Kʼexaʼab u kuxtaloʼob tumen le Bibliaoʼ

¿Baʼax áant utúul koʼolel utiaʼal ka xuʼuluk u yookol teʼ tuʼux ku meyajoʼ yéetel ka xuʼuluk u yoklik diamantes? ¿Bix úuchik u yantal u biilal u kuxtal utúul koʼolel kaʼatéen tu yóotaj u kíimsuba? ¿Baʼax péeks utúul máak u pʼat u sen káaltal yéetel u drogarkuba? Koʼox ilik baʼax ku yaʼalikoʼob.

U KʼAABAʼ: MARGARET DEBRUYN

U JAʼABIL: 45

KAJAʼAN: BOTSUANA

KAʼACHEʼ: CONTRABANDISTA YÉETEL KU YOOKOL

LE BIX KUXLIKEN KAʼACHOʼ: In papá kaʼacheʼ Alemania u taal, baʼaleʼ tu jóoʼsaj u juʼunil utiaʼal u pʼáatal kajtal tu noojol chikʼinil África (bejlaʼeʼ Namibia). Teneʼ síijen tiʼ upʼéel kaaj ku kʼaabaʼtik Gobabis, láayliʼ teʼ Africaoʼ. In maamaeʼ tiʼ u taal tu kaajil Botsuana, tiʼ upʼéel tribu ku kʼaabaʼtik Bangologa.

Tu jaʼabil 1970, u gobiernoi Sudafricaeʼ letiʼ controlartik kaʼach jujumpʼéel baʼaxoʼob ku beetaʼal tu kaajil Namibia, yéetel tu yaʼalajeʼ maʼ unaj u yantal mix baʼal u yil le máaxoʼob saktakoʼob yéetel le máaxoʼob boxtakoʼoboʼ. Tumen in taata alemaniai kaʼacheʼ, beetaʼab u pʼatik in maama. In maama túuneʼ suunaj Botsuana, teen yéetel in wíitsʼnoʼobeʼ binoʼon tu yéetel ka pʼáatoʼon kajtal tu noj kaajil Ghanzi.

Tu jaʼabil 1979, binen kajtal tu noj kaajil Lobatsi, teʼeloʼ pʼaten yiknal upʼéel familia tak ka tsʼoʼok in xook. Tsʼoʼoleʼ, káaj in beetik in secretariai tiʼ upʼéel nojoch taller tuʼux ku yutskíintaʼal camionoʼob. Desde tin chichnil kaʼacheʼ kin tuklikeʼ Dioseʼ maʼatech u tsʼáaik tiʼ máak tuláakal le baʼaxoʼob kʼaʼabéettiʼoʼ, le oʼolaleʼ cada utúuleʼ unaj u beetik jeʼel baʼalak utiaʼal ka yanak baʼax kʼaʼabéettiʼeʼ.

Le oʼolaleʼ káaj in woklik jujumpʼéel tiʼ u refaccionil le camionoʼob yaan teʼ tuʼux kin meyajoʼ, lelaʼ ku páajtal in beetik kaʼachi tumen jach tsʼaʼanten confianza yoʼolal le meyaj kin beetkoʼ. Le ken kʼuchuk xan kaʼach upʼéel tren de áakʼab teʼ kaajoʼ, teen yéetel in amigoʼobeʼ k-okol chʼaʼa jeʼel baʼaxak ka k-ileʼ. Kin konik xan diamantes, oro yéetel bronce okolbil beetaʼaniloʼob. Káaj in drogarkimba, pʼáat jach kʼaas in tsʼíikil yéetel káaj u yantal yaʼab in novioʼob.

Tu jaʼabil 1993, chuʼuken táan in wookol ka jóoʼsaʼaben tin meyaj. ¿Baʼax túun tu beetaj le máaxoʼob kin tuklik in amigoʼob kaʼachoʼ? Maʼ tu yáantenoʼobiʼ tumen saajkoʼob kaʼach u chuʼukloʼob xan. Leloʼ tu beetaj u jach yaatal in wóol,  le oʼolaleʼ tin chʼaʼatuklaj maʼ in kaʼa confiar tiʼ mix máak.

