ÁANTAJ UTIAʼAL LE FAMILIAʼOBOʼ
¿Baʼax jeʼel u yáantaj utiaʼal u tsʼáaikuba máak de acuerdoeʼ?
Le tsʼokaʼan u beeloʼoboʼ jejeláas baʼax u kʼáat u beetoʼob, baʼax suuk u beetkoʼob wa bix u modosoʼob, lelaʼ jeʼel u beetik u yantal problemaʼob tiʼobeʼ. Baʼaleʼ yaan uláakʼ baʼaloʼob jeʼel u beetik u maas chiʼichnaktaloʼob jeʼex:
Bukaʼaj tiempo ken u máansoʼob yéetel u láakʼtsiloʼob
Bix ken u kanáantil u taakʼinoʼob
Wa yaan u yantal u paalaloʼob
¿Baʼax jeʼel u beetik le máax tsʼokaʼan u beel wa maʼ tu tsʼáaikuba de acuerdo yéetel u núupoʼ?
Le baʼax unaj a wojéeltikoʼ
A tsʼáaikaba de acuerdo yéetel a núupeʼ maʼ u kʼáat u yaʼal wa junpʼéeliliʼ bix kan tuukuleʼexiʼ. Yaan horaeʼ kex jach maʼalob u biskuba le máaxoʼob tsʼokaʼan u beeloʼoboʼ yaan tiʼ baʼaloʼob jelaʼan u tuukuloʼob.
Tamaraeʼ ku yaʼalik: «In láakʼtsiloʼobeʼ jach maʼalob u biskubaʼob. Tu jóokʼbal semanaeʼ suuk k-muchʼikba yéetel in abueloʼob, in tíoʼob yéetel in primoʼob. Chéen baʼaleʼ u láakʼtsiloʼob in wíichameʼ maʼ suuk u sen muchʼkubaʼobiʼ. Le oʼolaleʼ maʼ igual k-tuukul tu yoʼolal le bukaʼaj tiempo unaj k-máansik yéetel k-láakʼtsiloʼoboʼ wa k-tʼanik le yanoʼob náachoʼ».
Tylereʼ ku yaʼalik: «Tumen jelaʼan bix líiʼsaʼaniloʼoneʼ, teen yéetel in wataneʼ jelaʼan bix k-tuukul tu yoʼolal le taakʼinoʼ. Le yáax mesoʼob tsʼoʼokok beeloʼ yaʼab u téenel kʼuuxilnajoʼon yoʼolal leloʼ. Yaʼab u téenel tsikbalnajoʼon hasta ka joʼopʼ k-tsʼáaikba de acuerdo».
Kaʼatúul máakoʼobeʼ táan u yilkoʼob junpʼéeliliʼ baʼal, chéen baʼaleʼ cada juntúuleʼ ku chʼíikil u paakat tiʼ le baʼax maas uts tu yichoʼ. Bey túun xanoʼ le tsʼokaʼan u beeloʼoboʼ jejeláas bix u tuukuloʼob yoʼolal jujunpʼéel baʼaloʼob.
Maʼ táan a wutskíintik le problema wa ka éejemtik wa baʼax chéen utiaʼal maʼ u seguer a kʼuuxileʼexoʼ. ¿Baʼax ken a beeteʼex wa juntúul tiʼ a taataʼex ku kʼojaʼantal yéetel kʼaʼabéet u kanáantaʼal? ¿Kux túun wa juntúul tiʼ teʼex u kʼáat ka yanak u paalal baʼaleʼ le uláakʼ juntúuloʼ maʼ u kʼáatiʼ? a
Alexeʼ ku yaʼalik: «Teen yéetel in wataneʼ yaʼab u téenel tsʼoʼok k-tsikbaltik wa yaan u yantal k-paalal wa maʼ. Letiʼeʼ maʼ tu xuʼulul u máansik tu tuukul leloʼ yéetel cada kʼiineʼ ku maas talamtal k-chʼaʼtuklik baʼax ken k-beete».
Maʼ unaj a jáan tuklik a pʼatik a núup chéen tumen maʼ a kan a tsʼáabaʼex de acuerdoiʼ. Jujuntúul máaxoʼob kaʼanchajak u xookoʼobeʼ ku yaʼalikoʼobeʼ wa maʼ tu tsʼáaikuba de acuerdo máak yéetel u núupeʼ kʼaʼabéet u beetik jeʼel baʼaxak utiaʼal u yantaltiʼ le baʼax u kʼáatoʼ, kex ka yanak u pʼatik u núup. Baʼaleʼ wa ka u beet máak lelaʼ ku yeʼesik chéen ku kaxtik u yutsil yéetel maʼatech u tuukul tiʼ le promesa tu beetaj tu táan Diosoʼ, maʼ u pʼatik u núup kex jeʼel baʼaxak ka úuchkeʼ.
