Kʼexaʼab u kuxtaloʼob tumen le Bibliaoʼ

¿Baʼax áant utúul xiʼipal kajaʼan México utiaʼal ka jóokʼok tiʼ upʼéel u bandai maleantes yéetel ka suunak honradoi yéetel jach meeyjil? Utúul koʼolel kajaʼan Japoneʼ, ¿baʼaxten tu pʼataj le jach maʼalob negocio yantiʼ tuʼux ku náajaltik yaʼab taakʼinoʼ, yéetel bix u yuʼubkuba yoʼolal le baʼax tu beetoʼ? ¿Baʼax péeks utúul máak utiaʼal ka u pʼat u beetik yéetel u konik armas, kex yaʼab taakʼin ku náajaltik kaʼachi? Koʼox ilik baʼax ku yaʼalikoʼob.

U KʼAABAʼ: ADRIÁN PÉREZ

U JAʼABIL: 30

KAJAʼAN: MÉXICO

KAʼACHEʼ: TIAʼAN ICHIL UPʼÉEL U BANDAI MALEANTESEʼ

LE BIX KUXLIKEN KAʼACHOʼ: Kex 13 jaʼaboʼob yanten ka binoʼon yéetel tuláakal in familia kajtal tu noj kaajil Ecatepec (Estado de México). Teʼ kʼiinoʼob jeʼeloʼ teʼ tuʼux kajaʼanoʼonoʼ jach yaʼab u yúuchul ookol, u drogarkuba le paalaloʼoboʼ yéetel jach yaʼab u kaxkoʼob baʼateʼel. Tu yoʼolal lelaʼ maʼ xáanchaj ka joʼopʼ in káaltal, in baʼateʼel yéetel in máan chéen bey yéetel koʼoleloʼoboʼ.

Ka máan kʼiineʼ suunajoʼon tu kaajil San Vicente, le tuʼux síijenoʼ. Teʼ xanoʼ jach yaʼab máakoʼob ku drogarkubaʼobiʼ, le oʼolaleʼ mantatsʼ ku yilaʼal kaʼach xiʼipalaloʼob pekaʼanoʼob teʼ calleʼob tsʼoʼok u kíimloʼoboʼ. Ka tsʼoʼokeʼ ooken tiʼ upʼéel banda tiʼ maleantes ku kʼaabaʼtik Satánicos Junior. Máan kʼiin kaʼach táan k-ookol yéetel táan k-drogartikba, maases yéetel thinner wa yéetel pegamento. Yaʼab utéenel úuchteneʼ maʼ tu kʼaʼajalten bix úuchik in kʼuchul tin wotoch, yéetel yaan kʼiineʼ ken sáasakeʼ tiʼ pekaʼanen teʼ calleoʼ. Jujuntúul tiʼ in amigoʼobeʼ oksaʼaboʼob cárcel úuchik u yookoloʼob wa úuchik u kíimskoʼob wa máax.

Baʼaleʼ kex bey in kuxtal kaʼachoʼ kin creertik yaan Dios. Le oʼolaleʼ utiaʼal túun u jáawal in chiʼichnaktal yoʼolal le baʼaxoʼob kin beetkoʼ kin táakpajal tiʼ le baʼaxoʼob ku beetaʼal teʼ  iglesia jeʼex le Via Crucis ku beetaʼal teʼ Semana Santaoʼ. Baʼaleʼ ken tsʼoʼokkeʼ tuláakal le táakpajoʼonoʼ k-bin káaltal, tak le máax tu beetaj u Jesusiloʼ.

BIX TU KʼEXIL IN KUXTAL LE BIBLIAOʼ: Ka maas nojochchajeneʼ joʼopʼ in xokik le Biblia yéetel u j-jaajkunajoʼob Jéeobaoʼ (testigos de Jehová). Tiʼ túun tin tsʼáaj cuenta maʼ in beet mix baʼal maʼalob yéetel in kuxtaliʼ. Wa maʼ in kʼexik kaʼach in kuxtaleʼ yaan u binten kʼaasil. Jach tu péeksaj in wóol le baʼax tin xokaj tu tsʼíibil Galaciailoʼob 6:8, tuʼux ku yaʼalik: «Máax ku pakʼik baʼax utstutʼaan [...] u luʼumkabil wíinklileʼ bíin u joch kíimil. Baʼaleʼ wa ku pakʼik baʼax uts utiaʼal kiliʼich pixaneʼ, tiʼ le kiliʼich pixanoʼ bíin u joch kuxtal minaʼan u xuul». Ka túun tin tsʼáaj cuentaeʼ wa in kʼáat ka xiʼikten utsileʼ kʼaʼabéet in «pakʼik» wa in beetik baʼaloʼob maʼalobtak.

