Tsolnuʼukoʼob utiaʼal le familiaʼoboʼ

Kaʼans a paalal u kanáantubaʼob

Loida, * juntúul maamatsil kajaʼan Mexicoeʼ ku yaʼalik: «Tumen ku tʼoʼoxol condón teʼ escuelaʼoboʼ, le paalaloʼ ku tuklikoʼobeʼ wa ku kanáantkubaʼobeʼ maʼ kʼaas ka yanak baʼal u yiloʼob yéetel wa máaxiʼ».

Nobuko, juntúul maamatsil kajaʼan Japoneʼ, ku yaʼalik: «Le ka tin kʼáataj tiʼ in hijo baʼax unaj u beetik wa ku pʼáatal tu juunal yéetel u noviaeʼ, tu yaʼalajten: “Maʼ in wojliʼ”».

¿MÁASAʼ le ka joʼopʼ u líikʼil u xíimbal a chan hijoeʼ ta wilaj a kanáantkeʼex utiaʼal maʼ u yúuchul loob tiʼ? Maʼ xaaneʼ ta pixeʼex le tuʼux ka enchufartikeʼex wa baʼaxoʼ, ta líiʼseʼex le baʼaxoʼob yaan u yejoʼ yéetel uláakʼ baʼaloʼob utiaʼal a kanáantkeʼex.

Baʼaleʼ tumen bejlaʼa tsʼoʼok u chan nojochtaleʼ, yaan uláakʼ talamiloʼob maas nuuktak ku aktáantik yéetel ku maas kʼaʼabéettal a kanáantkeʼex. Maʼ xaaneʼ ku máan ta tuukuleʼex wa táan u chaʼantik pornografía a hijoʼex. Wa maʼ xaan xaneʼ juntúul a hijaʼexeʼ táan u chʼaʼik u fotos tuʼux chaknuul u yilaʼal utiaʼal u túuxt tiʼ uláakʼ máakoʼob tiʼ celular. Maʼ xaaneʼ hasta tsʼoʼok u pʼáatal maʼ táan a weenleʼex tumen táan a tuklikeʼex lelaʼ: «¿Tsʼoʼok wa ta tʼaan u yantal baʼax u yil yéetel wa máax?».

Ku yuʼubkoʼob jach kʼaʼabéet u vigilartikoʼob

Yaan taatatsiloʼob tuklikeʼ bul kʼiin kʼaʼabéet u kanáantik u paalaloʼob utiaʼal maʼ u beetkoʼob baʼax kʼaas. Baʼaleʼ ken máanak kʼiineʼ ku tsʼáaikoʼob cuentaeʼ le paalaloʼoboʼ tsʼoʼok u kanik bix jeʼel u taʼakikoʼob le baʼaxoʼob aʼalaʼantiʼob maʼ u beetkoʼoboʼ.

Jeʼex k-ilkoʼ u jach vigilartaʼal baʼax ku beetik le paalaloʼoboʼ maʼ letiʼe baʼax kʼaʼabéetoʼ. Mix Jéeoba Dios beetik bey utiaʼal u beetaʼal baʼax ku yaʼalikoʼ (Deuteronomio 30:19). ¿Baʼax túun jeʼel a beetkeʼex utiaʼal ka u chʼaʼtukult a paalaleʼex u beetkoʼob baʼax maʼalob yéetel ka u kanáantubaʼobeʼ? (Proverbios 27:11.)

