Nicoleeʼ ku yaʼalik: «K-ojel peligroso le pornografíaoʼ, pero mix juntéen t-tuklaj wa jeʼel u kʼuchul tu kʼab k-hijaeʼ».

Teʼ xookaʼ yaan a kanik lelaʼ:

•  Le baʼax unaj a wojéeltikoʼ

•  Bix jeʼel a kanáantik a hijo tiʼ le pornografíaoʼ

•  Baʼax jeʼel a beetik wa tsʼoʼok u chaʼantik pornografía a hijoeʼ

 Le baʼax unaj a wojéeltikoʼ

 Kex mejentak le paalaloʼoboʼ séeb jeʼel u kʼuchul le pornografía tu kʼaboʼoboʼ. Tsʼoʼok u yilaʼaleʼ 11 años yaan tiʼ juntúul paal ken u yáax chaʼant pornografía.

 Le mejen paalaloʼoboʼ kex maʼ u yóoliliʼobeʼ jeʼel u chaʼantikoʼob pornografíaeʼ. Por ejemploeʼ jeʼel u téek chíikpajal pornografía tiʼob kéen joʼopʼok u kaxtikoʼob wa baʼax Interneteʼ wa kéen meyajnaktiʼob le redes socialesoʼ. Maʼ xan xaneʼ jeʼel u jóokʼol junpʼéel anuncio yaan pornografía le táan u báaxtikoʼob videojuego ich Internetoʼ. Jejeláas bix jeʼel u chaʼantaʼal pornografíaeʼ, le maas suuk u chaʼantaʼaloʼ ku yilaʼal tiʼ fotoʼob yéetel tiʼ videoʼob. Ku béeytal xan u xoʼokol wa u yuʼubaʼal u audioil. Tuláakal le baʼaloʼobaʼ tiaʼan teʼ Internetoʼ yéetel séeb jeʼel u descargartaʼaleʼ.

 Tsʼoʼoleʼ jeʼel xan u túuxtaʼal pornografía tiʼ a paalal tiʼ junpʼéel mensajeeʼ. Tiʼ junpʼéel encuesta beetaʼab tiʼ 900 paalaloʼobeʼ, óoliʼ u 90 por ciento tiʼ le x-chʼúupalaloʼob yéetel óoliʼ u 50 por ciento tiʼ le xiʼipalaloʼoboʼ tu yaʼaloʼobeʼ tsʼoʼok u túuxtaʼaltiʼob pornografía tumen u yéet xookoʼob.

 Ichil le pornografíaoʼ yaan violenciaiʼ. Le pornografía suuk u chaʼantaʼaloʼ yaan violenciaiʼ maases tu contra le koʼoleloʼoboʼ.

 Le pornografíaoʼ ku perjudicartik le mejen paalaloʼoboʼ. Tsʼoʼok u yilaʼaleʼ le mejen paalaloʼob chaʼantik pornografíaoʼ:

•   Ku yéemel u calificaciónoʼob.

•   Ku tsaʼayaltiʼob ansiedad, depresión yéetel ku yuʼubik mix baʼal u biilaloʼob.

•   Ku pʼáatal maʼ jelaʼan u yilkoʼob u beetaʼal kʼaas tiʼ wa máaxiʼ (agresión sexual).

 U jaajil: Le pornografíaoʼ jach séeb jeʼel u beetik loob tiʼ le mejen paalaloʼoboʼ, le oʼolaleʼ le taatatsiloʼoboʼ jach kʼaʼabéet u kanáantik u mejen paalaloʼob.

 Teksto jeʼel u yáantajeʼ: «Le tʼaanoʼob táan in waʼalikteʼex bejlaʼaʼ kʼaʼabéet u yantal ichil a puksiʼikʼaleʼex, kʼaʼabéet a kaʼansik tiʼ a paalaleʼex yéetel a tsikbaltikeʼextiʼob le kéen kulakeʼex ta wotocheʼex, le kéen xíimbalnakeʼex teʼ bejoʼ, le kéen chilakeʼex bey xan le kéen líiʼkeʼex» (Deuteronomio 6:6, 7).

 Bix jeʼel a kanáantik a hijo tiʼ le pornografíaoʼ

 Informartaba. Tukult baʼax kʼiin yéetel baʼax súutukil maas jeʼel u chaʼantik pornografía a hijoeʼ. a Por ejemploeʼ teʼ escuelaoʼ, ¿ku yokol wa Internet sin ke u yantal máax supervisartik baʼax ku beetik?