Le baʼax unaj a beetkoʼ
Béeykunt le promesa ta beetaj ka tsʼoʼok a beeloʼ. Tu lugar a wilik a núup bey juntúul a enemigoeʼ múul utskíinteʼex le problemaʼob ku yantalteʼexoʼ.
Baʼax ku yaʼalik le Bibliaoʼ: «Le baʼax tsʼoʼok u nuʼupul tumen Diosoʼ, mix máak unaj u jatsik» (Mateo 19:6).
Tukulte. Koʼox aʼalikeʼ juntúul tiʼ teʼexeʼ u kʼáat ka yanak u paalal pero le uláakʼoʼ maʼatech. Wa beyoʼ tuukulnen tiʼ le baʼaloʼobaʼ:
Bix a biskabaʼex
¿Jeʼel wa a kanik a aktáanteʼex le chiʼichnakil ku yantal ikil u líiʼsaʼal juntúul chan paaloʼ?
Le baʼaxoʼob ku páaʼtaʼal ka u beet le taatatsiloʼoboʼ
Ichileʼ táakaʼan u tsʼaʼabal janal, nookʼ yéetel tuʼux u kajtal u paalal
U yantaltech le taakʼin kʼaʼabéet utiaʼal a líiʼsik juntúul chan paaloʼ
¿Yaan wa u béeytal a meyaj, a kanáantik a familia wa a beetik uláakʼ baʼaloʼob?
Baʼax ku yaʼalik le Bibliaoʼ: «¿Máax ichileʼex wa u kʼáat u beet junpʼéel torreeʼ maʼ tu kutal táanil u tukult bukaʼaj ken u tojolttiʼ?» (Lucas 14:28).
Ilawileʼex uláakʼ baʼaloʼob unaj a chʼaʼikeʼex en cuenta. Wa ka beetkeʼex lelaʼ maʼ xaaneʼ jeʼel a tsʼáaikabaʼex de acuerdoeʼ. Jeʼex wa juntúul tiʼ teʼex maʼ u kʼáat ka yanak u paalaleʼ unaj u tuukul tiʼ lelaʼ:
«Ken in waʼal maʼ in kʼáat ka yanak in paalaleʼ, ¿táan wa in waʼalik jach junpuliʼ maʼ in kʼáatiʼ, wa chéen beora maʼ in kʼáataʼ?»
«¿Táan wa in waʼalik tumen kin tuklik maʼ ten in kaʼans in paalal tubeel?»
«¿Saajken wa u pʼáatal maʼ u jach beetaʼal in cuentail tumen in núup?»
Chéen baʼaleʼ le máax u kʼáat ka yanak u paalaleʼ unaj u tuklik lelaʼ:
«¿Jeʼel wa u béeytal k-líiʼsik yéetel k-kanáantik tubeel juntúul chan paaleʼ?»
«¿Yaan wa toʼon taakʼin utiaʼal k-líiʼsik juntúul chan paal?»
Baʼax ku yaʼalik le Bibliaoʼ: «Le kaʼanilbeʼen naʼatoʼ [...] ku tsʼáaik utsil puksiʼikʼal» (Santiago 3:17).
Kʼaʼajaktech yaan baʼaloʼob maʼalobtak ku yaʼalik a núup. Koʼox aʼalikeʼ kaʼatúul máakoʼobeʼ táan u yilkoʼob junpʼéeliliʼ baʼal, chéen baʼaleʼ cada juntúuleʼ ku chʼíikil u paakat tiʼ le baʼax maas uts tu yichoʼ. Bey túun xanoʼ le tsʼokaʼan u beeloʼoboʼ jejeláas bix u tuukuloʼob yoʼolal jujunpʼéel baʼaloʼob, jeʼex bix unaj u kanáantkoʼob le taakʼinoʼ. Kéen tsikbalnakeʼex tiʼ jujunpʼéel baʼaloʼob maʼ junpʼéeliliʼ bix a tuukuleʼexeʼ, maʼalob ka a yáax ileʼex tiʼ baʼax igual a tuukuleʼex.
¿Tiʼ baʼax de acuerdoʼex?
Ilawil baʼax utsiloʼob ku taasik le baʼax ku tuklik a núupoʼ
Utiaʼal u binteʼex maʼalobeʼ, ¿jeʼel wa a kʼexik baʼax ka tuklik utiaʼal a chʼaʼik en cuenta a núupeʼ?
Baʼax ku yaʼalik le Bibliaoʼ: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintoiloʼob 10:24).
a Le baʼaloʼobaʼ unaj u tsikbaltaʼal táanil tiʼ u tsʼoʼokol u beel máak. Baʼaleʼ yaan horaeʼ jeʼel u yúuchul wa baʼaxeʼ, wa jeʼel xan u kʼexpajal u tuukul juntúul tiʼ le máaxoʼob tsʼokaʼan u beeloʼoboʼ (Eclesiastés 9:11).