Kaanbalnakoʼon tiʼ u Tʼaan Dios

¿Bix jeʼel a wojéeltik máakalmáak u jaajil religioneʼ?

Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.

1. ¿Chéen wa junpʼéel jaajil religión yaan?

Jesuseʼ chéen junpʼéel jaajil religión tu kaʼansaj tiʼ u disipuloʼob. Lelaʼ bey junpʼéel bej ku bisik máak tiʼ kuxtaleʼ yéetel Jesuseʼ tu yaʼaleʼ chéen junpʼíit máaxoʼob ku binoʼob teʼ bejaʼ (Mateo 7:14). Dioseʼ chéen ku kʼamik u adoración le máaxoʼob beetik le baʼax ku yaʼalik le Bibliaoʼ. Le oʼolaleʼ le jaajil cristianoʼoboʼ chéen junpʼéeliliʼ baʼal ku creertikoʼobeʼ. (Xok Juan 4:23, 24; 14:6; Efesoiloʼob 4:4, 5.)

2. ¿Baʼaxten yaan yaʼab religionoʼob aʼalik u jaajil cristianoʼob?

Le maʼ jaajil profetaʼoboʼ tsʼoʼok u yoksikoʼob kaʼansajoʼob maʼ jaajtak ichil le jaajil cristianoʼoboʼ, lelaʼ chéen ku beetkoʼob utiaʼal u yutsiloʼob. Jeʼex tu yaʼalil Jesuseʼ, ku taaskubaʼob bey u tamanoʼobeʼ baʼaleʼ le baʼaxoʼob ku beetkoʼoboʼ ku yeʼesik bey tsʼíitsʼik chakmoʼoloʼobeʼ (Mateo 7:13-15, 21, 23). Maases le ka tsʼoʼok u kíimil le apostoloʼob ka joʼopʼ u kaʼansaʼal baʼaloʼob maʼ jaajtakoʼ. (Xok Beetaʼanoʼob [Hechos] 20:29, 30.)

3. ¿Baʼax eʼesik máax le jaajil cristianoʼoboʼ?

Ku beetkoʼob baʼax ku yaʼalik le Bibliaoʼ tumen u yojloʼob u Tʼaan Dios. Letiʼobeʼ maases ku yilik u beetkoʼob baʼax ku kaʼansik le Bibliaoʼ ke le baʼaxoʼob ku taaloʼob chéen tiʼ wíinikoʼ (Mateo 15:7-9). Ku tsʼáaik ichil u kuxtaloʼob le baʼaxoʼob ku kaʼanskoʼoboʼ. (Xok Juan 17:17; 2 Timoteo 3:16, 17.)

Ku nojbeʼenkúuntkoʼob u kʼaabaʼ Dios, Jéeoba. Jesuseʼ tu yáantaj le máakoʼob utiaʼal ka u kʼaj óoltoʼob u kʼaabaʼ yéetel u modos Diosoʼ. Letiʼeʼ tu kaʼansajtiʼobeʼ unaj u oraroʼob utiaʼal ka kiliʼichkúunsaʼak le kʼaabaʼaʼ (Mateo 6:9). Teʼ tuʼux kajaʼanechoʼ, ¿baʼax religionil kaʼansik jach unaj k-chʼaʼchiʼitik u kʼaabaʼ Dios? (Xok Juan 17:26; Romailoʼob 10:13, 14.)

  4. ¿Bix jeʼel a kʼaj óoltik máax u jaajil cristianoʼobeʼ?

Le jaajil cristianoʼoboʼ ku kʼaʼaytikoʼob u Reino Dios. Jesuseʼ túuxtaʼab way Luʼum utiaʼal u kʼaʼaytik le gobiernoaʼ, lelaʼ letiʼe baʼax ken u taas yaʼab utsiloʼob tiʼ wíinikoʼ. Tak le kʼiin nukaʼaj kíimiloʼ Jesuseʼ tu kʼaʼaytaj lelaʼ (Lucas 4:43; 8:1; 23:42, 43). Letiʼeʼ tu túuxtaj xan tiʼ u disipuloʼob ka u kʼaʼaytoʼob le Reinooʼ. Le oʼolaleʼ wa yaan máax ku taal yéetel ku tsikbaltiktech yoʼolal u Reino Dioseʼ, maʼ xaaneʼ ¿tiʼ baʼax religionil u taal? (Xok Mateo 10:7; 24:14.)

U disipuloʼob Jesuseʼ maʼatech u táakpajloʼob tiʼ le baʼaxoʼob ku beetaʼal teʼ kʼasaʼan yóokʼol kaabaʼ. Maʼatech u yoksikubaʼob tiʼ política, mix tiʼ uláakʼ baʼaloʼob yaan teʼ yóokʼol kaabaʼ (Juan 17:16). Maʼatech u beetkoʼob baʼax kʼaas yéetel maʼatech u yeʼeskoʼob kʼaakʼas modos jeʼex u beetaʼal tumen u maasil máakoʼoboʼ. (Xok Santiago 1:27; 4:4.)

5. ¿Baʼax jach eʼesik máax le jaajil cristianoʼoboʼ?

Le jaajil cristianoʼoboʼ ku paklan yaabiltikubaʼob. Le Bibliaoʼ u kaʼansmaj tiʼobeʼ unaj u yeʼeskoʼob tsiikil tiʼ tuláakal máak kex yaanal u raza. U suukileʼ le religionoʼob maʼatech u kaʼansik u jaajiloʼ ku táakpajloʼob tiʼ guerraʼob, baʼaleʼ u jaajil cristianoʼobeʼ maʼatech (Miqueas 4:1-4). Letiʼobeʼ yéetel kiʼimak óolal ku xupik u tiempoʼob yéetel u muukʼoʼob utiaʼal u yáantkoʼob yéetel ka líikʼik u yóol le máakoʼoboʼ. (Xok Juan 13:34, 35; 1 Juan 4:20, 21.)

¿Baʼax religionil kaʼansik baʼax ku yaʼalik le Bibliaoʼ, ku nojbeʼenkúuntik u kʼaabaʼ Dios yéetel ku kʼaʼaytik chéen le Reino ken u taas utsiloʼob tiʼ wíinikoʼ? ¿Máakalmáak le religión jach u yaabiltmubaʼob yéetel maʼatech u táakpajloʼob tiʼ guerraʼoboʼ? Tsʼoʼok u yilaʼaleʼ chéen u j-jaajkunajoʼob Jéeoba (1 Juan 3:10-12).

Wa a kʼáat a wojéelt u maasileʼ, ilawil u xookil quince tiʼe libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.

[Foto yaan teʼ táan juʼun 14]

«Ku yaʼalikoʼobeʼ u kʼaj óoloʼob Jajal Dios, baʼaleʼ tu yoʼolal baʼax ku beetkoʼobeʼ ku yilaʼal maʼ jaajiʼ.» (Tito 1:16)