Teʼ xookaʼ yaan k-núukik le preguntaʼobaʼ:

•  ¿Baʼax u kʼáat u yaʼal u káajal in biskinba yéetel wa máax?

•  ¿Listoen wa utiaʼal u káajal in biskinba yéetel wa máax?

  Yaan máaxoʼobeʼ chéen ku biskubaʼob yéetel wa máax chéen utiaʼal u náaysik u yóoloʼob. Pero teʼ xookaʼ le tʼaan u biskuba máak yéetel wa máaxoʼ u kʼáat u yaʼal u beetkubaʼob noviotsiloʼob utiaʼal u yilkoʼob wa maʼalob ka tsʼoʼokok u beeloʼob. Jeʼex k-ilkoʼ, maʼ chéen utiaʼal u náaysik u yóol juntúul xiʼipal wa juntúul x-chʼúupaliʼ.

 Le oʼolaleʼ desde kéen káajak u biskuba juntúul xiʼipal yéetel juntúul x-chʼúupaleʼ kʼaʼabéet u tsʼáaikoʼob tu tuukuloʼobeʼ kéen máanak kʼiineʼ yaan u chʼaʼikoʼob junpʼéel decisión. U tsʼoʼokol u beeloʼob wa u xuʼulul u biskubaʼob.

 U jaajil: Wa ka tuklik listoech utiaʼal a biskaba yéetel wa máaxeʼ, u kʼáat u yaʼaleʼ listoech xan utiaʼal ka tsʼoʼokok a beel.

  Wa ku káajal a biskaba yéetel wa máaxeʼ maʼ xaaneʼ yaan u tsʼoʼokol a beel tu yéetel, le oʼolaleʼ maʼalob ka a chʼaʼ en cuenta baʼax jatsʼuts modosil ken a weʼese. Tuukulnen tiʼ lelaʼ:

•   Bix a biskaba yéetel a familia. Le bix a tratartik a papáʼob bey xan a láakʼtsiloʼob le estresadoechoʼ bey xan ken a tratartil a watan wa a wíicham.

   Teksto jeʼel u yáantajeʼ: «Tseleʼex tiʼ teʼex tuláakal u jejeláasil kʼaakʼas kʼuuxilil, pʼujaʼanil, tsʼíikilil, awat tʼaan, poochʼil bey xan tuláakal baʼax jeʼel u beetik loobeʼ» (Efesios 4:31).

   Tukult lelaʼ: «¿Baʼax jeʼel u yaʼalik in familia tin woʼolaleʼ, kin respetarkoʼob wa? ¿Le kéen yanakten junpʼéel problema tu yéeteloʼobeʼ kin weʼesik wa jeetsʼelil, wa séeb in kʼuuxil tu yéeteloʼob?».

•   Kaxt u yutsil u maasil. Kʼaʼajaktecheʼ le kéen tsʼoʼokok a beeleʼ yaan kʼiineʼ yaan a beetik baʼax u kʼáat a núup kex maʼ jach de acuerdoechiʼ.

   Teksto jeʼel u yáantajeʼ: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintios 10:24).

   Tukult lelaʼ: «¿Mantatsʼ wa in kʼáat ka beetaʼak chéen baʼax in kʼáat? ¿Ku yilik wa u maasil kin chʼaʼik en cuenta baʼax ku tuklikoʼob? ¿Bix tsʼoʼok in weʼesik kin kaxtik u yutsil u maasil tu lugar in kaxtik chéen in wutsil?».

•   Eʼes humildeech. Juntúul maʼalob íichamtsil wa atantsileʼ ku reconocertik yaan baʼax maʼ maʼalob ku beetkiʼ yéetel ku kʼáatik perdón yéetel u jaajil u yóol.

   Teksto jeʼel u yáantajeʼ: «Tuláakloʼon yaʼab u téenel k-beetik baʼax maʼ maʼalobiʼ» (Santiago 3:2, nota).

   Tukult lelaʼ: «¿Kin reconocertik wa le baʼaxoʼob maʼ maʼalobtak kin beetkoʼ, wa kin kaxtik baʼax in waʼaleʼ? ¿Séeb wa in ofender kéen aconsejartaʼaken?».

•   Bix a kanáantik a taakʼin. Bejlaʼeʼ le taakʼinoʼ letiʼeʼ baʼax maases beetik u yantal problemas ichil le máaxoʼob tsʼokaʼan u beeloʼoboʼ, le oʼolaleʼ wa ka kanik a kanáant le taakʼinoʼ yaan a evitartik problemas yéetel a núup.

   Teksto jeʼel u yáantajeʼ: «Wa juntúul ichileʼex u kʼáat u beet junpʼéel torreeʼ, ¿máasaʼ yáaxeʼ unaj u kutal u tukult bukaʼaj ken u tojolttiʼ utiaʼal u yilik wa jeʼel u páajtal u tsʼoʼoksikeʼ?» (Lucas 14:28).

   Tukult lelaʼ: «¿Kin kanáantik wa bix in xuup, wa mantatsʼ táan in pʼaxkinba? ¿Bix in weʼesik in wojel in kanáant in taakʼin?».

•   A espiritualidad. Wa u testigoech Jéeobaeʼ kʼaʼabéet suuk a xokik le Biblia sáamsamaloʼ yéetel a bin tiʼ tuláakal le reuniónoʼoboʼ.

   Teksto jeʼel u yáantajeʼ: «Kiʼimak u yóol le máaxoʼob ku tsʼáaikoʼob cuenta kʼaʼabéet u nuʼuktaʼaloʼob tumen Diosoʼ» (Mateo 5:3).

   Tukult lelaʼ: «¿Kin beetik wa tuláakal le ku páajtal utiaʼal in muʼukʼaʼankúuntik in fe? ¿Kin tsʼáaik wa táanil ichil in kuxtal in espiritualidad wa uláakʼ baʼaloʼob?».

 Baʼax ta kanaj: Le máax yéetel kun tsʼoʼokol a beeloʼ ku merecertik juntúul maʼalob íichamtsil wa atantsil. Le oʼolaleʼ ilawil a weʼesik le jatsʼuts modosoʼobaʼ tumen beyoʼ maas séeb jeʼel a kaxtik juntúul xiʼipal wa x-chʼúupal yaan xan tiʼ le jatsʼuts modosoʼobaʼ.