Michelle: Bejlaʼeʼ táan in pʼatik junpʼéel chan juʼun tiʼ tuláakal le a vecinoʼoboʼ. Ku yaʼalik beyaʼ: ¿A kʼáat wa a wojéelt u jaajil? Kin pʼatiktech utiaʼal a xoke.

Sofía: ¿Máasaʼ tiʼ religión ku tʼaan?

Michelle: Beyoʼ. Wa ka wilkeʼ kabaleʼ ku taasik seis kʼáatchiʼob. ¿Máakalmáak a kʼáat...

Sofía: Saʼasten. Chéen táan a peʼertik a tiempo.

Michelle: ¿Baʼaxten ka waʼalik leloʼ?

Sofía: U jaajileʼ teneʼ mix in wojel wa jach tu jaajil yaan Diosiʼ.

Michelle: Diosboʼotik úuchik a waʼalikten baʼax ka tuklik. ¿Desde úuch wa bey a tuukuloʼ?

Sofía: Maʼ. Teen kaʼacheʼ suuk in bin iglesia. Baʼaleʼ tsʼoʼok u máan kʼiin xuʼuluk in biniʼ.

Michelle: Aan, xuʼul a bin túun. In kʼaabaʼeʼ Michelle. ¿Kux túun teech?

Sofía: Teneʼ Sofíaen.

Michelle: Kiʼimak in wóol in kʼaj óoltikech Sofía.

Sofía: Bey teen.

Michelle: Sofía, bik a tukult wa taalen in obligartech a creert baʼax kin creertik. Chéen taak in kʼáatiktech junpʼéel baʼal: ¿yaan wa baʼax beet u xuʼulul a jach creertik wa yaan Dios?

Sofía: Yaan. In maamaeʼ accidentarnaj walajki 17 jaʼaboʼobaʼ.

Michelle: Yaj tin wóol in wuʼuyik leloʼ. ¿Baʼax túun úuchtiʼ?

Sofía: Pʼáat paralizada.

Michelle: ¡Áay, bix a waʼik! In tuklikeʼ sen muʼyajnajeʼex.

Sofía: Jaaj, beyoʼ. Kin tuklik kaʼacheʼ wa yaan Dioseʼ, ¿baʼaxten tu chaʼaj u yúuchultoʼon leloʼ? ¿Baʼaxten ku chaʼik k-muʼyaj?

Michelle: Maʼ kʼaas ka tuukulnakech beyoʼ. Bey u yúuchul tiʼ máak ken muʼyajnakoʼ, ku taaktal u yojéeltik baʼaxten ku yúuchul baʼaloʼob beyoʼ. U jaajileʼ tak máaxoʼob adorart Dios úuchjeakileʼ taakchaj u yojéeltikoʼob baʼaxten yaan muʼyajil.

Sofía: ¿Tu jaajil?

Michelle: Tu jaajil. ¿Bix a wilik wa ka in weʼestech junpʼéel teksto tiʼ le Biblia ku tʼaan tiʼ leloʼ?

Sofía: Maʼalob.

Michelle: Teʼ Habacuc capítulo 1, versículo 2 yéetel 3, le profeta jach chúukaʼan u yóoloʼ tu kʼáataj tiʼ Dios: «Yuumtsil, ¿baʼax kʼiin bíin a chʼenxikint in sen awat kʼáat óolalaʼ? ¿Baʼax kʼiin bíin jáawak in payalchiʼ tu yoʼolal le meyaj loob utiaʼal ka taalakech a wáantoʼon? ¿Baʼax oʼolal ka beetik in wilik sen yaʼab yaj óolal[?]». ¿Bix a wilik? ¿Bey wa xan a wuʼuyikabaoʼ?

Sofía: Beyoʼ.

Michelle: Baʼaleʼ Dioseʼ maʼ tu kʼeyaj Habacuc ikil tu beetil le kʼáatchiʼobaʼ, mix tu yaʼalajtiʼ wa minaʼan u fejiʼ.

Sofía: Jach jatsʼuts le baʼax ka tsoliktenaʼ.

Michelle: Sofía, Dioseʼ ku tsʼáaik cuenta wa táan k-muʼyaj, yéetel u kʼáat u yáantoʼon.

Sofía: ¿Bix a wojéeltik túun leloʼ?

Michelle: Paʼatik in weʼesiktech baʼax ku yaʼalik Éxodo 3:7. ¿Jeʼel wa a xokikeʼ?

Sofía: Jeʼeleʼ. Ku yaʼalik: «Yuumtsileʼ bíin u yaʼa[le]: Tsʼoʼok in maʼalob ilik bix u muʼyaj in kaajal yaan tu luʼumil Egiptooʼ. Tsʼoʼok in wuʼuyik u jajakʼ  iikʼoʼob ikil u loobiltaʼaloʼob tumen u máayoloʼob, jach maʼalob in wojlil baʼax ku muʼyajtikoʼob».