BIX TU KʼEXIL IN KUXTAL LE BIBLIAOʼ: Ka máan upʼéel jaʼabeʼ tin kʼaj óoltaj Tim yéetel Virginia, kaʼatúul misioneroʼob tiʼ u j-jaajkunajoʼob Jéeoba. Ku binoʼob kaʼach u xíimbaltenoʼob teʼ tuʼux tin kaʼa kaxtaj meyajoʼ yéetel ku tsʼáaikoʼobten xook yéetel le Biblia tu yorai le jaanloʼ. Le ka tin tsʼáaj cuenta jeʼel u páajtal in confiar tiʼobeʼ, tin waʼalajtiʼob ka u tsʼaʼobten xook tin wotoch.

Tin tsʼáaj cuentaeʼ wa in kʼáat in beet baʼax utstutʼaan Dioseʼ, unaj kaʼach in kʼexik jujumpʼéel baʼaloʼob ichil in kuxtal. Jeʼex tiʼ 1 Corintoiloʼob 6:9, 10, tin kaneʼ «maʼ bíin u tiaʼaltoʼob u [reino] Jajal Dios le máaxoʼob ku kʼaakʼas kuxtaloʼoboʼ [...] mix le ku yookoloʼoboʼ, mix le ku tsʼíiboltikoʼob taakʼinoʼ, mix le ku káaltaloʼoboʼ, mix le ku yaʼalikoʼob baʼaloʼ, mix le ku tuusoʼoboʼ». Le oʼolaleʼ joʼopʼ in pʼatik tuláakal le baʼaloʼob kʼaastak suukaʼan in beetkoʼ. Xuʼul in wookol yéetel in biskimba yéetel le contrabandistaʼob tin kʼaj óoltaj desde tin chichniloʼ. Tsʼoʼoleʼ yéetel u yáantaj Jéeobaeʼ béeychaj in pʼatik tuláakal in novioʼoboʼ.

LE UTSILOʼOB TSʼOʼOK U TAASIKTENOʼ: Kex maʼ chéen chʼaʼabileʼ kin wilik maʼ in séeb tsʼíikil yéetel maʼ in kʼeʼekʼeyik in paalal ken u beetoʼob baʼax maʼ maʼalobiʼ (Efesoiloʼob 4:31). Kin wilik xan in kanáantik bix in waʼalik wa baʼax, leloʼ tsʼoʼok u taasik yaʼab utsiloʼob yéetel tsʼoʼok u beetik u yantal kiʼimak óolal ichil in familia.

Tuláakal in amigoʼob yéetel in vecinoʼobeʼ u yojloʼob jeʼel u páajtal u confiaroʼob teneʼ. Bejlaʼeʼ jach kin tsʼáaik in wóol meyaj yéetel maʼatech in woklik mix baʼal teʼ tuʼux kin meyajoʼ. Yoʼolal leloʼ ku béeytal in náajaltik le taakʼin kʼaʼabéettenoʼ yéetel in jóoʼsik tiempo utiaʼal in kaʼansik tiʼ uláakʼ máakoʼob le baʼax ku yaʼalik le Bibliaoʼ. Tsʼoʼok in tsʼáaik cuenta jach jaaj le baʼax ku yaʼalik Proverbios 10:22: «U kiʼtʼaan Yuumtsileʼ ayikʼalil maʼ tu taasik kʼiʼinamil tu yéetel».

