情况改变但仍然保持内心平静
“我已经使自己嘅心平和安静”——诗篇131:2
1,2． （甲）一个基督徒遇到一啲意外改变嗰时有乜嘢感受？（请睇吓课文开头嘅图片）（乙）诗篇131篇提到乜嘢特质可以帮助我哋保持内心平静？
劳埃德同亚历山德拉已经喺伯特利服务咗超过25年，佢哋啱啱知道自己会被委派去地区嘅时候，觉得好伤心。劳埃德话：“我觉得伯特利嘅工作就系我一生嘅委派。虽然我明白点解要调整，亦都觉得调整系好嘅，不过喺之后好多个星期，甚至好多个月嘅时间入面，我一直都有一种被遗弃嘅感觉。我嘅情绪好似坐过山车噉，有好大嘅起伏。前一分钟，我觉得可以积极面对；但后一分钟，我又觉得好失落。”
2 我哋面对人生当中一啲意外嘅转变嗰阵，可能会忧虑不安，喺感情上受到好大嘅压力。（箴言12:25）我哋甚至觉得好难接受呢啲改变。喺噉嘅情况下，我哋点样可以“使自己嘅心平和安静”呢？（请读诗篇131:1-3）等我哋嚟讨论吓，一啲圣经人物同耶和华嘅现代忠仆面对不断变化嘅情况嗰阵点样保持内心平静。
体验上帝所赐嘅平安
3． 约瑟嘅生活突然发生乜嘢转变？
3 约瑟嘅哥哥见父亲雅各特别痛锡约瑟，就心生妒忌。后来，喺约瑟大约17岁嘅时候，佢哋就将约瑟当奴隶卖咗。（创世记37:2-4,23-28）结果，约瑟不得不远离自己心爱嘅父亲，有成13年嘅时间喺埃及被迫成为奴隶同受囚禁。乜嘢帮助约瑟不致因为陷入绝望而向困苦低头屈服？
4． （甲）约瑟喺监狱嘅时候细心留意乜嘢？（乙）耶和华点样回应约瑟嘅祷告？
4 约瑟喺监狱受苦嘅时候，一定细心留意耶和华点样赐福俾佢。（创世记39:21；诗篇105:17-19）佢年轻嗰时所作嘅一啲预示未来嘅梦，亦都使佢确信自己受到耶和华嘅悦纳。（创世记37:5-11）可能佢唔只一次向耶和华倾诉自己嘅痛苦。（诗篇145:18）耶和华回应约瑟衷心嘅祷告，使约瑟深信遭遇一切患难嘅时候耶和华都“与佢同在”。（使徒行传7:9,10） *
5． 耶和华所赐嘅平安点样帮助我哋更加坚定噉事奉佢？
5 无论面对乜嘢困难，上帝所赐嘅平安都会保护我哋嘅头脑，帮助我哋保持内心平静。（请读腓立比书4:6,7）我哋觉得自己就快俾忧虑压倒嘅时候，只要向耶和华寻求帮助，佢所赐嘅平安就会强化我哋达到属灵目标嘅决心，而且帮助我哋抵抗内心任何想放弃嘅念头。现代嘅一啲例子可以说明呢一点。
恳求耶和华帮助你重获内心平静
6,7． 具体嘅祷告可以点样帮助我哋重获内心平静？请举例。
6 瑞安同朱丽叶得知佢哋唔再系临时特别先驱嗰时，觉得好灰心。瑞安话：“我哋向耶和华祷告，直接讲出自己嘅感受。我哋明白到，而家系一个特别嘅机会去表明自己信赖耶和华。我哋会众嘅好多人喺真理嘅时间唔长，所以我哋祈求耶和华帮助我哋喺信心方面立下榜样。”
7 耶和华点样回应佢哋嘅祷告？瑞安回忆话：“我哋祷告之后，最初嗰啲负面情绪同忧虑就冇晒嘞。上帝所赐嘅平安保护我哋嘅内心同头脑。我哋知道，只要保持正确嘅态度，我哋就可以继续为耶和华服务。”
