Le Bibliaoʼ ku yaʼalikeʼ «Jéeobaeʼ yaan u tsʼáaik tuláakal baʼax maʼalob tiʼ le máaxoʼob chúukaʼan u yóol u beetoʼob baʼax maʼaloboʼ» (Salmo 84:11). ¿Baʼaxten kʼaʼabéet u chúukpajal a wóol a beet baʼax maʼalob? Tumen leloʼ junpʼéel bix a weʼesik tiʼ Jéeoba táan a cumplirtik le promesa ta beetajtiʼ le ka ta kʼubaj a kuxtal tiʼoʼ (Eclesiastés 5:4, 5). ¿Bix jeʼel u seguer u chúukpajal a wóol le kéen tsʼoʼokok a wokjaʼeʼ?

Teʼ xookaʼ yaan k-ilik le baʼaloʼobaʼ:

•  Chúukpajak a wóol kex ka yanaktech problemas

•  Chúukpajak a wóol kex ka probartaʼakech

•  Tsʼáa a wóol a meyajt Dios

Teksto jeʼel u yáantajeʼ: «Yaʼab baʼaloʼob kʼaʼabéet k-muʼyajtik utiaʼal ka ookkoʼon tu Reino Dios» (Hechos 14:22).

Baʼax u kʼáat u yaʼale: U jaajileʼ tuláakal le máaxoʼob ku meyajtikoʼob Diosoʼ ku aktáantkoʼob problemas. Maʼ xaaneʼ yaan u yaʼalaʼaltech baʼal ikil a meyajtik Dios, wa jeʼel tak a kʼojaʼantal yéetel u pʼáatal minaʼantech taakʼin jeʼex u yúuchul tiʼ u maasil máakoʼobeʼ.

Baʼax jeʼel u tocar u yúuchultecheʼ: Yaan horaeʼ jeʼel u tocar u jáan kʼexpajal u kuxtal máak junpʼéel bix maʼ tu páaʼtikeʼ. Le Bibliaoʼ ku yaʼalikeʼ tiʼ jeʼel máaxak jeʼel u jáan úuchul wa baʼax kʼaaseʼ (Eclesiastés 9:11).

Baʼax unaj a beetik: Maʼalob ka a preparartaba por si wa ku yantal junpʼéel problema. Ilawil le problemas bey junpʼéel oportunidad utiaʼal u maas muʼukʼaʼantal a fe yéetel a maas confiar tiʼ Jéeoba (Santiago 1:2, 3). Beyoʼ kéen máanak kʼiineʼ yaan xan u béeytal a waʼalik le baʼax tu yaʼalaj apóstol Pabloaʼ: «Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ» (Filipenses 4:13).

Beet lelaʼ: Utiaʼal a wojéeltik baʼaxoʼob tu sen aktáantaj José ichil u kuxtaleʼ xok Génesis capítulo 37 yéetel capítulo 39 tak 41. Tuukulnen tiʼ lelaʼ: ¿Baʼax problemasil tu sen aktáantaj? ¿Bix úuchik u aktáantik? ¿Bix áantaʼabik tumen Jéeoba?

¿Kʼaʼabéettech wa maas áantaj?

• Xok le jaats:

  «¿Qué puedo hacer si sufro una desgracia?», ich español.

  «¿Baʼax jeʼel u yáantkech utiaʼal maʼ u jaan lúubul a wóoleʼ?»

  «Cómo adaptarse a los cambios», ich español.

• Descargart:

  «Cuando uno de tus padres está enfermo», ich español.

Teksto jeʼel u yáantajeʼ: «Cada juntúuleʼ ku probartaʼal kéen jíiltaʼak yéetel kéen táabsaʼak tumen u tsʼíibolal» (Santiago 1:14).

Baʼax u kʼáat u yaʼale: Tuláakal máak ku tsʼíiboltik baʼax maʼ maʼalobiʼ. Chéen baʼaleʼ wa maʼ t-controlartik le tsʼíibolal yaantoʼonoʼ jeʼel k-lúubul tiʼ baʼax kʼaaseʼ.

Baʼax jeʼel u tocar u yúuchultecheʼ: Kex tsʼoʼok a wokjaʼeʼ láayliʼ jeʼel u yantaltech ‹u tsʼíibolalil le bakʼoʼ› (2 Pedro 2:18). Le oʼolal jeʼel tak u taaktal u yantaltech relaciones sexuales yéetel wa máax kex maʼ tsʼokaʼan a beel tu yéeteliʼ.

