TU KʼIINIL 6 tiʼ septiembre tiʼ 1926, juntúul superintendente viajante (peregrino) japonés kajaʼan kaʼach Estados Unidoseʼ, suunaj Japón bey misioneroeʼ. Teʼeloʼ tiʼ ku páaʼtaʼal kaʼach tumen juntúul máak u kʼáatmaj ka túuxtaʼak tiʼ mantatsʼ le revista La Torre del Vigíaoʼ. Chéen tiʼ le máak ku túuxtaʼal kaʼach le revistaaʼ, tsʼoʼoleʼ ku muchʼkuba kaʼach yéetel u jaats máakoʼob utiaʼal u xokikoʼob le Biblia tu kaajil Kobeoʼ. Le j-Xoknáaloʼob tiʼ le Bibliaoʼ tu beetoʼob le yáax asamblea tu kʼiinil 2 tiʼ enero tiʼ 1927 tu kaajil Kobeoʼ. Teʼ asambleaaʼ bin 36 máakoʼobiʼ yéetel ocho u túulal okjaʼanajiʼ. Jach maʼalob úuchik u bintiʼob, baʼaleʼ le u chan múuchʼ sukuʼunoʼobaʼ ¿bix jeʼel u beetkoʼob u juul u sáasilil u Tʼaan Dios tiʼ le 60 millones máakoʼob kajaʼanoʼob Japonoʼ?

Tu mesil mayo tiʼ 1927, le j-Xoknáaloʼob tiʼ le Bibliaoʼ yaʼab baʼax tu beetoʼob utiaʼal u sen kʼaʼaytikoʼob yaan u yantal u jaats asambleaʼob. Le yáax asambleaoʼ tiʼ kun antal kaʼach tu kaajil Osakaeʼ. Le sukuʼunoʼoboʼ tu kʼaʼaytoʼob tiʼ tuláakal le kaaj yéetel letreroʼoboʼ. Tsʼoʼoleʼ tu túuxtoʼob xan 3,000 invitacionoʼob tiʼ máaxoʼob jach kʼaj óolaʼanoʼob teʼ kaajoʼ yéetel tu tʼoxoʼob uláakʼ 150,000. Tu anunciartoʼob xan teʼ periodicoʼob maas kʼaj óolaʼanoʼoboʼ, le anuncioaʼ tsʼaʼab xan tiʼ 400,000 u boletoiloʼob tren. Jach tu kʼiinil le discursooʼ kaʼapʼéel avionoʼob máan yóokʼol le kaaj utiaʼal u pulkoʼob uláakʼ 100,000 invitacionoʼoboʼ. ¿Bix biniktiʼob? Sen choʼbanaj le Sala Asahioʼ. Óoliʼ 2,300 máakoʼob tu yuʼuboʼob le discurso, «Tsʼoʼok u náatsʼal u Reino Dios». Uláakʼ 1,000 máakoʼobeʼ pʼáatoʼob táankab tumen maʼ anchaj tuʼux u yantaloʼobiʼ. Le ka tsʼoʼok le discursooʼ óoliʼ 600 máakoʼob pʼáatoʼob utiaʼal u beetkoʼob kʼáatchiʼob. Teʼ mesoʼob seguernajoʼ máansaʼab uláakʼ discursoʼob tu kaajil Kioto yéetel tuláakʼ kaajoʼob yaan tu lakʼinil Japón.

Tu mesil octubre tiʼ 1927, le sukuʼunoʼoboʼ tu yaʼaloʼob yaan u máanskoʼob óoxpʼéel discursoʼob tu kaajil Tokio. Tu kaʼa túuxtoʼob invitacionoʼob tiʼ máaxoʼob jach kʼaj óolaʼanoʼob jeʼex le yáax ministrooʼ, politicoʼob, u nuuktakil le religionoʼoboʼ bey xan tiʼ le soldadoʼoboʼ. Tu kaʼa tsʼáajoʼob letreroʼob, tu anunciartoʼob tiʼ periódico yéetel tu tʼoxoʼob 710,000 invitacionoʼob. Teʼ discursoʼob máansaʼaboʼ bin 4,800 máakoʼob.

Le colportoroʼoboʼ (precursores) jach áantajnajoʼob teʼ kʼaʼaytaj joonaj joonajiloʼ. Matsue Ishii, juntúul tiʼ le yáax colportoraʼob anchaj Japonoʼ, yéetel Jizo, u yíichameʼ kʼaʼaytajnajoʼob óoliʼ tiʼ tuláakal u luʼumil Japón, desde Sapporo, yaan tu xamanil Japoneʼ tak Sendai, Tokio, Yokohama, Nagoya, Osaka, Kioto, Okayama yéetel Tokushima. Le kiik Matsue yéetel Sakiko Tanaka, juntúul kiik nojoch u jaʼabileʼ, bin u xíimbaltoʼob jujuntúul politicoʼob, ken xiʼikoʼobeʼ ku takik u kimonoʼob, lelaʼ junpʼéel nookʼ suuk u taʼakal Japón. Juntéenjeakileʼ juntúul tiʼ le politicoʼoboʼ tu kʼáataj 300 libroʼob El Arpa de Dios yéetel le libro Liberación utiaʼal u tsʼáaik tu biblioteca le carceloʼoboʼ.