8-10． （甲）圣灵点样帮助我哋克服忧虑？（乙）只要我哋努力喺属灵方面保持专注，耶和华就可能会点样帮助我哋？
8 上帝嘅圣灵唔单止有助于我哋平复情绪，仲可以使我哋留意一啲关键嘅经文，帮助我哋将属灵嘅事放喺首位。（请读约翰福音14:26,27）菲利普同玛丽系夫妇，佢哋喺伯特利服务咗差唔多25年。四个月之内，佢哋都失去咗各自嘅妈妈同其他亲人，亦都要照顾玛丽患有痴呆症嘅爸爸。
9 菲利普回忆话：“我觉得，喺某程度嚟讲，我已经应付得几好，但仲系少咗啲嘢。我偶然喺一篇《守望台》研读文章留意到歌罗西书1:11嘅经文。我发觉，虽然我的确保持坚忍，但做得仲未够，我需要嘅系‘怀住喜乐同耐心’。呢节经文提醒我，喜乐唔系取决于自己所处嘅环境，而系在于圣灵喺我自己嘅生活中发挥作用。”
10 菲利普同玛丽一直专注于事奉耶和华，结果喺好多方面都得到耶和华嘅赐福。佢哋离开伯特利之后冇几耐，两个人都揾到圣经学生。圣经学生唔单止进步良好，甚至仲话一个星期学习一次唔够。玛丽话：“佢哋系我哋嘅喜乐，耶和华亦都通过佢哋话俾我哋知，喺一切事上佢都会帮助我哋。”
使耶和华有理由赐福俾你
无论喺乜嘢情况下，我哋都可以点样效法约瑟嘅榜样？（请睇第11-13段）
11,12． （甲）约瑟点样做，使耶和华有理由赐福俾佢？（乙）约瑟保持忍耐，结果耶和华点样奖赏佢？
11 我哋面对一啲突然嘅变化嗰时，好容易会过度忧虑将来嘅事，导致我哋除咗成日谂住自己嘅难题就乜嘢都唔想做。约瑟都有可能会噉样。不过，佢决心喺当时嘅情况下尽力做自己做到嘅事，使耶和华有理由赐福俾佢。虽然身处监狱，约瑟仲系辛勤工作，努力完成监狱长交俾佢嘅任务，就好似佢为波提乏做嘅噉。（创世记39:21-23）
12 有一日，约瑟得到一个任务，要照顾两个曾经喺法老嘅宫廷担任要职嘅人。约瑟仁慈对待佢哋，所以两个人就将佢哋嘅忧虑同前一晚佢哋所作嘅令人费解嘅梦话俾约瑟知。（创世记40:5-8）约瑟当时并唔知道，呢次交谈会使佢得到自由。两年之后，佢获得释放，而且当日就成为地位仅次于法老嘅高官。（创世记41:1,14-16,39-41）
13． 无论喺乜嘢情况下，我哋可以点样使耶和华有理由赐福俾我哋？
13 我哋可能会好似约瑟噉，身处于自己完全无法控制嘅情况。不过，只要我哋保持耐心，喺当前嘅环境下尽力做能够做嘅事，噉耶和华就有理由赐福俾我哋。（诗篇37:5）冇错，可能我哋有时会感到“心里迷惘”，但正如使徒保罗所讲，我哋唔会永远“陷于绝境”。（哥林多后书4:8）我哋继续专注于传道工作，耶和华就会与我哋同在。
继续专注于传道工作
14-16． 虽然情况不断改变，传福音者腓力点样喺传道工作方面保持专注？
14 无论情况点样改变，传福音者腓力依然专注于自己嘅传道工作，为我哋立下优良嘅榜样。有一段时间，佢喺耶路撒冷喜乐噉执行自己嘅新委派。（使徒行传6:1-6）不过，情况突然之间完全唔同晒。司提反殉道之后，基督徒随即受到猛烈嘅迫害。 *不过，当基督嘅门徒四散嗰时，腓力仲系好想事奉上帝，于是去撒马利亚传道，因为当时嗰度有好多人都未接触过上帝王国嘅好消息。（马太福音10:5；使徒行传8:1,5）
