Le Bibliaoʼ ku yaʼalikeʼ Dioseʼ u kʼáat ‹ka xiʼiktech maʼalobil yéetel ka béeychajak le baʼax ka páaʼtikoʼ› wa ka yanaktech esperanza a (Jeremías 29:11). Dios xaneʼ tu tsʼáajtoʼon le Biblia utiaʼal u líiʼsik k-óoloʼ (Romanos 15:4). Teʼ xookaʼ yaan k-ilkeʼ le baʼaxoʼob ku yaʼalik le Bibliaoʼ ku beetik u kiʼimaktal k-óol sáamsamal. Tsʼoʼoleʼ le promesaʼob tsʼíibtaʼan teʼ Bibliaoʼ ku tsʼáaiktoʼon esperanza teʼ kʼiinoʼobaʼ bey xan teʼ kʼiinoʼob ku taaloʼoboʼ.

Teʼ xookaʼ yaan k-tʼaan tiʼ lelaʼ:

•  ¿Bix u yáantkoʼon le Biblia utiaʼal maʼ u xuʼulul u kiʼimaktal k-óoloʼ?

•  ¿Bix u líiʼsik k-óol le promesaʼob yaan teʼ Bibliaoʼ?

•  Tekstoʼob ku tʼaanoʼob yoʼolal le esperanzaoʼ

 Le Bibliaoʼ ku yáantkoʼon utiaʼal maʼ u xuʼulul u kiʼimaktal k-óol tumen ku yaʼaliktoʼon baʼax unaj k-beetik utiaʼal ka xiʼiktoʼon maʼalobil. Koʼox ilik jujunpʼéeloʼobiʼ.

•   Chʼaʼ en cuenta le baʼax ku yaʼalik le Bibliaoʼ. Salmo 119:105 ku yaʼalik: «A tʼaaneʼ junpʼéel lámpara utiaʼal in wook, bey junpʼéel sáasil ku julik le bej tuʼux kin máanoʼ». Junpʼéel lámparaeʼ jeʼel u yáantkoʼon utiaʼal k-julik le baʼaxoʼob yaan naatsʼ tiʼ toʼonoʼ bey xan le baʼaxoʼob yanoʼob náachoʼ. Bey túun xanoʼ le consejoʼob yanoʼob teʼ Bibliaoʼ jeʼel u yáantkoʼon utiaʼal k-utskíintik le problemas ku yantaltoʼon teʼ kʼiinoʼobaʼ. Le baʼaxoʼob ku yaʼalikoʼ ku tsʼáaik u muukʼ máak yéetel «ku kiʼimakkúuntik u yóol u puksiʼikʼal máak» (Salmo 19:7, 8). Tsʼoʼoleʼ le jatsʼuts promesaʼob yaan teʼ Bibliaoʼ ku beetik u kiʼimaktal k-óol yéetel ku tsʼáaiktoʼon esperanza.

•   Chaʼa a wáantaʼal tumen u maasil. Kéen yanak yaʼab problemas tiʼ máakeʼ u suukileʼ ku náachtal tiʼ u láakʼtsiloʼob yéetel tiʼ u amigoʼob. Chéen baʼaleʼ maʼ maʼalob ka u beet máak beyoʼ tumen le Bibliaoʼ ku yaʼalikeʼ jeʼel u chʼaʼtuklik u beetik máak baʼaloʼob maʼ maʼalobtakeʼ (Proverbios 18:1). Le baʼaxoʼob ku yaʼaliktoʼon k-láakʼtsiloʼoboʼ jeʼel u yáantkoʼon utiaʼal k-beetik baʼaxoʼob maʼalobtakeʼ yéetel jeʼel u yáantkoʼon utiaʼal k-utskíintik le problemas yaantoʼonoʼ (Proverbios 11:14). Letiʼobeʼ jeʼel xan u yilik u líiʼskoʼob k-óoleʼ yéetel jeʼel xan u yilik u yáantkoʼonoʼobeʼ (Proverbios 12:25).

