Jujuntúul máaxoʼob meyajtik Dioseʼ ku tuklikoʼobeʼ chéen kunel u tsʼáaik u yóoloʼob kuxtal jeʼex u yaʼalik le Bibliaoʼ (Salmo 73:2, 3). Yaneʼ hasta tsʼoʼok u joʼopʼol u beetkoʼob baʼaloʼob ku bin tu contra Dios. U maas kʼaasileʼ ku taʼakikoʼob baʼax ku beetkoʼob yéetel ku tuklikoʼobeʼ maʼ kun ojéeltbil tumen le sukuʼunoʼoboʼ.

 Le xookaʼ beetaʼan utiaʼal u yáantik le máaxoʼob tsʼoʼok u káajal u beetkoʼob baʼaloʼob kʼaastakoʼ pero u kʼáat u kʼex u kuxtaloʼob.

Teʼ xookaʼ yaan k-núukik le preguntaʼobaʼ:

•  ¿Baʼaxoʼob táakaʼan ichil in beetik baʼaloʼob kʼaastak wa táan in meyajtik Dios?

•  ¿Kʼasaʼanen wa kin beetik baʼaloʼob kʼaastak kex táan in meyajtik Dios?

•  ¿Bix jeʼel u xuʼulul in beetik baʼaloʼob kʼaastak wa táan in meyajtik Dioseʼ?

•  Baʼax ku yaʼalik uláakʼ paalaloʼob

 Ichil le jeʼelaʼ táakaʼan a beetik baʼaloʼob kʼaastak kéen yanakech yéetel máaxoʼob maʼatech u meyajtikoʼob Jéeoba. Chéen baʼaleʼ le kéen yanakech yéetel máaxoʼob meyajtik Dioseʼ ka beetik baʼaloʼob maʼalobtak, ka beetik bey jach tu jaajil a kʼáat a meyajt Dioseʼ. Juntúul máak beyaʼ kaʼapʼéel ich tumen yaan baʼax ku taʼakik, mix junpʼéel ku beetik tu jaajil u yóoliʼ.

 Erineʼ ku yaʼalik: «Wa ka beetik baʼaloʼob kʼaastak kex a wojel maʼ unaj a beetkeʼ bey ka a bis kaʼapʼéel kuxtaleʼ yéetel chéen táan a tusik u maasil tumen mix máak u yojel jach máaxechiʼ. Tsʼoʼoleʼ u beetik máak beyoʼ jach kʼaas».

 ¿A wojel wa? Ichil a beetik baʼaloʼob kʼaastak kex táan a meyajtik Jéeobaeʼ táakaʼan a beetik taʼakumbail baʼaloʼob ku bin tu contra Dios.

 Nolaneʼ ku yaʼalik: «Le yaanten 14 añosoʼ joʼopʼ in chaʼantik baʼaloʼob kʼaastak ich Internet. Tu táan u maasileʼ kin waʼalik jach in pʼeek le pornografíaoʼ, chéen baʼaleʼ u jaajileʼ maʼ kʼaas in wilkiʼ».

 Teksto jeʼel u yáantajeʼ: «Mix máak jeʼel u páajtal u meyajtik kaʼatúul tsʼuuloʼobeʼ, tumen yaan u pʼektik juntúuliʼ yéetel yaan u yaabiltik le uláakʼoʼ, wa yaan u biskuba yéetel juntúuliʼ yéetel yaan u náachtal tiʼ le uláakʼoʼ» (Mateo 6:24).

 Según baʼax oʼolal táan a beetik, yaan máakeʼ u yóoliliʼ u beetik baʼax kʼaas tu táan Jéeoba. Pero kux túun teech, ¿bey wa xan a beetkoʼ? Maʼ xaaneʼ ka beetik baʼaloʼob kʼaastak yoʼolal lelaʼ:

•   Tumen jelaʼan a wuʼuyikaba ikil maʼ ta beetik le baʼax ku beetik u maasil paalaloʼoboʼ.

•   Tumen maas maʼalob a wuʼuyikaba yéetel a wéet xookoʼob ke yéetel le sukuʼunoʼoboʼ.

•   Tumen ka wuʼuyik maʼ ta tsaʼayal a beet tuláakal baʼax ku kʼáatiktech Dios.

