Nojochchajen tu kaajil Turku, junpʼéel kaaj yaan tu jáal le kʼáaʼnáaboʼ. In taataeʼ campeón tiʼ box; teen yéetel in wíitsʼineʼ jach jatsʼuts k-ilik xan le deporte jeʼeloʼ. Teʼ escuela kaʼachoʼ ken kaxtaʼakten baʼateleʼ loox kin beetik. Tin paalileʼ ooken ichil junpʼéel pandilla, leloʼ tu beetaj in maas kʼastal. Joʼopʼ u jatsʼutstal in wuʼuyik heavy metal, ka joʼopʼ xan in tsʼíiboltik in paax ichil junpʼéel banda de rock utiaʼal in suut famosoil.

Tin manaj junpʼéel bateríaeʼ (nuʼukul paax) ka tin kaxtaj máaxoʼob jeʼel u paaxoʼob tin wéeteleʼ. Káaj in kʼaay ichil le bandaoʼ; teen u yáax vozil. Jach uts tin tʼaan in beetik in locoil teʼ escenariooʼ. Jach kʼaas bix k-vestirtikba kaʼachi yéetel kʼasaʼan máakoʼob k-ilaʼal, le oʼolal séeb úuchik k-kʼaj óoltaʼal. Káaj k-paax tu táan yaʼab máakoʼob, ka t-grabartaj jujunpʼéel discoʼob; le u tsʼookoʼ jach jatsʼuts uʼuyaʼabik tumen le máakoʼoboʼ. Tu jóokʼbal u jaʼabiloʼob 1980, binoʼon tu luʼumil Estados Unidos utiaʼal ka kʼaj óoltaʼakoʼon teʼeloʼ. Paaxnajoʼon Nueva York yéetel Los Ángeles, ka t-kʼaj óoltaj jujuntúul máakoʼob jach u yojloʼob le meyaj yaan yil yéetel le paaxoʼ, tsʼoʼoleʼ suunajoʼon tu luʼumil Finlandia.

Kex uts tin tʼaan tiaʼanen ichil le bandaoʼ, kin tsʼíiboltik kaʼach ka maas yanak u biilal in kuxtal. Jach in pʼeek in wilik u kʼasaʼanil le máakoʼob ku meyaj paaxoʼoboʼ. Maʼ kiʼimak xan in wóol yéetel le bix in kuxtaloʼ. Kin wuʼuyikinba jach kʼasaʼanen yéetel saajken in tóokaʼal teʼ infiernooʼ. Joʼopʼ in xokik libroʼob yaan yil yéetel religión, ka joʼopʼ xan in orar tiʼ Dios kex kin wuʼuyik mix bikʼin jeʼel in lúubul utsil tiʼeʼ.

Utiaʼal in náajaleʼ kin meyaj kaʼach tiʼ junpʼéel oficina tiʼ correo yaan teʼ tuʼux kajaʼanenoʼ. Juntéenjeakeʼ tin wojéelteʼ u j-jaajkunaj Jéeoba juntúul tiʼ in wéet meyajoʼob. Tin beetaj yaʼab kʼáatchiʼob tiʼ. Le ka tin wilaj bix tu núukil yéetel le Bibliaoʼ taakchaj in maas kaanbal, ka káaj in xokik le Biblia tu yéeteloʼ. Le ka tsʼoʼok u máan wa jaypʼéel semanaʼob táan in xookeʼ aʼalaʼab tiʼ in banda jeʼel u grabartaʼal junpʼéel disco utiaʼal konbil  teʼ Estados Unidosoʼ. Tin tukleʼ jach unaj k-aprovechartik.

