好多喺伯特利服务嘅年轻人经常会叫我做“爹哋”、“爸爸”、“叔叔”。我好钟意佢哋噉样嗌我。我已经89岁，为耶和华全时服务咗72年。我将呢啲亲切嘅称呼视为耶和华俾我嘅奖赏。根据我事奉耶和华咁多年嘅经验，我可以由衷噉向呢啲年轻人保证：“唔好沮丧，因为你哋所做嘅，必有奖赏。”（历代志下15:7）

我父母系从乌克兰移民到加拿大嘅。佢哋喺马尼托巴省嘅罗斯本定居。我亲爱嘅妈妈生咗8个仔同8个女，当中冇双胞胎，而我就排名14。爸爸好钟意睇圣经，佢会喺星期日朝早读圣经俾我哋听，不过佢唔钟意宗教，觉得宗教只系人用嚟赚钱嘅工具。佢经常讽刺话：“耶稣传道教人，有冇收过人钱吖？”

我嘅兄弟姐妹当中，后来有8个人——4男4女接受咗真理。我家姐露丝去世之前一直都做先驱。佢喺临终之前嗰段日子一直鼓励身边嘅人要留意上帝嘅话语，同佢哋讲：“我好想喺新世界见翻你哋。”我哥哥泰迪最初系一个鼓吹地狱永火嘅传教士。每个星期日早上，佢都会喺电台以强烈嘅措辞发表演讲，话罪人会喺地狱受尽折磨，永远俾火烧。不过后来，佢成为一个忠心嘅见证人，热心事奉耶和华。

1944年6月，有一日我放学返屋企，见到台上面放住一本叫做《将临世界嘅复兴》 *嘅册子。我翻开第一页睇咗吓，然后又睇咗第二页，跟住我就忍唔住睇晒成本嘞。之后，我就决心效法耶稣，事奉耶和华上帝。

呢本册子系点嚟嘅呢？原来之前，有两个男人嚟过我哋屋企，问我哋要唔要买啲书刊或册子。我哥哥史蒂夫话：“嗰本册子我 买嘅，5分钱咋。”第二个星期，嗰两个男人又过嚟我哋屋企。佢哋话，佢哋系耶和华见证人，会用圣经嚟回答人提出嘅问题。佢哋又话，见证人好快会喺温尼伯举行一个大会。我家姐埃尔茜就住喺嗰个城市。我决定参加呢个大会。

我踩单车去温尼伯，全程有成320公里（200英里）。途中，我喺凯尔伍德镇停低，因为嗰两个嚟过我哋屋企嘅见证人就住喺嗰度。我喺逗留期间参加咗聚会，亦知道咗乜嘢系会众。我亦都明白到，无论男女老幼，每个人都应该好似耶稣噉，逐家逐户向人传道。

喺温尼伯，我遇到从安大略省北部嚟参加大会嘅哥哥杰克。大会头一日，一个弟兄宣布会有浸礼。于是杰克同我就决定喺大会受浸。我哋决心受浸之后就尽快做先驱。所以大会一结束，杰克就投身全时服务。我当时只系16岁，仲要返学，所以到第二年先至做先驱。

我同斯坦·尼哥逊一齐喺马尼托巴省嘅苏里斯镇开始做先驱。我好快就明白到，做先驱唔系一帆风顺嘅。虽然积蓄越来越少，但我哋继续向人传道。有一次，我哋结束一日嘅传道工作之后觉得好肚饿，不过身上一分钱都冇。返到屋企嗰时，我哋好惊喜噉发现，门口居然放住一大袋食物！直到今日，我哋都唔知道系边个俾我哋嘅。嗰一晚，我哋食得好满足。我哋喺逆境之下冇灰心沮丧，真系得到好大嘅奖赏！嗰个月嘅月尾，我嘅体重居然系有史以来最重嘅！

几个月之后，我哋被委派到吉尔伯特普莱恩斯镇。呢个镇位于苏里斯北面240公里（150英里）。当时，每个会众嘅讲台上都展示咗一张好大嘅表格，记录咗会众每个月嘅传道情况。如果某个月嘅传道时间减少咗，我就会对会众发表演讲，强调弟兄姊妹要做多啲。有个年长嘅先驱姊妹，丈夫唔喺真理，佢喺聚会结束之后眼湿湿噉同我讲：“我尽咗力㗎喇，但系我真系做唔到更多。”我好内疚，仲喊咗出嚟，亦都向佢道歉。

