Teʼ xookaʼ yaan k-ilik lelaʼ:

•  ¿Baʼax u meyaj juntúul taatatsil?

•  ¿Baʼax ku páaʼtaʼal ka u beet le taatatsiloʼ?

•  Taatatsil, tsʼáa junpʼéel maʼalob ejemplo tiʼ a hija

•  Consejoʼob utiaʼal le taatatsiloʼoboʼ

•   Antes tiʼ a chʼaʼtuklik u yantal a paalal. Le yaabilaj ku yeʼesik juntúul íichamtsil tiʼ u yatanoʼ letiʼe xan ken u yeʼes tiʼ u paalal le kʼiin kéen yanakoʼ. Le libro ku kʼaabaʼtik ¿Importan los padres?, ku yaʼalik:

   «Juntúul maʼalob taatatsileʼ le kéen u yojéelt embarazada u yataneʼ ku káajal u listokíintik baʼax kun kʼaʼabéettal, ku láakʼintik u yatan yiknal doctor, uts tu tʼaan u yilik u chaambal teʼ ultrasonidooʼ yéetel ku yuʼubik bix u péek u chan corazón. Beyoʼ ku káajal u yaabiltik táanil tiʼ u síijil. Le interés yéetel le yaabilaj ku yeʼesik tiʼ u yatanaʼ bey xan kun seguer u beetik tak ken síijik le chaambaloʼ».

   Jameseʼ ku yaʼalik: «Teʼ tiempo embarazada in watanoʼ tin wilaj in wáantik tiʼ tuláakal baʼax kʼaʼabéetchajtiʼ utiaʼal maʼ u yuʼubikuba tu juunal, tu kaʼatúulaloʼon t-arreglartaj u cuarto le chaambaloʼ. Jach jatsʼuts u jóoʼsik máak tiempo utiaʼal u máansik yéetel u yatan, toʼoneʼ jach tu yáantoʼon».

   Le Bibliaoʼ ku yaʼalik: «Maʼ a kaxtikeʼex chéen a wutsileʼex, baʼaxeʼ kaxteʼex u yutsil u maasil» (Filipenses 2:4).

•   Kéen tsʼoʼokok u síijil le chaambaloʼ. Wa ka báaxal yéetel ka méekʼik a chaambaleʼ letiʼeʼ yaan u yuʼubik a yaabiltmaj. Suukchajak xan a kanáantik, le interés ken a weʼestiʼoʼ jach yaan u yáantik le kéen nojochchajak. Le baʼaxoʼob ken a beet utiaʼal a kanáantik a chan hijooʼ yaan u yeʼesik wa jach tu jaajil a yaabiltmaj.

   Richardeʼ ku yaʼalik: «Kulen báaxal yéetel a chan hijo, beet u cheʼej. Maʼ a tuklik wa tumen taatatsilecheʼ maʼ maʼalob ka báaxalnakech tu yéeteliʼ. Maʼ u tuʼubultecheʼ le bix ken a weʼesil yaabilaj tiʼ a chan hijooʼ letiʼe xan ken u kanoʼ».

   Le Bibliaoʼ ku yaʼalik: «Le paalaloʼoboʼ junpʼéel herencia ku tsʼáaik Jéeoba tiʼ máak. Le paalaloʼoboʼ junpʼéel regalo tiʼ Dios u taal» (Salmo 127:3).

•   Le táan u nojochtal a hijooʼ. Le máaxoʼob kaʼanchajaʼan u xookoʼoboʼ tsʼoʼok u yilkoʼobeʼ maas maʼalob u calificación le paalaloʼob ku máanskoʼob yaʼab tiempo yéetel u taataʼoboʼ, maas ku kanik xan u controlartubaʼob, ku náachtaloʼob tiʼ le drogasoʼ yéetel maʼ tu jáan beetkoʼob loob tiʼ u maasil. Utiaʼal a maas amigotik a hijoeʼ kʼaʼabéet a jóoʼsik tiempo a máans tu yéetel.

   Denniseʼ ku yaʼalik: «Le ka bin in hijo kajtal táanxel tuʼuxoʼ tu yaʼaleʼ le baʼax maas ken u extrañartoʼ letiʼe bix k-tsikbal le táan k-viajaroʼ wa le táan k-cenaroʼ. Yaʼab tiʼ le jatsʼuts baʼaloʼob t-tsikbaltoʼ maʼ k-planearma kaʼachiʼ. Lelaʼ béeychaj tumen t-aprovechartaj maʼalob le tiempooʼ».