Baʼax unaj a beetik: Chʼaʼtukult a beetik baʼax maʼalob, lelaʼ unaj a beetik antes tiʼ a tsʼaʼabal a prueba tumen wa máax. Maʼ a beetik chéen baʼax ku tsʼíiboltik a wíinklil. Kʼaʼajaktech baʼax tu yaʼalaj Jesús: «Mix máak jeʼel u páajtal u meyajtik kaʼatúul tsʼuuloʼobeʼ» (Mateo 6:24). U jaajileʼ cada máak ken u yéey máax u kʼáat u meyajte, pero maas maʼalob wa ka beetik baʼax ku yaʼalik Jéeoba. Kex maʼ chéen chʼaʼabileʼ maʼ a chaʼik a lúubul tiʼ baʼax kʼaas (Gálatas 5:16).

Beet lelaʼ: Ilawil tiʼ baʼaxoʼob unaj a maas kanáantkaba, bisaba yéetel máaxoʼob jeʼel u yáantkechoʼob a beet baʼax maʼalobeʼ. Maʼ a biskaba yéetel máaxoʼob ku beetkoʼob baʼax kʼaas, náachkuntaba xan tiʼ le lugaroʼob jeʼel u beetkoʼob a lúubul tiʼ baʼax maʼ maʼaloboʼ (Salmo 26:4, 5).

¿Kʼaʼabéettech wa maas áantaj?

• Xok le jaats:

  «¿Qué puedo hacer para resistir las tentaciones?», ich español.

  «¿Cómo puedo dejar de pensar en el sexo?», ich español.

  «Cómo resistir la presión de tus compañeros», ich español.

  «¿K-tuukul wa jeʼex u tuukul Jéeobaeʼ?»

Teksto jeʼel u yáantajeʼ: «K-tsʼíiboltikeʼ bey ka seguernak a beetkeʼex tak tu xuuloʼ [...]. Wa ka beetkeʼex beyoʼ maʼ kan maʼakʼóoltaleʼex» (Hebreos 6:11, 12).

Baʼax u kʼáat u yaʼale: Juntúul máak maʼ tu tsʼáaik u yóol tiʼ baʼax ku beetkeʼ séeb jeʼel u maʼakʼóoltaleʼ.

Baʼax jeʼel u tocar u yúuchultecheʼ: Maʼ xaaneʼ le táant a wokjaʼoʼ jach kiʼimak a wóol yéetel jach taak a meyajtik Dios. Pero ka máan kʼiineʼ ta wileʼ maʼ chéen chʼaʼabil a beetik tuláakal le baʼaxoʼob ku yaʼalik Jéeobaoʼ. Wa ku seguer a tuukul beyoʼ jeʼel u lúubul a wóoleʼ yéetel jeʼel tak u xuʼulul a tsʼáaik a wóol a meyajt Dioseʼ (Gálatas 5:7).

Baʼax unaj a beetik: Kex maʼ chéen chʼaʼabileʼ, tsʼáa a wóol a beet baʼax maʼalob (1 Corintios 9:27). Ilawil a maas natsʼkaba tiʼ Jéeoba, ¿bix jeʼel a beetkeʼ? Orarnen tiʼ letiʼ yéetel ilawil a maas kʼaj óoltik. Tsʼoʼoleʼ bisaba yéetel máaxoʼob uts tu tʼaan u meyajtikoʼob.

Beet lelaʼ: Kʼaʼajaktecheʼ Jéeobaeʼ jach u yaabiltmech yéetel u kʼáat u yáantech. Maʼ a tuklik wa táan u kʼuuxil ta wéetel chéen tumen xuʼul a meyajtik jeʼex a beetik kaʼacheʼ. Le Bibliaoʼ ku yaʼalik: «Letiʼeʼ ku tsʼáaik u muukʼ máax kaʼanaʼan, yéetel ku tsʼáaik páajtalil tiʼ le máaxoʼob minaʼan u muukʼoʼoboʼ» (Isaías 40:29). Tsʼáa a wóol a maas meyajt Jéeoba, wa ka beetkeʼ letiʼeʼ jach yaan u bendecirkech.

¿Kʼaʼabéettech wa maas áantaj?

• Xok le jaats:

  «Táankelem paalaleʼex, «seguernak a kaxtik a salvacioneʼex»

  «¿Y si no me atrae la idea de ser testigo de Jehová?», ich español.

• Chaʼant le video:

  Baʼax ku yaʼalik uláakʼ paalaloʼob: Le kuxtal maas maʼaloboʼ

Kʼaʼajaktech lelaʼ: Wa ku seguer a beetik baʼax maʼalobeʼ yaan a kiʼimakkúuntik u yóol Jéeoba (Proverbios 27:11). Letiʼeʼ jach ku kiʼimaktal u yóol le kéen u yil mix máak obligarkech a meyajte, tsʼoʼoleʼ yaan u yáantkech utiaʼal maʼ a lúubul tiʼ le trampas ku tsʼáaik Satanásoʼ.