U KʼAABAʼ: GLORIA ELIZARRARÁS DE CHOPERENA

U JAʼABIL: 37

KAJAʼAN: MÉXICO

KAʼACHEʼ: TU YÓOTAJ U KÍIMSUBA

LE BIX KUXLIKEN KAʼACHOʼ: Líikʼen tu kaajil Naucalpan, (Estado de México) tuʼux jach yaʼab máaxoʼob ayikʼaloʼob yaan kaʼachiʼ. Tin x-lóoʼbaynileʼ jach maʼatech in wuʼuyik tʼaan yéetel jach jatsʼuts in wilik in bin tiʼ fiestaʼob. Le ka tu tsʼáajten 12 jaʼaboʼobeʼ káaj in tsʼuʼutsʼik chamal yéetel ka tu tsʼáajten 14, káaj in káaltal. Le ka tu tsʼáajten 16 káaj xan in drogarkimba yéetel jach maʼ xáanchaj tiʼ leloʼ lukʼen tin wotoch. Óoliʼ tuláakal in amigoʼobeʼ yaan kaʼach talamil tu yotochoʼob yéetel jach ku maltratartaʼaloʼob. Jach kin wuʼuyik xan minaʼan kaʼach u biilal in kuxtal le oʼolaleʼ kaʼatéen tin wóotaj in kíimsimba.

Le ka tu tsʼáajten 19 jaʼaboʼobeʼ káaj in meyaj bey modeloileʼ yéetel káaj in jóokʼol yéetel yaʼab politicoʼob bey xan yéetel actoroʼob. Ka máan kʼiineʼ, tsʼoʼok in beel yéetel anchaj in paalal, baʼaleʼ teen aʼalik kaʼach baʼax kun beetbil ichil in wotoch. Láayliʼ kin tsʼuʼutsʼ chamal kaʼacheʼ, kin káaltal yéetel mantatsʼ kin bin kaʼach tiʼ fiestaʼob. Jach kin poochʼil xan kaʼachi yéetel jatsʼuts in wuʼuyik u yaʼalaʼal baʼaloʼob kʼaastak yéetel subtsiltak. Tsʼoʼoleʼ jach kʼaas in pʼuʼujul kaʼachi.

In amigoʼob kaʼacheʼ láayliʼ beyoʼoboʼ. Letiʼobeʼ ku yaʼalikoʼobeʼ yanten kaʼach tuláakal baʼax  in kʼáat. Baʼaleʼ teneʼ kin wuʼuyik kaʼach minaʼan u biilal in kuxtal.

BIX TU KʼEXIL IN KUXTAL LE BIBLIAOʼ: Tu jaʼabil 1998 káaj in xokik le Biblia yéetel u j-jaajkunajoʼob Jéeobaoʼ. Teʼ Bibliaoʼ tin kanaj yaan u biilal le kuxtalaʼ, yéetel tin naʼatajeʼ Dioseʼ yaan u sutik paraísoi le Luʼumaʼ yéetel yaan u kaʼa kuxkíintik le kimenoʼoboʼ. Tsʼoʼoleʼ tin kaneʼ jeʼel u páajtal in wilik u yúuchul tuláakal le baʼaloʼobaʼ.

Tin kanaj xaneʼ utiaʼal in weʼesik tiʼ Dios in yaabilmeʼ unaj in beetik baʼax utstutʼaan (1 Juan 5:3). U jaajileʼ chan talamchaj in beetik le baʼaxoʼob tin kanajoʼ, tumen suuk in beetik kaʼach chéen le baʼax in kʼáateʼ. Baʼaleʼ kʼuchen in naʼat maʼ tu páajtal in nuʼuktik in kuxtal chéen tin juunal (Jeremías 10:23). Le oʼolaleʼ tin kʼáataj tiʼ Jéeoba ka u yáanten in tsʼáa ichil in kuxtal le baʼaxoʼob kin kanik teʼ Bibliaoʼ yéetel ka in kaʼans tiʼ in paalaloʼob u bisoʼob upʼéel maʼalob kuxtal.

