Kéen máanak kʼiineʼ, jujuntúul máaxoʼob tsʼokaʼan u beeloʼobeʼ ku jáawal u yeʼeskoʼob yaabilaj ichiloʼob. Wa táan u yúuchultech beyoʼ, ¿baʼax unaj a beetik?

•  Le baʼax unaj a wojéeltikoʼ

•  Le baʼax unaj a beetkoʼ

 Le yaabilajoʼ jach kʼaʼanaʼan u yantal ichil le máaxoʼob tsʼokaʼan u beeloʼoboʼ. Jeʼex le jaʼ yéetel le janal kʼaʼabéet utiaʼal u yantal u muukʼ máakeʼ, le yaabilajoʼ kʼaʼanaʼan utiaʼal u maas biskuba le máaxoʼob tsʼokaʼan u beeloʼoboʼ. Kex tumen tsʼoʼok u maan yaʼab jaʼaboʼobeʼ, le máaxoʼob tsʼokaʼan u beeloʼoboʼ láayliʼ kʼaʼabéet u yuʼubik yaabiltaʼanoʼob tumen u núupoʼobeʼ.

 Le jaajil yaabilajoʼ maʼatech u kaxtik chéen u yutsil. Ku kaxtik u yutsil u núup. Le oʼolaleʼ maʼ chéen wa baʼax kʼiin ku yilik u beetik wa baʼax tu yoʼolaliʼ, baʼaxeʼ mantatsʼ ku yeʼesik yaabilaj tiʼ yéetel ku yilik u beetik tuláakal le ku páajtal utiaʼal u tsʼáaik le baʼax kʼaʼabéettiʼoʼ.

 U suukileʼ le atantsiloʼ maas kʼaʼabéet u yeʼesaʼal yaabilaj tiʼ ke le íichamtsiloʼ. Maʼ xaaneʼ le íichamtsiloʼ jach u yaabiltmaj u yatan, baʼaleʼ wa chéen ku yeʼesik u yaabilaj tu káajbal yéetel tu tsʼoʼokbal le kʼiinoʼ bey xan wa chéen táanil tiʼ u núupchitaloʼobeʼ, maʼ xaaneʼ le atantsiloʼ maʼ ten u yuʼub wa yaabiltaʼan. Le oʼolaleʼ maas maʼalob ka u yeʼes yaabilaj tiʼ letiʼ mantatsʼ.

 Aʼal tiʼ a núup a yaabiltmaj. Jeʼel u yuʼubik jach yaabiltaʼan tak chéen yéetel ka a waʼaltiʼ lelaʼ: «Jach in yaabiltmech» yéetel «kiʼimak in wóol úuchik u tsʼoʼokol in beel ta wéetel».

 Teksto jeʼel u yáantajeʼ: «Tumen tu chiʼ máak ku jóokʼol tuláakal baʼax yaan tu puksiʼikʼal» (Mateo 12:34).

 Beet lelaʼ: Maʼ u xuʼulul a waʼalik tiʼ a núup a yaabiltmaj. Jeʼel u páajtal a tsʼíibtik mejen juʼunoʼob tiʼ utiaʼal a waʼalik a yaabiltmeʼ wa a túuxtik mensajeʼob wa correoʼob tiʼ.

 Eʼes a yaabiltmaj yéetel baʼaxoʼob ka beetik. A méekʼik, a tsʼuʼutsʼik yéetel a machik u kʼabeʼ jujunpʼéel bix jeʼel a weʼesik jach jaaj a yaabiltmeʼ. Jeʼel xan a weʼesik a yaabiltmaj kéen a síi wa baʼax tiʼeʼ bey xan kéen a pakt yéetel yaabilaj. Uláakʼ bix jeʼel a weʼesik a yaabiltmeʼ letiʼe kéen a wáant u beet wa baʼaxoʼ. Jeʼex le kéen a wáant u chʼúuy u bolsail u maanoʼ, a jeʼik u jool le naj tiʼoʼ, a wáantik u pʼoʼ le nookʼoʼoboʼ, u pʼoʼ baʼaloʼob yéetel u beetik le jaanloʼ. Utiaʼal le atantsiloʼ yaan horaeʼ maʼ chéen junpʼéel áantajiʼ, baʼaxeʼ táan u yeʼesaʼal yaabilaj tiʼ.

 Teksto jeʼel u yáantajeʼ: «Maʼ chéen unaj k-aʼalik yéetel k-chiʼ yaan k-yaabilajeʼexiʼ, baʼaxeʼ kʼaʼabéet k-eʼesik [...] yéetel le baʼaxoʼob k-beetkoʼ» (1 Juan 3:18).

 Beet lelaʼ: Tratart a núup jeʼex a beetik le táan a enamorartik kaʼachoʼ.

 Jóoʼs tiempo utiaʼal a máansik yéetel a núup. A beetik lelaʼ ku yáantaj utiaʼal u yilik a núup a yaabiltmaj yéetel ku beetik a maas biskabaʼex. Baʼaleʼ wa yaan a paalaleʼex yéetel yaʼab baʼaloʼob ka beetkeʼexeʼ jeʼel u talamtal a jóoʼskeʼex tiempoeʼ. Le oʼolaleʼ cada wa baʼax kʼiineʼ jóoʼseʼex u súutukil utiaʼal a jóokʼleʼex xíimbal ta juunaleʼex.

 Teksto jeʼel u yáantajeʼ: «Jach ileʼex máakalmáak le baʼaloʼob maas kʼaʼanaʼantakoʼ» (Filiposiloʼob 1:10).

 Beet lelaʼ: Kex tumen yaʼab baʼaxoʼob yaan beetbileʼ, jujuntúul máaxoʼob tsʼokaʼan u beeloʼobeʼ ku jóoʼskoʼob u súutukil utiaʼal u «binoʼob cenar» wa utiaʼal u binoʼob wa jaypʼéel kʼiin «xíimbal yéetel u núup chéen tu juunaloʼob».

 Maas kʼaj óolt a núup. Cada juntúuleʼ jelaʼan bix u kʼáat ka eʼesaʼak yaabilaj tiʼ. Le oʼolaleʼ tsikbalteʼex bix a kʼáateʼex ka eʼesaʼakteʼex yaabilaj. Kéen tsʼoʼokkeʼ, ilawil a beetik tuláakal le ku páajtal utiaʼal a kaxtik u yutsil a núupoʼ. Kʼaʼajakteʼexeʼ le yaabilajoʼ jach kʼaʼanaʼan utiaʼal a biskabaʼex maʼalob.

 Teksto jeʼel u yáantajeʼ: «Le máax yaan u yaabilajeʼ [...] maʼatech u kaxtik chéen u yutsil» (1 Corintoiloʼob 13:4, 5).

 Beet lelaʼ: Tu lugar a kʼáatik ka eʼesaʼaktech yaabilajeʼ, tukulte: «¿Baʼax unaj in beetik utiaʼal ka eʼesaʼakten yaabilaj tumen in núup?».