Tiʼ junpʼéel salmoeʼ, rey Davideʼ tu kʼayaj: «[In Dios] uts tin tʼaan in beetik le baʼax a kʼáateʼ; ¡kin bisik tin puksiʼikʼal a kaʼanbesaj!» (Sal. 40:8). Kex yaʼab talamiloʼob tu aktáantaj Davideʼ, jach kiʼimakchaj u yóol u beetik baʼax uts tu tʼaan Dios. Baʼaleʼ maʼ chéen David kiʼimakchaj u yóol u meyajt Diosiʼ yaan xan uláakʼ máaxoʼob kiʼimakchaj u yóoloʼob ikil u meyajtikoʼob Dios.

Apóstol Pabloeʼ tu yaʼaleʼ le Mesías, wa Cristooʼ, bey u tuukul kaʼach jeʼex u yaʼalik le Salmo 40:8. Pabloeʼ tu yaʼalaj: «Ka taal Cristo way Luʼumeʼ, tu yaʼalaj tiʼ Dios: ‹Maʼ ta wóotaj a kʼam kíimsbil baʼalcheʼobiʼ mix uláakʼ siibaloʼob, baʼaleʼ ta preparartajten junpʼéel wíinklil. Maʼ utschaj ta tʼaan baʼalcheʼob tóokaʼanoʼob tu túulisiloʼobiʼ, mix siibaloʼob tu yoʼolal le kʼebanoʼ›. Ka túun tin waʼalaj: ‹¡Ile! Teneʼ taalen (tu rolloil le librooʼ yaan baʼax tsʼíibtaʼan tin woʼolal) utiaʼal ka in beet baʼax a kʼáat, in Dios›» (Heb. 10:5-7).

Le tiaʼan kaʼach Jesús way Luʼumeʼ ku kiʼimaktal u yóol ken u yil le baʼaxoʼob u beetmaj Diosoʼ bey xan ken yanak yéetel u amigoʼob yéetel ken múul janak yéetel máaxoʼob u yaabiltmaj (Mat. 6:26-29; Juan 2:1, 2; 12:1, 2). Baʼaleʼ maas kiʼimakchaj u yóol u beetik kaʼach baʼax uts tu tʼaan u Taata yaan teʼ kaʼanoʼ. Juntéenjeakileʼ tu yaʼalaj: «In woʼocheʼ in beetik baʼax u kʼáat le máax túuxtenoʼ yéetel in tsʼoʼoksik le meyaj u tsʼaamajtenoʼ» (Juan 4:34; 6:38). U disipuloʼobeʼ tu yiloʼob baʼax unaj u beetik máak utiaʼal u kiʼimaktal u yóol. Le oʼolal yéetel kiʼimak óolal tu tsʼáaj u yóol u kʼaʼaytoʼob le Reinooʼ (Luc. 10:1, 8, 9, 17).

Jesuseʼ tu yaʼalaj tiʼ u disipuloʼob: «Xeeneʼex [...] ka a beeteʼex [...] disipuloʼob, táan a tsʼáaikeʼex u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ, yéetel táan a kaʼanskeʼexoʼob u  tsʼoʼokbesoʼob tuláakal le baʼaxoʼob tsʼoʼok in waʼalikteʼex ka a beeteʼexoʼ. Yéetel, ¡ileʼex!, tiʼ yanen ta wéeteleʼex tak teʼ kʼiinoʼob táan u kʼuchul u xuul yóokʼol kaaboʼ» (Mat. 28:19, 20). Utiaʼal k-beetik le baʼax tu yaʼaloʼ unaj k-kʼaʼaytaj tiʼ le máakoʼob jeʼel tuʼuxakoʼ, unaj k-suut xíimbaltoʼob yéetel unaj k-tsʼáaik xook tiʼob. Leloʼ jach jeʼel u taasiktoʼon kiʼimak óolaleʼ.

Kex wa maʼ tu kʼamik le máakoʼob le baʼax k-kʼaʼaytikoʼ maʼ unaj u lúubul k-óoliʼ. ¿Baʼaxten maʼ tu xuʼulul k-kʼaʼaytik le maʼalob péektsil kex yaʼab máaxoʼob maʼ tu kʼamkoʼoboʼ? Tumen k-ojleʼ ken k-kʼaʼayt le Reino yéetel ken k-beet disipuloʼobeʼ k-eʼesik k-yaabiltmaj Dios bey xan k-éet máakil. Maʼ u tuʼubultoʼoneʼ wa maʼ k-beetkeʼ yaʼab máak jeʼel u peʼertik u kuxtaleʼ, tak toʼon (Eze. 3:17-21; 1 Tim. 4:16). Le oʼolaleʼ koʼoneʼex ilik baʼax tsʼoʼok u beetik yaʼab sukuʼunoʼob utiaʼal maʼ u lúubul u yóoloʼob.

