U testigoʼob Jéeobaeʼ yaʼab u jejeláasil bibliaʼob tsʼoʼok u meyajtiʼob utiaʼal u xookoʼob. Baʼaleʼ maas jatsʼuts u yilkoʼob le biblia U Suttʼaanil Túumben Luʼumoʼ —sutaʼan ich yaʼab idiomaʼob— tumen ichileʼ ku chíikpajal u kʼaabaʼ Diosiʼ, maʼalob sutaʼanil yéetel séeb u naʼataʼal.

•   U kʼaabaʼ Dios. Maʼ tuláakal le editorialoʼob respetartik u kʼaabaʼ le Máax beet u yantal le Bibliaoʼ. Por ejemploeʼ, tiʼ junpʼéel bibliaeʼ tsʼaʼan u kʼaabaʼ maas tiʼ setenta máakoʼob táakpajoʼob utiaʼal u beetaʼal. Baʼaleʼ mix junpuul ku chíikpajal u kʼaabaʼ le Máax beet u yantal le Bibliaoʼ: Jéeoba Dios.

   Chéen baʼaleʼ, teʼ biblia U Suttʼaanil Túumben Luʼumoʼ ku chíikpajal u kʼaabaʼ Dios u milesil u téenel, le jaytéen ku chíikpajal kaʼach teʼ úuchben tsʼíiboʼoboʼ. Tsʼoʼoleʼ maʼ tu yaʼalaʼal u kʼaabaʼ le máaxoʼob táakpajoʼob utiaʼal u suʼutul ich yaanal idiomaoʼ.

•   Maʼalob sutaʼanil. Tiʼ jujunpʼéel bibliaʼobeʼ maʼ jach maʼalob sutaʼanil jujunpʼéel tʼaanoʼobiʼ. Jeʼex tiʼ junpʼéel bibliaeʼ, teʼ Mateo 27:40, ku yaʼalik: «¡Wa u Paalech Jajal Dioseʼ éemen tiʼ le cruzoʼ!». Maʼ xaaneʼ le máaxoʼob sutoʼ tu tsʼáajoʼob «cruz» tumen ku creertikoʼobeʼ tiʼ cruz kíim Jesús. Baʼaleʼ le úuchben tsʼíiboʼoboʼ maʼ tu yaʼalik «cruz», baʼaxeʼ chéen ku yaʼalik «cheʼ». U jaajileʼ mix tuʼux ku yaʼalik le Biblia wa tiʼ junpʼéel cruz kíim Jesusoʼ. Le oʼolaleʼ, le biblia U Suttʼaanil Túumben Luʼumoʼ bey u yaʼalikaʼ: «¡Wa u paalech Dioseʼ, éemkech tiʼ u cheʼil le muʼyajoʼ!».

•   Séeb u naʼataʼal. Junpʼéel bibliaeʼ maʼ chéen unaj u suʼutul maʼalobiʼ, kʼaʼabéet xan u naʼataʼal tu séebaʼanil. Koʼox ilik junpʼéel ejemplo. Teʼ Mateo 5:3, le tʼaan meyajnaj tiʼ Jesús ich griegooʼ ku suʼutul «kiʼimak u yóol le máaxoʼob óotsil u yóoloʼoboʼ». Baʼaleʼ ich mayaeʼ wa ka tsʼaʼabak jach jeʼex tu yaʼaliloʼ maʼ tun jach naʼatbil le baʼax tu yóotaj u yaʼal Jesusoʼ. Le oʼolaleʼ le biblia U Suttʼaanil Túumben Luʼumoʼ utiaʼal ka séeb naʼataʼakeʼ ku yaʼalik: «Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ».

 Jeʼex k-ilkoʼ U Suttʼaanil Túumben Luʼumeʼ ku respetartik u kʼaabaʼ le Máax beet u yantal le Bibliaoʼ, maʼalob sutaʼanil yéetel séeb u naʼataʼal. Baʼaleʼ maʼ chéen leloʼ: le bibliaaʼ siibil u beetaʼal. Le oʼolaleʼ u millonesil máakoʼob jeʼel u páajtal u yantaltiʼob ichil u idiomaʼob kex minaʼan taakʼin tiʼob utiaʼal u manikoʼobeʼ.