Yaʼab máakoʼobeʼ ken tsʼaʼabak junpʼéel puesto tiʼob ichil le gobiernooʼ ku kʼastaloʼob: ku yookoloʼob, ku tuusoʼob, wa ku chaʼik u maʼanaloʼob tumen uláakʼ máakoʼob. Lelaʼ maʼ túumbeniʼ. Walajki 3,500 jaʼaboʼobaʼ tsʼíibtaʼab junpʼéel ley teʼ Biblia tuʼux ku yaʼalikeʼ le juezoʼoboʼ maʼ unaj u chaʼik u maʼanaloʼob tumen le kʼasaʼanoʼoboʼ (Éxodo 23:8). Uláakʼ baʼax suuk u beetik le máaxoʼob ku meyajoʼob ichil le gobiernooʼ u yoklikoʼob le áantaj ku tsʼaʼabal tiʼ le kaajoʼ, u yáantkoʼob chéen u láakʼtsiloʼob wa u amigoʼob, yéetel yaan kʼiineʼ hasta minaʼan u suʼtaloʼob ken u beetoʼob.

Le baʼaxoʼob tsʼoʼok k-aʼalikaʼ tuláakal tuʼux ku yilaʼal, baʼaleʼ maases ichil le gobiernoʼoboʼ. Tu jaʼabil 2013, le Transparencia Internacionaloʼ tu yaʼaleʼ le cinco puestoʼob tuʼux maas suuk u yúuchul ookoloʼ letiʼe politicaoʼ, le policíaoʼ, le máaxoʼob ku meyajoʼob ichil le gobiernooʼ, le máaxoʼob ku beetkoʼob leyoʼoboʼ bey xan le juezoʼoboʼ (Barómetro Global de la Corrupción 2013). Koʼox ilik bix u yúuchul leloʼ:

• ÁFRICA: Tu jaʼabil 2013, óoliʼ 22,000 máakoʼob ku meyajoʼob kaʼach ichil u gobiernoil Sudáfricaeʼ taʼak u pooloʼob tumen ookolnajoʼob.

• SUDAMÉRICA: Tu jaʼabil 2012 tu luʼumil Brasileʼ, 25 máakoʼob kʼaʼaloʼob cárcel úuchik u báaxtikoʼob política yéetel u taakʼin le kaajoʼ. Ichiloʼobeʼ tiaʼan le máax nuʼuktik kaʼach u Gabinete le presidente táant u jóokʼoloʼ.

• ASIA: Tu jaʼabil 1995, kíim 502 máakoʼob ka lúub junpʼéel edificio tu yóokʼoloʼob tu kaajil Seúl (Corea del Sur). Le investigadoroʼoboʼ tu yojéeltoʼobeʼ le máaxoʼob beet le edificiooʼ tu tsʼáajoʼob taakʼin tiʼ le máaxoʼob ku meyajoʼob teʼ municipio utiaʼal ka chaʼabak u meyajtiʼob materialoʼob maʼ koʼojtakiʼ kex séeb u kʼastaloʼob.

• EUROPA: Cecilia Malmström, le máax ilik le Asuntos de Interior de la Comisión Europeaoʼ, tu yaʼalaj: «Tsʼoʼok u píit máan u kʼastal [le gobierno teʼ Europaoʼ]». Tu yaʼalaj xan: «Utiaʼal u xuʼulul u kʼastaleʼ maases letiʼe politicoʼob unaj u yáantajoʼoboʼ, baʼaleʼ maʼ u kʼáat u beetoʼobiʼ».

¡Maʼ chéen chʼaʼabil u xuʼulsaʼal le ookol ku beetaʼal ichil le gobiernooʼ! Le profesora Susan Rose-Ackermanoʼ tu yaʼaleʼ utiaʼal u xuʼululeʼ «kʼaʼabéet u kʼexpajal bix u meyaj» le gobiernoʼoboʼ. Maʼ xaaneʼ jeʼel u tuklaʼal mix bikʼin kun úuchul leloʼ, baʼaleʼ le Bibliaoʼ ku yaʼalikeʼ yaan u kʼuchul u kʼiinil u kʼexpajal tuláakal.