Ku yuʼubikoʼon. Dioseʼ ku yuʼubik le máaxoʼob maʼ tu kʼáatkoʼob baʼaloʼob ku bin tu contra u voluntadoʼ. Le Bibliaoʼ ku tʼaan tiʼ jujuntúul máakoʼob tu kʼáatoʼob u yáantaj Dios. K-kaanbal tiʼ le baʼax tu beetoʼoboʼ jeʼel u yáantkoʼon orar kex mix juntéen k-beeteʼ.

•   «Yuum Jéeoba in Dios, áanteniʼ. Salvarten tu yoʼolal a nojoch yaabilaj» (Salmo 109:26).

•   «Teneʼ óotsilen, minaʼan máax áantken. In Dios, koʼoten tu séebaʼanil a wáanten. In Dios, teech áantken» (Salmo 70:5).

 Jeʼex k-ilkoʼ le máax tsʼíibt le versículoʼobaʼ jach yaan u fe tiʼ Dios. Chéen baʼaleʼ, ¿jeʼel wa u yuʼubikoʼon Dios kex ka k-uʼuy bey minaʼan k-fejeʼ? Jeʼeleʼ, Dioseʼ ku yuʼubik le máaxoʼob kaxtik u yáantajoʼ. Le Bibliaoʼ ku yaʼalikeʼ Dioseʼ «naatsʼ yanil tiʼ le máaxoʼob ku muʼyajoʼoboʼ» yéetel «ku yáantik le máaxoʼob yaachajaʼan u yóoloʼoboʼ» (Salmo 34:18).

 Maʼ xaaneʼ jeʼel k-tuklikeʼ Dioseʼ náach yanil tiʼ toʼon yéetel mix tu yilik le baʼaxoʼob ku yúuchultoʼonoʼ. Pero le Bibliaoʼ ku yeʼesik maʼ beyiʼ tumen ku yaʼalik: «Kex Jéeoba tiaʼan teʼ kaʼanoʼ ku biskuba yéetel le máax humildeoʼ, pero junpuliʼ maʼatech u biskuba yéetel le máax ku creerkubaoʼ» (Salmo 138:6). Jesús xaneʼ tu yaʼalaj tiʼ u discípuloʼob: «U tsoʼotsel a pooleʼexeʼ láaj xokaʼanoʼob» (Mateo 10:30). Lelaʼ ku yeʼesikeʼ wa Dios ku chʼaʼik en cuenta le baʼaloʼob beyaʼ, maas jeʼel u yuʼubikoʼon le kéen k-tsikbalttiʼ le baʼaxoʼob ku yúuchultoʼonoʼ (1 Pedro 5:7).