“同哭泣嘅人一齐哭泣”
“不断彼此安慰，互相强化”——帖撒罗尼迦前书5:11
唱诗121，75首
1，2． 我哋需要讨论一下点样安慰失去亲友嘅人。点解呢？（请睇吓课文开头嘅图片）
“我哋个仔死咗差唔多一年嘞，到而家，我哋嘅心仲系痛到好似俾刀㓤噉”，一个叫做苏西嘅姊妹噉样讲。一个弟兄嘅太太突然间去世，当时弟兄感受到“一种无办法形容嘅悲痛”。无奈嘅系，世上无数人都要经历生离死别嘅痛苦。好多弟兄姊妹可能都冇谂过，佢哋挚爱嘅亲友会喺哈米吉多顿之前去世。无论系你自己所爱嘅人去世，抑或系知道其他人失去亲友，你都可能会问:“嗰啲伤心嘅人点先可以得到帮助，嚟医治佢哋内心嘅伤痛？”
2 可能你听过有句话讲，“时间系医治一切创伤嘅良药”。但系，破碎嘅心系咪真系只靠时间就医得到呢？一个寡妇话:“我觉得呢句话更准确嚟讲应该系，一个人有冇得到医治，取决于佢点样运用自己嘅时间。”冇错，同身体所受嘅伤一样，感情上嘅伤痛如果得到悉心嘅照顾，随住时间过去可能会慢慢好翻。有咩实际嘅方法可以帮助失去亲友嘅人医治佢哋感情上嘅创伤？
耶和华——“赐一切安慰嘅上帝”
3，4． 点解我哋可以确信，耶和华明白悲伤嘅人需要安慰？
3 毫无疑问，我哋充满怜悯之心嘅天父耶和华系安慰嘅主要来源。（请读哥林多后书1:3，4）耶和华系表现体恤嘅最好榜样，佢向佢嘅子民保证:“我就系安慰你哋嘅上帝。”（以赛亚书51:12；诗篇119:50，52，76）
4 我哋慈悲嘅天父都失去过心爱嘅人，例如亚伯拉罕、以撒、雅各、摩西同大卫王。（民数记12:6-8；马太福音22:31，32；使徒行传13:22）圣经向我哋保证，耶和华定意将来要复活佢嘅忠仆，佢一直热切等待呢个日子嘅到来。（约伯记14:14，15）到时，呢啲忠仆会充满活力，满心喜乐。另外，耶和华深深“宠爱”嘅儿子受尽折磨而死。（箴言8:22，30）耶和华当时肯定忍受咗难以形容嘅悲痛。（约翰福音5:20；10:17）
5，6． 耶和华点样安慰我哋？
5 我哋可以有坚定嘅信心，相信耶和华一定会帮助我哋。所以，我哋应该向耶和华倾心吐意，喺祷告里面将自己内心嘅悲痛毫无保留噉话俾佢知。知道耶和华理解我哋嘅痛苦，而且喺我哋最需要嘅时候提供帮助，真系令我哋深感安慰！佢会点样做呢？
6 上帝帮助我哋嘅其中一个方法就系，用“圣灵安慰”我哋。（使徒行传9:31）上帝发出嘅动力系强大嘅安慰来源。耶稣承诺，天父耶和华一定会乐意“将圣灵赐俾恳求佢嘅人”。（路加福音11:13）文章之前提到嘅苏西话:“我同先生好多次都跪喺地上恳切祈求耶和华安慰我哋。每一次，上帝都真系赐平安保护我哋嘅内心同头脑。”（请读腓立比书4:6，7）
耶稣——有体恤之心嘅大祭司
7，8． 点解我哋可以确信，耶稣一定会提供安慰？
7 耶稣富有同情心，佢喺地上所讲所做嘅，十全十美噉反映出耶和华对人嗰份亲切嘅怜恤之情。（约翰福音5:19）耶稣被派嚟安慰嗰啲“心灵破碎嘅人”同“所有哀恸嘅人”。（以赛亚书61:1，2；路加福音4:17-21）圣经描述佢满怀体恤之心，深切体会到人类嘅痛苦，而且好渴望减轻佢哋嘅苦楚。（希伯来书2:17）
8 耶稣年轻嘅时候，肯定面对过家人同朋友嘅死亡。睇嚟养父约瑟去世嗰阵时，耶稣仲系个年轻人。 * 可能喺十几二十岁嗰时，心地善良嘅耶稣除咗要面对丧父之痛，仲要去安慰妈妈同细佬妹。
9． 拉撒路去世嗰时，耶稣点样表现出体恤之心？
9 耶稣一开始佢嘅传道工作，就已经好识得体恤人，而且有出色嘅洞察力。我哋就以耶稣嘅好朋友拉撒路嘅死为例。虽然耶稣将会复活拉撒路，不过佢仲系体恤马利亚同马大嘅嗰种哀痛。佢深深感受到呢种心如刀割嘅悲痛，忍唔住流出眼泪。（约翰福音11:33-36）
