Ilawil baʼax úuch tiʼ Karina yéetel tukult baʼax jeʼel a beetik wa tiʼ teech ka úuchkeʼ.

 Karinaeʼ ku yaʼalik: «Junpʼéel kʼiin le táan in bin xookoʼ juntúul policíaeʼ tu multarten tumen jach chich in bin yéetel in coche. ¡Jach kʼaas tin wuʼuyilinba! Tin waʼalaj tiʼ in maama baʼax úuchten letiʼeʼ tu yaʼalaj ka in waʼal tiʼ in papá. Pero teneʼ jach maʼ taak kaʼach in waʼaliktiʼiʼ».

1.  U pʼáatal: Maʼ a waʼalik mix baʼal yéetel a páaʼtik maʼ u yojéeltaʼal tumen a papá.

2.  Wa: A tsikbaltik tiʼ a papá le baʼax úuchtechoʼ.

 Maʼ xaaneʼ jeʼel a yéeyik le yáax baʼax t-aʼaloʼ tumen ka waʼalikeʼ a maamaeʼ jeʼel u tuklik tsʼoʼok a waʼalik tiʼ a papáeʼ. Chéen baʼaleʼ maas maʼalob ka u yaʼal máak teʼ súutukil ka tu beetoʼ. Koʼox ilik baʼaxten.

1.  1. Letiʼe baʼax unaj a beetkoʼ. Le Bibliaoʼ ku yaʼalikeʼ tuláakal le máaxoʼob meyajtik Diosoʼ u kʼáat u beetoʼob «tuláakal baʼal tu nuʼuk» (Hebreos 13:18).

    Juntúul x-chʼúupal ku kʼaabaʼtik Alexiseʼ, ku yaʼalik: «Mantatsʼ kin tratartik in waʼalik u jaajil, beyoʼ kin beetkinba responsableil tiʼ baʼax kin beetik. Kin waʼalik le baʼaloʼob maʼ maʼalobtak kin beetkoʼ yéetel kin wilik in séeb kʼáatik perdón».

2.  2. Maas fácil a perdonartaʼal tumen u maasil. Le Bibliaoʼ ku yaʼalik: «Le máax ku taʼakik le baʼax kʼaas u beetmoʼ maʼ kun bin utsil tiʼ, pero le máax ku yaʼalik le baʼax u beetmaj yéetel ku xuʼulul u beetkeʼ yaan u chʼaʼabal óotsilil tiʼ» (Proverbios 28:13).

    Richardeʼ ku yaʼalik: «Kʼaʼabéet valor tiʼ máak utiaʼal u reconocertik le baʼaloʼob maʼ maʼalobtak ku beetkoʼ, wa ka beetkeʼ u maasileʼ ku yilkoʼob ka waʼalik u jaajil yéetel maas ku confiaroʼob teech. Jeʼex k-ilkoʼ yaan baʼax k-kanik tiʼ le baʼax kʼaas tsʼoʼok k-beetkoʼ».

3.  3. Letiʼe baʼax ku páaʼtik Jéeoba ka a beetoʼ. Lelaʼ letiʼe baʼax oʼolal maas unaj a waʼalik u jaajiloʼ. Le Bibliaoʼ ku yaʼalikeʼ «Jéeobaeʼ jach u pʼekmaj le kʼasaʼan máakoʼoboʼ pero jach ku biskuba maʼalob yéetel le máaxoʼob toj u kuxtaloʼoboʼ» (Proverbios 3:32).

    Racheleʼ ku yaʼalik: «Juntéeneʼ tin beetaj junpʼéel baʼax jach maʼ maʼalobiʼ ka máan kʼiineʼ tin tsʼáaj cuentaeʼ maʼ tu páajtal u seguer in taʼakik, kʼaʼabéet kaʼach in waʼalik. Wa in kʼáat kaʼach ka u yáanten Jéeobaeʼ unaj in beetik baʼax ku yaʼalik».

