弃绝世俗嘅思想
“你哋要小心，免得有人根据人嘅传统，根据世人嘅肤浅谂法，……用哲学同空虚骗人嘅话将你哋掳去。”——歌罗西书2:8
1． 使徒保罗喺信中向基督徒同工提出乜嘢劝告？（请睇吓课文开头嘅图片）
大约公元60至61年，使徒保罗喺罗马被囚嘅时候写信俾歌罗西会众。保罗同佢哋讲，有“属灵嘅悟性”系好重要嘅。（歌罗西书1:9）保罗进一步提出:“我讲呢啲话，系免得有人用花言巧语蒙骗你哋。……你哋要小心，免得有人根据人嘅传统，根据世人嘅肤浅谂法，唔以基督为依归，用哲学同空虚骗人嘅话将你哋掳去。”（歌罗西书2:4，8）保罗跟住解释，有啲大众嘅主流思想点解系错误嘅，呢啲思想点解对唔完美嘅人嚟讲可能好有吸引力。例如，世俗嘅思想可能会令人觉得自己好聪明同高人一等。呢封信嘅目的系帮助弟兄姊妹弃绝世俗嘅思想同错误嘅行为。（歌罗西书2:16，17，23）
2． 点解我哋要分析一啲世俗嘅谂法？
2 世俗嘅思想忽视或者贬低耶和华嘅标准，而且会逐渐削弱我哋对上帝嘅信心。今日，呢个世界充斥住世俗嘅思想，尤其喺电视、互联网、学校同工作嘅地方，我哋所有人都会受到影响。我哋可以点样避免俾呢啲思想腐化呢？呢篇课文会分析五种世俗嘅谂法，睇吓我哋要弃绝呢啲思想可以点样做。
我哋需唔需要信上帝？
3． 好多人有乜嘢谂法？点解？
3 “唔使信上帝我都可以做个好人。”喺好多国家，经常会听到有人话自己唔信上帝，认为自己系无神论者。佢哋可能冇认真谂过有冇上帝存在呢个问题，只系钟意自由自在噉做自己想做嘅嘢。（请读诗篇10:4）有啲人可能觉得自己好有智慧，佢哋会话:“我唔信上帝都可以有高尚嘅道德标准。”
4． 我哋可以点样同一个声称冇创造主嘅人推理？
4 认为创造主唔存在嘅呢种谂法系咪符合逻辑呢？有啲人想通过科学嚟确定到底有冇创造主，佢哋好容易会喺巨量嘅信息当中迷失方向。其实答案好简单。如果一间屋都需要有人建造，噉样，比房屋复杂得多嘅生物唔系更需要有一个创造者咩？事实上，连地球上最简单嘅活细胞都远远复杂过任何一间屋，因为活细胞可以做到任何房屋做唔到嘅嘢，就系自我复制。呢啲细胞会以某种方式将自我复制所需要嘅信息储存并传递俾一个新嘅细胞。呢啲活细胞嘅设计系点样嚟嘅呢？圣经话:“任何房屋都有人建造，但系建造万物嘅就系上帝。”（希伯来书3:4）
5． 对于人唔需要信上帝都可以自行判断善恶嘅呢种谂法，我哋可以点样推理？
5 关于人唔需要信上帝都可以自行判断善恶嘅呢种谂法，我哋可以点样推理？上帝嘅话语承认，唔信上帝嘅人可能都会有一啲好嘅原则。（罗马书2:14，15）例如，佢哋会尊重同爱自己嘅父母。但系，如果一个人否认是非标准系由仁爱嘅创造主制定嘅，噉佢道德标准嘅依据又有几可靠呢？（以赛亚书33:22）今日，好多人认真思考之后睇出，人类确实需要上帝嘅帮助先至可以解决地球嘅恶劣情况。（请读耶利米书10:23）所以我哋唔应该认为，人唔需要信上帝同埋服从上帝嘅标准，可以完全自行判断善恶。（诗篇146:3）
我哋需唔需要有信仰呢？
6． 好多人对宗教有乜嘢睇法？
6 “就算冇信仰你都可以好开心。”好多人都有呢种世俗嘅谂法，因为佢哋觉得宗教又枯燥又唔实际。而且，好多宗教鼓吹地狱永火嘅道理、强制性收取捐款或者怂恿人参政，令人同上帝疏远。难怪越来越多人觉得佢哋冇信仰都可以好快乐。噉样嘅人可能会话:“我有兴趣了解宗教，但唔想加入宗教团体。”
7． 正确嘅宗教点样帮助人得到真正嘅幸福快乐？
