Ka máan kex cuatrocientos jaʼaboʼob tsʼoʼoksaʼak le Kiliʼich Tsʼíiboʼob ich Hebreooʼ, béeychaj u profecía Miqueas yoʼolal le Mesíasoʼ: Jesuseʼ síij tu kaajil Belén. Ka máan kex uláakʼ treinta jaʼaboʼobeʼ, tu jaʼabil 29 tsʼoʼokok u taal Cristoeʼ, béeychaj xan u yáax jaats u profecía Daniel yoʼolal le Mesíasoʼ: okjaʼanaj Jesús ka yéeyaʼab yéetel kiliʼich muukʼ. ¡Le Mesías, wa «chʼiʼibal», úuch káajak u páaʼtaʼaloʼ kʼuch jach teʼ kʼiin aʼalaʼanoʼ!

Jesuseʼ tu séebaʼanil káaj u «kʼaʼaytik u maʼalob péektsilil u Reino Dios» (Lucas 8:1). Jach jeʼex aʼalaʼaniloʼ yéetel u jaajil u yóol tu yeʼesaj u yutsil yéetel u yaabilaj tiʼ le máakoʼoboʼ. Tu kaʼansaj baʼaloʼob jach ku yáantajoʼob, yéetel tu tsʼakaj «tuláakal u jejeláasil kʼojaʼanil yéetel muʼyajil»; leloʼ tu yeʼesaj tiaʼan Dios tu yéeteleʼ (Mateo 4:23). Jeʼel máaxak kaʼach ka náatsʼak yiknaleʼ —paalal wa nukuch máakoʼobeʼ— ku yaʼalikoʼob: «Tsʼoʼok k-kaxtik le Mesíasoʼ» (Juan 1:41).

Jesuseʼ tu yaʼaleʼ le jach taʼaytak u káajal u gobernar yóokʼol tuláakal yóokʼol kaabeʼ, yaan u tíitkuba luʼum jejeláas tuʼux, yaan u yantal baʼateltáambaloʼob yéetel yaʼab uláakʼ talamiloʼob. Tu yaʼalaj xan: «Maʼ a weenleʼex» (Marcos 13:37).

Jesuseʼ maʼ anchaj u kʼebaniʼ; chúukpaj u yóol u yuʼub u tʼaan Dios, baʼaleʼ pʼektaʼabi yéetel kíimsaʼabi. Úuchik u kíimileʼ tu manaj k-tiaʼalt le baʼax tu peʼertaj Adán yéetel Evaoʼ: kuxtal minaʼan u xuul teʼ Paraísooʼ.

Jeʼex u yaʼalmil xan uláakʼ profecíaʼobeʼ Jesuseʼ kaʼa kuxkíintaʼab jach tu yóoxpʼéel kʼiin kíimik, yéetel tu chíikbesuba tiʼ maas tiʼ quinientos disipuloʼob. Tsʼoʼoleʼ táanil tiʼ u suut kaʼaneʼ tu yaʼalaj tiʼ u disipuloʼob ka u kʼaʼaytoʼob le maʼalob péektsil tiʼ «u máakiloʼob tuláakal kaajoʼob[oʼ]» (Mateo 28:19). ¿Tak tuʼux náak u kʼaʼaytajoʼob?

(Jóoʼsaʼan tiʼ Mateo, Marcos, Lucas, Juan, 1 Corintoiloʼob.)