Junpʼéel baʼax jeʼel u yáantajeʼ letiʼe ka tsikbalnak mantatsʼ le taatatsiloʼob yéetel u paalaloʼob tiʼ baʼaloʼob yaan yil yéetel sexooʼ. Maʼalob ka káajs a tsikbaltik tiʼ a paalal desde tu chichniloʼob, baʼaleʼ maʼ unaj u xuʼulul a tsikbaltiktiʼob kex tsʼoʼok u nuuktaloʼobiʼ (Proverbios 22:6). * Kʼaʼajakteʼexeʼ teʼex unaj a tsolik tiʼ a paalaleʼex le baʼaloʼobaʼ. Alicia, juntúul x-chʼúupal kajaʼan Gran Bretañaeʼ, ku  yaʼalik: «Yaan máaxoʼob aʼalikeʼ maas uts t-tʼaan k-tsikbal tiʼ sexo yéetel k-amigoʼob, baʼaleʼ maas maʼalob ka k-uʼuy baʼax ku yaʼalik k-taataʼob. Tumen maas jaajtak le baʼaxoʼob ku yaʼalikoʼoboʼ».

Kʼaʼabéet u kaʼansaʼaloʼob

Wa tsʼoʼok u chan táankelemtal a paalaleʼ, maʼ xaaneʼ u yojloʼob tuʼux u taal le chaanpaloʼoboʼ. Baʼaleʼ maʼ chéen le unaj u yojéeltkoʼobiʼ. Maʼalob ka u kan u «[chʼaʼnuʼuktoʼob] baʼax le utsoʼ bey xan baʼax le kʼaasoʼ» (Hebreob 5:14). Le paalaloʼoboʼ kʼaʼabéet u kaʼansaʼaltiʼob baʼaxoʼob jach maʼalobtak jeʼel u yáantkoʼob utiaʼal u chʼaʼtuklik u beetkoʼob baʼax maʼalob tak ken nuukchajkoʼob. Baʼaleʼ ¿baʼax jeʼel a beetkeʼex utiaʼal u tsʼáaik ichil u kuxtal a paalaleʼex le baʼaxoʼob ka kaʼanskeʼextiʼoboʼ?

Yáaxeʼ ilawileʼex baʼaxoʼob ku tuklikoʼob. Maʼ xaaneʼ teʼexeʼ a wojleʼex, u yantal baʼax u yil máak yéetel máax maʼ u núupeʼ, kʼeban tu táan Dios (1 Tesalonicailoʼob 4:3). Maʼ xaaneʼ a paalaleʼexeʼ u yojloʼob baʼaxoʼob ka creertikeʼex, yéetel jeʼel tak u yaʼalikoʼob de memoriail tiʼ baʼax tekstoiloʼob ka jóoʼskeʼex le baʼax ka creertikeʼexoʼ. Le oʼolal wa ka kʼáataʼak tiʼ a hijo baʼax ku tuklik yoʼolal u yantal baʼax u yil máak yéetel máax maʼ u núupeʼ, yaan u yaʼalikoʼob maʼ maʼalobiʼ.

Baʼaleʼ maʼ chéen yaan yéetel u yojéeltkoʼob lelaʼ. Junpʼéel libro ku tʼaan tiʼ sexo, ku kʼaabaʼtik Sex Smart, ku tsolikeʼ yaʼab táankelem paalaleʼ chéen ku yaʼalikoʼob le baʼax suuk u yuʼubik u yaʼalik xan u taataʼoboʼ, tumen «maʼ yiijchajak u tuukuloʼobiʼ». Yéetel ku yaʼalik xan: «Ken u aktáantoʼob junpʼéel talamil tuʼux ku kʼaʼabéettal u jáan chʼaʼtuklikoʼob baʼax ken u beetoʼobeʼ, teʼ ku yilkoʼob u yajiliʼ». Le oʼolal maʼalob ka a kaʼanseʼex tiʼ a paalaleʼex u chʼaʼtukloʼob u beetkoʼob baʼax maʼalob. ¿Bix jeʼel a wáantkeʼexoʼobeʼ?