15 腓力愿意跟从圣灵嘅指引去任何地方，所以耶和华运用佢开辟新嘅传道地区。好多犹太人鄙视撒马利亚人，用唔好嘅态度对待佢哋。不过腓力对撒马利亚人冇偏见，而且好渴望同佢哋分享好消息。所以，好多撒马利亚人“齐心一意”听佢讲话。（使徒行传8:6-8）
16 后来，圣灵引导腓力去亚实突同凯撒里亚呢两座有好多外邦人居住嘅城市。（使徒行传8:39,40）喺撒马利亚传道大约20年之后，腓力嘅情况再次发生改变。而家，佢建立咗家庭，亦都喺自己嘅传道地区定居落嚟。虽然情况不断改变，但系腓力始终专注于做传道工作。结果，佢同家人都得到耶和华丰厚嘅赐福。（使徒行传21:8,9）
17,18． 生活发生改变嘅时候，专注做传道工作可以点样帮助我哋？
17 好多全时仆人都话，就算情况不断改变，专注做传道工作可以帮助佢哋喺各方面保持平衡。奥斯本同波利特系南非嘅一对夫妇。离开伯特利嗰阵，佢哋以为好快就可以揾到住嘅地方同埋一份部分时间嘅工作。奥斯本回忆话：“不幸嘅系，同我哋谂嘅唔一样，我哋唔系即刻可以揾到世俗工作。” 太太波利特话：“我哋三个月都揾唔到工做，而且又冇积蓄，当时真系唔容易。”
18 乜嘢帮助佢哋应付咁大嘅压力呢？奥斯本话：“同会众一齐传道大大帮助我哋保持思想积极，专注于属灵嘅事。我哋决心唔系坐喺度忧虑，而系专心传道。噉样做真系带俾我哋好大嘅喜乐。我哋亦都努力到处揾工，终于俾我哋揾到咗。”
耐心等候耶和华
19-21． （甲）乜嘢帮助我哋保持内心平静？（乙）适应新嘅情况为我哋带嚟乜嘢益处？
19 以上嘅例子表明，如果我哋尽量善用自己嘅环境，怀住信心等候耶和华，我哋就可以保持内心平静。（请读弥迦书7:7）我哋甚至会发现，适应新嘅情况可能会喺属灵上为我哋带嚟好多益处。波利特根据自己以上提到嘅经历，话：“新嘅委派教识我，喺极其不利嘅情况下仰赖耶和华嘅真正意义系乜嘢。而家我同耶和华有更深厚嘅关系。”
20 上文提到嘅玛丽一边继续照顾佢年老嘅爸爸，一边做先驱。佢话：“我已经学识，每当感到忧虑，就要停低、祷告同埋放松一下。要将事情交俾耶和华，呢个可能系我学到最宝贵嘅一课。将来我都要噉样做。”
21 课文开头提到嘅劳埃德同亚历山德拉承认，冇谂到自己嘅信心会喺情况改变之下受到考验。不过佢哋话：“当难题出现嘅时候，我哋嘅信心会受到考验，到时我哋就知道自己有冇真正嘅信心，同埋我哋嘅信心系咪俾到自己支持同安慰。我哋都成为咗更成熟嘅人。”
意外嘅变化可以带嚟意想唔到嘅福分！（请睇第19-21段）
22． 我哋喺逆境之下尽力而为，就可以确信乜嘢？
22 如果你嘅生活发生一啲意外嘅转变，无论系有新嘅委派、有健康问题抑或系有新嘅家庭责任，都要确信耶和华会照顾你，喺适当嘅时候帮助你。（希伯来书4:16；彼得前书5:6,7）同时，要喺逆境之下尽力而为。通过祷告亲近天父，学识全心仰赖佢。噉样，任凭情况点样改变，你都可以使自己继续享有平和安静嘅心。
