事奉“快乐嘅上帝”嘅人几咁有福
“有耶和华作为上帝嘅人几咁有福！”——诗篇144:15
1． 点解耶和华见证人系一群快乐嘅人？（请睇吓课文开头嘅图片）
耶和华见证人系一群快乐嘅人。无论系聚会或者大会前后，定系交往嘅时候，佢哋当中都一定充满欢声笑语。点解佢哋咁快乐？最主要嘅原因系，佢哋认识“快乐嘅上帝”耶和华，亦都事奉同努力效法佢。（提摩太前书1:11；诗篇16:11）耶和华上帝系快乐之源，佢希望我哋快乐，亦都赐俾我哋好多福分，使我哋有理由感到喜乐。（申命记12:7；传道书3:12,13）
2,3． （甲）快乐系乜嘢？（乙）边啲情况会令我哋好难保持快乐？
2 你系咪一个快乐嘅人？你希唔希望自己更加快乐？一本著名嘅词典将快乐定义为“一种比较持久嘅幸福感，程度深浅有别，从人对生活大致满意到深感喜乐满足不等；感到幸福快乐嘅人都希望现状能够持续落去。”圣经表明，嗰啲同耶和华有亲密关系嘅人先至会享有真正嘅快乐。喺今日嘅世界，想过快乐嘅生活的确一啲都唔容易。点解？
3 生活中有好多事会夺去我哋嘅喜乐，可能系离婚、失业、亲友去世或者被开除。如果屋企人经常嘈交，同学或同事嘲笑我哋，或者我哋因为信仰而受迫害，甚至坐监，我哋就好难保持喜乐。健康恶化，患上慢性病或抑郁症，同样都会令我哋失去喜乐。但系，“快乐嘅、独一嘅掌权者”耶稣基督好想为人带嚟安慰同快乐。（提摩太前书6:15；马太福音11:28-30）即使撒但嘅世界充满各种患难同难题，不过耶稣喺登山宝训当中提到嘅几种特质可以帮助我哋保持快乐。
灵性坚强系快乐嘅要诀
4,5． 我哋可以点样得到并保持快乐？
4 耶稣讲嘅第一种特质尤其重要。佢话：“自觉有属灵需要嘅人有福嘞，因为天上嘅王国系佢哋嘅。”（马太福音5:3）我哋点样表明自觉有属灵需要呢？我哋吸收灵粮，服从上帝嘅诫命，将崇拜上帝放喺生活首位，就表明我哋自觉有属灵需要嘞。噉样做，我哋会更加快乐，对上帝即将实现嘅应许更加有信心，亦都因为盼望得着圣经预言嘅各种“福乐”而有力量保持忍耐。（提多书2:13）
5 同耶和华建立稳固嘅关系，系获得恒久快乐嘅一个重要因素。使徒保罗受圣灵启示写道：“要靠主［耶和华］常常喜乐。我再讲，要喜乐！”（腓立比书4:4）为咗享有同耶和华嘅宝贵友谊，我哋就要向佢寻求智慧。圣经话：“人揾到智慧，能明辨事理，就有福嘞。人持守智慧，智慧就系佢哋嘅生命树；紧守智慧嘅，必称为有福嘅人。”（箴言3:13,18）
6． 恒久快乐嘅基础系乜嘢？
6 不过，为咗得到恒久嘅快乐，我哋唔单止要阅读上帝嘅话语，仲要将学到嘅实践出嚟。耶稣强调咗实践嘅重要性，佢话：“你哋既然知道呢啲事，如果遵行，就有福嘞。”（约翰福音13:17；请读雅各书1:25）呢个系满足我哋属灵需要同埋得到恒久快乐嘅关键。不过，有好多事都可以夺去我哋嘅快乐，噉我哋点样先可以得到幸福快乐呢？等我哋继续分析吓，耶稣喺登山宝训所讲嘅话。
使我哋更加快乐嘅特质
7． 哀恸嘅人点样得到幸福快乐？
7 “哀恸嘅人有福嘞，因为佢哋会得到安慰。”（马太福音5:4）有啲人可能会谂：“嗰啲伤心嘅人又点会快乐呢？”耶稣指嘅唔系所有伤心嘅人。就算系邪恶嘅人，喺“难以应付嘅非常时期”都一样会因为面对压力而感到悲伤。（提摩太后书3:1）不过，佢哋只系为自己嘅境况同遭遇悲伤，呢个唔会使佢哋亲近耶和华，所以佢哋唔可以从呢种悲伤得到幸福快乐。耶稣谂到嘅，一定系嗰啲有属灵需要嘅人。佢哋见到周围好多人冇听从上帝嘅吩咐，唔想按照上帝嘅正义标准生活，就感到悲伤。佢哋意识到自己有罪，亦都明白系因为人唔完美，所以导致周围嘅情况咁恶劣。耶和华留意呢啲悲伤嘅人有真诚嘅态度，就通过圣经安慰佢哋，使佢哋可以喺生活中得到快乐。（请读以西结书5:11；9:4）