7 人冇信仰系咪真系会快乐呢？当然，一个人冇受到错误宗教嘅影响系可以好开心嘅，不过佢如果冇同“快乐嘅上帝”耶和华建立友谊，就唔能够得到真正嘅快乐。（提摩太前书1:11）上帝所做嘅每一件事都为咗使人得益。佢嘅仆人亦因为专注于帮助人而感到快乐。（使徒行传20:35）例如，请谂吓正确嘅崇拜可以点样促进家庭幸福。正确嘅宗教教导我哋要尊重同爱护配偶、重视婚誓、避免通奸、培养识得尊重他人嘅儿女，同埋要向家人表现真挚嘅爱。结果，正确嘅崇拜会使会众嘅人团结一致，享有一个快乐嘅国际弟兄团体。（请读以赛亚书65:13，14）
8． 我哋可以点样运用马太福音5:3同人推理真正令人快乐嘅原因系乜嘢？
8 人唔事奉上帝都可以得到真正嘅快乐，呢种世俗嘅谂法系咪啱嘅呢？试谂吓，人点解会觉得快乐？有啲人喺事业、运动、爱好方面得到满足感，而有啲人因为照顾家人或者帮助朋友而感到满足。虽然，呢啲嘢都可以令我哋好开心，但系我哋嘅人生有更崇高嘅目的，可以带俾我哋恒久嘅快乐。我哋同动物唔同。耶和华创造我哋嘅时候，使我哋可以通过认识佢同埋忠心事奉佢得到快乐。（请读马太福音5:3）例如，真基督徒一齐聚集起嚟崇拜耶和华会得到喜乐同受到鼓励。（诗篇133:1）佢哋仲可以享有一个团结嘅弟兄团体，过道德清白嘅生活，同埋有快乐嘅希望。
我哋需唔需要道德标准呢？
9． （甲）呢个世界嘅人普遍对性关系有乜嘢睇法？（乙）点解圣经禁止婚外性行为？
9 “点解要谴责婚外性行为？”有人可能会同我哋讲:“点解要谴责婚外性行为？人生在世就系要尽情享受。”有人话基督徒对不道德嘅性行为应该宽容啲，呢种谂法系错嘅。点解？因为圣经禁止淫乱。 *（请读帖撒罗尼迦前书4:3-8）耶和华系我哋嘅创造主，所以佢有权为我哋制定律法。按照上帝对婚姻安排所制定嘅律法，只有结为夫妇嘅一男一女先可以有性关系。上帝出于爱心赐律法俾我哋，希望我哋遵守而享有更好嘅生活。一个家庭如果按照上帝嘅律法去做，就会充满爱心、互相尊重、有安全感。上帝并唔会纵容嗰啲故意违反佢律法嘅人。（希伯来书13:4）
10． 我哋可以点样避免犯性不道德？
10 上帝嘅话语教导我哋点样避免犯性不道德。一个重要嘅方法就系约束双眼。耶稣讲过:“凡系注视妇女而动淫念嘅，心里面已经同佢通奸。如果你嘅右眼成为你嘅绊脚石，就挖出嚟揼咗佢。”（马太福音5:28，29）所以，我哋要避免睇色情资讯或者听内容唔道德嘅歌。使徒保罗写俾基督徒同工嘅信话:“要治死你哋喺地上嘅肢体，根绝淫乱”。（歌罗西书3:5）除此之外，我哋仲要控制自己嘅言谈同思想。（以弗所书5:3-5）
我哋应唔应该追求世俗嘅事业？
11． 点解世俗嘅事业咁有吸引力呢？
11 “事业有成系快乐嘅要诀。”好多人鼓励我哋以追求世俗嘅事业为人生目标。呢啲事业可能会使我哋得到地位、权力同财富。由于好多人将追求事业成功定为佢哋人生最重要嘅目标，基督徒可能都会受到影响，有同样嘅谂法。
12． 事业有成系咪得到快乐嘅要诀呢？
12 名成利就系咪真系可以令你得到恒久嘅快乐呢？唔系。要记住，撒但好想控制人，渴望人追捧佢。喺某方面嚟讲，佢已经得到想要嘅，但系佢并唔快乐，只系感到愤怒。（马太福音4:8，9；启示录12:12）比起通过帮助人认识上帝同埋有机会得享永生所带俾我哋嘅恒久喜乐，世俗事业嘅成功只可以俾到我哋短暂嘅满足感。另外，呢个世界嘅竞争精神俾人好大压力，使人想去超越其他人，造成妒忌。结果证明，噉样做只不过系“捕风”。（传道书4:4）
13． （甲）喺追求事业方面，我哋应该有乜嘢睇法？（乙）从保罗写俾帖撒罗尼迦会众嘅信可以睇出，乜嘢使佢得到真正嘅快乐？