Tin waʼalaj tiʼ le j-Jaajkunaj tsʼáaikten xookoʼ yaan in kuxtal jeʼex u yaʼalik le Bibliaoʼ, baʼaleʼ chéen uláakʼ junpʼéel disco in kʼáat in grabarte. Letiʼeʼ maʼ tu yaʼalajten baʼax ku tuklikiʼ, chéen tu yaʼalajten ka in xok Mateo 6:24, tuʼux ku yaʼalik: «Mix máak jeʼel u páajtal u beetkuba palitsil tiʼ kaʼatúul tsʼuuloʼobeʼ». Jaʼakʼ in wóol le ka tin naʼataj le baʼax u yaʼalmaj Jesusoʼ. Baʼaleʼ ka máan kʼiineʼ le máax tsʼáaikten xookoʼ letiʼ jaʼakʼ u yóol. Tin waʼalajtiʼeʼ tsʼoʼok in pʼatik le bandaoʼ tumen in kʼáat in beet le baʼax u yaʼalmaj Jesusoʼ.

Le Bibliaoʼ bey junpʼéel néen tu yeʼesajten baʼax kʼaas kin beetkeʼ (Santiago 1:22-25). Tin tsʼáaj cuentaeʼ jach kʼaas in modos, kaʼanal in wich yéetel chéen kin tsʼíiboltik u yantalten yaʼab baʼaloʼob. Kin poochʼil, kin baʼateʼel, kin tsʼuʼutsʼik chamal yéetel jach kin káaltal. Le ka tin tsʼáaj cuenta teʼ Biblia jach maʼ maʼalob bix in kuxtaleʼ jach lúub in wóol. Kex talamchajeʼ tin chʼaʼtuklaj in kʼexik in kuxtal (Efesoiloʼob 4:22-24).

Tu káajbaleʼ jach yaj tin wóol le baʼaxoʼob kʼaastak in beetmoʼ. Baʼaleʼ le j-Jaajkunaj tu tsʼáajten xook yéetel le Bibliaoʼ jach tu yáanten. Tu yeʼesajten Isaías 1:18: «Kex tumen sen chak jopeʼen a kʼebaneʼexeʼ, teneʼ bíin in pʼat sen sak bey yeʼebeʼ». Le tekstoʼob beyaʼ tu kaʼansajteneʼ k-Taata yaan teʼ kaʼanoʼ ku chʼaʼik óotsilil yéetel u kʼáat u «tsʼak» le máaxoʼob yaj tu yóoloʼob le baʼaloʼob kʼaastak u beetmoʼoboʼ.

Le ka tin kʼaj óoltaj Jéeobaeʼ kʼuchen in yaabilte ka taakchaj in kʼubik in kuxtal tiʼ letiʼ (Salmo 40:8). Okjaʼanajen 1992 tiʼ junpʼéel asamblea internacional tiʼ u j-jaajkunajoʼob Jéeoba beetaʼab San Petersburgo (Rusia).

Ichil le máaxoʼob adorartik Jéeobaoʼ yaʼab amigoʼob tin kaxtiʼ. Tak bejlaʼeʼ suuk k-muchʼikba utiaʼal k-kiʼimakkúuntik k-óol yéetel paaxoʼob maʼ kʼaastak tu táan Diosiʼ (Santiago 1:17). Dioseʼ tu tsʼáajten junpʼéel jatsʼuts siibal: Kristina in watan, máax jach in yaabiltmaj. Tu yéeteleʼ tsʼoʼok in wilik jatsʼuts súutukiloʼob bey xan baʼaloʼob talamtak; letiʼeʼ jach ku naʼatik bix in wuʼuyikinba.

Wa maʼ in beetkinba kaʼach u j-jaajkunaj Jéeobaeʼ bejlaʼa míin maʼ kuxaʼaneneʼ. Kaʼacheʼ maʼ tin jóokʼol tiʼ le talamiloʼoboʼ, baʼaleʼ bejlaʼeʼ tu jaajil kiʼimak in wóol. Beoraaʼ kin wuʼuyik yaan u biilal in kuxtal yéetel maʼalob yanil tuláakal baʼal.