Yaan junpʼéel clase muucheʼ jach famoso yoʼolal bix u kʼaay (rana arbolícola japonesa). Kéen sen kʼaaynak le xibil muuchoʼoboʼ jeʼel u tuklaʼal chéen minaʼan u cuentail u kʼaayoʼobeʼ. Chéen baʼaleʼ séeb jeʼel u tsʼaʼabal cuenta bix u kʼaay cada juntúuleʼ. Tu luʼumil Japóneʼ le máaxoʼob investigartik bix u kuxtal le clase muuchaʼ ku yaʼalikoʼobeʼ jach en orden bix u kʼaayoʼob utiaʼal u yuʼubaʼal tumen le x-chʼupul muuchoʼoboʼ.

 Tuukulnen tiʼ lelaʼ: Le xibil muuchoʼ ku kʼaay utiaʼal u tʼanik le x-chʼupul muuchoʼ. Le u kʼaayoʼ tu kaal ku jóokʼol, chéen baʼaleʼ ku maas kʼaʼamtal u kʼaay yoʼolal junpʼéel baʼal yaan tu kaal ku pʼuruʼuspajal cada ken kʼaaynakeʼ.

 Cada xibil muucheʼ yaan junpʼéel forma bix u kʼaay yéetel le x-chʼupul muuchoʼoboʼ ku béeytal u kʼaj óoltikoʼob máax tʼankoʼob. Le investigadoroʼoboʼ ku yaʼalikoʼobeʼ utiaʼal u kʼaj óoltaʼaloʼob tumen le x-chʼupul muuchoʼ cada xibil muucheʼ ku páaʼtik u turno u kʼaay, maʼ tu kʼaayoʼob u páakiliʼeʼ. Beyoʼ ku béeytal u yojéeltaʼal tumen le x-chʼupul muuch máax ku kʼaayoʼ, tsʼoʼoleʼ ku jeʼeleloʼob mientras táan u kʼaay uláakʼ yéetel maʼ tu kaʼanaloʼob.

 Le bix u kʼaay le muuchoʼobaʼ jach táan u yáantik le científicoʼoboʼ. Tumen táan u yilkoʼob u maas maʼalobkíintikoʼob le bix u túuxtikoʼob informaciónoʼ (comunicaciónes inalámbricas). Beyoʼ tu tsoolol kun bin le información ken u túuxtoʼoboʼ, maas seguro yéetel yaan u ahorrarkoʼob tiempo.

 Techeʼ, ¿bix a wilik? Le bix u kʼaay le muuchoʼob tu tsoololoʼ, ¿chéen wa bey anchajikoʼ wa yaan máax beete?