好多精力充沛嘅年轻弟兄都同我一样，好容易犯噉嘅错误，然后对自己感到失望。不过我嘅经验系，与其灰心丧气，不如从中吸取教训，并且谨记在心。只要保持忠心，就必得奖赏。

我好荣幸喺21岁嘅时候就参加咗第14届基列学校，喺1950年2月毕业。有四分一嘅学员被派到加拿大嘅魁北克省，嗰度系法语嘅地区。见证人喺当地受到猛烈嘅宗教迫害。我被委派到魁北克省金矿区嘅瓦勒多镇。有一日，我哋一班人去附近嘅瓦尔塞讷维尔村传道。当地嘅教士恐吓我哋话，如果我哋唔即刻离开就对我哋唔客气。因为噉，我将教士告上法庭，结果佢被判罚款。 *

呢个事件同其他好多类似嘅事件成为“魁北克之战”嘅一部分。魁北克省被罗马天主教会控制咗超过三百年。教士同佢哋嘅政治盟友迫害耶和华见证人。虽然呢段时期好艰难， 而且我哋人数唔多，不过我哋并冇灰心沮丧。诚心正意嘅魁北克人响应真理。我好荣幸帮助咗一啲人认识真理。我有机会同一个十口之家讨论圣经，结果佢哋全家都事奉耶和华。佢哋嘅勇敢榜样激励其他人离开天主教会。我哋继续传道，最终获得胜利！

1956年，我被委派到海地。对好多啱啱去到嗰度嘅海外传道员（现称特派传道员）嚟讲，学习法文唔系一件容易嘅事。虽然佢哋识嘅法文唔多，但系当地人都愿意听佢哋传讲嘅信息。海外传道员斯坦利·博古斯话：“令我哋惊讶嘅系，嗰度嘅人好热心噉帮助我哋表达自己想讲嘅话。”起初，我以为自己喺魁北克学过法文，应该冇问题。不过好快我就留意到，当地大部分嘅弟兄姊妹净系识讲海地克里奥尔语。所以，如果海外传道员想有效噉作见证，就一定要学习当地语言。于是我哋努力噉样做，而且得到好好嘅成果。

为咗进一步帮助当地嘅弟兄姊妹，中央长老团批准我哋将《守望台》同其他书刊翻译成海地克里奥尔语。之后，全国出席聚会嘅人数大幅增加。1950年，海地只有99个传道员，不过到咗1960年，传道员人数已经超过800！就喺嗰时，我被派去伯特利服务。1961年，我有殊荣成为王国职务训练班嘅一个导师。我哋培训咗40个长老同特别先驱。喺1962年1月嘅大会，我哋鼓励符合资格嘅当地弟兄扩大服务。后来，佢哋当中有啲人被委任做特别先驱。呢个真系好适时，因为好快我哋就要面对迫害。

1962年1月23日，大会啱啱结束，就有警察嚟分部逮捕我同海外传道员安德鲁·得阿米科，亦都将1962年1月8日刊嘅法语《警醒！》全 部没收。原因系，嗰期《警醒！》引录咗某啲法语报刊关于海地人施行巫术嘅报道，而有啲人唔钟意呢啲内容，以为系我哋分部写嘅。几个星期之后，海外传道员就被驱逐出境。 * 不过，受过培训嘅本地弟兄做得好好，继续执行当地嘅工作。今日，我因为佢哋所表现嘅忍耐同喺属灵上嘅进步而感到高兴。而家，佢哋甚至有海地克里奥尔语嘅《圣经新世界译本》。呢个系我哋以前梦寐以求嘅。