Ka káaj in xokik le Bibliaoʼ tin kaneʼ Jéeobaeʼ utúul Dios kuxaʼan, u kʼáat u yáanten yéetel jeʼel u perdonartik tuláakal le baʼaxoʼob kʼaastak in beetmoʼ. Tin wilaj xaneʼ letiʼeʼ ku yuʼubik yéetel ku núukik le oracionoʼob ku beetaʼaltiʼoʼ.

Baʼaleʼ jach talamchajten in kʼexik in kuxtal. Istikiaj úuchik in jóokʼol tiʼ le bandaoʼ. Tsʼoʼoleʼ kex tsʼoʼok kaʼach in jóokʼoleʼ yaan tuʼuxoʼob maʼ tu páajtal in máan tumen kʼaj óolaʼanen tumen le bandaʼob yanoʼoboʼ. Le in wéet máanoʼob xan kaʼachoʼ ku taal u yilenoʼob utiaʼal ka xiʼikoʼon káaltal yéetel k-drogarkba, le oʼolal anchaj in taʼakkimba tiʼob.

Jach utschaj tin wich baʼax ku beetaʼal teʼ tuʼux ku muchʼkuba u j-jaajkunajoʼob Jéeobaoʼ. Letiʼobeʼ máakoʼob jach utsoʼob yéetel jatsʼuts u modosoʼob. Tin wileʼ jach yaan u fejoʼob yéetel ku beetkoʼob le baʼax ku kaʼansikoʼoboʼ. Tuláakal lelaʼ jach jelaʼan tiʼ le baʼaxoʼob suukaʼan kaʼach in wilikoʼ.

LE UTSILOʼOB TSʼOʼOK U TAASIKTENOʼ: Taʼaytak diez jaʼaboʼob in beetimba utúul u j-jaajkunaj Jéeoba. Bejlaʼeʼ kin wilik in tsʼáaik ichil in kuxtal le baʼax ku yaʼalik le Bibliaoʼ, yoʼolal lelaʼ in láakʼoʼobeʼ ku yeʼeskoʼobten tsiikil. U yojloʼob bejlaʼeʼ honradoen yéetel meeyjilen. Yaan tak kʼiin tsʼoʼok in wáantkoʼob yéetel baʼax kʼaʼabéettiʼob. Jach kiʼimak in wóol tumen in maamaeʼ káaj xan u xokik le Bibliaoʼ, yéetel bejlaʼeʼ utúul u j-jaajkunaj Jéeoba. In taataeʼ tsʼoʼok xan u káajal u kʼexik u kuxtal. Baʼaleʼ kex u maas yaʼabil in láakʼoʼob maʼ j-jaajkunajoʼobeʼ, ken u yiloʼob bix tsʼoʼok in kʼexik in kuxtaleʼ, ku éejemtkoʼob yaan u páajtalil tiʼ le Bibliaoʼ utiaʼal u kʼexik u kuxtal máakoʼ.

U KʼAABAʼ: YAYOI NAGATANI

U JAʼABIL: 50

KAJAʼAN: JAPÓN

KAʼACHEʼ: YANTIʼ UPʼÉEL JACH MAʼALOB NEGOCIO

LE BIX KUXLIKEN KAʼACHOʼ: Teneʼ líikʼen tiʼ upʼéel chan kaaj tuʼux tuláakal máak ku biskubaʼob maʼalob. Tiʼ in taataeʼ yaan kaʼach upʼéel tienda tuʼux ku meyaj diez utúulul máakoʼobiʼ; letiʼ yéetel in maamaeʼ bulkʼiin ku meyajoʼob kaʼach. Baʼaleʼ tumen tu tséel le tienda yaan k-otochoʼ, maʼ tin wuʼuyimba tin juunaliʼ.

 Tin familiaeʼ óoxtúul hijatsiloʼon, baʼaleʼ tumen teen u maas nojchileʼ, desde tin chichnil ka káaj u kaʼansaʼalten bix u meeyjil le tiendaoʼ. Jach x-lóoʼbaynen ka tsʼoʼok in beel, yéetel in wíichameʼ tu pʼataj u meyaj tiʼ upʼéel banco utiaʼal u yáantken in meyajt le tiendaoʼ. Anchaj óoxtúul k-paalal, baʼaleʼ tumen bulkʼiin kin meyajeʼ in maama kanáantikoʼob yéetel letiʼ beetik tuláakal le meyaj ichil le najoʼ. Kex beyoʼ k-jóoʼsik kaʼach u súutukil utiaʼal k-antal yéetel k-paalal.

