Madián yéetel Marcelaeʼ jach maʼalob bix kuxlikoʼob kaʼach tu kaajil Medellín, Colombia. Madiáneʼ jach maʼalob u náajal kaʼachi, le oʼolaleʼ jach jatsʼuts le naj tuʼux kajaʼanoʼoboʼ. Pero yaan baʼax úuchtiʼob beet u kʼexkoʼob yaʼab baʼaloʼob ichil u kuxtaloʼob. Como u testigoʼob Jéeobaeʼ tu añoil 2006, binoʼob tiʼ junpʼéel asamblea especial tu kʼaabaʼtaj: «Maʼ u xuʼulul k-paakat maʼalob». Letiʼobeʼ tu yaʼaloʼob: «Yaʼab tiʼ le discursoʼob máansaʼaboʼ tu tsoloʼobeʼ utiaʼal k-maas meyajtik Dioseʼ kʼaʼabéet k-ilik k-kuxtal chéen yéetel le baʼaxoʼob kʼaʼabéettoʼonoʼ. Le ka tsʼoʼok le asambleaoʼ t-tsʼáaj cuentaeʼ maʼ letiʼe baʼaxoʼob táan k-beetkoʼ. Suuk k-maʼamanik yaʼab baʼaloʼob, le oʼolal yaʼab k-pʼaax yaan».

 Le baʼax tu yuʼuboʼob teʼ asambleaoʼ tu beetaj u chʼaʼtuklik u kʼexik u kuxtaloʼob. Letiʼobeʼ ku yaʼalikoʼob: «T-ilaj maʼ k-sen xuup, binoʼon kajtal tiʼ junpʼéel naj maas chichan, tsʼoʼoleʼ t-konaj k-cocheeʼ ka t-manaj junpʼéel moto». Madián yéetel Marcelaeʼ xuʼul u binoʼob tiʼ lugaroʼob tuʼux yaan nukuch tiendaʼob utiaʼal maʼ u xuʼuxupik u taakʼinoʼob tiʼ baʼaloʼob maʼ kʼaʼabéettiʼobiʼ. Letiʼobeʼ tu chʼaʼtukloʼob u maas tsikbaltikoʼob u Tʼaan Dios tiʼ u maasil máakoʼob, káaj xan u biskubaʼob yéetel kaʼatúul precursor especialoʼob a jach u tsʼaamaj u yóol u meyajtoʼob Dios.

 Maʼ úuch tiʼ leloʼ Madián yéetel Marcelaeʼ binoʼob áantaj tiʼ junpʼéel chan múuchʼulil yaan tiʼ junpʼéel chan kaaj. Chéen baʼaleʼ utiaʼal u páajtal u beetkoʼob leloʼ Madiáneʼ anchaj u pʼatik u meyaj. U patronaeʼ tu tuklaj tsʼoʼok u locotaleʼ, le oʼolaleʼ Madiáneʼ anchaj u tsoliktiʼ baʼaxten táan u pʼatik le meyajoʼ. Letiʼeʼ tu yaʼalaj tiʼ u patrona: «Techeʼ yaʼab taakʼin ka náajaltik. Chéen baʼaleʼ, ¿kiʼimak wa a wóol?». Letiʼeʼ tu yaʼaleʼ maʼatech tumen yaʼab problemaʼob yaantiʼ. Madián túuneʼ tu yaʼalajtiʼ: «Le baʼax maas kʼaʼabéet u beetik máakoʼ maʼ letiʼe u náajaltik taakʼinoʼ, baʼaxeʼ letiʼe u beetik le baʼax maas taasik kiʼimak óolal tiʼoʼ. Le baʼax maas taasik kiʼimak óolal tiʼ teen yéetel tiʼ in watanoʼ, letiʼe k-tsikbaltik tiʼ uláakʼ máakoʼob le baʼax ku yaʼalik Diosoʼ, le oʼolaleʼ letiʼe baʼax tsʼoʼok k-chʼaʼtuklik k-beetik ichil k-kuxtaloʼ».

 Madián yéetel Marcelaeʼ jach kiʼimak u yóoloʼob tumen u meyajtikoʼob Dioseʼ letiʼe baʼax maas kʼaʼanaʼan ichil u kuxtaloʼoboʼ. Letiʼobeʼ 13 años joʼopʼok u yáantajoʼob tiʼ jejeláas múuchʼuliloʼob yanoʼob tu xaman-chikʼinil Colombia. Bejlaʼeʼ precursor especialoʼob.