Kaʼans a paalaleʼex

Josíaseʼ tu chʼaʼatuklaj u beetik baʼax maʼalob

¿KU TALAMTAL tech wa a beetik baʼax maʼalob? *... Wa ku talamtal techeʼ, maʼ chéen tiʼ teech ku yúuchliʼ. Lelaʼ bey u yúuchul tak tiʼ le máaxoʼob tsʼoʼok u chan yantal u jaʼabiloʼoboʼ. Baʼaleʼ ¿baʼaxten yaan horaeʼ ku talamtal u beetik máak baʼax maʼalob? Koʼox ilik baʼaxten talamchaj tiʼ Josías u beetik baʼax maʼalob. ¿A wojel wa máax kaʼachi?...

Josíaseʼ u hijo Amón, utúul gobernante jach kʼasaʼan yaan kaʼach tu kaajil Judá. Dieciséis jaʼaboʼob yaan kaʼach tiʼ Amón ka síij Josías. Manasés u abuelo Josíaseʼ, utúul rey jach kʼasaʼan kaʼachi. Baʼaleʼ ka bisaʼab palitsiltbil Babiloniaeʼ tu kʼáataj tiʼ Jéeoba ka perdonartaʼak; Jéeoba túuneʼ tu perdonartaj.

Le ka chaʼab Manaseseʼ, joʼopʼ u kaʼa gobernar tu kaajil Jerusalén. Letiʼeʼ tu pʼataj tuláakal le baʼaloʼob kʼaastak ku beetik kaʼachoʼ yéetel tu yáantaj uláakʼ máakoʼob u meyajtoʼob Jéeoba. Chéen tukult bukaʼaj úuchik u yaatal u yóol le ka tu yilaj Amón, u hijoeʼ, táan kaʼach u beetik baʼaloʼob kʼaastak. Teʼ kʼiinoʼob jeʼeloʼ síij Josías, u yáabil. Le Bibliaoʼ maʼatech u yaʼalik wa jach tu bisuba yéetel Josías, baʼaleʼ ¿máasaʼ jeʼel u páajtal k-aʼalikeʼ tu kaʼansaj tiʼ u yáabil u kʼaʼananil u meyajtaʼal Jéeoba?...

Seis jaʼaboʼob yaan tiʼ Josías ka kíim Manasés u abuelo yéetel káaj u gobernar Amón. Letiʼeʼ chéen kaʼapʼéel jaʼab gobernarnaji tumen kíimsaʼab tumen u j-meyajoʼob. Yoʼolal lelaʼ Josíaseʼ kʼuch u beetuba u reyil Judá kex chéen ocho jaʼaboʼob yaan kaʼach tiʼ (2 Crónicas, capítulo 33). ¿Baʼax ta tʼaan ken u beet kaʼach Josías? ¿Yaan wa u beetik baʼax kʼaas jeʼex tu beetil Amón u taataoʼ, wa yaan u beetik baʼax maʼalob jeʼex tu beetil Manasés, u abuelo le ka arrepentirnajoʼ?...

Kex maʼ yaʼab jaʼaboʼob yantiʼeʼ Josíaseʼ tu chʼaʼatuklaj u meyajtik Jéeoba. Le oʼolaleʼ letiʼeʼ maʼ tu yuʼubaj le baʼaxoʼob aʼalaʼabtiʼ tumen u amigoʼob u taataoʼ, baʼaxeʼ tu yuʼubaj u tʼaan le máaxoʼob meyajtik Jéeobaoʼ. Kex chéen ocho jaʼaboʼob yantiʼeʼ u yojel maas maʼalob ka u yuʼub u tʼaan le máaxoʼob u  yaabiltmoʼob Jéeobaoʼ (2 Crónicas 34:1, 2). ¿A kʼáat wa wojéelt máaxoʼob áant Josías u beet baʼax maʼalob?...

Utúul tiʼ letiʼobeʼ profeta Sofonías. Maʼ xaaneʼ letiʼeʼ u láakʼtsil Josías, tumen u láakʼtsil xan kaʼach le profeta Ezequías, u taata Manasesoʼ. Tu yáax jaʼabiloʼob u reinar Josíaseʼ, Sofoníaseʼ tu tsʼíibtaj le libro ku bisik u kʼaabaʼoʼ. Teʼ libroaʼ tu yaʼalaj baʼax kun úuchul tiʼ le máaxoʼob maʼatech u beetkoʼob baʼax utstutʼaan Diosoʼ, yéetel Josíaseʼ tu chʼaʼaj en cuenta le baʼax tu yaʼalaj le profetaaʼ.

Uláakʼ máax áanteʼ letiʼe profeta Jeremíasoʼ. Maʼ xaaneʼ techeʼ a wuʼuymaj u yúuchul tʼaan tiʼ le profetaaʼ tumen tu tsʼíibtaj xan upʼéel libro ku bisik u kʼaabaʼ. Tu kaʼatúulaloʼob táankelmoʼob, tsʼoʼoleʼ u kaajal Jeremíaseʼ maʼ náach yaan kaʼach tiʼ u kaajal Josíasiʼ. Letiʼobeʼ jach ku biskubaʼob kaʼachi, le oʼolaleʼ ka kíim Josías tiʼ upʼéel baʼateleʼ, Jeremíaseʼ tu tsʼíibtaj upʼéel kʼaay tuʼux ku yaʼalik jach yaj tu yóol (2 Crónicas 35:25). Jeʼel u páajtal k-aʼalikeʼ letiʼobeʼ tu paklan líiʼsaj u yóoloʼob utiaʼal ka u meyajtoʼob Jéeoba.

Baʼaleʼ ¿baʼax jeʼel u páajtal a kanik tiʼ Josíaseʼ?... Wa a papá maʼatech u meyajtik Dioseʼ, ¿yaan wa uláakʼ máax jeʼel u páajtal u kaʼansiktech tiʼ Dioseʼ? Maʼ xaaneʼ jeʼel u páajtal u kaʼanskech a maama, utúul tiʼ a abueloʼob wa utúul tiʼ a láakʼtsiloʼob. Wa maʼ xaaneʼ a maamaeʼ jeʼel u chaʼik a xook yéetel utúul tiʼ le máaxoʼob meyajtik Jéeobaoʼ.

Kex wa yantech le talamiloʼob anchaj tiʼ Josías bey xan wa maʼeʼ, ilawil a beetik jeʼex tu beetil letiʼeʼ. Jeʼex tsʼoʼok k-ilkoʼ, kex utúul chan paal kaʼacheʼ, letiʼeʼ u yojleʼ chéen unaj u biskuba yéetel le máaxoʼob ku meyajtikoʼob Jéeobaoʼ. Maʼ xaaneʼ techeʼ yaan xan a chʼaʼatuklik a beetik baʼax maʼalob mantatsʼ.

[Tsolajiloʼob]

Kʼáatchiʼob:

❍ ¿Máax kaʼach u taata yéetel u abuelo Josías? ¿Kʼasaʼanoʼob wa kaʼach wa utsoʼob?

❍ ¿Baʼax kʼeexiloʼob anchaj u beetik u abuelo Josías?

❍ ¿Bix u kʼaabaʼ le kaʼatúul profetaʼob áant Josías u beet baʼax maʼaloboʼ? ¿Baʼaxten a tuklik maʼalob ka yanak u amigoʼob máak beyoʼ?

[U tsolajil le oochel teʼ táan juʼun 25]

¿Bix áantaʼabik Josías u beet baʼax maʼalob tumen Sofonías yéetel Jeremías?