   Le Bibliaoʼ ku yaʼalik: «Jach kanáanteʼex maʼ a máaneʼex bey máaxoʼob minaʼan u naʼatoʼobeʼ, baʼaxeʼ bey máaxoʼob yaan u naʼatoʼobeʼ. Ilawil u meyajteʼex tubeel le tiempo yaanteʼexoʼ» (Efesios 5:15, 16).

 U suukileʼ le máakoʼoboʼ ku tuklikoʼobeʼ letiʼe taatatsiloʼob kʼaʼabéet u meyajoʼob utiaʼal u tsʼáaikoʼob baʼax kʼaʼabéet tiʼ le familiaoʼ yéetel u kanáantkoʼob wa yaan peligro, pero le maamatsiloʼoboʼ u meyajoʼobeʼ u máanskoʼob tiempo yéetel u paalaloʼob (Deuteronomio 1:31; Isaías 49:15). Tiʼ jujunpʼéel familiaʼobeʼ le taatatsiloʼ letiʼ beetik le meyaj kʼaʼabéet u beetik le maamatsiloʼ, yaan tuʼuxoʼob xaneʼ letiʼe maamatsil beetik le meyaj kʼaʼabéet u beetik le taatatsiloʼ. Le máaxoʼob kaʼanchajaʼan u xookoʼoboʼ ku yaʼalikoʼobeʼ le meyaj ku beetik le taatatsil yéetel le maamatsiloʼ beyoʼob u xaʼakʼil junpʼéel kiʼikiʼ janaleʼ. a

 Le investigadora Judith Wallersteinoʼ ku yeʼesik u kʼaʼabéetil le meyaj ku beetik le taatatsil yéetel le maamatsiloʼ. Letiʼeʼ ku yaʼalik: «Le ka chocartaʼab in hija yaan 12 años tiʼoʼ, letiʼeʼ tu kʼáataj ka xiʼik u papá tu yéetel teʼ ambulanciaoʼ tumen ku yuʼubik maas jeʼel u kanáantaʼaleʼ, pero le tiaʼan tu cama teʼ hospitaloʼ letiʼeʼ tu kʼáataj ka pʼáatken tu yéetel utiaʼal maʼ u yuʼubikuba tu juunal». b

 Danieleʼ ku yaʼalik: «Juntúul taatatsileʼ ku yáantaj utiaʼal u yuʼubikuba seguro le familiaoʼ tumen ku yuʼubikoʼob kanáantaʼanoʼob. Lelaʼ junpʼéel baʼal jach istikyaj tiʼ juntúul maamatsil wa tu juunal ku líiʼsik u paalal. Wa ku chʼenxikintik u paalaleʼ yaan u yeʼesik u yaabiltmoʼob yéetel ku naʼatik bix u yuʼubikubaʼob. Tu kaʼatúulaloʼobeʼ ku múul meyajoʼob bey junpʼéel equipoeʼ».

 Baʼax ku yaʼalik le Bibliaoʼ: «In paal, uʼuy u consejo a papá, yéetel maʼ a xúumpʼattik baʼax ku kaʼansiktech a maama» (Proverbios 1:8).

 Le bix ken a tratartil a hijaoʼ yaan u yeʼesiktiʼ bix unaj u tratartaʼal tumen le xiiboʼoboʼ. Kaʼapʼéel bix jeʼel u páajtal a kaʼansik a hijaeʼ:

•   Kéen u yil bix a tratartik u maama. Le yaabilaj yéetel le respeto ka weʼesik tiʼ a watanoʼ ku yeʼesik tiʼ a hija bix u modos le máax unaj u kaxtik utiaʼal u tsʼoʼokol u beel tu yéeteloʼ (1 Pedro 3:7).

•   Kéen u yil bix a tratartik. Le respeto ken a weʼes tiʼ a hijaoʼ yaan u yáantik utiaʼal ka u kan u respetartuba xan. Wa teech ka respetartikeʼ yaan u kanikeʼ kʼaʼabéet xan u respetartaʼal tumen u maasil xiiboʼob.

   Wa mantatsʼ ka criticartik a hijaeʼ jeʼel u yuʼubik mix baʼal u biilaleʼ yéetel jeʼel u kaxtik uláakʼ máax yaabiltikeʼ, pero leloʼ jeʼel u beetik u aprovecharkuba le xiiboʼob tiʼoʼ.

   Wayneeʼ ku yaʼalik: «Juntúul hijatsil yaabiltaʼan yéetel ku apoyartaʼal tumen u taataeʼ maʼ chéen jeʼel máaxak ken u yéey utiaʼal u tsʼoʼokol u beeliʼ, baʼaxeʼ yaan u kaxtik juntúul máax jatsʼuts u modos yéetel jeʼel u béeytal u beetkuba juntúul maʼalob íichamtsileʼ».