 Ilawil baʼax configuraciónil ku taasik u celular a hijo, baʼax aplicaciónil wa videojuegoʼob u descargarmaj. Por ejemploeʼ yaan aplicaciónoʼobeʼ tu séebaʼanil ku borrartik le mensajeoboʼ, wa ku túuxtaʼal junpʼéel mensaje yaan pornografíaeʼ tu séebaʼanil ku beetik u saʼatal. Táan xan u bin u maas yaʼabtal le videojuegoʼob ich Internet yaan pornografíaoʼ, le máaxoʼob báaxtikoʼ hasta ku béeytal u controlartikoʼob le personajeʼob le táan u yantal relaciones sexuales tiʼoboʼ.

 Davideʼ ku yaʼalik: «Wa yaan u celular a hijoeʼ teech taatatsilecheʼ kʼaʼabéet a kanik xan a usarte, activart le control parentaloʼ yéetel revisart baʼax ku chaʼantik a hijo. Teneʼ bey in beetikoʼ».

 Beet tuláakal le ku páajtal utiaʼal a kanáantkoʼob. Utiaʼal a kanáantik a paalal tiʼ le pornografíaoʼ configurart u celular bey xan tuláakal le nuʼukuloʼob yaan ta wotoch yaan Internet tiʼoʼ yéetel bloqueart le páginas yaan pornografíaoʼ. Activart le control parentaloʼ yéetel kʼáat u contraseñail u celular.

 Maurizioeʼ ku yaʼalik: «Teneʼ jach tsʼoʼok u yáantken in activartik le control parentaloʼ, in configurartik le televisiónoʼ yéetel in wojéeltik u contraseñail u celular».

 Gianlucaeʼ ku yaʼalik: «Teneʼ maʼatech in chaʼik tiʼ in paalal ka u chaʼantoʼob videoʼob wa u kʼalmoʼob le joonajoʼ, tsʼoʼoleʼ le kéen xiʼikoʼob weenleʼ maʼatech in chaʼik u bisik u celuraroʼob tu cuartoʼob».

 Kaʼanstiʼ baʼax ken u beeteʼ. Juntúul maamatsil ku kʼaabaʼtik Flaviaeʼ ku yaʼalik: «Yaan taatatsiloʼobeʼ maʼ taak u tsikbaloʼob yoʼolal pornografía yéetel u paalaloʼobiʼ tumen ku tuklikoʼobeʼ mix bikʼin kun taaktal u chaʼantikoʼob». Uláakʼ taatatsiloʼobeʼ ku tuklikoʼobeʼ wa ku tsikbaloʼob yoʼolal pornografía yéetel u paalaloʼobeʼ jeʼel u taaktal u chaʼantikoʼobeʼ. Chéen baʼaleʼ maʼ maʼalob ka tuukulnakoʼob beyoʼ. Le taatatsiloʼob u yaabiltmaj u paalaloʼoboʼ antes tiʼ u chaʼantikoʼob pornografíaeʼ kʼaʼabéet u tsoliktiʼob baʼax consecuenciail jeʼel u yantaltiʼob wa ku chaʼantikoʼobeʼ. ¿Bix jeʼel a tsikbal yéetel a paalaleʼ?

 Wa mejentak a paalaleʼ aʼaltiʼob baʼax jeʼel u páajtal u beetkoʼob wa ku téek chíikpajal pornografía tiʼobeʼ. Por ejemploeʼ, jeʼel u páajtal u mutsʼik u yichoʼobeʼ wa u tupikoʼob le baʼax ku chaʼantikoʼoboʼ. Aʼal xan tiʼob ka u tsikbaltoʼob teech le baʼax tu yiloʼob wa tu yuʼuboʼoboʼ. b

 Maurizioeʼ ku yaʼalik: «Desde tu chichnil k-hijoeʼ t-tsolajtiʼ bukaʼaj loob ku beetik tiʼ máak le pornografíaoʼ. Le yaan 11 años tiʼoʼ tu descargartaj junpʼéel videojuego tu celular, chéen baʼaleʼ káaj u chíikpajal anuncioʼob yaan pornografíaiʼ, tsʼoʼoleʼ káaj u kʼáataʼal xan tiʼ ka u túuxt u foto. Pero como u yojel maʼ maʼalobeʼ tu séebaʼanil tu yaʼalajten le baʼax ku yúuchloʼ».