Ka tsʼoʼok u xokik Katsuo yéetel Hagino Miura le libroʼob tsʼaʼabtiʼob tumen le kiik Matsueoʼ, tu tsʼáajoʼob cuentaeʼ tsʼoʼok u kaxtikoʼob u jaajil. Letiʼobeʼ  okjaʼanajoʼob tu jaʼabil 1931 ka tu beetubaʼob colportoroʼob. Haruichi yéetel Tane Yamada, bey xan u láakʼtsiloʼobeʼ tu kʼamoʼob u jaajil táanil tiʼ 1930. Haruichi yéetel Tane Yamadaeʼ tu beetaj u colportoriloʼob, yéetel Yukiko u hijaʼobeʼ, bin meyaj tu Betelil Tokio.

Teʼ kʼiinoʼob jeʼeloʼ, le cocheʼoboʼ jach koʼojtakoʼob yéetel le carreteraʼoboʼ maʼ maʼalobtakiʼ. Le oʼolaleʼ Kazumi Minoura yéetel uláakʼ colportoroʼob táankelmoʼobeʼ meyajnajtiʼob mejen najoʼob tsʼaʼan u ruedasil minaʼan u motoril, jíitbil u beetaʼal. Le mejen najoʼobaʼ tu kʼaabaʼtoʼob Jehús, tsʼaʼab u kʼaabaʼ beyaʼ yoʼolal Jehú yéetel yoʼolal bix u manejartik u carro (2 Rey. 10:15, 16). Tu betelil Japoneʼ beetaʼab óoxpʼéel Jehús nuuktak, u chowakileʼ 2,2 metros, u kóochil yéetel u kaʼanlileʼ 1,9 metros. Le najoʼobaʼ letiʼe colportoroʼob jíitkoʼ yéetel ku páajtal kaʼach u wenel tak seis máakiʼ. Tu beetoʼob xan 11 uláakʼ Jehús maas mejentak, le mejen najoʼobaʼ jíitbil u beetaʼal yéetel bicicleta tsʼoʼoleʼ jeʼel u páajtal u wenel kaʼatúul colportoroʼob kaʼacheʼ. Kiichi Iwasaki, máax beetoʼobeʼ, ku yaʼalik: «Cada Jehueʼ yaan kaʼach u lonail utiaʼal u piʼixil yéetel yaan junpʼéel u bateríail camión utiaʼal u tsʼaʼabal sáasil ichil». Le colportoroʼoboʼ ku biskoʼob kaʼach le mejen najoʼob tak yóokʼol puʼukoʼoboʼ desde Hokkaido, yaan tu xamanil Japoneʼ, tak Kyushu, tu noojolil Japón. Yoʼolal lelaʼ juulnaj u sáasilil le jaaj tiʼ tuláakal u luʼumil Japonoʼ.

Ikumatsu Otaeʼ ku yaʼalik: «Ken kʼuchkoʼon kaʼach tiʼ junpʼéel kaajeʼ k-pʼatik le chan naj tu jáal junpʼéel áalkab jaʼoʼ wa tuʼux píiʼkab. Yáaxeʼ k-bin il le máaxoʼob maas yaan autoridad tiʼob, jeʼex le presidenteoʼ, tsʼoʼoleʼ k-bin kʼaʼaytaj joonaj joonajil. Ken tsʼoʼokok k-kʼaʼaytaj teʼ kaajoʼ k-bin tiʼ uláakʼ».

Teʼ yáax asamblea beetaʼab tu kaajil Kobeoʼ chéen 36 j-Xoknáaloʼob tiʼ le Biblia yanoʼob kaʼachoʼ (Zac. 4:10). Tu jaʼabil 1932, cinco jaʼaboʼob beetaʼak le asambleaoʼ, tsʼaʼab u informeileʼ yaan 103 colportoroʼob yéetel j-kʼaʼaytajoʼob. Informartaʼab xaneʼ tu pʼatoʼob maas tiʼ 14,000 libroʼob. Bejlaʼeʼ yaan óoliʼ 220,000 j-kʼaʼaytajoʼob táan u beetkoʼob u juul u sáasilil le jaaj tu Luʼumil Japonoʼ. (Le baʼaxoʼob k-líiʼsmoʼ, Japón.)