Maʼ chéen chʼaʼabil úuchik in kʼexik in kuxtaliʼ, baʼaleʼ joʼopʼ in beetik le baʼax ku yaʼalik Efesoiloʼob 4:22-24: «Xúumpʼatteʼex le úuchben wíinik tsʼoʼok u kʼastaloʼ [...] yéetel [...] búukinteʼex le túumben wíinikoʼ beetaʼan jeʼel bix u kʼáat Jajal Dioseʼ yéetel ku chíikbesaʼal yéetel jumpʼéel kuxtal tu jaajil toj yéetel Kiliʼich». Le in búukintik le túumben wíinikoʼ u kʼáat u yaʼal kaʼach in pʼatik tuláakal le baʼaloʼob suukaʼanten jeʼex in tsʼuʼutsʼ chamal yéetel in waʼalik baʼaloʼob kʼaastakoʼ. Tu bisajten óoliʼ óoxpʼéel jaʼaboʼob in pʼatik tuláakal lelaʼ, baʼaleʼ béeychaj in beetik, yéetel ka tsʼoʼokeʼ okjaʼanajen ka tin beetimba utúul u j-jaajkunaj Jéeoba.

Káaj xan in beetkimba utúul maʼalob atantsil bey xan in beetik baʼaloʼob maʼalobtak u yil in paalal. Tin beetaj le baʼax ku yaʼalik 1 Pedro 3:1, 2: «Atantsileʼex, tsʼáabaʼex yáanal u kʼab a wíichameʼex, utiaʼal beyoʼ wa yaan tiʼ letiʼob maʼ táan u yoksaj óoltikoʼob le maʼalob péektsiloʼ, ka kʼuchuk u yoksaj óoltoʼob tu yoʼolal bix a kuxtaleʼex teʼex, kex maʼ a waʼalikeʼex mix baʼal, le ken u yiloʼob a toj yéetel tsiikil kuxtaleʼex».

LE UTSILOʼOB TSʼOʼOK U TAASIKTENOʼ: Bejlaʼeʼ jach kiʼimak in wóol tumen tu yoʼolal Jéeobaeʼ tin tsʼáaj cuenta yaan u biilal in kuxtal. Jach yaʼab baʼaloʼob tsʼoʼok in kʼexik ichil in kuxtal yéetel kin tuklikeʼ jeʼel u páajtal in tsʼáaik upʼéel maʼalob kaʼansaj tiʼ in paalaleʼ. Tak bejlaʼa ken in kʼaʼajs baʼaxoʼob in beetmeʼ kin wuʼuyik kin chiʼichnaktal, baʼaleʼ in wojleʼ Jéeobaeʼ u yojel baʼax yaan tin puksiʼikʼal (1 Juan 3:19, 20). Desde ka káaj in tsʼáaik ichil in kuxtal le baʼaxoʼob ku kaʼansik le Bibliaoʼ, maas kiʼimak in wóol yéetel jach yanten jeetsʼelil.

U KʼAABAʼ: JAILSON CORREA DE OLIVEIRA

U JAʼABIL: 33

KAJAʼAN: BRASIL

KAʼACHEʼ: JACH KU KÁALTAL YÉETEL KU DROGARKUBA

LE BIX KUXLIKEN KAʼACHOʼ: Síijen tu noj kaajil Bagé yaan tu luʼumil Brasil. Tin kaajaleʼ yaan kex cien mil máakoʼobiʼ, yéetel naatsʼ kaʼach tiʼ u luʼumil Uruguay. Teʼeloʼ maases ku yúuchul paakʼal yéetel ku tséentaʼal wakaxiʼ. Tsʼoʼoleʼ teʼ tuʼux líikʼenoʼ jach yaʼab máakoʼob óotsiloʼobiʼ yéetel yaan yaʼab u bandai maleantes kaʼachi, tsʼoʼoleʼ yaʼab táankelem paalaloʼob ku sen káaltaloʼob yéetel ku drogarkubaʼobiʼ.

Le ka tin pʼataj in bin xookeʼ, joʼopʼ in káaltal, in tsʼuʼutsʼik marihuana yéetel kin wuʼuyik kaʼach le paax ku kʼaabaʼtik heavy metal. Maʼatech in creertik kaʼach wa yaan Dios, tumen kin tuklikeʼ wa yaneʼ  bejlaʼa minaʼan sen muʼyajil yéetel talamiloʼob teʼ yóokʼol kaabaʼ.