 Wa tsʼoʼok u táankelemtal a paalaleʼ áantoʼob utiaʼal maʼ u chaʼantikoʼob, u yuʼubikoʼob, wa u xokikoʼob pornografía. Tsʼíibteʼex jujunpʼéel reglas kʼaʼabéet u cumplirtaʼal ichil le familiaoʼ. Aʼal xan tiʼ a hijo ka u tsʼíibt baʼax jeʼel u beetik wa ka téek chíikpajak pornografíaeʼ tiʼeʼ yéetel baʼaxten bey u tuukuloʼ. Aʼal xan tiʼ ka u tsʼíibt baʼax consecuenciail jeʼel u yantaltiʼ wa u yóoliliʼ u chaʼantik pornografíaeʼ, jeʼex u yuʼubik mix baʼal u biilal, yaan u xuʼulul u confiar u papáʼob tiʼ yéetel yaan u xuʼulul u biskuba yéetel Dios. c

 Laurettaeʼ ku yaʼalik: «Jeʼex u bin u nojochtal a paalaleʼ aʼaltiʼob baʼax cosecuencial ku taasik u chaʼantal pornografía, leloʼ jeʼel u yáantik utiaʼal maʼ u chaʼantikeʼ».

 Davideʼ ku yaʼalik: «Wa le paalaloʼob ku naʼatkoʼob maʼ chéen jeʼel u beetik loob le pornografíaoʼ baʼaxeʼ jeʼel tak u beetik u náachtaloʼob tiʼ Jéeobaeʼ, maas jeʼel u kanáantkubaʼobeʼ»

 Suukchajak a tsikbal yéetel a paalal. Le paalaloʼoboʼ taak u tsikbaloʼob yoʼolal sexo yéetel u papáʼob, táakaʼan xan u múul tsikbaloʼob yoʼolal pornografía. Rachel de Souzaeʼ ku yaʼalik: «Le baʼax ku tsʼíiboltik [le paalaloʼoboʼ] letiʼeʼ ka séeb tsikbalnakoʼon tu yéeteloʼoboʼ. Jeʼex u bin u nojochtal juntúul paaleʼ bey xan unaj u bin u kaʼansaʼaltiʼ le baʼax unaj u yojéeltikoʼ» (Comisionada de la infancia de Inglaterra).

 Flaviaeʼ ku yaʼalik: «Tin chichnileʼ in papáʼobeʼ mix juntéen tsikbalnajoʼob tin wéetel yoʼolal jujunpʼéel baʼaloʼob kʼaʼabéet in wojéeltik. Kexiʼ ka u beetoʼob kaʼacheʼ. Beora yaan in paalaleʼ kin beetik tuláakal le ku páajtal utiaʼal in tsikbal tu yéeteloʼob yoʼolal sexo».

 Baʼax jeʼel a beetik wa tsʼoʼok u chaʼantik pornografía a hijoeʼ

 Maʼ a pʼuʼujul. Wa ka wojéeltik tsʼoʼok u chaʼantik, u xokik , wa u yuʼubik pornografía a hijoeʼ maʼ a jáan pʼuʼujul. Maʼ xaneʼ letiʼeʼ yaachajaʼan u yóol yéetel suʼlak yoʼolal baʼax tsʼoʼok u yúuchul. Wa ka pʼuʼujuleʼ chéen yaan a beetik u maas yaatal u yóol a hijo yéetel maʼ ken u yóot u kaʼa tsikbalttech baʼax ku yúuchultiʼ.

 Ojéelt jach bix úuchik. Tu lugar a tuklik yaanal baʼaleʼ kʼat tiʼ a hijo jach baʼax úuchiʼ. Tukulte: ¿Yaan wa máax túuxttiʼ le fotooʼ wa letiʼ kaxte? ¿Yáaxil wa u chaʼantik pornografíaoʼ? ¿U celulareʼ u configurarmaj wa utiaʼal maʼ u chíikpajal pornografíaiʼ? Wa u cofigurarmeʼ, ¿tu desactivartaj wa? Maʼ u tuʼubultecheʼ le kʼáatchiʼobaʼ chéen utiaʼal ka u tsikbalttech a hijo baʼax úuchiʼ.

 Beet lelaʼ. Wa maʼ u yóoliliʼ úuchik u chaʼantik a hijo pornografíaeʼ maʼ xaneʼ kʼaʼabéet a kaʼa activartik le control parental tu celularoʼ bey xan le uláakʼ configuraciónoʼob ku taaskoʼ.

 Wa ka wilik u yóoliliʼ u kaxtik pornografía u chaʼante aʼal u núuk tiʼ pero beet yéetel yaabilaj. Utiaʼal u yilik a hijo baʼaxten maʼ unaj u chaʼantik pornografíaeʼ d múul xokeʼex baʼax ku yaʼalik Job 31:1, Salmo 97:10, yéetel Salmo 101:3, aʼaltiʼeʼ yaan a tsikbal tu yéetel cada semana utiaʼal a wilik bix u bintiʼ bey xan utiaʼal ka u yaʼaltech wa yaan baʼax kʼaʼabéettiʼ.