Kʼáatchiʼob ku beetaʼal

¿Baʼaxten le Bibliaoʼ ku yaʼalik: «Ku sen yaatal tu yóol Yuumtsil u yilik u kíimil le máaxoʼob yaabiltmiloʼ»?

▪ Utiaʼal Jéeobaeʼ jach koʼoj u tojol u kuxtal tuláakal yéetel cada juntúul tiʼ le máaxoʼob meyajtik yéetel chúukaʼan óolaloʼ. Baʼaleʼ le Salmo 116:15 maʼ táan u tʼaan chéen tiʼ juntúul máax ku kíimiliʼ.

Le oʼolal teʼ tsoltʼaan ku máansaʼal ken kíimik wa máaxoʼ, maʼ unaj u meyaj le teksto utiaʼal u chʼaʼchiʼitaʼal le máax kíimoʼ, kex wa chúukaʼan u yóol u meyajt Jéeoba tak ka kíimi. ¿Baʼaxten? Tumen yaʼab baʼax u kʼáat u yaʼale. Le salmistaoʼ tu yóotaj u yaʼaleʼ utiaʼal Jéeobaeʼ jach nojoch baʼal wa ka kíimik tuláakal le máaxoʼob meyajtik yéetel chúukaʼan óolaloʼ, le oʼolal maʼ ken u chaʼa u yúuchul (ilaʼak Salmo 72:14 yéetel 116:8).

Bey túunoʼ le salmoaʼ ku yeʼesikeʼ Dioseʼ maʼ ken u chaʼa u xuʼulsaʼal tiʼ tuláakal le máaxoʼob meyajtik yéetel chúukaʼan óolaloʼ. Lelaʼ bey u yeʼesik le baʼaxoʼob tsʼoʼok u muʼyajtik le máaxoʼob meyajtik Dios teʼ tu tsʼook kʼiinoʼobaʼ. Le chʼaʼpachtajil tsʼoʼok k-muʼyajtikoʼ ku yeʼesikeʼ táan k-kanáantaʼal tumen Dios utiaʼal maʼ u xuʼulsaʼaltoʼon.

Jéeobaeʼ yaan tuláakal páajtalil tiʼ, yéetel le baʼax u tukultmaj u beetkoʼ jach yaan u béeytal. Le oʼolaleʼ mix bikʼin ken u chaʼa u xuʼulsaʼal tiʼ u kaajal. Tumen wa ka u chaʼeʼ jeʼel u tuklaʼal bey maas yaan u páajtalil le máaxoʼob pʼekmiloʼ, baʼaleʼ leloʼ jach junpuliʼ maʼ beyiʼ. Tsʼoʼoleʼ wa ka úuchuk beyoʼ, maʼ kun chuʼupul le Luʼum yéetel máaxoʼob meyajtik Dios yéetel chúukaʼan óolal, jeʼex u tukultmiloʼ (Isa. 45:18; 55:10, 11). Yéetel wa ka láaj kíimik tuláakal le máaxoʼob meyajtik way Luʼumaʼ, mix máak kun pʼáatal adorartik tu táankabiloʼob le templo espiritualoʼ. Tsʼoʼoleʼ mix máak kun pʼáatal utiaʼal u yantal le «túumben luʼum[oʼ]», wa le máaxoʼob beetik baʼax maʼalob utiaʼal u kuxtaloʼob yáanal u páajtalil le «túumben kaʼan[oʼoboʼ]» (Apo. 21:1). Yéetel wa mix máak ku pʼáatal way Luʼumeʼ, maʼ kun béeytal u reinar Cristo ichil le Mil Jaʼaboʼoboʼ (Apo. 20:4, 5). Jach junpuliʼ maʼ kun úuchul mix junpʼéel tiʼ le baʼaloʼobaʼ.

Tsʼoʼoleʼ wa ka u chaʼa Jéeoba tiʼ le máaxoʼob pʼekmil ka u xuʼulsoʼob tiʼ u kaajal yaan way Luʼumeʼ, yaan u yilaʼal bey minaʼan u páajtalileʼ yéetel yaan u yilaʼal bey maʼatech u béeykuntik baʼax ku yaʼalikeʼ. Tsʼoʼoleʼ maas yaan u tuklaʼal minaʼan u derechoil u gobernartik tuláakal baʼal. Yoʼolal u kiliʼich kʼaabaʼeʼ, letiʼeʼ maʼ ken u chaʼa u yúuchul beyoʼ. Tsʼoʼoleʼ maʼ unaj u tuʼubultoʼoneʼ tiʼ Dioseʼ «minaʼan baʼax maʼ tubeeliʼ», le oʼolal jeʼel u páajtal k-creertikeʼ yaan u kanáantik tuláakal le máaxoʼob meyajtik yéetel chúukaʼan óolaloʼ (Deu. 32:4; Gén. 18:25). Leloʼ jach bey u yaʼalik le Bibliaoʼ: «Yuumtsileʼ bíin u tsʼáa tsikbeʼenil tiʼ u kʼaabaʼ utiaʼal maʼ u pʼatkeʼex» (1 Sam. 12:22). Bey túunoʼ, «le Yuumtsiloʼ maʼ [ken] u xúumpʼat u kaajal, mix xan tu pʼatik chéen tu juunaloʼob le u tiaʼaloʼoboʼ» (Sal. 94:14).

¿Máasaʼ jach ku kiʼimaktal k-óol k-ojéeltik maʼ kun xuʼulul u yantal u kaajal Dios way Luʼumeʼ? Le oʼolaleʼ unaj u seguer u chúukpajal k-óol k-meyajte, yéetel unaj k-jach creertik le baʼax ku yaʼalikaʼ: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ. Bíin a mak u chiʼ tuláakal máax ku táabal u tak a pool. Jeʼel baʼax bíin in [tsʼáa] tiʼ tuláakal [le] máaxoʼob meyajtikenaʼ» (Isa. 54:17).

[Uláakʼ baʼax ku tsoʼolol teʼ táan juʼun 22]

Dioseʼ mix bikʼin ken u chaʼa u xuʼulsaʼal tiʼ u kaajal