LE BIBLIAOʼ KU NÚUKIK: «Yaan u kʼuchul u kʼiinileʼ, tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan [Jesús] yéetel yaan u jóokʼloʼob» (Juan 5:28, 29).

Jesuseʼ tu yaʼaleʼ yáanal u gobiernoeʼ mix máak kun antal teʼ muknaloʼoboʼ. «Jach péeknaj in wóol ka tin xokaj Juan 5:28, 29 —ku yaʼalik Fernando, le máax t-aʼalaj teʼ yáax xookoʼ—. Jach claro baʼax ku yaʼalik; tu beetaj u yantalten esperanza.»

Úuchjeakileʼ Job, juntúul máak jach utseʼ, u yojel kaʼach yaan u kʼuchul u kʼiinil u kaʼa kuxkíintaʼal. Tu yaʼalaj: «¿Bíin kaʼa kuxlak wa le xiib ku kíimiloʼ?». Tsʼoʼoleʼ tu núukaj xan: «Jeʼel in páaʼtik loʼobal tuláakal u kʼiiniloʼob in kuxtaleʼ [...]. Techeʼ bíin a tʼanen, teen xaneʼ bíin in núuk a tʼaan» (Job 14:14, 15).

Marta, u kiik Lázaroeʼ, u yojel xan yaan u kʼuchul u kʼiinil u líiʼsaʼal le kimenoʼoboʼ. Jesuseʼ tu yaʼalaj tiʼ Marta: «A wíitsʼineʼ yaan u líikʼil». Ka tu núukaj: «In wojel yaan u líikʼil ken kaʼa kuxkíintaʼak le kimenoʼob teʼ tu tsʼook kʼiinoʼ». Ka túun tu yaʼalaj Jesús: «Teen le kuxtaloʼ, bey xan le kaʼa kuxtaloʼ. Le máax ku tsʼáaik u fe tiʼ teneʼ, kex ka kíimkeʼ yaan u kaʼa kuxtal» (Juan 11:23-25). Maʼ sáam u yaʼal leloʼ ka tu kaʼa kuxkíintaj Lázaro. Le tsikbalaʼ ku yeʼesik bukaʼaj jatsʼutsil baʼax kun úuchul. ¡U millonesil máakoʼob tiʼ tuláakal yóokʼol kaab kun kaʼa kuxkíintbiloʼob!

LE BIBLIAOʼ KU NÚUKIK: U Tʼaan Dioseʼ ku yeʼesikeʼ le ka líiʼsaʼab Jesusoʼ maʼ igual jeʼex le uláakʼ ocho máakoʼob kaʼa kuxlajoʼoboʼ. Letiʼobeʼ líiʼsaʼaboʼob utiaʼal u kuxtaloʼob way Luʼumeʼ. Baʼaleʼ maʼ bey úuchik yéetel Jesusiʼ. Le Bibliaoʼ ku yaʼalik: «Letiʼeʼ tiʼ yaan tu x-noʼoj kʼab Dioseʼ tumen tu chʼaʼjoʼoltaj u bin teʼ kaʼanoʼ» (1 Pedro 3:21, 22). ¿Chéen wa túun Jesús kaʼa kuxkíintaʼab utiaʼal u bin kaʼan? Jesuseʼ u yaʼalmaj tiʼ u disipuloʼob: «Wa xan kin chʼaʼjoʼoltik in bin yéetel in preparartikteʼex junpʼéel kúuchileʼ, yaan in suut, yéetel teen ken in kʼameʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ» (Juan 14:3).

Jesucristoeʼ bin teʼ kaʼanoʼ ka tu preparartaj tuláakal utiaʼal u kʼamik jujuntúul u disipuloʼob. Le Bibliaoʼ ku yaʼalikeʼ 144,000 kun biniʼ (Apocalipsis 14:1, 3). Baʼaleʼ ¿baʼax ken u beetoʼobiʼ?

