Koʼox aʼalikeʼ kʼaʼabéet a operartaʼal yoʼolal junpʼéel kʼojaʼanil jeʼel u kíimskecheʼ, yéetel a kʼáat a yéey juntúul jach maʼalob doctor tumen a wojel yaan a pʼatik a kuxtal tu kʼab. Baʼaleʼ ¿máasaʼ táanileʼ yaan a wilik wa jach tu jaajil juntúul maʼalob doctor?

Bey u yúuchul xan yéetel le religionoʼ: kʼaʼabéet u yilik máak u maʼalob u religión. ¿Baʼaxten? Tumen táan u pʼatik u kuxtal tu kʼab u religión yéetel chéen jeʼel u salvarkuba wa maʼalob u religioneʼ.

Jesuseʼ tu yaʼalaj bix jeʼel u yilik máak wa maʼalob junpʼéel religioneʼ. Tu yaʼalaj: «Cada cheʼeʼ ku kʼaj óoltaʼal yoʼolal u yichoʼob» (Lucas 6:44). Tuukulnen tiʼ junpʼéel religión a kʼaj óol. ¿Baʼax claseil ich ku tsʼáaik? U nuuktakiloʼobeʼ ¿chéen wa taakʼin uts tu yichoʼob? Le máaxoʼob yanoʼob teʼ religionoʼ ¿ku nuʼuktik wa u kuxtaloʼob jeʼex u yaʼalik le Bibliaoʼ? ¿Ku táakpajloʼob wa tiʼ baʼateltáambaloʼob? ¿Yaan wa junpʼéel religión ku páajtal a kʼubik a wóol tiʼ? Koʼox ilik u núukil teʼ tuláakʼ xookoʼoboʼ.