Maʼ chéen Alejandro u pʼeek u sen meyajiʼ. Aaron, juntúul mecanicoeʼ, ku yaʼalik: «Yaʼab máakeʼ ku tuklikeʼ suʼtsil u yantal tiʼ máak junpʼéel meyaj tuʼux ku sen xupik u muukʼ. Ku conformar mientras u kaxtik junpʼéel meyaj maas maʼalob».

Yaʼab máax tuklikeʼ le meyaj tuʼux ku sen xupik u muukʼoʼ maʼ u tiaʼaliʼ. ¿Baʼaxten? Maʼ xaaneʼ tumen teʼ cine yéetel teʼ televisionoʼ ku yeʼesaʼaleʼ kex maʼ u sen meyaj máakeʼ jeʼel u páajtal u kuxtal ich ayikʼalil yéetel kiʼimak óolaleʼ. Mateo, máax ku meyaj mantenimientoeʼ, ku yaʼalik: «Yaʼab máax tuklikeʼ wa kʼaʼabéet a sen kíimskaba meyaj utiaʼal a náajaltik a kuxtaleʼ, u kʼáat u yaʼal maʼ táan u bintech utsiliʼ». Juntúul conserje ku kʼaabaʼtik Sebastianeʼ ku yaʼalik: «U kʼáatoʼob ka boʼotaʼaktiʼob u túulisil junpʼéel kʼiin, baʼaleʼ maʼ u kʼáatoʼob meyaj bul kʼiiniʼ».

Baʼaleʼ uláakʼ máakoʼobeʼ uts tu tʼaanoʼob le kaʼanaʼantsil meyajoʼ. Daniel, máax yaan 25 jaʼab tiʼ yéetel ku meyaj utiaʼal u beetaʼal najoʼobeʼ, ku yaʼalik: «Kiʼimak a wóol ken sen meyajnakech, maases wa a wojel yaan u taasik utsil». Andrés, máax yaan 23 tiʼeʼ, ku yaʼalik xan: «Tsʼoʼok in tsʼáaik cuentaeʼ utiaʼal u yantal kiʼimak óolal tiʼ máakeʼ kʼaʼabéet u meyaj. Wa chéen junpʼíit meyaj ka beetkeʼ yaan u náakal a wóol».

¿Baʼaxten kiʼimak u yóol Daniel yéetel Andrés kex kaʼanaʼantsil le meyaj ku beetkoʼoboʼ? Tumen tsʼoʼok u beetkoʼob baʼax ku yaʼalik le Bibliaoʼ: unaj k-tsʼáaik k-óol tiʼ baʼax k-beetik yéetel unaj u kiʼimaktal k-óol ken k-beete.

¿Yaan wa baʼaxoʼob ku yaʼalik le Biblia jeʼel u yáantkech utiaʼal u kiʼimaktal a wóol yéetel a meyajeʼ? Koʼox ilik tuláakʼ xookoʼ.