 ¡Yaʼab meyaj ken u beetoʼob! Le Bibliaoʼ ku yaʼalik: «Kiʼimak u yóol yéetel kiliʼich tuláakal máax ku táakpajal ichil le yáax máakoʼob ku kaʼa kuxkíintaʼaloʼoboʼ; le kaʼa kíimiloʼ minaʼan páajtalil tu yóokʼoloʼob, baʼaxeʼ yaan u meyajoʼob bey sacerdoteʼob utiaʼal Dios bey xan utiaʼal Cristo, yéetel yaan u reinaroʼob tu yéetel ichil le mil jaʼaboʼoboʼ» (Apocalipsis 20:6). Yaan u beetik u reyiloʼob yéetel u sacerdoteiloʼob; yaan u múul gobernaroʼob yéetel Jesús yóokʼol le Luʼumaʼ.

LE BIBLIAOʼ KU NÚUKIK: Teʼ Kiliʼich Tsʼíiboʼoboʼ apóstol Pabloeʼ tu yaʼalaj: «Táan xan in páaʼtik u kaʼa kuxkíintaʼal le kimenoʼob jeʼex u yaʼalmil Diosoʼ, le utsoʼoboʼ bey xan le kʼasaʼanoʼoboʼ» (Baʼaxoʼob [Hechos] 24:15).

¿Máax «le utsoʼob» tu yaʼalaj Pablooʼ? Koʼox ilik. Le taʼaytak u kíimil Daniel, juntúul máak utseʼ, aʼalaʼabtiʼ tumen Dios: «Jeʼelsaba, tu xuul le kʼiinoʼoboʼ ka líikʼil utiaʼal a kʼamik a boʼolal» (Daniel 12:13). ¿Tuʼux kun antal Daniel ken líiʼsaʼak? Le Bibliaoʼ ka yaʼalik: «Le utsil máakoʼoboʼ bíin u tiaʼalintoʼob le luʼumaʼ; tiʼ bíin kajlakoʼob utiaʼal jaʼaboʼob minaʼan u xuul» (Salmo 37:29). Jesús xaneʼ tu yaʼalaj: «Kiʼimak u yóol le máaxoʼob maʼ séeb u kʼuuxiloʼoboʼ, tumen letiʼobeʼ yaan u tiaʼalintikoʼob le Luʼumoʼ» (Mateo 5:5). Daniel yéetel uláakʼ utsul máakoʼobeʼ yaan u kaʼa kuxkíintaʼaloʼob way Luʼumeʼ, yéetel jeʼel u kuxtaloʼob minaʼan u xuuleʼ.

¿Kux túun «le kʼasaʼanoʼob» tu yaʼalaj Pablooʼ? Letiʼe u millonesil máakoʼob maʼ páajchaj u kʼaj óoltikoʼob Dios mix kuxlajoʼob jeʼex u yaʼalik le Bibliaoʼ. Ken kaʼa kuxlakoʼobeʼ yaan u yojéeltikoʼob máax Jéeoba * yéetel máax Jesús; yaan xan u kʼuchul u yaabiltoʼob (Juan 17:3). Máaxoʼob meyajtik Dioseʼ yaan u kuxtaloʼob tuláakal le tiempo kuxaʼan Jéeobaoʼ, u kʼáat u yaʼaleʼ mantatsʼ.

LE BIBLIAOʼ KU NÚUKIK: Dioseʼ yaan «u choʼik tuláakal u jaʼil u yichoʼob, maʼ tun yantal kíimil, mix okʼol, mix yaj óolal, mix kʼiʼinamil» (Apocalipsis 21:4). «Máaxoʼob ku beetkoʼob u yotochoʼobeʼ bíin kajlakoʼob ichiloʼob, máaxoʼob pakʼik uvaʼobeʼ bíin u jaantoʼob u yich.» (Isaías 65:21.)

¡Bukaʼaj utsil ka líiʼsaʼak a láakʼtsiloʼob yéetel a amigoʼob yéetel ka yanaktech junpʼéel kuxtal beyaʼ! Baʼaleʼ yaan junpʼéel kʼáatchiʼ maʼ k-núukiʼ: ¿bix k-ojel wa tu jaajil yaan u kaʼa kuxtal le kimenoʼoboʼ?