8． 性情温和点样促进喜乐？
8 “性情温和嘅人有福嘞，因为佢哋会承受大地作为产业。”（马太福音5:5）性情温和点样促进喜乐呢？有啲人认识真理之后，就作出改变。可能佢哋以前脾气暴躁、对人粗鲁无礼或者钟意同人嘈交。不过而家，佢哋穿上“新品格”，表现出“怜恤之情、仁慈、谦卑、温和、耐心”呢啲美好嘅特质。（歌罗西书3:9-12）结果，佢哋成为满怀爱心嘅人，同人和睦共处，得享快乐嘅生活。上帝嘅话语亦都保证，呢啲人“必得着大地”。（诗篇37:8-10,29）
9． （甲）喺乜嘢意义上，性情温和嘅人“会承受大地作为产业”？（乙）点解“对正义如饥似渴嘅人”可以得到快乐？
9 点解话，性情温和嘅人会“承受大地作为产业”？耶稣嘅受膏弟兄会作为君王同祭司管理地球，到时，佢哋就会承受大地作为产业嘞。（启示录20:6）另外，千百万人唔会去天上，佢哋同样会承受大地作为产业。佢哋会恢复完美，永远喺地球上过和平幸福嘅生活。虽然呢两群人嘅希望唔同，但佢哋都可以得享快乐，因为佢哋都系“对正义如饥似渴嘅人”。（马太福音5:6）喺新世界，佢哋对正义嘅渴求会得到满足。（彼得后书3:13）上帝最终会将所有邪恶消灭净尽。到时，正义嘅人将会得享幸福快乐，佢哋唔再因为坏人坏事而感到悲伤。（诗篇37:17）
10． 慈悲系乜嘢意思？
10 “慈悲嘅人有福嘞，因为佢哋会得蒙慈悲。”（马太福音5:7）翻译成“慈悲”嘅希伯来语词意思系“因怀住温情而火热，显出热烈嘅情感；……怜恤”。呢个词喺希腊语都有同样嘅意思，表示对其他人有怜悯之心。不过，圣经所讲嘅慈悲唔单止系一种深厚嘅温情，仲包括积极噉采取行动帮助对方。
11． 关于‘表现慈悲，我哋从好心嘅撒马利亚人嘅比喻学到乜嘢？
11 请读路加福音10:30-37。耶稣通过好心嘅撒马利亚人嘅比喻，生动噉描述咗表现慈悲系乜嘢意思。撒马利亚人同情、怜悯一个受苦嘅人，就采取积极嘅行动去帮助佢。讲完呢个比喻之后，耶稣就话：“你都去照样做喇。”所以，我哋都可以问吓自己：“我有冇照住做呢？我有冇效法好心嘅撒马利亚人？我有冇向受苦嘅人表现慈悲，积极采取行动帮助佢哋？例如，我可唔可以为寡妇、年长嘅同工或者父母唔系信徒嘅年轻人提供实际嘅帮助？我可唔可以主动‘安慰忧郁嘅人’？”（帖撒罗尼迦前书5:14；雅各书1:27）
我哋主动帮助其他人，大家都会感到快乐（请睇第12段）
12． 向人表现慈悲点样使我哋得到快乐？
12 表现慈悲点样使我哋得到快乐？我哋慈悲待人，就可以从施与得享喜乐。另外，我哋知道自己所做嘅会令耶和华嘅心欢喜，亦都会感到快乐。（使徒行传20:35；请读希伯来书13:16）大卫王谈及表现慈悲嘅人，话：“耶和华要守护佢，保全佢嘅生命。佢喺地上必称为有福嘅人。”（诗篇41:1,2）如果我哋向人表现慈悲同怜恤，耶和华亦都会慈悲对待我哋，赐俾我哋恒久嘅快乐。（雅各书2:13）
“心地纯洁嘅人”会快乐
13,14． 心地纯洁同快乐之间有乜嘢关系？
13 耶稣话：“心地纯洁嘅人有福嘞，因为佢哋会睇见上帝。”（马太福音5:8）我哋想心地纯洁，就要弃绝不洁嘅欲望，使思想保持洁净。如果我哋希望自己嘅崇拜可以得蒙耶和华悦纳，就必须噉样做。（请读哥林多后书4:2；提摩太前书1:5）
