Kaʼans a paalaleʼex

Tiʼ baʼax súutukiloʼob maʼ unaj k-weenliʼ

¿MÁASAʼ maʼ unaj u wenel máak teʼ escuelaoʼ? Yaan horaeʼ yaʼab máaxoʼob ku weenloʼob tu yorail le xookoʼ, baʼaleʼ wa a kʼáat kaanbaleʼ maʼ unaj a weenliʼ. Láayliʼ xan bey unaj a beetik teʼ muchʼtáambaloʼob tuʼux ku xoʼokol le Bibliaoʼ.

¿Baʼax jeʼel u yáantkech utiaʼal maʼ a wenel? *... Maʼ xaaneʼ maʼalob ka chilakech temprano utiaʼal a wenel. Wa maʼ xaaneʼ jeʼel u páajtal a chital wenel u súutuk de kʼiineʼ. Le Bibliaoʼ ku tʼaan tiʼ juntúul táankelem xiʼipal ween le táan kaʼach u yuʼubik u tʼaan le apóstol Pablooʼ. Koʼox ilik baʼax jeʼel u páajtal a kanik tiʼ le baʼax úuchaʼ. Kaxt ta Biblia le capítulo 20 tiʼ u libroil Beetaʼanoʼob wa Hechosoʼ yéetel xok le versículo 7 tak 12.

Pabloeʼ táan kaʼach u xíimbaltik junpʼéel nojoch kaaj yaan tu jáal le kʼáaʼnáab ku kʼaabaʼtik Troasoʼ. Le Bibliaoʼ ku yaʼalikeʼ tumen «yaan u jóokʼol tu jeel kʼiin» tiʼ barcoeʼ, «tʼaanaj tak chúumuk áakʼab». Le Bibliaoʼ ku yaʼalikeʼ «juntúul táankelem xiʼipal Eutico u kʼaabaʼeʼ kulukbal tiʼ junpʼéel kalon iikʼ [wa ventana]. Tu yoʼolal chowakchaj u tseʼek [wa kʼaʼaytaj] Pabloeʼ jach taakchaj u wenel le xiʼipaloʼ». ¿Taak wa a wojéeltik baʼax úuch tiʼ letiʼ?...

Tumen «tʼúub u weneleʼ lúub tu yóox yáal le najoʼ». Tuláakal máaxoʼob yanoʼob teʼeloʼ éemoʼob tu séebaʼanil yéetel Pablo u yiloʼob le xiʼipaloʼ. Baʼaleʼ ka éemoʼobeʼ tu yiloʼob kimen Eutico. ¿Bix a tuklik tu yuʼubilubaʼob?... Le Bibliaoʼ ku yaʼalikeʼ Pabloeʼ noklaj tu yóokʼoleʼ ka tu méekʼaj. Ka tu yaʼalaj tiʼ u maasiloʼoboʼ: «¡Maʼ u jaʼakʼal a wóoleʼex Euticoeʼ kuxaʼan!». Maʼalob xan yanik le xiʼipal jeʼex tu yaʼalil Pablooʼ tumen Dios kaʼa kuxkíinte.

 ¿Baʼax ku kaʼansiktoʼon yoʼolal Dios le baʼax úuch tiʼ Euticooʼ?... Ku kaʼansik toʼoneʼ Jéeoba Dioseʼ yaan u páajtalil u sutik u kuxtal le kimenoʼoboʼ ichileʼ tak le mejen paalaloʼ. Tsʼoʼoleʼ letiʼeʼ jach ku naʼatikech yéetel maas u yaabiltmech ke a taataʼob. Ka taal Jesús way Luʼumeʼ tu yaabiltaj xan le mejen paalal jeʼex u beetik u Taataoʼ. Letiʼeʼ maʼ chéen tu méekʼaj yéetel tu kiʼikiʼtʼantoʼobiʼ, baʼaxeʼ tu kaʼa kuxkíintaj jujuntúul táankelem paalaloʼob, ichileʼ juntúul x-chʼúupal 12 jaʼaboʼob tiʼ.

¿Bix a wuʼuyikaba úuchik a wojéeltik u yaabiltmech Dios?... Jeʼex techeʼ tuláakloʼon k-yaabiltmaj Dios le oʼolal k-kʼáat k-beet baʼax u kʼáat. ¿A kʼáat wa a wojéelt baʼax jeʼel u páajtal k-beetik utiaʼal k-eʼesik k-yaabiltmeʼ?... Jeʼex Jesuseʼ jeʼel u páajtal k-aʼalik tiʼ k-yaabiltmeʼ, letiʼeʼ tu yaʼalaj: «Teneʼ in yaabiltmaj le Taataoʼ». Baʼaleʼ maʼ chéen tu yaʼaliʼ, tu yeʼesaj xan.

Jesuseʼ tu beetaj baʼax aʼalaʼabtiʼ tumen Dios. Letiʼeʼ tu yaʼalaj: «Teneʼ mantatsʼ kin beetik le baʼax uts tu tʼanoʼ». Wa k-kʼáat xan k-beet beyoʼ yaan k-ilik k-beetik baʼax uts tu tʼaan Jéeoba yéetel u Hijo yéetel yaan k-ilik maʼ k-wenel teʼ súutukiloʼob maas kʼaʼanaʼantak jeʼex teʼ escuelaoʼ yéetel teʼ muchʼtáambaloʼob tuʼux ku xoʼokol le Bibliaoʼ.

XOK TA BIBLIA

Beetaʼanoʼob 20:7-12

Lucas 8:49-56

Juan 8:29; 14:31

[Tsolajiloʼob]