U suukileʼ ku taasik utsil wa u tukultmaj máak baʼax kʼáatchiʼil ken u beete. Junpʼéel kʼiineʼ Amaliaeʼ tu yilaj juntúul máak táan u xokik periódico tiʼ junpʼéel parque. Náatsʼ tu yiknaleʼ ka tu kʼáatajtiʼ wa yaan junpʼéel maʼalob noticia tsʼoʼok u xokik. Le máakoʼ tu yaʼaleʼ minaʼan, letiʼ túuneʼ tu yaʼalaj: «Teneʼ táan in taasik maʼalob noticiaʼob ku tʼaan tiʼ u Reino Dios». Le máakoʼ jatsʼuts tu yuʼubil le oʼolal ka tsʼoʼokeʼ tu kʼamaj junpʼéel xook. Amaliaeʼ tu káajsaj óoxpʼéel xookoʼob teʼ parqueoʼ.

Juntúul kiik ku kʼaabaʼtik Janiceeʼ tu yilaj u kʼaʼaytaj tuʼux ku meyaj. Juntéenjeakil ka tu yilaj jatsʼuts úuchik u yilaʼal junpʼéel u xookil U Pʼíich Tulumil Kanan tumen juntúul guardia bey xan tumen juntúul koʼolel u yéet meyajeʼ, Janiceeʼ tu yaʼaleʼ jeʼel u bisiktiʼob le túumben revistaʼob ku jóokʼoloʼ. Bey xan tu yaʼalil tiʼ uláakʼ juntúul u yéet meyaj uts tu tʼaan u xokik le jejeláas baʼaloʼob ku taasik U Pʼíich Tulumil Kanan yéetel ¡Despertad! Tsʼoʼoleʼ uláakʼ juntúul koʼolel u yéet meyajeʼ tu kʼáataj xan revistaʼob. Janiceeʼ ku yaʼalik: «¡Jach tsʼoʼok u kiʼikiʼtʼantiken Jéeoba!». Joʼopʼ u bisik revistaʼob tiʼ 11 u yéet meyajoʼob.

Juntúul superintendente viajanteeʼ tu yaʼalaj tiʼ le sukuʼunoʼoboʼ ken tsʼoʼokok u tsikbaloʼob yéetel u yuumil najeʼ, maʼ chéen unaj u yaʼalikoʼob yaan u suutoʼob tuláakʼ kʼiiniʼ. Baʼaxeʼ maas maʼalob ka u yaʼaloʼob: «¿Jeʼel wa u páajtal in weʼesiktech bix k-tsʼáaik junpʼéel xookeʼ?», «¿baʼax kʼiin wa baʼax hora jeʼel u páajtal in suut utiaʼal u seguer k-tsikbaleʼ?». Le superintendenteoʼ tu yaʼaleʼ tiʼ junpʼéel múuchʼulil beetaʼab le baʼax tu yaʼaloʼ chéen ichil junpʼéel semanaeʼ káajsaʼab 44 xookoʼob.

Jach ku yáantaj wa maʼ u máan yaʼab kʼiinoʼob ka suunak máak u xíimbalt le máakoʼoboʼ. ¿Baʼaxten? Tumen le máakoʼob uts u puksiʼikʼaloʼoboʼ yaan u yilkoʼob jach tu jaajil taak k-áantkoʼob u naʼatoʼob baʼax ku yaʼalik le Bibliaoʼ. Ka kʼáataʼab  tiʼ juntúul koʼolel baʼaxten káaj u xokik le Biblia yéetel u j-jaajkunajoʼob Jéeobaoʼ, tu yaʼalaj: «Káaj in xook tumen tin wilaj taak u yáantkenoʼob yéetel u yaabiltmenoʼob».

Juntúul precursora ku kʼaabaʼtik Madaíeʼ bin teʼ Escuela utiaʼal Precursoroʼoboʼ. Le maʼ úuch suunakoʼ tu káajsaj 20 xookoʼob, baʼaleʼ tu máansaj 5 tiʼ uláakʼ j-kʼaʼaytajoʼobiʼ. Jujuntúul tiʼ u j-xoknáaloʼobeʼ káaj u binoʼob muchʼtáambal. ¿Baʼax áant Madaí u káajs le bukaʼaj xookoʼoboʼ? Úuchik u bin teʼ escuelaoʼ tu yilaj kʼaʼabéet u suut u xíimbalt le máakoʼob taak u kaanbaloʼoboʼ; bey unaj u beetik tak ken páajchajak u kaʼa tsikbal tu yéeteloʼob. Uláakʼ kiik tsʼoʼok u yáantik yaʼab máakoʼob u kʼaj óoltoʼob u jaajileʼ, tu yaʼalaj: «Tsʼoʼok in kanikeʼ utiaʼal u páajtal in wáantik le máakoʼob taak u kʼaj óoltikoʼob Jéeobaoʼ maʼ unaj u xuʼulul in xíimbaltikoʼobiʼ».

Kʼaʼabéet u chúukpajal u yóol máak u xíimbalt le máakoʼob taak u kaanbaloʼoboʼ utiaʼal u tsʼaʼabal xook tiʼob. Kex maʼ chéen chʼaʼabileʼ yaʼab utsiloʼob ku taasik. Wa k-tsʼáaik k-óol k-kʼaʼayt le Reinooʼ, yaan k-áantik k-éet máakiloʼob u «chúukaʼan kʼaj óoltoʼob le jaajoʼ», beyoʼ jeʼel u salvarkubaʼobeʼ (1 Tim. 2:3, 4). U jaajileʼ ku kiʼimaktal u yóol máak ken u kʼaʼayt le maʼalob péektsil yéetel ken u beet disipuloʼoboʼ.