Jach utstintʼaan in paxik kaʼach guitarra yéetel yaan horaeʼ ku meyajten u libroi Apocalipsis utiaʼal in beetik kʼaayoʼob. Baʼaleʼ maʼ bin utsil tiʼ in conjunto jeʼex in páaʼtik kaʼachoʼ, le oʼolaleʼ joʼopʼ in drogarkimba yéetel baʼaxoʼob maas fuertetakoʼob. Tumen jach suuk in drogarkimba kaʼacheʼ pʼáat maʼ saajken in kíimil ikil u píit máan in drogarkimbaiʼ. Kin tuklik kaʼacheʼ maʼ jelaʼan ka kíimken beyoʼ tumen yaʼab tiʼ le máaxoʼob jatsʼuts in wuʼuyik u kʼaayoʼob kaʼachoʼ bey kíimikoʼoboʼ.

Kin kʼáatik kaʼach taakʼin tiʼ in abuela, le máax nojochkíintenoʼ, baʼaleʼ chéen utiaʼal in manik drogaʼob. Yaan kʼiineʼ ku kʼáatikten tiʼ baʼax kin xupik le taakʼin ku tsʼáaiktenoʼ, baʼaleʼ teneʼ kin tusik kaʼachi. Tsʼoʼoleʼ maʼ chéen leloʼ, joʼopʼ in wokskimba tiʼ baʼaloʼob yaan yil yéetel espiritismo. Jach jatsʼuts in wilik kaʼach le magia negraoʼ tumen kin tuklik jeʼel u yáantken in maas maʼalobkíint le kʼaayoʼob kin jóoʼskoʼ.

BIX TU KʼEXIL IN KUXTAL LE BIBLIAOʼ: Ka káaj in xokik le Biblia yéetel in bin teʼ muchʼtáambaloʼob ku beetik u j-jaajkunajoʼob Jéeobaoʼ, joʼopʼ in kʼexik bix in tuukul. Jujumpʼíitileʼ joʼopʼ in kaʼa yaabiltik le kuxtaloʼ yéetel joʼopʼ in wilik u yantalten kiʼimak óolal. Teʼ kʼiinoʼob jeʼeloʼ chowak kaʼach in pool, lelaʼ utiaʼal in weʼesik maʼ kiʼimak in wóol yoʼolal yaʼab baʼaloʼob ku yúuchloʼobiʼ. Kʼuchen in naʼateʼ wa in kʼáat in beet baʼax utstutʼaan Dioseʼ, unaj in pʼatik in káaltal, in tsʼuʼutsʼ chamal yéetel in drogarkimba. Yéetel unaj xan in xulik in wuʼuyik le paaxoʼob utstintʼaan in wuʼuyik kaʼachoʼ.

Ka yáax binen tiʼ le muchʼtáambal ku beetik u j-jaajkunajoʼob Jéeobaoʼ, tin wilajeʼ u tsʼaamoʼob upʼéel cuadro teʼ pakʼ tuʼux tsʼíibtaʼan upʼéel teksto tiʼ le Bibliaoʼ. Lelaʼ u tekstoi Proverbios 3:5, 6, tuʼux ku yaʼalik: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej». Tuukulnajen tiʼ le baʼax ku yaʼalik le tekstoaʼ ka tin tsʼáaj cuentaeʼ wa kin chaʼik u nuʼuktiken Jéeobaeʼ yaan u yáantken in wutskíint in kuxtal.

