U oraciónil le padrenuestrooʼ chéen junpʼéel ejemplo ku yeʼesiktoʼon le baʼaxoʼob unaj k-aʼalik kéen orarnakoʼon tiʼ Diosoʼ. Jesúseʼ tu yaʼalaj u oraciónil le padrenuestrooʼ tumen u discípuloʼobeʼ tu kʼáatoʼobtiʼ lelaʼ: «Yuumtsil, kaʼansoʼon orar» (Lucas 11:1). Chéen baʼaleʼ u oraciónil le padrenuestrooʼ maʼ chéen letiʼe ku yuʼubik Diosoʼ. a Chéen junpʼéel ejemplo tiʼ le clase oraciónoʼob ku yuʼubik Diosoʼ.

Teʼ xookaʼ yaan k-ilik lelaʼ.

•  ¿Baʼax ku yaʼalik u oraciónil le padrenuestrooʼ?

•  ¿Baʼax u kʼáat u yaʼal u oraciónil le padrenuestrooʼ?

•  ¿Unaj wa u yaʼalik máak le padrenuestro cada kéen orarnakoʼ?

•  ¿Bix unaj k-orar?

•  Uláakʼ oraciónoʼob yaan teʼ Bibliaoʼ

 U oraciónil le padrenuestro yaan teʼ Mateo 6:9-13, jejeláas bix tsʼíibtaʼanil tiʼ uláakʼ bibliaʼob. Koʼox ilik kaʼapʼéel ejemploʼob.

 Túumben Luʼum: «K-Taata yanech teʼ kaʼanoʼ, santificartaʼak a kʼaabaʼ. Taalak a Reino, beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ. Tsʼáa k-oʼoch waaj utiaʼal le kʼiinaʼ. Perdonart k-pʼaax, jeʼel bix toʼon tsʼoʼok k-perdonartik le máaxoʼob pʼaxmiloʼonoʼ. Maʼ a chaʼik k-lúubul tiʼ baʼax kʼaas, baʼaxeʼ kanáantoʼon tiʼ le Kʼaasilbaʼaloʼ».

 Quiliʼich Biblia ich Maya: «K-Yuum yanech teʼ kaʼanoʼ, kiliʼichkúunsaʼak a kʼaabaʼ. Taalak a [reino]. Beetaʼak baʼax a kʼáat way luʼumeʼ jeʼel bix u beetaʼal teʼ kaʼanoʼ. Tsʼáatoʼon bejlaʼeʼ le waaj kʼaʼabéet tiʼ toʼon sáamsamaloʼ. Saʼates toʼon le kʼaas tsʼoʼok k-beetkoʼ, jeʼel bix toʼon [k-perdonartik] le máaxoʼob ku beetiktoʼon kʼaasoʼ. Maʼ a chaʼik k-lúubul tiʼ túuntaj óolal, baʼaleʼ tokoʼon tiʼ kʼaas». b

 Le baʼaxoʼob tu kaʼansaj Jesúsoʼ yaan yil yéetel u maasil baʼaxoʼob ku yaʼalik u Tʼaan Diosoʼ, le oʼolaleʼ le u maasil baʼaxoʼob tsʼíibtaʼan teʼ Bibliaoʼ ku tsolkoʼob baʼax u kʼáat u yaʼal u oraciónil le padrenuestrooʼ.

«K-Taata yanech teʼ kaʼanoʼ»

 Maʼalob ka k-aʼal tiʼ Dios letiʼ k-Taata tumen letiʼ beetmiloʼon yéetel letiʼ tsʼaamil k-kuxtal (Isaías 64:8).

«Santificartaʼak a kʼaabaʼ»

 U kʼaabaʼ Dioseʼ Jéeoba, le kʼaabaʼaʼ santo yéetel unaj u respetarta’al. Toʼoneʼ k-santificartik u kʼaabaʼ Dios kéen tʼaanakoʼon tiʼ u jatsʼuts modos yéetel kéen k-tsʼáa ojéeltbil u promesaʼob (Salmo 83:18; Isaías 6:3).

«Taalak a Reino»

 U Reino Dioseʼ tiaʼan teʼ kaʼanoʼ yéetel Jesús u reyil. Jesúseʼ tu kaʼansajtoʼoneʼ kéen orarnakoʼoneʼ unaj k-kʼáatik ka taalak u Reino Dios yéetel ka gobernarnak tiʼ tuláakal le Luʼumaʼ (Daniel 2:44; Apocalipsis 11:15).

«Beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ»

 Teʼ kaʼanoʼ minaʼan kʼasaʼanil mix kíimil. Dioseʼ bey xan u kʼáat ka kuxlak wíinik way Luʼumeʼ, ich jeetsʼelil yéetel ich kiʼimak óolal (Salmo 37:11, 29).

«Tsʼáa k-oʼoch waaj utiaʼal le kʼiinaʼ»

 Le tʼaanoʼobaʼ ku kʼaʼajsiktoʼon kʼaʼabéettoʼon u yáantaj Dios utiaʼal u yantaltoʼon janal yéetel uláakʼ baʼaloʼob kʼaʼabéettoʼon utiaʼal k-kuxtal (Hechos 17:24, 25).

