Síijen Moundsville, junpʼéel kaaj tranquilo yaan tu jáal le Río Ohio tu xamanil Virginia Occidental. Yéetel in sukuʼun yéetel in kaʼatúul wíitsʼineʼ, ¡maʼ túun náak k-óol báaxaliʼ! In taataʼobeʼ jach uts u modosoʼob, jach meeyjiloʼob yéetel ku yeʼesik u yutsiloʼob tiʼ u maasil. Maʼ yaʼab taakʼin yaantoʼoniʼ, baʼaleʼ mix juntéen pʼáatoʼon minaʼan le baʼax kʼaʼabéetoʼ. In papá yéetel in maamaeʼ u j-Jaajkunajoʼob Jéeoba. Desde t-chichnileʼ tu beetoʼob tuláakal le ku páajtal utiaʼal u kaʼanskoʼobtoʼon baʼax ku yaʼalik le Bibliaoʼ.

Baʼaleʼ desde tin táankelmileʼ káaj in tsʼíiboltik baʼaloʼob tu náachkunten tiʼ le baʼaxoʼob kaʼansaʼabtenoʼ. Kin tuklik kaʼacheʼ wa ka in beet le baʼax ku yaʼalik le Bibliaoʼ maʼ kun antal u biilal in kuxtaliʼ mix kun kiʼimaktal in wóol. Kin chéen aʼalikeʼ utiaʼal ka kiʼimakchajak in wóol jach tu jaajileʼ kʼaʼabéetten jáalkʼabil utiaʼal in beetik tuláakal le baʼax in kʼáatoʼ. Maʼ xáanchaj ka xuʼul in bin muchʼtáambaliʼ. In sukuʼun yéetel juntúul in wíitsʼineʼ bey xan tu beetiloʼoboʼ. In taataʼobeʼ jach tu tsʼáaj u yóol u yáantoʼonoʼob baʼaleʼ maʼ t-uʼuyaj tʼaaniʼ.

Maʼ tin tuklaj wa le jáalkʼabil ku yaʼalaʼaloʼ yaan u beetik in lúubul tiʼ baʼaloʼob kʼaastak. Juntéenjeak táan in suut tin xookeʼ, náatsʼ juntúul in wéet xook u tichʼten junpʼéel chamal, ka tin chʼaʼaj. Desde teʼ kʼiin jeʼeloʼ káaj in beetik yaʼab uláakʼ baʼaloʼob kʼaastak. Chéen ka tin wileʼ kin drogarkinba, kin káaltal yéetel kin máan yéetel koʼoleloʼob. Jeʼex máanik le jaʼaboʼoboʼ bey binik in túuntik uláakʼ drogaʼob maas kʼaastak, ka enviciarnajen. Úuchik in jach enviciareʼ hasta káaj in konik drogaʼob utiaʼal ka yanakten taakʼin in xup chéen beyoʼ.

Kex maʼ in kʼáat kaʼach in tukult bukaʼaj kʼaasil le baʼax kin beetkoʼ in concienciaeʼ mantatsʼ táan u kʼaʼajsikten. Baʼaleʼ kin wuʼuyik kaʼacheʼ mix baʼal jeʼel u páajtal in beetik utiaʼal in wutskíintik in kuxtaleʼ. Kex yaʼab máakoʼob yaan teʼ fiestaʼob yéetel teʼ conciertoʼob tuʼux kin máanoʼ, jach ku lúubul in wóol yéetel kin wuʼuyikinba tin juunal. Yaan kʼiineʼ kin tuklik: ¿bix úuchik in jach kʼastal wa jach maʼalob le kuxtal tu yeʼesoʼobten in taataʼoboʼ?

Kex kin tuklik minaʼan utskíinajil tiʼ in kuxtaleʼ, uláakʼoʼobeʼ maʼ bey tu tukliloʼobiʼ. Tu jaʼabil 2000, in taataʼobeʼ tu invitartenoʼob teʼ asamblea tiʼ distrito tiʼ u j-jaajkunajoʼob Jéeobaoʼ. Kex maʼ jach in kʼáateʼ binen tu yéeteloʼob. Jaʼakʼ in wóol le ka tin wileʼ in sukuʼun yéetel in wíitsʼin náachchajaʼanoʼob kaʼach tiʼ Dioseʼ binoʼob xaniʼ.