Aʼaleʼextiʼob baʼax ka tuklikeʼex. Maʼ xaaneʼ maʼ maʼalob a wilkeʼex u yantal baʼax u yil máak yéetel wa máax táanil tiʼ u tsʼoʼokol u beeliʼ. Wa bey a tuukuleʼexoʼ maʼalob ka a tsoleʼex tiʼ a paalaleʼex mantatsʼ. Junpʼéel libroeʼ ku yaʼalikeʼ, «ken aʼalaʼak tiʼ le táankelem paalal tumen u taataʼob jach junpuliʼ maʼ maʼalob ka yanak baʼax u yiloʼob yéetel wa máaxoʼ, letiʼobeʼ maʼ tu jáan antal baʼax u yiloʼob yéetel wa máax» (Beyond the Big Talk).

U yojéeltik le paalal baʼax ku tuklik u taataʼoboʼ, maʼ u kʼáat u yaʼal wa yaan u tuukuloʼob xan jeʼex letiʼoboʼ. Baʼaleʼ jeʼel u yáantaj utiaʼal u kanik u chʼaʼtukloʼob tu juunaloʼob baʼax ken u beetoʼobeʼ. Tsʼoʼok xan u yilaʼaleʼ le táankelem paalaloʼoboʼ ku kʼamkoʼob le nuʼuktaj ku tsʼaʼabaltiʼob tumen u taataʼob, kex maʼatech u yóotik u kʼamoʼob tu paaliloʼob.

JEʼEL U PÁAJTAL A BEETKEʼEX BEYAʼ. Jeʼel u páajtal a waʼalikeʼex junpʼéel noticia ta wuʼuyeʼex utiaʼal a káajsik a tsikbaleʼex tu yéeteloʼobeʼ. Jeʼex wa ta wuʼuyeʼex junpʼéel noticia yoʼolal wa máax tu violartaj juntúul koʼoleleʼ, jeʼel u páajtal a waʼalikeʼxeʼ: «Jach táaj kʼasaʼan le máakoʼob ku yilkoʼob le koʼoleloʼob chéen bey baʼaloʼob utiaʼal u máansik u tsʼíibolaloʼoboʼ. Techeʼ ¿baʼax a tuklik péekskoʼob u beetoʼob baʼaloʼob beyaʼ?».

Aʼal u jaajil tiʼob. Unaj u yaʼalaʼal tiʼ le paalal le talamiloʼob ku taasik le sexooʼ (1 Corintoiloʼob 6:18; Santiago 1:14, 15). Baʼaleʼ maʼ u tuʼubulteʼexeʼ le Bibliaoʼ ku yaʼalikeʼ le sexooʼ, junpʼéel siibal ku taal tiʼ le Máax beetmiloʼonoʼ, yéetel maʼ junpʼéel táabsajil ku meyaj tiʼ Satanasiʼ (Proverbios 5:18, 19; Cantares 1:2). Wa cada ka tʼaan kʼaas tiʼ le sexooʼ, a paalaleʼ maʼ ken u yiloʼob jeʼex unajoʼ mix jeʼex u yaʼalik le Bibliaoʼ. Corrina juntúul x-chʼúupal, kajaʼan Franciaeʼ, ku yaʼalik: «Tumen sen kʼaas u tʼaan in taataʼob yoʼolal le sexooʼ, pʼáat xan kʼaas in wilik».

Le oʼolaleʼ ilawil a kaʼanskeʼex tiʼ a paalaleʼex u jaajil yoʼolal le sexooʼ. Nadia, juntúul maamatsil kajaʼan tu luʼumil Mexicoeʼ, ku yaʼalik: «Teneʼ mantatsʼ kin wilik u naʼatik in paalal maʼ kʼaas le sexo ichil le máaxoʼob tsʼokaʼan u beeloʼoboʼ, tumen junpʼéel siibal tiʼ Jéeoba u taal. Tsʼoʼoleʼ kin wilik u naʼatkoʼob xaneʼ le sexooʼ jeʼel u taasik kiʼimak óolal tiʼobeʼ wa jeʼel xan u taasik talamiloʼobeʼ; baʼaleʼ lelaʼ yaan yil yéetel baʼax ken u chʼaʼtukult u beetkoʼob».

