Juan Bautistaeʼ juntúul u profeta kaʼach Dios (Lucas 1:76). Letiʼeʼ síij teʼ año 2 táanil tiʼ u taal Jesúsoʼ, yéetel kíimsaʼab teʼ año 32 tsʼoʼokok u taal Jesúsoʼ. Dioseʼ tu kʼubéentaj tiʼ Juan ka u preparart le bej utiaʼal u kʼuchul le Mesías wa Cristooʼ. Tsʼoʼoleʼ tu yaʼalaj xan tiʼ le judíoʼob ka arrepentirnakoʼoboʼ, beyoʼ yaan u kaʼa kʼaʼamloʼob tumen Dios (Marcos 1:1-4; Lucas 1:13, 16, 17).

 Le baʼax tu yaʼalaj Juanoʼ jach tu yáantaj le judíoʼob uts u puksiʼikʼaloʼob utiaʼal ka u tsʼáaʼob cuenta Jesúseʼ letiʼe Mesías aʼalaʼan kun taaloʼ (Mateo 11:10). Juaneʼ tu yaʼalajtiʼob kʼaʼabéet u arrepentiroʼob yéetel u yokjaʼob (Lucas 3:3-6). Como yaʼab máaxoʼob tu tsʼáaj u yokjaʼobeʼ kʼaj óoltaʼab bey Juan Bautistaeʼ. Pero le máax maas importante tu tsʼáaj u yokjaʼoʼ, Jesucristo (Marcos 1:9). a

Teʼ xookaʼ yaan k-núukik le preguntaʼobaʼ:

•  ¿Baʼaxten jach importante le meyaj tu beetaj Juanoʼ?

•  ¿Máax kaʼach u taataʼob Juan Bautista?

•  ¿Máax aʼal ka kíimsaʼak Juan Bautista?

•  ¿Competirnaj wa Juan Bautista yéetel Jesús?

•  ¿Jaytúul Juanoʼob ku chʼaʼchiʼitaʼal teʼ Bibliaoʼ?

 Tumen aʼalaʼan teʼ Biblia baʼax ken u beetoʼ. Le Bibliaoʼ úuch u yaʼaleʼ Dioseʼ yaan u túuxtik juntúul máak wa juntúul mensajero. Le máax béeykunt le profecíaaʼ Juan Bautista (Malaquías 3:1; Mateo 3:1-3). U meyaj Juaneʼ «u listokíintik junpʼéel kaaj utiaʼal u meyajt Jéeoba». Letiʼeʼ tu yáantaj le judíoʼob utiaʼal ka u kʼamoʼob le baʼaxoʼob tu kaʼansaj Jesucristo, le máax túuxtaʼab tumen Jéeobaoʼ (Lucas 1:17).

 Yaʼab baʼax tu béeykuntaj ichil u kuxtal. Jesúseʼ tu yaʼalaj: «Ichil tuláakal le máaxoʼob tsʼoʼok u síijloʼoboʼ mix máak maas nojoch tiʼ Juan Bautista, chéen baʼaleʼ le máax maas chichan tu Reinoil le kaʼanoʼ maas nojoch ke letiʼ» (Mateo 11:11). Antes tiʼ u síijil Juaneʼ maʼ yanchaj uláakʼ máak jeʼex letiʼeʼ, tumen letiʼeʼ maʼ chéen tu beetaj u profetailiʼ baʼaxeʼ kʼuch u beetuba xan u mensajero Dios. Le baʼax tu yaʼalaj Jesúsoʼ ku yeʼesikeʼ Juaneʼ maʼ bin teʼ kaʼanoʼ. b ¿Baʼaxten maʼ biniʼ? Tumen Juaneʼ kíim antes tiʼ u jeʼekʼabtaʼal u bejil u bin máak teʼ kaʼan tumen Jesúsoʼ (Hebreos 10:19, 20). Kex Juan maʼ bin kaʼaneʼ yaan u kaʼa kuxkíintaʼal teʼ Paraíso kéen káajak u gobernar u Reino Diosoʼ (Salmo 37:29; Lucas 23:43).

 U kʼaabaʼ kaʼach u taataʼobeʼ Zacarías yéetel Elisabet. Elisabeteʼ maʼ tu páajtal kaʼach u yantal u paalal, tsʼoʼoleʼ letiʼ yéetel u yíichameʼ tsʼoʼok u chʼíijloʼob. Le oʼolal jeʼel u páajtal u yaʼalaʼaleʼ junpʼéel milagro úuchik u síijil Juan (Lucas 1:5-7, 13).

 Rey Herodes Antipas aʼal ka kúulchʼaktaʼak u pool Juan. Herodías, u yataneʼ, letiʼ túulchʼint u hija u kʼáat u pool Juan. Herodíaseʼ jach u pʼekmaj kaʼach Juan tumen tu yaʼalajtiʼ maʼ maʼalob úuchik u kajkúuntaʼal tumen Herodesiʼ. Herodíaseʼ u yatan kaʼach Filipo, u sukuʼun Herodes (Mateo 14:1-12; Marcos 6:16-19).

 Mix tuʼux teʼ Biblia ku yaʼalik wa Juan Bautistaeʼ competirnaj yéetel Jesús (Juan 3:25-30). Juaneʼ mix juntéen tu tuklaj u competir yéetel Jesús, baʼaxeʼ letiʼeʼ tu yaʼaleʼ taal u káajs le meyaj ken u beet Jesúsoʼ. Juaneʼ tu yaʼalaj tu yoʼolal Jesús: «Taaljaʼanen tsʼaa okjaʼ yéetel jaʼ utiaʼal ka kʼaj óoltaʼak tumen u kajnáaliloʼob Israel». Tsʼoʼoleʼ tu yaʼalaj xan: «Letiʼeʼ u Paal Dios» (Juan 1:26-34). Jeʼex k-ilkoʼ Juaneʼ jach kiʼimakchaj u yóol yoʼolal le meyajoʼob tu beetaj Jesúsoʼ.