14 嗰啲心地纯洁嘅人会同耶和华享有亲密嘅关系。耶和华话：“洗净自己袍服嘅人几咁有福！”（启示录22:14）佢哋喺乜嘢意义上“洗净自己袍服”呢？受膏基督徒“洗净自己袍服”意味住，喺耶和华眼中，佢哋系洁净嘅。佢哋会得到不朽嘅生命，喺天上享有永恒嘅快乐。有希望喺地上生活嘅大群人，亦都被上帝视为正义嘅人，可以成为上帝嘅朋友。圣经话：“佢哋用绵羊羔嘅血将自己嘅袍洗洁白嘞。”（启示录7:9,13,14）
15,16． 心地纯洁嘅人可以点样睇见上帝？
15 既然“冇人睇见［上帝］，仲能够存活”，噉心地纯洁嘅人又点可以睇见上帝呢？（出埃及记33:20）译作“睇见”嘅希腊语词嘅意思系，“用头脑睇见、领悟、认识”。一个人确切认识上帝，而且欣赏上帝嘅美好特质，佢就会“心眼明亮”，喺比喻嘅意义上睇见上帝。（以弗所书1:18）耶稣完美噉反映出上帝嘅特质，所以佢话：“边个睇见我，就系睇见父亲。”（约翰福音14:7-9）
16 另外，我哋体验到上帝点样帮助我哋，就可以“睇见”上帝。（约伯记42:5）耶和华承诺会赐福俾嗰啲尽力保持纯洁，而且忠心为佢服务嘅人。“睇见”亦都意味住，我哋定睛注视将来嘅奇妙福分。当然，受膏基督徒复活之后会得到天上嘅奖赏。到时，佢哋就可以亲眼睇见上帝。（约翰一书3:2）
逆境之下保持快乐
17． 点解促进和睦嘅人会快乐？
17 耶稣又话：“促进和睦嘅人有福嘞”。（马太福音5:9）主动促进和睦嘅人可以得享快乐。耶稣嘅门徒雅各话：“正义嘅果实要喺和睦嘅情况下先能够撒种，而且系促进和睦嘅人先能够享有嘅。”（雅各书3:18）如果我哋好难同某个弟兄姊妹或者家人相处，我哋可以祈求上帝帮助我哋促进和睦。噉样，耶和华就会用佢嘅圣灵帮助我哋表现基督徒嘅美好特质，使我哋得享快乐。耶稣强调我哋要主动促进和睦，佢话：“你将礼物带到祭坛嘅时候，如果喺嗰度谂起有弟兄对你不满，就要将礼物留喺坛前，先去同弟兄讲和，返嚟再将礼物献上。”（马太福音5:23,24）
18,19． 点解基督徒受到迫害仍然保持喜乐？
18 “人因为我嘅缘故侮辱你哋，迫害你哋，用各种邪恶嘅话诬蔑你哋，你哋就有福嘞。”耶稣嘅呢番话系乜嘢意思呢？耶稣接住又话：“要欢喜雀跃，因为你哋喺天上嘅奖赏系大嘅。喺你哋之前嘅先知，人都系噉样迫害佢哋。”（马太福音5:11,12）使徒俾人拷打，又受到警告话唔可以传道，不过佢哋离开公议会嗰时，个个都“欢欢喜喜”。当然，佢哋感到喜乐，唔系因为钟意俾人鞭打，而系“因为有荣幸配得为［耶稣］嘅名受辱”。（使徒行传5:41）
19 当耶和华嘅现代子民为耶稣嘅名受苦，或者面对严峻嘅考验嗰时，都依然怀住喜乐保持忍耐。（请读雅各书1:2-4）我哋同使徒一样，遭受苦难同面对迫害嘅时候唔会感到开心。不过，只要我哋喺患难中对耶和华保持忠义，佢就会使我哋坚毅刚强，有力量忍耐落去。喺1944年8月，极权政府嘅官员将亨里克·多尔尼克同佢哥哥关入集中营。不过，呢啲官员话：“我哋根本冇办法说服佢哋做任何嘢。为咗信仰佢哋就算死都觉得开心。”多尔尼克弟兄解释话：“我唔想做殉道者，不过为咗对耶和华保持忠贞，我愿意怀住尊严，勇敢忍受逆境。噉样做使我得到喜乐。 ……我热切祷告亲近耶和华，佢的确信实可靠，俾我适时嘅帮助。”
20． 点解我哋事奉“快乐嘅上帝”就会感到快乐？
20 如果“快乐嘅上帝”耶和华悦纳我哋，噉我哋就算遭受宗教迫害、家人反对，面对疾病同衰老，都依然感到快乐。（提摩太前书1:11）耶和华系“冇可能讲大话嘅上帝”。我哋亦都因为深信佢各种奇妙嘅应许必然实现而满怀喜乐。（提多书1:2）当上帝嘅应许实现嗰时，我哋唔会再谂翻起任何面对过嘅难题。事实上，喺将临嘅乐园，耶和华所赐嘅福分一定超出我哋嘅想象，我哋一定会体验到前所未有嘅快乐。冇错，我哋一定会“大享平安，满心喜乐”。（诗篇37:11）