 ¿Kʼajaʼan wa tech baʼax úuch tiʼ Karina? ¿Tu tsikbaltaj wa tiʼ u papá le baʼax úuchtiʼoʼ? Maʼatech, tu tuklaj u taʼakik kaʼachi, pero ka máan kʼiineʼ kʼuch ojéeltbil tumen u papá. Letiʼeʼ ku yaʼalik: «Kex u año úuchukten leloʼ in papáeʼ joʼopʼ u checartik u juʼuniloʼob le segurooʼ ka tu yileʼ yaan junpʼéel multa tsʼaʼan tin kʼaabaʼ. ¡Bey ojéeltaʼabik le baʼax tin beetoʼ! ¡Tak in maama jach tsʼíikilnaj tin wéetel tumen maʼ tin beetaj u cuentail baʼax tu yaʼalajteniʼ!».

 Baʼax ku kaʼansiktoʼon: Karinaeʼ ku yaʼalik: «U tratartik máak u taʼakik le baʼax kʼaas u beetmoʼ chéen ku beetik u maas nojochtal le problemaoʼ. Yaan u kʼuchul u kʼiinil a boʼotik u consecuenciail baʼaxoʼob ka beetik».

 Tuláakal máak beetik baʼax maʼ maʼalobiʼ (Romanos 3:23; 1 Juan 1:8). Pero maʼ tuláakal máak humilde yéetel yiijchajaʼan u tuukul utiaʼal u reconocertik le baʼaloʼob maʼ maʼalobtak tu beetoʼ, menos ka u reconocert teʼ súutukil ka tu beetoʼ.

 Baʼaleʼ maʼ chéen unaj u reconocertik máak yaan baʼax maʼ maʼalob tu beetiʼ, baʼaxeʼ unaj u kaanbal tiʼ. Lastima yaʼab táankelmoʼobeʼ maʼ tu beetkoʼob beyoʼ. Maʼ xaaneʼ ku tuukuloʼob jeʼex juntúul x-chʼúupal ku kʼaabaʼtik Priscillaeʼ, letiʼeʼ ku yaʼalik: «Jach kin chiʼichnaktal kéen in beet baʼax maʼ maʼalobiʼ. Como jach ku yaatal in wóoleʼ kin wuʼuyik minaʼan tuʼux in chʼaʼik in wiikʼ, bey junpʼéel kuuch jach aal kin biskeʼ. Jach yaj in wuʼuyik baʼax ku yúuchulten, hasta kin tuklik kaʼach mix baʼal in biilal».

 ¿Yaan wa kʼiin tsʼoʼok a wuʼuyikaba jeʼex Priscillaeʼ? Wa beyoʼ kʼaʼajaktecheʼ a sen kʼaʼajsik le baʼax ta beetoʼ bey jeʼex ka a manejart a coche pero chéen u néenil chʼiikilech a pakteʼ. Lelaʼ ku yeʼesikeʼ wa ka sen tuukul tiʼ le baʼax úuchtechoʼ yaan u pʼáatal minaʼan a muukʼ yéetel maʼ ken a aguantart le u maasil baʼaloʼob kun úuchultechoʼ.

 Maas maʼalob ka a wil a kaanbal tiʼ le baʼaxoʼob ku yúuchultechoʼ.

 Ellioteʼ ku yaʼalik: «Maʼ kʼaas u tuukul máak tiʼ baʼax u beetmiʼ, chéen baʼaleʼ utiaʼal u kaanbal máak yéetel u yilik maʼ u kaʼa beetik. Wa ka beetik beyaʼ maʼ tun sen yaatal a wóol».

 Veraeʼ ku yaʼalik: «Kin wilik in kaanbal tiʼ le baʼaloʼob maʼ maʼalobtak kin beetkoʼ. Lelaʼ ku yáantken utiaʼal in maas jatsʼutskíintik in modos, tsʼoʼoleʼ wa ku kaʼa úuchulteneʼ in wojel baʼax ken in beete. Kéen u beet máak beyoʼ ku yáantaj utiaʼal u maas yiijtal u tuukul».