Le Armagedónoʼ letiʼe kéen baʼatelnak Dios tu contra u gobierno wíinikoʼ. Le gobiernoʼob yéetel le máaxoʼob apoyarkoʼ ku yeʼeskoʼob tiaʼanoʼob tu contra Dioseʼ tumen maʼ u kʼáat u beetoʼob baʼaxoʼob ku yaʼalikiʼ (Salmo 2:2). Le Armagedónoʼ yaan u xuʼulsik u gobierno wíinik (Daniel 2:44).

 Le tʼaan Armagedónoʼ ku tsʼíibtaʼal xan bey Har–Magedón. Le tʼaanaʼ chéen juntéen ku chíikpajal teʼ Biblia tu libroil Apocalipsisoʼ. U libroil Apocalipsiseʼ ku yaʼalikeʼ yaan u muchʼkíintaʼal «u reyiloʼob tuláakal yóokʼol kaab» utiaʼal le baʼateʼel «kun antal tu noj kʼiinil le Dios jach táaj yaan u poderoʼ». Le baʼatelaʼ yaan u yúuchul «teʼ lugar ku kʼaabaʼtik ich hebreo Armagedónoʼ» (Apocalipsis 16:14, 16).

 ¿Máaxoʼob kun baʼateloʼob teʼ Armagedónoʼ? Jesús yéetel u soldadoʼob yaan teʼ kaʼanoʼ yaan u baʼateloʼob yéetel yaan u ganaroʼob (Apocalipsis 19:11-16, 19-21). Ichil u enemigoʼob Dioseʼ táakaʼan le máaxoʼob ku tsʼáaikubaʼob tu contra u gobiernooʼ yéetel ku mixbaʼalkúuntikoʼob u kʼaabaʼoʼ (Ezequiel 39:7).

 ¿Chéen wa tiʼ junpʼéel lugar kun antal u baʼatelil Armagedón? Maʼatech. U baʼatelil Armagedóneʼ yaan u yúuchul tiʼ tuláakal yóokʼol kaab, maʼ chéen tiʼ junpʼéel lugar kun antaliʼ (Jeremías 25:32-34; Ezequiel 39:17-20).

 Le tʼaan Armagedónoʼ (ich hebreo, Har Meghiddóhn) u kʼáat u yaʼal «U Montañail Meguidó». Meguidóeʼ junpʼéel kaaj yaan naatsʼ tiʼ u kaajil Israel kaʼachi. Naatsʼ tiʼ le lugaroʼ anchaj nukuch baʼateloʼobiʼ. Le Bibliaoʼ ku tʼaan tiʼ jujunpʼéeloʼobiʼ (Jueces 5:19, 20; 2 Reyes 9:27; 23:29). Chéen baʼaleʼ le kéen aʼalaʼak Armagedóneʼ maʼ táan u yúuchul tʼaan tuʼux yaan u úuchben kaajil Meguidóiʼ tumen teʼeloʼ minaʼan mix junpʼéel montañaiʼ. Tsʼoʼoleʼ tu táax luʼumil Jezreel tuʼux yaan Meguidóeʼ maʼ tu caber tuláakal le máakoʼob kun baʼateloʼob tu contra Diosoʼ. U jaajileʼ le Armagedónoʼ maʼ junpʼéel lugariʼ, baʼaxeʼ letiʼe kéen baʼatelnak tuláakal u gobiernoʼob wíinik tu contra u gobierno Diosoʼ.

 ¿Baʼax kun úuchul tu baʼatelil Armagedón? Maʼ k-ojel jach bix ken u usart u poder Diosiʼ. Maʼ xaaneʼ yaan u meyajtiʼ le baʼaxoʼob meyajnajtiʼ úuchjeakil jeʼex bat, u tíitkuba le luʼumoʼ, búulkabal, u kʼáaxal kʼáakʼ yéetel azufre, u jaatsʼ cháak yéetel kʼojaʼaniloʼob (Job 38:22, 23; Ezequiel 38:19, 22; Habacuk 3:10, 11; Zacarías 14:12). Yoʼolal tuláakal le baʼaxoʼob kun úuchloʼ u enemigoʼob Dioseʼ yaan u paklan atacarkubaʼob, pero tu tsʼookeʼ yaan u tsʼáaikoʼob cuentaeʼ Dios ku baʼateʼel tu contraʼob (Ezequiel 38:21, 23; Zacarías 14:13).

 Le Armagedónoʼ, ¿yaan wa u xuʼulsik le yóokʼol kaabaʼ? Le Luʼum wa le yóokʼol kaabaʼ maʼ kun xuʼulsbil teʼ Armagedónoʼ. Le Luʼumaʼ beetaʼan utiaʼal u kajtal wíinik mantatsʼiʼ (Salmo 37:29; 96:10; Eclesiastés 1:4). Maʼ tuláakal máak kun xuʼulsbil teʼ Armagedónoʼ, baʼaxeʼ yaan u páajtal u salvarkuba «yaʼabkach máakoʼob» meyajtik Dios (Apocalipsis 7:9, 14; Salmo 37:34).

 ¿Maʼ wa tu yaʼalik le Bibliaoʼ le Armagedónoʼ yaan u xuʼulsik le yóokʼol kaabaʼ? Yaan horaeʼ teʼ Bibliaoʼ ku meyaj le tʼaan yóokʼol kaab utiaʼal u yúuchul tʼaan tiʼ le Luʼum tuʼux kajaʼanoʼonaʼ, pero yaan hora xaneʼ ku meyaj utiaʼal u yúuchul tʼaan tiʼ le máaxoʼob yanoʼob tu contra Diosoʼ (1 Juan 2:15-17). Le kéen u yaʼal le Biblia teʼ Armagedón kun «tsʼoʼokol tiʼ le yóokʼol kaabaʼ» táan u tʼaan tiʼ u xuʼulsaʼal le kʼasaʼan máakoʼoboʼ (Mateo 24:3).

 ¿Baʼax kʼiin kun antal le Armagedónoʼ? Jesúseʼ tu yaʼaleʼ antes tiʼ le Armagedónoʼ «yaan u sen muʼyaj máak». Pero tu yaʼalaj xaneʼ «u kʼiinil yéetel u yoraileʼ mix máak u yojel, mix le ángeloʼob yanoʼob teʼ kaʼanoʼ, mix le Paaloʼ, chéen le Taataoʼ» (Mateo 24:21, 36). Le Bibliaoʼ ku yaʼalikeʼ le Armagedónoʼ yaan u yúuchul teʼ kʼiinoʼob kʼaj óolaʼan bey u «kʼiiniloʼob way yaan u Paal máakeʼ», lelaʼ káaj tu añoil 1914 (Mateo 24:37-39).