Le tiaʼanen teʼ asambleaoʼ tin tsʼáaj cuentaeʼ jach letiʼe local tuʼux binen utiaʼal junpʼéel u conciertoil rock junjaʼabjeakiloʼ. In wilik bukaʼaj jelaʼanil le asamblea tiʼ le conciertooʼ, jach tu beetaj in tuukul. Tumen teʼ conciertooʼ jach yaʼab basura ku puʼulul yéetel chéen u book chamal ku yuʼubaʼaliʼ. Óoliʼ tuláakal le máaxoʼob ku binoʼoboʼ kʼaas u modosoʼob, tsʼoʼoleʼ okʼom óol u letrail le kʼaayoʼoboʼ. Baʼaleʼ teʼ asambleaaʼ tuláakal máak kiʼimak u yóoloʼobiʼ yéetel ku náatsʼal u tʼanenoʼob kex úuch in wiloʼob. Tuláakal baʼal limpio, tsʼoʼoleʼ jach ku líiʼsik u yóol máak le baʼaxoʼob ku kaʼansaʼaloʼ. In tuukul tiʼ le utsil ku taasik u kuxtal máak jeʼex u yaʼalik le Bibliaoʼ tu beetaj u yaatal in wóol úuchik in pʼatik u jaajil (Isaías 48:17, 18).

Chéen pʼelak tsʼoʼokik le asambleaoʼ, tin chʼaʼtuklaj in suut tu kaajal Jéeoba. In sukuʼun yéetel in wíitsʼineʼ bey xan tu beetiloʼob úuchik binoʼob teʼ asambleaoʼ. Tu yóoxtúuliloʼon káaj k-xokik le Bibliaoʼ.

Junpʼéel teksto jach tu líiʼsaj in wóoleʼ Santiago 4:8, tuʼux ku yaʼalik: «Natsʼabaʼex tiʼ Jajal Dios, letiʼ xaneʼ bíin u natsʼuba tiʼ teʼex». Tin naʼateʼ wa in kʼáat in natsʼinba tiʼ Dioseʼ kʼaʼabéet in wutskíintik in kuxtal. Ichil le baʼaxoʼob kʼaʼabéetchaj in pʼatkoʼ letiʼe in tsʼuʼutsʼik chamaloʼ, in drogarkinba yéetel in káaltal (2 Corintoiloʼob 7:1).

Xuʼul in biskinba yéetel le máaxoʼob maʼ unajoʼ ka joʼopʼ in kaxtik amigoʼob ichil le máaxoʼob adorartik Jéeobaoʼ. Le anciano tu tsʼáajten xookoʼ jach tu yáanten. Mantatsʼ ku tʼanken tiʼ teléfono wa ku jáan máan u yil bix in beel. Tak bejlaʼeʼ juntúul tiʼ in maas maʼalob amigoʼob.

Tu jaʼabil 2001, okjaʼanajen utiaʼal in weʼesik tsʼoʼok in kʼubik in kuxtal tiʼ Dios. In sukuʼun yéetel in wíitsʼineʼ bey xan tu beetiloʼoboʼ. Chéen tukleʼex bukaʼaj kiʼimakchajik u yóol in papá, in maama yéetel le uláakʼ juntúul in wíitsʼin le ka tu yiloʼob tuláakloʼon táan k-múul meyajtik Jéeobaoʼ.

Kaʼacheʼ kin tuklikeʼ le Bibliaoʼ mix baʼal ku chaʼik u beetik máak, baʼaleʼ bejlaʼeʼ kin wilkeʼ ku kanáantkoʼon. Le Bibliaoʼ tu tsʼáajten u muukʼil utiaʼal in pʼatik le drogaʼob bey xan utiaʼal in kʼexik in kuxtal.

Jach kiʼimak in wóol tumen tiʼ yanen ichil le máaxoʼob adorartik Jéeoba tuláakal yóokʼol kaaboʼ. Jach tu jaajil u yaabiltmubaʼob, yéetel junmúuchʼ u meyajtikoʼob Jéeoba (Juan 13:34, 35). Ichil le máakoʼobaʼ tiʼ tin kʼaj óoltaj Adrianne, in x-kiʼichpan atan jach in yaabiltmoʼ. Tu kaʼatúuliloʼoneʼ jach kiʼimak k-óol k-meyajtik Dios.

Tu lugar in bin tu paach chéen le baʼax in kʼáatoʼ, bejlaʼeʼ jach in tsʼaamaj in wóol in kaʼans tiʼ le máakoʼob bix jeʼel u páajtal u jóoʼskoʼob u yutsil le Bibliaoʼ. Minaʼan uláakʼ baʼax jeʼel u taasikten maas yaʼab kiʼimak óolaleʼ. Bejlaʼeʼ jach yéetel u jaajil in wóol kin waʼalikeʼ le Bibliaoʼ tu kʼexaj in kuxtal. Tin kaxtaj le u jaajil jáalkʼabiloʼ.