Baʼaleʼ le tuʼux k-koonoloʼ pʼáat maʼ tu jach úuchul maaniʼ, le oʼolal t-chʼaʼatuklaj k-jeʼik upʼéel negocio yaan yil yéetel u jeel túumbenkuntaʼal najoʼob. Lelaʼ t-tsʼáaj tu jáal upʼéel noj bej. Baʼaleʼ upʼéel kʼiin táanil tiʼ k-jeʼekʼabkeʼ, in taata, le máax nuʼuktik le negocioaʼ, tsúuts upʼéel vena ku bin tu tsʼoʼomeleʼ ka pʼáat óoliʼ maʼ tu páajtal u tʼaan. Yoʼolal le baʼax úuchaʼ, teen pʼáaten in nuʼukt le túumben negociooʼ ka pʼáat le tienda tiʼ in wíichamoʼ. U jaajileʼ jach táaj yaʼab meyaj k-beetik kaʼachi.

Jach maʼalob úuchik u bin tiʼ le túumben negociooʼ. Teneʼ jach kiʼimakchaj in wóol, yéetel tin wilaj in meyaj le bukaʼaj ku páajtaleʼ, kex tak maʼ in jeʼelel. Tsʼoʼoleʼ kex in yaabilmaj in paalaloʼobeʼ, tin pooleʼ chéen meyaj sen yaniʼ. Pʼáat óoliʼ maʼatech in tsikbal yéetel in wíicham, yéetel ken tsikbalnakoʼoneʼ chéen baʼateʼel k-beetik. Utiaʼal túun maʼ in tuukul tiʼ in talamiloʼobeʼ, óoliʼ cada áakʼab kin jóokʼol in chan ukʼ yéetel in amigoʼob wa yéetel in wéet meyajoʼob. In kuxtal kaʼacheʼ chéen in meyaj, in wukʼik yéetel in wenel. Baʼaleʼ maʼ tin naʼatik kaʼach baʼaxten kex maʼalob u binten tin negocioeʼ minaʼanten kiʼimak óolal.

BIX TU KʼEXIL IN KUXTAL LE BIBLIAOʼ: Ka káaj in xokik le Biblia yéetel u j-jaajkunajoʼob Jéeobaoʼ anchaj óoxpʼéel tekstoʼob jach kʼuch tin puksiʼikʼal. Upʼéeleʼ Mateo 5:3, ku yaʼalik: «Kiʼ u yóoloʼob le máaxoʼob ku kʼaj óoltikoʼob u yóotsilil u pixanoʼoboʼ, tumen u tiaʼaloʼob u [reinoi] kaʼan». Le ka tin naʼataj baʼax u kʼáat u yaʼal le tekstooʼ joʼopʼ in wokʼol. Kʼuchen xan in naʼat baʼaxten kex maʼalob u binten teʼ negociooʼ kin wuʼuyik minaʼan u beelal in kuxtal. Tin tsʼáaj cuentaeʼ utiaʼal ka yanakten kiʼimak óolaleʼ kʼaʼabéet in natsʼkimba tiʼ Dios.

Teʼ kʼiinoʼob jeʼeloʼ yaʼab tiʼ le negocioʼob yanoʼob Japonoʼ káaj u bin kʼaasiltiʼob; yaʼab tiʼ le máaxoʼob in kʼáaj óoloʼoboʼ bey úuchik tiʼ u negocioʼoboʼ. Leloʼ tu beetaj in wilik jach jaaj baʼax ku yaʼalik 1 Timoteo 6:9: «Le máaxoʼob u kʼáatoʼob ayikʼaltaloʼ, ku lúubuloʼob tiʼ le túuntaj óolaloʼ yéetel tiʼ u sat óolil yaʼabkach chéen kunel tsʼíibolaloʼob ku loobiltikoʼob máak yéetel ku bisikoʼob máak tiʼ kʼaskúunajil yéetel tiʼ xuʼulsajil». Ka túun tuukulnajen tiʼ baʼax ku yaʼalik Mateo 6:24: «Maʼ tu páajtal a meyajtikeʼex Jajal Dios wa táan a meyajtikeʼex le taakʼinoʼ». Yoʼolal lelaʼ tin wilaj in kʼexik in kuxtal.