«Perdonart k-pʼaax, jeʼel bix toʼon tsʼoʼok k-perdonartik le máaxoʼob pʼaxmiloʼonoʼ»

 Teʼ tekstoaʼ le tʼaan «pʼaaxoʼ» u kʼáat u yaʼal le baʼaloʼob maʼ maʼalobtak k-beetkoʼ wa u kʼebantal máak. Tuláakloʼon kʼeban máakoʼon yéetel kʼaʼabéet k-perdonartaʼal (Lucas 11:4). Le oʼolaleʼ wa k-kʼáat ka perdonartaʼakoʼon tumen Dioseʼ kʼaʼabéet k-perdonartik xan u maasil (Mateo 6:14, 15).

«Maʼ a chaʼik k-lúubul tiʼ baʼax kʼaas, baʼaxeʼ kanáantoʼon tiʼ le Kʼaasilbaʼaloʼ»

 Jéeobaeʼ maʼatech u probarkoʼon utiaʼal k-beetik baʼax kʼaas (Santiago 1:13). Chéen baʼaleʼ Satanás, le Kʼaasilbaʼaloʼ, ku probartik máak utiaʼal u lúubul tiʼ baʼax kʼaas (1 Juan 5:19; Mateo 4:1-4). Wa k-probartaʼal utiaʼal k-beetik baʼax kʼaaseʼ unaj k-kʼáatik u yáantaj Jéeoba utiaʼal k-uʼuyik u tʼaan.

 U oraciónil le padrenuestro tu yaʼalaj Jesúsoʼ chéen junpʼéel ejemplo tu tsʼáaj utiaʼal u yeʼesik bix unaj u orar máak, maʼ utiaʼal ka u yaʼal máak de memoriail cada kéen orarnakiʼ. Antes u yaʼalik Jesús u oraciónil le padrenuestrooʼ tu yaʼalaj: «Kéen orarnakech túuneʼ maʼ a babal aʼalik junpʼéeliliʼ baʼal» (Mateo 6:7). Tsʼoʼoleʼ tiʼ uláakʼ súutukil ka tu kaʼansaj orar le máakoʼoboʼ meyajnajtiʼ uláakʼ tʼaanoʼob (Lucas 11:2-4).

 Kéen orarnak máakeʼ maas maʼalob ka u beet yéetel u jaajil u yóol yéetel u yaʼalik tiʼ Dios le baʼaloʼob ku síijil tu puksiʼikʼaloʼ (Salmo 62:8).

 U oraciónil le padrenuestrooʼ junpʼéel ejemplo tiʼ le clase oraciónoʼob ku yuʼubik Diosoʼ. Koʼox ilik uláakʼ tekstoʼob eʼesik jeʼel u páajtal k-aʼalik ichil k-oraciónoʼob jujunpʼéel baʼaxoʼob ku yaʼalaʼal teʼ padrenuestrooʼ.

•   Orarnen chéen tiʼ Jéeoba

   Teksto: «Aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex» (Filipenses 4:6).

   Baʼax u kʼáat u yaʼale: Tu káajbal u oraciónil le padrenuestrooʼ Jesúseʼ tu yaʼalaj: «K-Taata yanech teʼ kaʼanoʼ». Leloʼ ku yeʼesiktoʼoneʼ chéen tiʼ Jéeoba unaj k-orar, maʼ tiʼ Jesúsiʼ, tiʼ Maríaiʼ mix tiʼ uláakʼ santoʼobiʼ.

•   Orarnen yoʼolal baʼaxoʼob uts tu tʼaan Dios

   Teksto: «Jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik» (1 Juan 5:14).

   Baʼax u kʼáat u yaʼale: Jeʼel u páajtal k-orar yoʼolal jeʼel baʼaxak maʼ tu bin tu contra u voluntad Dioseʼ. Úuchik u yaʼalik Jesús ichil u oraciónil le padrenuestro le tʼaan «beetaʼak baʼax a kʼáat», tu yeʼeseʼ jach kʼaʼanaʼan k-chʼaʼik en cuenta baʼax u voluntad Dios. Wa k-xokik le Bibliaoʼ yaan k-ojéeltik baʼax u voluntad Dios wa baʼax u tukultmaj utiaʼal wíinik bey xan utiaʼal le yóokʼol kaabaʼ.

•   Orarnen yoʼolal baʼaxoʼob preocuparkech

   Teksto: «Pʼat a kuuch tiʼ Jéeoba, letiʼ túuneʼ yaan u yáantkech» (Salmo 55:22).

   Baʼax u kʼáat u yaʼale: Jéeobaeʼ ku preocuparkuba t-oʼolal. Le ka tʼaanaj Jesús yoʼolal u oraciónil le padrenuestrooʼ tu chʼaʼchiʼitaj baʼaloʼob ku preocupartik máak sáamsamal. Toʼon xaneʼ jeʼel u páajtal k-orar yoʼolal baʼaxoʼob kʼaʼabéettoʼon, táanil tiʼ k-chʼaʼtuklik k-beetik wa baʼax, kéen k-aktáant wa baʼax problemaileʼ wa utiaʼal k-kʼáatik ka perdonartaʼakoʼon. c