʼoboʼ. Yéetel jeʼex u beetik Emmanuel yéetel u familiaeʼ, sáamsamal unaj k-beetik baʼaloʼob yaan yil yéetel u meyajtaʼal Dios, utiaʼal k-pʼil ich mantatsʼ yéetel utiaʼal maʼ u náayal k-óol.

[Tsolajil]

[Foto yaan te táan juʼun 4]

Emmanuel yéetel u familiaeʼ sáamsamal ku xakʼalxoktikoʼob le baʼaxoʼob ku kaʼansik le Biblia utiaʼal maʼ u náayal u yóoloʼoboʼ