Kaʼacheʼ maʼatech in máansik súutukil yéetel in taataʼob, in wíicham mix yéetel in paalal. Tsʼoʼoleʼ kʼaschaj xan in modos, jach séeb in tsʼíikil yéetel jach nojbaʼal in taaskimba. Le oʼolal tu káajbaleʼ tin tuklaj maʼ kun béeytal in beetik le baʼax ku yaʼalik le Bibliaoʼ. Baʼaleʼ tumen jach in yaabiltmaj in paalaleʼ tin wilaj in beetik baʼax ku yaʼalik le Biblia yoʼolal le familiaoʼ, letiʼob túuneʼ jach kiʼimakchaj u yóoloʼob. Tsʼoʼoleʼ káaj xan in máansik maas yaʼab súutukil yéetel in paalal bey xan in biskoʼob teʼ muchʼtáambaloʼoboʼ.

LE UTSILOʼOB TSʼOʼOK U TAASIKTENOʼ: Bejlaʼa táan in meyajtik Dioseʼ jach kiʼimak in wóol yéetel kin wuʼuyik jach yaan u beelal in kuxtal. Kin tsʼáaik táanil in familia maʼ in meyajiʼ, lelaʼ tsʼoʼok u beetik u muʼukʼaʼantal in wóol.

Ka tu yilaj in maama bix tsʼoʼok u yáantken le Biblia in kʼex in kuxtaloʼ, letiʼeʼ káaj u xokik le Bibliaoʼ, bejlaʼeʼ utúul u j-jaajkunaj Jéeoba xan. U maʼalobileʼ mix in taata mix in wíicham kʼuuxilnajoʼob yoʼolal le baʼax t-chʼaʼatuklaj k-beetkoʼ. Bejlaʼeʼ teen yéetel in paalaleʼ jach maʼalob k-bisikba, yéetel jach yaan kiʼimak óolal ichil in familia.

U KʼAABAʼ: MIKHAIL ZUYEV

U JAʼABIL: 51

KAJAʼAN: RUSIA

KAʼACHEʼ: KU BEETIK YÉETEL KU KONIK ARMAS

 LE BIX KUXLIKEN KAʼACHOʼ: Síijen Krasnogorsk, upʼéel noj kaaj sen yaan cheʼobiʼ yéetel tiʼ xan ku kʼáat máan le río Moscovaoʼ. Le najoʼob yanoʼob tu xaman yéetel tu chikʼinil le kaajoʼ maʼ jach chíikaʼanoʼob yoʼolal le yaʼabkach cheʼoboʼ.

Tin táankelmileʼ jach yaʼab in beetik ejercicio, yéetel jatsʼuts in wilik in baʼateʼel bey xan u yantalten armas. Kin beetik kaʼach cuchilloʼob, municionoʼob yéetel tsʼoonoʼob maʼ tu chaʼabal u yantal tiʼ máak tumen le gobiernooʼ. Ka tsʼoʼokeʼ joʼopʼ in konik armas tiʼ le kʼasaʼan máakoʼoboʼ. Jach maʼalob in kaxmil bix ken in beetil le meyajoʼ, le oʼolal yaʼab taakʼin kin náajaltik kaʼachi.

BIX TU KʼEXIL IN KUXTAL LE BIBLIAOʼ: Tin kʼaj óoltaj u j-jaajkunajoʼob Jéeoba tu káajbal u jaʼabiloʼob 1990. Baʼaleʼ ka káajeʼ chan saajken tsikbal tu yéeteloʼob tumen bey in wóol jach yaʼab kʼáatchiʼ ku beetkoʼobeʼ.

Utéenjeakileʼ, utúul tiʼ letiʼobeʼ tu xokajten Romailoʼob 14:12, tuʼux ku yaʼalik: «Cada juntúul tiʼ toʼoneʼ yaan u tsolik tiʼ Jajal Dios baʼax u beetmaj». Ka túun tin tuklaj: «Ken u kʼáatten Dios baʼax in beetmeʼ, ¿baʼax túun ken in waʼaltiʼ?». Lelaʼ tu beetaj in chʼaʼatuklik in kanik bix u kʼáat Dios ka kuxlaken.

