Clodeaneʼ, u testigo Jéeoba yéetel kajaʼan Sudáfrica, letiʼeʼ hospitalizartaʼabi tumen kʼaʼabéetchaj u operartaʼal. Tsʼoʼoleʼ como yaan uláakʼ kʼojaʼaniloʼob tiʼeʼ kʼaʼabéetchaj u yéeyik baʼax tratamientoil u kʼáat ka tsʼaʼabaktiʼ. Antes tiʼ u operartaʼal bey xan le tsʼoʼok u operartaʼaloʼ ku yuʼubik jach ku kaʼanal, ku tsʼáaik dolor tiʼ yéetel jach yaʼab u estresar. Tsʼoʼoleʼ como jach delicado le operación beetaʼabtiʼoʼ kex tsʼaʼab de altaeʼ máan 10 semanas maʼ tu páajtal u kutal yéetel yoʼolal le COVID-19 mix máak kaʼach ku páajtal u bin xíimbaltik.

 Clodeaneʼ maʼ u kʼáat kaʼach tuukul chéen tu yoʼolaliʼ, le oʼolal tu kʼáataj tiʼ Jéeoba ka áantaʼak utiaʼal ka páajchajak u líiʼsik u yóol u maasil. Chéen pʼelak béeychaj u kutaleʼ tu tʼanaj u kiik juntúul u vecina, le koʼolelaʼ ku tsʼaʼabal xook kach tiʼ, chéen baʼaleʼ tu pʼataj. Clodeaneʼ tu xokaj tiʼ le koʼolel jujunpʼéel tekstoʼob tiʼ le Bibliaoʼ, leloʼ tu beetaj u taaktal u kaʼa xook. Clodeaneʼ tu yaʼalajtiʼeʼ wa ku conectarkuba teʼ reuniónoʼoboʼ maas yaʼab baʼaloʼob jeʼel u kanikeʼ, le oʼolal tu yáantaj utiaʼal u conectarkuba. Le koʼolel túunoʼ tu conectartuba, hasta comentarnaji.

 Ka tsʼoʼokeʼ Clodeaneʼ tu tʼanaj xan u yíitsʼin le koʼoleloʼ tumen letiʼ xaneʼ taak kaʼach u kaanbal tiʼ le Bibliaoʼ. Le koʼolelaʼ tu yaʼalaj tiʼ Clodeaneʼ u kʼaj óol xan uláakʼ koʼoleloʼob taak xan u xokikoʼob le Bibliaoʼ. Clodean túuneʼ káaj u tsʼáaik xook tiʼ cuatro koʼoleloʼob maas. Pero yaan uláakʼ baʼax úuchi.

 Clodeaneʼ jach taak u yáantik u maasil, le oʼolal káaj u tsʼáaik xook tiʼ uláakʼ 10 koʼoleloʼob. Beyoʼ tu chukaj 16 u túulal u j-xoknáaloʼob, tuláakal lelaʼ úuch le táan le pandemiaoʼ. Tsʼoʼoleʼ yaan tiʼ le koʼoleloʼobaʼ tsʼoʼok u káajal u conectarkubaʼob teʼ reuniónoʼoboʼ. Ikil u yáantik u maasil utiaʼal u kʼaj óoltikoʼob Jéeobaeʼ bejlaʼeʼ Clodeaneʼ maʼatech u sen tuukul tiʼ le baʼax ku yúuchultiʼoʼ. Como tsʼoʼok u yáantaʼal tumen Jéeoba, «le Dios mantatsʼ ku líiʼsaj óoloʼ», Clodeaneʼ tsʼoʼok u páajtal u yáantik uláakʼ máakoʼob (2 Corintios 1:3, 4).

 ¿Baʼax túun ku yaʼalik le koʼoleloʼob yoʼolal le baʼax táan u kankoʼoboʼ? Juntúul tiʼ letiʼobeʼ tu yaʼalaj: «Jach tsʼoʼok u yáantken le baʼax tsʼoʼok in kanikoʼ. Pero le baʼax maas utschaj tin wichoʼ letiʼe in kanik u kʼaabaʼ Diosoʼ. Leloʼ tsʼoʼok u yáantken utiaʼal in maas náatsʼal tiʼ letiʼ». ¿Kux túun le yáax koʼolel tsʼaʼab xook tiʼoʼ? Letiʼeʼ jach taak u yokjaʼ. Tuláakal lelaʼ tsʼoʼok u taasik kiʼimak óolal tiʼ Clodean, tsʼoʼoleʼ jach maʼalob bix táan u yutstal tiʼ le operación beetaʼabtiʼoʼ.