13 我哋确实要维持生计，而且选择自己钟意嘅工作都唔系错嘅。但系，我哋唔应该将世俗工作当成系生活嘅重心。耶稣话:“一个人唔能够做两个主人嘅奴隶。佢唔系讨厌呢个，钟意嗰个，就系忠于呢个，轻视嗰个。你哋唔能够又做上帝嘅奴隶，又做财富嘅奴隶。”（马太福音6:24）如果我哋先专心事奉耶和华同教导人圣经，就会体验到无与伦比嘅喜乐。使徒保罗曾经有过噉样嘅经历。佢年轻嘅时候，一心想喺犹太教创出一番成就。不过，当后来保罗开始帮助人成为基督徒，见到佢哋点样响应上帝嘅信息而改变自己人生嗰阵，佢先至得到真正嘅快乐。（请读帖撒罗尼迦前书2:13，19，20）世上的确冇其他事业可以俾到我哋噉样嘅满足感。
帮助人从上帝嘅智慧得益，使我哋得到恒久嘅喜乐。（请睇第12，13段）
人类有冇能力解决自身嘅难题呢？
14． 点解话人类可以自行解决难题呢种谂法好吸引呢？
14 “人类有能力解决自己嘅难题。”点解呢种世俗嘅谂法对好多人嚟讲可能好吸引？因为如果真系噉嘅话，人就可以随心所欲做自己钟意嘅事，唔需要上帝嘅引导。人有能力解决自身难题呢种谂法似乎好有说服力，因为有啲报告显示，战争、罪行、疾病同贫穷都喺度逐渐减少。其中一份报告话:“人类决心要令世界变得更美好，所以人类嘅情况越来越好。”呢类报告系咪表明，人类已经揾到方法解决一直以来困扰住佢哋嘅难题呢？为咗揾出答案，等我哋嚟深入分析吓。
15． 乜嘢事实表明人类面对嘅难题好严重？
15 战争:两场世界大战夺去咗超过6000万人嘅生命。第二次世界大战结束以来，人类明显冇吸取教训避免战争。到2015年，因战争或者迫害而被迫离开家园嘅人数上升到大约6500万人。但只系2015年期间，被迫离开家园嘅人数就有1240万。罪行:虽然喺一啲地方某种类型嘅罪行已经减少咗，但其他类型嘅罪行，例如网络犯罪、家庭暴力同埋恐怖袭击就有惊人嘅增长。仲有，好多人都觉得全球嘅贪污腐败越来越严重。人类并唔能够消除罪行。疾病:有啲疾病已经揾到治疗嘅方法。但系一份2013年出版嘅报告指出，每年有高达900万未到60岁嘅人死于心脏病、中风、癌症、呼吸系统疾病同埋糖尿病。贫穷:世界银行嘅数据指出，单系喺非洲，生活极度贫困嘅人，数量从1990年嘅2亿8000万人增加到2012年嘅3亿3000万人。
16． （甲）点解只有上帝嘅王国先至可以解决人类嘅难题？（乙）以赛亚同诗篇执笔者预告上帝嘅王国会点样造福我哋？
16 目前嘅经济同政治制度由自私嘅势力所操纵。好明显，佢哋唔能够消除战争、罪行、疾病同贫穷，只有上帝嘅王国先至做得到。请谂吓耶和华将会为人类成就乜嘢事。战争:上帝嘅王国会将自私、腐败、爱国主义、错误宗教同撒但呢一切引发战争嘅根本原因通通消除。（诗篇46:8，9）罪行:上帝嘅王国已经教导数以百万计嘅人学识彼此相爱同互相信任，呢啲系其他政府都做唔到嘅。（以赛亚书11:9）疾病:耶和华会赐福俾佢嘅子民，使佢哋身心完美。（以赛亚书35:5，6）贫穷:耶和华会消除贫穷，使佢嘅子民喺属灵同物质上得到满足。呢种咁美好嘅生活比金钱财富远远有价值得多。（诗篇72:12，13）
“知道应该点样回答每个人”
17． 你可以点样弃绝世俗嘅思想呢？
17 如果你听到一个世俗嘅谂法，而呢个谂法可能会使你嘅信心受到考验，你可以查找相关嘅资料，睇吓圣经对呢个问题有乜嘢睇法，然后同一位成熟嘅弟兄姊妹一齐讨论吓。我哋要沉思一下:点解呢个谂法听起嚟似乎好合理？点解噉样嘅谂法系错嘅？为咗弃绝呢啲思想，我哋可以点样做？实际上，我哋每个人都可以通过保罗嘅劝告嚟帮助自己抵抗世俗嘅思想。保罗喺写俾歌罗西会众嘅信里面话:“你哋同教外嘅人来往，总要用智慧行事，……知道应该点样回答每个人。”（歌罗西书4:5，6）
