Le Bibliaoʼ ku yaʼalikeʼ jach yaj baʼax kun úuchul ken taalak u xuul. Ku yaʼalik: «Yaan u yantal junpʼéel nojoch muʼyajil mix juntéen ilaʼak desde ka káaj yóokʼol kaab tak bejlaʼeʼ [...]. U jaajileʼ, wa maʼ tu kóomkintaʼal le kʼiinoʼob jeʼeloʼ mix máak jeʼel u salvarkubaeʼ» (Mateo 24:21, 22). Pero ku yaʼalik xaneʼ yaan máaxoʼob ken u salvartubaʼob: «Le yóokʼol kaabaʼ táan u bin u xuʼulultiʼ [...], baʼaleʼ le máax ku beetik baʼax u kʼáat Dioseʼ yaan u pʼáatal utiaʼal mantatsʼ» (1 Juan 2:17).

¿Baʼax unaj a beetik utiaʼal a salvarkaba? ¿Kʼaʼabéet wa u káajal a kaxtik yaʼab baʼaloʼob utiaʼal a líiʼskaba? Maʼ. Le Bibliaoʼ ku yaʼalik: «Wa tuláakal le baʼaloʼob bey kun beetbil u yíibilaʼ, ¡jach túun kʼaʼabéet a wilik a biskeʼex junpʼéel kiliʼich kuxtal yéetel a tsʼáaik a wóoleʼex a meyajteʼex Dios mientras táan a páaʼtkeʼex yéetel jach a tsʼaamaj ta tuukuleʼex u kʼuchul u kʼiinil Jéeoba!» (2 Pedro 3:10-12). Ken k-xok le uláakʼ versiculoʼoboʼ k-naʼatikeʼ le baʼaxoʼob «kun beetbil u yíibil[oʼ]» letiʼe kʼasaʼan gobiernoʼoboʼ bey xan le máaxoʼob apoyartikoʼob yéetel ku tsʼáaikubaʼob tu contra u gobierno Diosoʼ. Le oʼolaleʼ k-nikkúunsik taakʼin yéetel uláakʼ baʼaloʼobeʼ maʼ tu salvartikoʼon tiʼ le xuʼulsajiloʼ.

U jaajileʼ wa k-kʼáat k-salvartbaeʼ kʼaʼabéet k-natsʼikba tiʼ Dios yéetel k-kanik kuxtal jeʼex uts tu tʼaanoʼ (Sofonías 2:3). Maʼ unaj k-beetik jeʼex u maas yaʼabil le máakoʼob maʼ tu beetkoʼob u cuentail kuxaʼanoʼob tu tsʼook kʼiinoʼoboʼ, baʼaxeʼ kʼaʼabéet ‹k-páaʼtik yéetel k-jach tsʼáaik t-tuukul u kʼiinil Jéeoba›. U j-jaajkunajoʼob Jéeobaeʼ jeʼel u yeʼeskoʼobtech baʼax ku yaʼalik le Biblia unaj a beetik utiaʼal a salvarkabaeʼ.