JEʼEL U PÁAJTAL A BEETKEʼEX BEYAʼ. Ken kaʼa tʼaanakeʼex yoʼolal sexo yéetel a paalaleʼ, ilawil maʼ a beetkeʼex u tuklikoʼob wa kʼaas. Maʼ a suʼlaktal a waʼaleʼex tiʼ a paalaleʼex le sexooʼ junpʼéel siibal u tsʼaamaj Dios, yéetel ken tsʼoʼokok u beeloʼobeʼ teʼ ken u yuʼuboʼob le kiʼimak óolal ku taaskoʼ. Eʼes tiʼ a paalal ka confiareʼex yaan u beetkoʼob le baʼax ku yaʼalik le Biblia yéetel yaan u kanáantkubaʼob tak ken tsʼoʼokok u beeloʼoboʼ.

 Aʼaleʼextiʼob ku taasik talamil. Utiaʼal ka u kan u chʼaʼtukult máak baʼax maʼalobeʼ, maʼ chéen unaj u yojéeltik baʼax maʼalob yéetel baʼax kʼaasiʼ. Kʼaʼabéet u kanik u yéey baʼax ken u beete bey xan u yilik baʼax utsiloʼob wa baʼax talamiloʼob jeʼel u taaskeʼ. Emma, juntúul máax meyajtik Dios kajaʼan Australiaeʼ, ku yaʼalik: «Tin x-chʼúupalileʼ, in wojel baʼaxoʼob uts tu tʼaan Dios. Baʼaleʼ maʼ tin jach creertik kaʼachi. Le baʼaxoʼob úuchten ka tsʼoʼokoʼ, tu yáanten in wil baʼaxten unaj u beetaʼal baʼax ku yaʼalik le Bibliaoʼ yéetel baʼax jeʼel u yúuchul tiʼ máak wa maʼ u beetkeʼ».

Le Bibliaoʼ jeʼel u yáantkoʼoneʼ tumen ku tsolik baʼaxoʼob ku yaʼalik u ley Dios yéetel baʼax jeʼel u yúuchul wa maʼ u beetaʼaleʼ. Junpʼéel baʼax eʼeskeʼ letiʼe baʼax ku yaʼalik Proverbios 5:8, 9. Teʼeloʼ ku yaʼalik tiʼ juntúul xiʼipal ka púutsʼuk tiʼ u kʼebantal yéetel juntúul koʼolel, tumen wa maʼeʼ yaan u xuʼulul u yeʼesaʼal tsiikil tiʼ. Le máax ku yantal baʼax u yil yéetel wa máax táanil tiʼ u tsʼoʼokol u beeloʼ ku yuʼubik bey maʼ u yaabiltmubaeʼ yéetel ku mixbaʼalkúuntkuba. Tsʼoʼoleʼ ku xuʼulul u biskuba yéetel Jéeoba yéetel ku xuʼulul u yeʼesaʼal interés tiʼ tumen u maasil. Wa a hijo ku yilik u beetik baʼax ku yaʼalik le Bibliaoʼ, yaan u tuukul tiʼ le talamiloʼob jeʼel u taasik tiʼ u wíinklil, tiʼ u tuukul beey xan tiʼ bix u biskuba yéetel Dios le u tsʼáaikuba tu contra u leyoʼoboʼ. *

JEʼEL U PÁAJTAL A BEETKEʼEX BEYAʼ. Meyajnakteʼex kettʼaanoʼob utiaʼal a weʼeskeʼex tiʼ a hijo u kʼaʼanaʼanil u beetik baʼax ku yaʼalik le Bibliaoʼ. Maʼ xaaneʼ jeʼel u páajtal a waʼalikeʼex tiʼeʼ: «Le kʼáakʼoʼ jeʼel u yáantajeʼ, baʼaleʼ yaan horaeʼ jeʼel xan u beetik loobeʼ. ¿Máasaʼ maʼ igual u kʼáakʼil junpʼéel kʼáax ku yelel tiʼ junpʼéel chan kʼáakʼ tuʼux k-cocinariʼ? ¿Jeʼel wa u páajtal xan u yúuchul bey yéetel le sexooʼ? Bey túunoʼ ¿baʼax jeʼel u yúuchul wa maʼ ta beetik baʼax ku yaʼalik Dios, yéetel ka tsʼoʼokbesik u tsʼíibolal u yantal baʼax a wil yéetel wa máax?». Tsʼoʼoleʼ xokeʼex Proverbios 5:3-14 utiaʼal a wáantik tuukul tiʼ le talamiloʼob jeʼel u taasik u múul chital yéetel wa máaxoʼ.

