«Chéen pʼelak u kíimil le máaxoʼob jach kʼebanchajaʼanoʼoboʼ u pixanoʼobeʼ ku yéemloʼob infiernoʼob tuʼux ku muʼyajtikoʼob u castigoil le infierno: ‹kʼáakʼ maʼatech u tuʼupul›.» (Catecismo de la Iglesia Católica.) Jujuntúul xan tiʼ u nuuktakil le religionoʼoboʼ ku yaʼalikoʼobeʼ le infiernooʼ letiʼe u jach náachtal máak tiʼ Diosoʼ.

«Le máax ku kʼebantaleʼ yaan u kíimil» (Ezequiel 18:⁠4). «Le kimenoʼoboʼ maʼ u yojloʼob mix baʼaliʼ» (Eclesiastés 9:5). Wa maʼ u yojloʼob mix baʼaleʼ, ¿bix kun páajtal u muʼyajtikoʼob «le kʼáakʼ maʼatech u tuʼupul» wa u yaj óoltikoʼob náach yaniloʼob tiʼ Dios?

Teʼ Bibliaoʼ le tʼaan hebreo yéetel griego suuk u suʼutul «metnal» wa «infiernooʼ» u jaajileʼ letiʼe Muknaloʼ. Jeʼex Job le ka jach yaachaj u yóoloʼ, tu kʼáat óoltaj tiʼ Dios: «Bukaʼaj maʼalobil ka béeyak a taʼakiken teʼ Muknal[oʼ]» (Job 14:13). Wa jeʼex u yaʼalik La Sagrada Biblia, jóoʼsaʼan tumen Guillermo Jünemanneʼ, «teʼ infiernooʼ». Job kaʼacheʼ u kʼáat jeʼelel teʼ muknaloʼ, maʼ ka muʼyajnak tiʼ junpʼéel u kúuchilil muʼyajiʼ, mix ka náachkuntaʼak tiʼ Diosiʼ.

Wa k-tuklik kʼasaʼan Dioseʼ maʼ ken k-náatsʼal tiʼ letiʼ, baʼaxeʼ náachtal ken k-beete. Rocío, máax kajaʼan Méxicoeʼ, ku yaʼalik: «Tin paalileʼ kaʼansaʼabten yaan infierno. Táaj saajken kaʼachi; maʼ tu páajtal in creertik wa uts Dios. Kin tuklik kaʼacheʼ jach tsʼíik yéetel kʼasaʼan».

Le baʼax ku yaʼalik le Biblia yoʼolal Dios bey xan yoʼolal bix anik le kimenoʼoboʼ tu kʼexaj baʼax ku tuklik Rocío. Letiʼeʼ ku yaʼalik: «Tin wuʼuyaj bey jáalkʼabtaʼabeneʼ, bey ka luʼsaʼak junpʼéel baʼal jach aal tin wóokʼoleʼ. Dioseʼ jach tu jaajil u kʼáat u yáantoʼon, u yaabiltmoʼon, yéetel jeʼel u páajtal in yaabiltikeʼ. Dioseʼ bey jeʼex juntúul taatatsil u kʼáat ka xiʼik utsil tiʼ u paalaleʼ» (Isaías 41:13).

Yaʼab máakeʼ ku bin tu religión chéen tumen sajak tiʼ le infiernooʼ. Baʼaleʼ Dioseʼ maʼ u kʼáat ka k-meyajt yoʼolal saajkiliʼ, baʼaxeʼ u kʼáat ka k-beet le baʼax tu yaʼalaj Jesusoʼ: «Kʼaʼabéet xan a yaabiltik Jéeoba a Dios» (Marcos 12:29, 30). Tsʼoʼoleʼ ken k-il mix juntéen ku beetik Dios baʼax kʼaaseʼ, yaan k-creertikeʼ maʼ xan ken u beet baʼax kʼaas teʼ kʼiinoʼob ku taaloʼoboʼ. Jeʼex Eliú, u amigo Jobeʼ, jeʼel u páajtal xan k-aʼalikeʼ: «U jaajil Dioseʼ junpuliʼ maʼ tu beetik baʼax kʼaas! ¡Le Máax jach táaj yaan u poderoʼ junpuliʼ maʼ tu beetik baʼax maʼ maʼalobiʼ!» (Job 34:10).