Yaʼab paalaloʼobeʼ ku yaʼalikoʼobeʼ ku oraroʼob, chéen baʼaleʼ maʼ sáamsamaliʼ. Maʼ xaaneʼ jujuntúul tiʼ letiʼobeʼ jeʼel u yaʼalikoʼobeʼ: «¿Jach wa tu jaajil jeʼel u yáantken le oraciónoʼ?».

•  ¿Baʼax le oraciónoʼ?

•  ¿Ku chʼenxikintiken wa Dios?

•  ¿Baʼaxoʼob jeʼel u páajtal in waʼalikeʼ?

•  ¿Baʼax ku yaʼalik uláakʼ paalaloʼob?

 U orar máakeʼ letiʼe u tsikbal máak yéetel Jéeoba Dios, le Máax Beet tuláakal baʼaloʼ. Chéen tukle, kex jach táaj yaan u podereʼ, Jéeobaeʼ «maʼ náach yanil tiʼ máakiʼ» (Hechos 17:27). Tsʼoʼoleʼ le Bibliaoʼ ku yaʼaliktoʼon: «Natsʼabaʼex tu yiknal Dios, letiʼ túuneʼ bíin u natsʼuba ta wiknaleʼex» (Santiago 4:8).

 ¿Bix jeʼel a natsʼkaba tiʼ Dioseʼ?

•   Kéen orarnakecheʼ ka tsikbal yéetel Dios.

•   Le kéen a xakʼalxokt le Bibliaoʼ letiʼeʼ ku «tʼankech».

 Le kaʼapʼéel baʼaloʼobaʼ ku yáantkoʼon utiaʼal k-maas náatsʼal tiʼ Dios.

 «Jéeobaeʼ u tsʼaamajtoʼon u jatsʼuts páajtalil k-tsikbal tu yéetel, leloʼ junpʼéel nojoch siibal» (Jeremy).

 «Le kéen in tsikbalt tiʼ Jéeoba bix in wuʼuyikinbaeʼ kin wuʼuyikinba maas naatsʼ tiʼ letiʼ» (Miranda).

 Kex k-creertik yaan Dioseʼ yaan horaeʼ istikyaj k-creertik jach tu jaajil ku chʼenxikintikoʼon. Chéen baʼaleʼ le Bibliaoʼ ku yaʼalikeʼ Jéeobaeʼ ku chʼenxikintik «le oraciónoʼoboʼ» (Salmo 65:2). Ku yaʼalik xan toʼon ka k-pʼat tu kʼab Dios tuláakal baʼax chiʼichnakkúuntikoʼon «tumen letiʼeʼ jach taak u yáant[koʼon]» (1 Pedro 5:7).

 Tukult lelaʼ: ¿Suuk wa a tsikbal yéetel a amigoʼob? Wa beyoʼ jeʼel xan u suuktal a orar tiʼ Jéeoba utiaʼal a tsikbal tu yéeteleʼ. Chéen baʼaleʼ unaj a tʼanik xan tu kʼaabaʼ (Salmo 86:​5-7; 88:9). Le Bibliaoʼ ku yaʼalik: «Maʼ u jáawal a orareʼex» (1 Tesalonicenses 5:​17).

 «Le kéen orarnakeneʼ jach u súutukil in waʼalik tiʼ Jéeoba Dios bix in wuʼuyikinba» (Moisés).

 «Tiʼ in maama yéetel tiʼ in amigoʼobeʼ kin tsikbaltiktiʼob baʼaloʼob maʼ tiʼ jeʼel máaxak jeʼel in tsikbaltikeʼ, láayliʼ bey xan in tsikbal yéetel Jéeobaoʼ» (Karen).

 Le Bibliaoʼ ku yaʼalikeʼ: «Aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex» (Filipenses 4:6).

 ¿Jeʼel wa túun u páajtal k-tsikbaltik tiʼ Jéeoba le problemas yaantoʼonoʼ? Jeʼel u páajtaleʼ. Le Bibliaoʼ ku yaʼalik: «Pʼat a kuuch tiʼ Jéeoba, letiʼ túuneʼ yaan u yáantkech» (Salmo 55:22).

 Chéen baʼaleʼ maʼ chéen unaj u júupul k-tsikbaltik k-problemas tiʼ Jéeobaiʼ. Juntúul x-chʼúupal ku kʼaabaʼtik Chantelleʼ ku yaʼalik: «Kin tuklikeʼ utiaʼal in biskinba maʼalob yéetel Jéeobaeʼ maʼ chéen in problemas unaj in tsikbaltiktiʼiʼ. Baʼaxeʼ táanil unaj in tsʼáaik gracias tiʼ yoʼolal le baʼaxoʼob ku tsʼáaiktenoʼ».

 Tukult lelaʼ: ¿Yoʼolal baʼaxoʼob jeʼel a tsʼáaik gracias tiʼ Jéeobaeʼ? Tuukulnen tiʼ óoxpʼéel baʼaloʼob tsʼoʼok u tsʼáaiktech bejlaʼa Jéeoba utiaʼal a tsʼáaik gracias tiʼeʼ.

 «Jeʼel u páajtal k-tsʼáaik gracias tiʼ Jéeoba tak chéen yoʼolal junpʼéel jatsʼuts looleʼ» (Anita).

 «Tuukulnen tiʼ junpʼéel teksto jach jatsʼuts ta wilil bey xan tiʼ le baʼaxoʼob u beetmaj Jéeobaoʼ, kéen tsʼoʼokkeʼ ka tsʼáaik u graciasil tiʼ» (Brian).