Le mantarrayaoʼ mientras táan u nadareʼ u japmaj u chiʼ utiaʼal u tséentkuba, tumen beyoʼ ku páajtal u yokol jaʼiʼ bey xan mejen ikʼeloʼob ku kʼaabaʼtik plancton. Le kéen okok le jaʼ yéetel le planctonoʼ ku máanoʼob tiʼ junpʼéel filtro, le planctonoʼ tiʼ ku pʼáatliʼ yéetel ku rebotaroʼob tu kaal. Bey túunoʼ ku páajtal u jaantik, le jaʼoʼ ku seguer u bin yéetel ku jóoʼsaʼal tumen le branquiasoʼ. Tsʼoʼoleʼ kex maas chichantak le plancton tiʼ u joolil le filtrooʼ tiʼ ku pʼáatloʼobiʼ. Ed Yong, juntúul científicoeʼ, ku yaʼalikeʼ le baʼax ku beetik le mantarrayaoʼ «ku beetik u jaʼakʼal u yóol máak».

 Tuukulnen tiʼ lelaʼ: Le filtro yaan tiʼ le mantarrayaoʼ bey junpʼéel xáacheʼ yaan cinco u kojoʼob tu kaʼatséelileʼ, jujunpʼéel tiʼ le kojoʼobaʼ ku wutsʼkubaʼob táanil yéetel uláakʼoʼobeʼ paachil. Yoʼolal lelaʼ le mantarrayaoʼ ku béeytal u jatsik le jaʼoʼ, junpʼéel parteeʼ ku máan tu yóokʼol le filtrooʼ yéetel uláakʼeʼ tu yáam le filtrooʼ, bey túunoʼ le jaʼoʼ ku suut bey mejen remolinoʼobeʼ.

 Le kéen okok tu chiʼ le mejen ikʼeloʼob jeʼex le planctonoʼ u chichil u bin le jaʼoʼ ku beetik u kʼolkubaʼob tu kojoʼob yéetel ku bin tu kaal le mantarrayaoʼ. Yoʼolal lelaʼ kex tumen jach chichan le planctonoʼ le mantarrayaoʼ ku béeytal u filtrartik utiaʼal u lukʼik. Le filtro yaan tiʼ le mantarrayaoʼ jach maʼalob u meyaj tumen ku béeytal u chukik tak le mejen ikʼeloʼob maas pʼayachtakoʼoboʼ.

 Kex jach chich u nadar le mantarrayaoʼ yéetel kex yaʼab mejen ikʼeloʼob yaan teʼ kʼáaʼnáaboʼ como jach maʼalob le filtro yaantiʼoʼ maʼatech u chaʼik u tʼíilil mix baʼaliʼ yéetel tu juunal ku limpiokíinkuba.

 Le científicoʼoboʼ táan u yilkoʼob u copiarkoʼob le filtro ku meyaj tiʼ le mantarrayaoʼ utiaʼal u beetkoʼob filtroʼob utiaʼal u limpiokíinkoʼob le jaʼ sucio yaniloʼ yéetel utiaʼal jóoʼskoʼob le basura yaan ichiloʼ.

 Techeʼ, ¿bix a wilik? Le filtro yaan tiʼ le mantarrayaoʼ, ¿chéen wa bey anchajikoʼ wa yaan máax beete?