离开海地之后，我被委派去中非共和国做海外传道员。我后来有殊荣从事探访工作，之后又成为分部监督。

喺嗰时，好多王国聚会所都非常简陋。我学习点样喺灌木丛收集茅草搭屋顶。因为我系个新手，好多经过嘅人，见到我鸡手鸭脚嘅样，就好好奇噉望住我。不过，当地嘅弟兄姊妹见到我咁落力就受到鼓励，更积极噉建造同维修佢哋自己嘅王国聚会所。当地嘅宗教领袖嘲笑我哋，因为佢哋用铁皮嚟整教堂嘅屋顶，而我哋就只系用茅草。我哋冇受影响，继续使用我哋嘅聚会所。后来，一场暴风雨袭击首都班吉嘅时候，佢哋就笑唔出嘞。佢哋嘅铁皮屋顶俾暴风雨吹咗落街，而我哋聚会所嘅茅草屋顶就安然无恙。为咗更好噉督导王国传道工作，我哋喺短短嘅5个月内，就起好一个新嘅分部同海外传道员之家。 *

1976年中非共和国禁止我哋嘅传道工作。我被委派到乍得嘅首都恩贾梅纳。喺嗰度，我遇到夏佩。佢系一个好热心嘅特别先驱，嚟自喀麦隆。我哋喺1978年4月1日结婚。同一个月，内战爆发。我哋同好多人一样逃去乍得南部。战争结束之后，我哋返翻屋企，发现嗰度已经成为一个武装组织嘅指挥部。我哋唔单止冇晒啲杂志，连婚纱同结婚礼物都冇埋。不过，我哋并冇灰心沮丧，因为我哋有嘅系一生嘅伴侣，亦都有更多嘅工作要做。

大约两年之后，中非共和国撤销对见证人嘅禁制令，于是我哋返去嗰度从事探访工作。我哋嘅屋企系一部车，入面有张折叠床，一个可以装200升（53加仑）水嘅桶，一个冰箱同一个煤气炉。探访嘅旅途一啲都唔容易。有一次，我哋途中至少喺117个关卡俾警察截停检查。

当地嘅气温经常高达摄氏50度（华氏122度）。大会嗰阵，有时好难有足够嘅水施行浸礼。所以，弟兄要挖开干咗嘅河床，将揾到嘅水逐啲逐啲收集喺个大桶度。好多时，新人就系喺桶入面受浸嘅。

1980年，我哋被派到尼日利亚。有两年半嘅时间，我哋喺嗰度帮手筹备新分部嘅建筑工作。弟兄买咗一个两层高，可以拆开嘅移动仓库。我哋打算将仓库拆开之后，搬去新分部嘅工地再重新安装。有一日，我帮手拆仓库，就爬到仓库上面。到咗中午，我想爬翻落去嘅时候，冇留意下面嘅部分已经俾人拆咗，结果一脚踩空就跌咗落嚟。我嘅情 况睇嚟好严重，不过医生睇过X光片之后，同夏佩讲：“唔使担心，佢只系扭伤咗，一个星期左右就冇事㗎喇。”

1986年，我哋搬到科特迪瓦从事探访工作。我哋要探访嘅地区亦都包括附近嘅布基纳法索。我冇谂到，一年之后我哋会係布基纳法索居住一段时间。

我喺1956年离开加拿大。事隔47年之后，即系2003年，我同夏佩一齐返到加拿大嘅伯特利。虽然我哋嘅国籍系加拿大，但系我哋觉得自己系属于非洲嘅。

2007年，我喺79岁嘅时候，同太太再次返到非洲！我哋被委派到布基纳法索。喺嗰度，我成为地区委员会嘅成员。后来呢度嘅办公室成为远程翻译处，由贝宁分部管理。2013年8月，我哋又被委派到贝宁嘅伯特利。

虽然我嘅健康情况唔系咁好，但系我仲系好钟意做传道。过去三年期间，我喺其他长老嘅帮助同太太嘅支持下，好开心见到自己嘅两个圣经学生，热代翁同弗雷格斯受浸。而家，佢哋继续热心噉事奉耶和华。

喺呢段期间，我同太太被派去南非分部。我喺嗰度受到伯特利家庭悉心照顾。南非系我喺非洲服务嘅第七个国家。2017年10月，我哋得到一个好大嘅祝福。我哋被邀请参加纽约沃威克总部嘅呈献礼。呢件事的确令我哋终生难忘！

《1994耶和华见证人年鉴》255页话：“我哋鼓励多年来坚忍不拔为耶和华工作嘅人：‘要勇敢，唔好沮丧，因为你哋所做嘅，必有奖赏。’”（历代志下15:7）我同夏佩决心听从呢个劝告，亦都鼓励其他人噉样做。