•   Orarnen tiʼ Dios. Le Bibliaoʼ ku yaʼalik: «Pʼat a kuuch tiʼ Jéeoba, b letiʼ túuneʼ yaan u yáantkech. Letiʼeʼ mix bikʼin ken u chaʼa u lúubul le máax utsoʼ» (Salmo 55:22). Le tekstoaʼ ku yeʼesikeʼ «Dios áantkoʼon k-páaʼt le baʼax ku taal u kʼiinoʼ» (Romanos 15:13). Kéen orarnakech tiʼ Dioseʼ tsikbalttiʼ bix a wuʼuyikaba tumen letiʼeʼ jach ku naʼatik baʼax ku yúuchultech (1 Pedro 5:7). Le Bibliaoʼ ku yaʼalikeʼ ‹Dioseʼ yaan u beetik a muʼukʼaʼantal, yaan u tsʼáaik a muukʼ yéetel yaan u beetik a waʼatal tubeel› (1 Pedro 5:10).

•   Le pruebaʼob ka máansikoʼ ku yáantkech confiar tiʼ u promesaʼob Dios. Dioseʼ ku beetiktoʼon le promesaaʼ: «Le máax ku yuʼubik baʼax kin waʼalikeʼ yaan u kuxtal ich jeetsʼelil, maʼ kun sajaktal tiʼ le loob jeʼel u taal tu yóokʼoloʼ» (Proverbios 1:33). Margaret, juntúul koʼolel kajaʼan Australiaeʼ kʼaschaj u yotoch le ka máan junpʼéel ciclón le tuʼux kajaʼanoʼ. Pero tu lugar u chʼíikil u tukult le baʼax úuchtiʼoʼ tu kaneʼ le baʼaxoʼob yaan tiʼ máakoʼ jach séeb jeʼel u kʼastaloʼobeʼ. Ka tsʼoʼok u yúuchultiʼ leloʼ tu yilaj u maas biskuba yéetel u láakʼtsiloʼob bey xan yéetel u amigoʼob, tu yilaj xan u maas biskuba yéetel Dios yéetel maas confiarnaj tiʼ le promesaʼob yaan teʼ Bibliaoʼ (Salmo 37:34; Santiago 4:8).

 Le Bibliaoʼ ku yaʼalikeʼ maʼ kun xáantaleʼ yaan u jatsʼutstal le kuxtal way Luʼumoʼ. Le baʼaloʼob kʼaastak ku sen úuchloʼoboʼ ku yeʼesik kuxaʼanoʼon «tu tsʼook kʼiinoʼob» (2 Timoteo 3:1-5). Maʼ tun xáantaleʼ Dioseʼ yaan u luʼsik le injusticiaoʼ bey xan le baʼaxoʼob beetik u sufrir máakoʼ. Le jatsʼuts promesaʼobaʼ yaan u béeytaloʼob kéen káajak u gobernar u Reino Dios way Luʼumeʼ (Daniel 2:44; Apocalipsis 11:15). Teʼ tu oraciónil le padrenuestrooʼ Jesúseʼ tu yaʼalaj ka kʼáataʼak ka taalak le Reinoaʼ, letiʼeʼ tu yaʼalaj: «Taalak a Reino, beetaʼak baʼax a kʼáat [...] way luʼumeʼ» (Mateo 6:9, 10).

 Le Bibliaoʼ ku yaʼaliktoʼon baʼax u tukultmaj u beetik Dios way Luʼumeʼ. Koʼox ilik jujunpʼéel tiʼ le baʼaxoʼob ken u luʼs u Reino Diosoʼ:

•   Mix máak kun muʼyajtik wiʼijil. «Le luʼumoʼ yaan u tsʼáaik u yich» (Salmo 67:6).

•   Mix máak kun kaʼa kʼojaʼantal. «Mix juntúul u kajnáalil le luʼum ken u yaʼal: ‹Kʼojaʼanen›» (Isaías 33:24).

•   Mix máak kun kíimil. Dioseʼ ku yaʼalik tiʼ tuláakal máakeʼ «yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob» (Apocalipsis 21:3, 4).