Baʼaleʼ maʼ chéen chʼaʼabil úuchik in pʼatik le kʼaakʼas kuxtal kin bisik kaʼachoʼ, tumen kin wuʼuyik bey jeʼex ka u yóot u xotʼ upʼéel u kʼab máakeʼ (Mateo 18:8, 9). In wojel kaʼacheʼ wa chéen jujumpʼíitil ka in wil in pʼatik tuláakaleʼ maʼ kin béeytal. Le oʼolaleʼ upʼéel kʼiineʼ tin waʼalaj: «¡Way kun náakleʼ!», ka tin pʼataj tuláakal le vicioʼob yantenoʼ. Tin xulaj in biskimba yéetel le máaxoʼob jeʼel u beetkoʼob in kaʼa lúubul tiʼ baʼaloʼob kʼaastakoʼ yéetel tin xulaj in bin teʼ tuʼuxoʼob suuk in bin kaʼachoʼ.

Teʼ kʼiinoʼob jeʼeloʼ, tin wilaj in tuukul chéen tiʼ le baʼaxoʼob maʼalobtak kin beetikoʼ maʼ tiʼ le baʼaxoʼob chiʼichnakkúuntkenoʼ. Tin tuklaj bukaʼaj kiʼimak óolal jeʼel u yantalten wa ka u yil Jéeoba táan in bisik upʼéel kuxtal limpio tu táaneʼ. Tin sen kʼáatajtiʼ ka u yáanten in tuʼubs tuláakal le baʼaxoʼob kin beetik kaʼachoʼ yéetel ka tuukulnaken tiʼ le baʼaxoʼob maʼalobtak kun káajal in beetkoʼ, letiʼeʼ jach tu yáanten. Kex yanchaj kʼiinoʼob tin kaʼa beetaj baʼax maʼ maʼalobeʼ, tin kʼáataj ka seguernak u tsʼaʼabalten xook yéetel le Bibliaoʼ kex yaan kʼiin maʼ jach máanak in kalaʼaniliʼ.

Tin tsʼáaj cuenta jach jaajtak tuláakal le baʼaxoʼob kin kanik teʼ Biblia, jeʼex u yaʼalik jach u yaabilmoʼon Diosoʼ, le u yaʼalik maʼ kun xáantal ken u xuʼuls le religión maʼatech u kaʼansik u jaajiloʼ, yéetel le u yilik u kʼaʼaytaʼal le maʼalob péektsil tuláakal tuʼuxoʼ (Mateo 7:21-23; 24:14; 1 Pedro 5:6, 7.) Kʼuchen in naʼat baʼaxten ku yúuchul tuláakal le baʼaxoʼob maʼ tin naʼatik kaʼachoʼ. Le oʼolaleʼ tin chʼaʼatuklaj in kʼubkimba in meyajt Dios. In kʼáat kaʼach in weʼes tiʼ jach kiʼimak in wóol úuchik u yáantken in kʼex in kuxtal.

LE UTSILOʼOB TSʼOʼOK U TAASIKTENOʼ: Anchaj u biilal in kuxtal (Eclesiastés 12:13). Bejlaʼeʼ maʼatech in taasik chiʼichnakiloʼob tiʼ in láakʼtsiloʼob, baʼaxeʼ kin wilik in wáantkoʼob. Jeʼex tiʼ in abuelaeʼ tin tsikbaltaj le baʼaxoʼob táan in kanik teʼ Bibliaoʼ, ka tu chʼaʼatuklaj xan u meyajtik Jéeoba. Jujuntúul tiʼ in láakʼtsiloʼob yéetel utúul máax ku paax kaʼach tin wéeteleʼ bey xan tsʼoʼok u beetikoʼoboʼ.

Bejlaʼeʼ tsʼokaʼan in beel; teen yéetel in wataneʼ k-máansik yaʼab tiempo táan k-kaʼansik tiʼ uláakʼ máakoʼob le baʼaxoʼob ku yaʼalik le Bibliaoʼ. Bejlaʼeʼ jach kin kʼubik in wóol tiʼ Jéeoba yéetel tuláakal in puksiʼikʼal, lelaʼ tsʼoʼok u taasikten yaʼab utsiloʼob.

[U tsolajil le oochel teʼ táan juʼun 29]

«Jujumpʼíitileʼ joʼopʼ in kaʼa yaabiltik le kuxtaloʼ yéetel joʼopʼ in wilik u yantalten kiʼimak óolal»