 Davideʼ ku yaʼalik: «In tuklikeʼ jujuntúul táankelem paalaloʼob ku beetkoʼob baʼaloʼob kʼaastak kex u yojloʼob maʼ debe sereʼ maʼalob u biskubaʼob yéetel máaxoʼob maʼ tu meyajtikoʼob Diosiʼ. Tumen le baʼax u kʼáatoʼoboʼ letiʼe u yantal u amigoʼoboʼ».

 Chéen baʼaleʼ leloʼ maʼ u kʼáat u yaʼal wa uts u beetik máak baʼaloʼob kʼaastak kex u yojel maʼ unajiʼ. Baʼaxeʼ leloʼ ku yeʼesikeʼ tak juntúul utsul máakeʼ jeʼel u káajal u beetik baʼaloʼob kʼaastakeʼ. Wa bey u yúuchultechoʼ, ¿baʼax jeʼel u páajtal a beetkeʼ?

1.  1. Tuukulnen tiʼ le kuxtal táan a bisik beoraaʼ. Tuukulnen tiʼ lelaʼ: ¿Jach wa tu jaajil bey in kʼáat kuxtalaʼ? Wa maʼ tin kʼexik in kuxtaleʼ, ¿bix kun tsʼoʼokolten?

    Teksto jeʼel u yáantajeʼ: «Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail» (Proverbios 27:12).

2.  2. Tsikbalte. Tsikbalt tiʼ a papáʼob wa tiʼ juntúul máax meyajtik Jéeoba le baʼax ku yúuchultechoʼ. Letiʼobeʼ jach yaan u kiʼimaktal u yóoloʼob kéen a kʼáat áantaj tiʼob yéetel kéen u yiloʼob a kʼáat a beet baʼax maʼalob.

    Nolaneʼ ku yaʼalik: «Junpʼéel tiʼ le baʼaxoʼob jach istikyaj úuchik in beetkoʼ letiʼe in tsikbaltik tiʼ wa máax le baʼax ku yúuchultenoʼ. Chéen baʼaleʼ úuchik in beetik beyoʼ jach maʼalob tin wuʼuyilinba».

    Teksto jeʼel u yáantajeʼ: «Le máax ku taʼakik le baʼax kʼaas u beetmoʼ maʼ kun bin utsil tiʼ, pero le máax ku yaʼalik le baʼax u beetmaj yéetel ku xuʼulul u beetkeʼ yaan u chʼaʼabal óotsilil tiʼ» (Proverbios 28:13.

3.  3. Kʼaʼajs baʼax consecuenciail kun antal. Kʼaʼajaktecheʼ wa yaan baʼax kʼaas ta beetaj yéetel maʼ ta waʼalaj tiʼ a papáʼob bey xan tiʼ le ancianoʼoboʼ maʼ chéen chʼaʼabil kun kaʼa confiaroʼob tiʼ techiʼ. Tsʼoʼoleʼ maʼ xaaneʼ tu yáamil junpʼéel tiempoeʼ yaan baʼaloʼob maʼ kun chaʼabil a beetik jeʼex kaʼacheʼ. Chéen baʼaleʼ uʼuy a wuʼuy le baʼax kun aʼalbiltechoʼ yéetel chʼaʼtukult a beetik «tuláakal baʼal tu nuʼuk» (Hebreos 13:18).

    Teksto jeʼel u yáantajeʼ: «Uʼuy le consejooʼ yéetel kʼam le nuʼuktajoʼ beyoʼ kéen máanak kʼiineʼ yaan u yantal a naʼat» (Proverbios 19:20).

4.  4. Maʼ u tuʼubultecheʼ Dioseʼ jach u yaabiltmech. Jéeobaeʼ jach u yaabiltmech, ku chʼaʼik en cuenta tuláakal baʼax ka beetik. Le oʼolaleʼ jach ku yaatal u yóol kéen u yil táan a beetik baʼaloʼob kʼaastak wa a wojel maʼ unajiʼ. Pero letiʼeʼ u kʼáat ka xiʼiktech utsil yéetel u kʼáat u yáantech a beet baʼax maʼalob (1 Pedro 5:7).

    Teksto jeʼel u yáantajeʼ: «Jéeobaeʼ jach táan u yilik baʼax ku yúuchul tiʼ tuláakal yóokʼol kaab, tumen letiʼeʼ taak u yáantik le máaxoʼob meyajtik yéetel tuláakal u puksiʼikʼaloʼoboʼ» (2 Crónicas 16:9).