Baʼaleʼ kex yaan hora taak u beetik máak baʼax maʼalobeʼ maʼ chéen chʼaʼabiliʼ. Takao, juntúul xiʼipal japonil 18 jaʼaboʼob yaantiʼeʼ, ku yaʼalik: «In wojel baʼax unaj in beetik, baʼaleʼ maʼ chéen chʼaʼabil in wilik in beetkiʼ». Wa bey u yuʼubkuba a hijooʼ, aʼaleʼex tiʼ maʼ chéen tiʼ letiʼ ku yúuchul beyoʼ. Tak le apóstol Pablo juntúul máax chúukpaj u yóol u beet baʼax maʼalobeʼ, tu yaʼalaj: «Le ken in wóolt in beet le utsoʼ, chéen kin wilik tiʼ teen le kʼaasoʼ» (Romailoʼob 7:21).

Tsʼoʼoleʼ lelaʼ jeʼel u yáantaj utiaʼal ka chíikpajak baʼax ken u chʼaʼtukult u beetik ken u chʼaʼ u nojoch máakileʼ: juntúul máax ku beetik chéen le baʼaxoʼob ku yaʼalaʼaltiʼ yéetel ku tsʼíiboltikoʼ, wa juntúul máax u yojel u chʼaʼtukult u beetik baʼax maʼalob. Tuláakal le baʼaloʼob maʼalobtak kaʼansaʼantiʼoʼ le kun áantik u chʼaʼtukult u beetik baʼax maʼalob.

[Tsolajiloʼob]

TUKULTE

▪ ¿Táan wa u yeʼesik in hijo u yojel baʼax uts yéetel baʼax kʼaas?

▪ Le ken tʼaanaken yéetel in paalal yoʼolal sexoeʼ, ¿kin waʼalik wa tiʼob junpʼéel siibal u tsʼaamaj Jéeoba, wa kin waʼaliktiʼob chéen junpʼéel táabsajil ku meyaj tiʼ Satanás?

[U tsolajil le oochel teʼ táan juʼun 12]

Junpʼéel baʼal jeʼel u yáantajeʼ

Junpʼéel libro ku tʼaan tiʼ bix unaj u líiʼsaʼal le paalaloʼoboʼ ku yaʼalik: «Le tsolnuʼukoʼob ku tsʼáaik le Biblia yoʼolal le sexooʼ ku yáantik máak mantatsʼ. Lelaʼ ku chíikpajal yoʼolal baʼax ku muʼyajtik le x-chʼúupalal yéetel le xiʼipalaloʼob úuchik u yantal baʼax u yiloʼob yéetel wa máax jach tu paaliloʼoboʼ, úuchik u yantal u paalaloʼob kex maʼ tsʼokaʼan u beeloʼobiʼ wa úuchik u tsaʼayal tiʼob junpʼéel kʼaakʼas kʼojaʼanil jeʼex le sidaoʼ. Jeʼex túun k-ilkoʼ jach maʼalob baʼax ku yaʼalik le Biblia yoʼolal u páaʼtik máak u yantal baʼax u yil yéetel u núup tak ken tsʼoʼokok u beeloʼ, yéetel letiʼe baʼax maas maʼalob ka u beet máak teʼ kʼiinoʼobaʼ» (Parenting Teens With Love and Logic).