Michelle: Diosboʼotik. Jeʼex u yeʼesik le versiculoaʼ, ¿ku tsʼáaik wa cuenta Dios ken muʼyajnak le máaxoʼob meyajtikoʼ?

Sofía: Pues, jeʼex u yeʼesikoʼ beyoʼ.

Michelle: Tsʼoʼoleʼ letiʼeʼ maʼ chéen ku jáan ilik le baʼax ku yúuchloʼ. Il tu kaʼatéen le u tsʼook jaatsoʼ. Dioseʼ tu yaʼalaj: «Tsʼoʼok in maʼalob ilik bix u muʼyaj in kaajal». Lelaʼ ¿máasaʼ ku yeʼesikeʼ Dioseʼ jach taak u yáantik máak?

Sofía: Jaaj, beyoʼ.

Michelle: Tsʼoʼoleʼ Dioseʼ maʼ chéen táan u yilik le baʼaxoʼob táan u yúuchultoʼonoʼ baʼaxeʼ ku yaatal xan u yóol ken u yil táan k-muʼyaj.

Sofía: Jaaj a tʼaan.

Michelle: Koʼox ilik uláakʼ teksto tuʼux ku yaʼalaʼal táan u muʼyaj le máaxoʼob meyajtik Diosoʼ. Isaías 63:9. Teʼelaʼ ku yaʼalikeʼ «tiʼ tuláakal u yaj óolaloʼob[eʼ] Yuumtsileʼ [...] letiʼ jáalkʼabtoʼob tu yoʼolal u yaabilaj yéetel u chʼaʼ óotsilil». Jeʼex a wilkoʼ, ¿yaj wa tu yóol Dios úuchik u yilik u muʼyaj le máaxoʼob meyajtikoʼ?

Sofía: Pues, letiʼe baʼax ku yaʼalik le tekstooʼ.

Michelle: U jaajileʼ, Sofía, Dioseʼ jach u kʼáat ka xiʼiktoʼon utsil, yéetel u pʼeek ka muʼyajnakoʼon. Wa k-muʼyajeʼ letiʼeʼ ku muʼyaj xan.

Michelle: Táanil tiʼ in bineʼ, yaan uláakʼ baʼax in kʼáat in jáan eʼestech.

Sofía: Maʼalob.

Michelle: Ilawil baʼax ku yaʼalik le Biblia yoʼolal le páajtalil yaan tiʼ Diosoʼ. Tiaʼan teʼ Jeremías 10:12. ¿Jeʼel wa a xokikeʼ?

Sofía: Ajá. Ku yaʼalik: «Yuumtsil[eʼ] yéetel u páajtalileʼ tu beetaj luʼum; yéetel u yojéelajeʼ tu jetsʼaj yóokʼol kaab; yéetel u naʼateʼ tu sinkúuntaj kaʼan».

Michelle: Diosboʼotik. Koʼox jáan tuukul tiʼ baʼax ku yaʼalik le tekstoaʼ. ¿Kʼaʼabéetchaj wa yaʼab páajtalil tiʼ Dios utiaʼal u beetik kaʼan, Luʼum yéetel tuláakal le baʼaloʼob yanoʼ?

Sofía: Kʼaʼabéetchaji.

Michelle: Jeʼeloʼ. Wa Dios anchaj u páajtalil tiʼ utiaʼal u beetik tuláakal baʼaleʼ, ¿maʼ wa túun jeʼel u páajtal xan u controlartik tuláakal le baʼaxoʼob u beetmoʼ?

Sofía: Jeʼeleʼ.

Michelle: Tuukulnen tu kaʼatéen tiʼ a maamaoʼ. ¿Baʼaxten ku yaatal a wóol a wilik u muʼyaj?

Sofía: Tumen in yaabiltmaj. In maama.

Michelle: Wa ka yanaktech u páajtalileʼ, ¿jeʼel wa a beetik u xuʼulul u muʼyajeʼ?

Sofía: Jeʼeleʼ. ¡Bix maʼil!

Michelle: Tuukulnen tiʼ lelaʼ. Le Bibliaoʼ ku yaʼalikeʼ Dioseʼ ku yaatal u yóol u yilik k-muʼyaj yéetel jach yaan u páajtalil. ¿Bix a wilik? ¿Máasaʼ Dioseʼ jach ku controlarkuba utiaʼal maʼ u jáan xuʼulsik le muʼyajiloʼ?

Sofía: Mix juntéen in tukult beyoʼ.

Michelle: A tuklikeʼ ¿yaan wa baʼax oʼolal maʼ u jáan utskíint le talamiloʼob yaantoʼonoʼ? *

Sofía: Umm, in waʼalikeʼ yaan.

Michelle: Míin táan u juum a teléfono. ¿Bix a wilik ka suunaken tuláakʼ kʼiin utiaʼal k-tsikbal yoʼolal le kʼáatchiʼaʼ?

Sofía: Aan, maʼalob. Diosboʼotik. *