Tin wilaj in beetik le baʼax ku yaʼalik le Biblia tiʼ Colosailoʼob 3:5-10: «Beeteʼex u kíimil tuláakal le luʼumkabil baʼaloʼob yaan tiʼ teʼexoʼ: Mix máak ka núupkʼebanchajak, mix ka u beet baʼaloʼob kʼaastak, mix ka xiʼik tu paach kʼaakʼas tuukuloʼob yéetel u kʼaakʼas tsʼíibolaloʼob, mix ka u tsʼíibolt taakʼin, tumen lelaʼ keet yéetel u [adorartaʼal] beetbil [diosoʼob]. Tu yoʼolal le baʼaloʼobaʼ ku taal u yaayaj jaatsʼ Jajal Dios [...]. Baʼaleʼ beoraaʼ pʼateʼex tuláakal le baʼaloʼobaʼ: kʼuuxil, kʼaakʼas tuukul, kʼaasil, poochʼil, yéetel le kʼaakʼas tʼaanoʼob ku páajtal u jóokʼol tiʼ a chiʼexoʼ. Maʼ a tusikabaʼex ta baatsileʼex, tumen tsʼoʼok a pʼatikeʼex le úuchben kuxtaloʼ yéetel le baʼaloʼob ka beetikeʼex kaʼachoʼ, yéetel tsʼoʼok a búukbeskabaʼex yéetel le túumben kuxtaloʼ».

Baʼaleʼ talamchaj in kʼexik le kuxtal yanten kaʼachoʼ. Le máaxoʼob manikten le armasoʼ láayliʼ ku kaxkenoʼob kaʼach utiaʼal ka in kon tiʼobeʼ; tsʼoʼoleʼ jach séeb kaʼach in pʼuʼujul ken beetaʼakten wa baʼax. Baʼaleʼ kex jach koʼoj u tojol le armas yantenoʼ tin láaj kʼaskúuntaj. Seguernaj in xokik le Bibliaoʼ, yéetel jeʼex u bin in maas kanik bix u yeʼesikten u yaabilaj Dios yéetel Jesucristoeʼ kin wuʼuyik maas in yaabiltmoʼob. Tsʼoʼoleʼ maʼ xuʼul in bin teʼ muchʼtáambaloʼoboʼ yéetel maʼ xuʼul in kʼáatik tiʼ Jéeoba ka u yáanteniʼ.

LE UTSILOʼOB TSʼOʼOK U TAASIKTENOʼ: Kex chan talamchajteneʼ, baʼaleʼ bejlaʼeʼ tsʼoʼok in kanik in controlartimba utiaʼal maʼ in séeb pʼuʼujul. In wéet religioniloʼobeʼ jach tsʼoʼok u yáantkenoʼob. Upʼéel baʼax jach taasikten kiʼimak óolaleʼ, letiʼe in wojéeltik Jéeobaeʼ u yaabiltmaj tuláakal máak, tak le máaxoʼob tsʼoʼok u kíimloʼoboʼ (Beetaʼanoʼob [Hechos] 24:15). Tsʼoʼoleʼ baʼax jatsʼuts in wilik tiʼ u j-jaajkunajoʼob Jéeobaeʼ, letiʼe u tʼaanoʼob yéetel u jaajiloʼ, u kʼamikoʼob máak maʼalob yéetel jach chúukaʼan u yóoloʼob u meyajtoʼob Dios. Jach kiʼimak in wóol xan yoʼolal le yaabilaj tsʼoʼok u yeʼeskoʼobtenoʼ.

Ka káajeʼ jujuntúul in láakʼtsiloʼobeʼ, kʼuuxilnajoʼob úuchik u káajal in xokik le Bibliaoʼ. Baʼaleʼ ka tsʼoʼokeʼ tu yiloʼobeʼ maas maʼalob ka yanaken tiʼ upʼéel religión ke ka seguernak in konik armas utiaʼal u kíimsaʼal máakoʼob. Bejlaʼeʼ jach kiʼimak in wóol. Tumen maʼatech in konik u nuʼukulil utiaʼal u kíimsaʼal máakoʼob, baʼaxeʼ kin wáantikoʼob utiaʼal ka u kʼaj óoltoʼob le Dios ken u taas jeetsʼeliloʼ.

[U tsolajil le oochel teʼ táan juʼun 27]

Utiaʼal u jáawal in chiʼichnaktaleʼ kin táakpajal kaʼach tiʼ le baʼaxoʼob ku beetaʼal teʼ iglesiaoʼ

[U tsolajil le oochel teʼ táan juʼun 28]

Kex maʼalob u binten tin negocioeʼ minaʼanten kiʼimak óolal kaʼachi