10． 点解我哋可以确信耶稣怜恤今日嘅世人？
10 耶稣讲嘅话充满怜恤同安慰，喺今日点样帮助到我哋？经文保证话，“耶稣基督昨天、今天、永永远远，始终如一”。（希伯来书13:8）因为呢位“领人得生命嘅领袖”亲身体会过人类生离死别嘅悲痛，所以“而家就能够扶助受考验嘅人”。（使徒行传3:15；希伯来书2:10，18）因为噉，我哋可以深信，耶稣一直以来都感受到人类嘅哀痛，明白佢哋嘅悲伤，佢会继续俾佢哋“合时嘅”安慰。（请读希伯来书4:15，16）
“圣经所带嚟嘅安慰”
11． 边啲经文特别令你感到安慰？
11 上帝嘅话语当中有无数安慰人嘅经文，耶稣因拉撒路死亡而悲伤嘅记载只系其中一个例子。唔怪得经文话，“从前写落嚟嘅话，全部都系为咗教导我哋而写嘅，等我哋靠住忍耐，靠住圣经所带嚟嘅安慰，可以怀有希望。”（罗马书15:4）如果你因为失去亲友而感到悲伤，你都可以从以下嘅经文得到安慰:
-
“耶和华亲近心碎嘅人，拯救心灵伤痛嘅人。”——诗篇34:18，19
-
“每当我心里多忧多虑，你都安慰我，使我安心。”——诗篇94:19
-
“上帝爱我哋，又凭住分外恩典，赐俾我哋恒久嘅安慰同美好嘅希望。愿我哋嘅父上帝同我哋嘅主耶稣基督，安慰你哋嘅心，使你哋……坚定不移。”——帖撒罗尼迦后书2:16，17 *
会众——安慰嘅另一个来源
12． 我哋安慰其他人嘅一个重要方式系乜嘢？
12 对嗰啲感到悲伤嘅人嚟讲，另一个安慰嘅来源系基督徒会众。（请读帖撒罗尼迦前书5:11）你可以点样强化、安慰嗰啲“黯然神伤”嘅人？（箴言17:22）要记住，“有静默嘅时候，有讲话嘅时候”。（传道书3:7）一个叫达琳嘅寡妇话:“人失去亲友嗰时，好需要将自己嘅谂法同感受讲出嚟。所以，你最帮到佢哋嘅就系用心聆听，唔好打断佢哋嘅话。”尤尼亚嘅哥哥自杀死咗，佢话:“可能你无办法完全理解佢哋嘅悲痛，但重要嘅系你好想明白佢哋嘅感受。”
13． 对于每个人表达悲伤嘅方式，我哋要记得乜嘢？
13 要记得，每个人嘅感受同表达悲伤嘅方式都系唔一样嘅。有时，只有当事人先体会到内心嘅悲痛到底有几深，可能对佢嚟讲，好难用言语将自己内心真正嘅感受表达出嚟。圣经话:“自己愁苦，唯有心里知晓；自己欢喜，外人无法分享。”（箴言14:10）就算佢可以讲出自己嘅感受，但系其他人唔一定可以明白佢想表达嘅意思。
14． 我哋可以点样安慰嗰啲失去亲友嘅人？
14 我哋对嗰啲失去亲友嘅人唔知讲咩好，系可以理解嘅。不过，圣经话“明智人嘅舌就如良药”。（箴言12:18）好多人都喺《痛失亲者》 *呢本册子入面，揾到一啲建议，知道点样安慰佢哋。好多时，最好嘅做法就系“同哭泣嘅人一齐哭泣。”（罗马书12:15）“眼泪已经成为我表达内心情感嘅语言。”失去丈夫嘅嘉贝噉样讲，“所以当朋友同我一齐喊嘅时候，喺嗰一刻我就冇咁孤独喇。”
15． 如果觉得好难面对面去安慰人嘅话，我哋可以点做？（请参考附栏“ 令人安慰嘅言词”）
15 如果你觉得面对面嘅时候唔知讲咩好，或者你可以写慰问卡、发电子邮件、发短信或者写信俾佢哋。你可以简单引用一节令人安慰嘅经文，提及死者嘅一啲美好特质，或者分享你珍惜嘅快乐回忆。“收到弟兄姊妹一条鼓励嘅短信，或者受邀请去参加一个交往，我就已经得到好大嘅安慰，”尤尼亚话，“佢哋噉样做使我知道大家都好关心我，好爱我。”
16． 提供安慰嘅一个有效方法系乜嘢？
16 同失去亲者嘅人一齐祷告，而且为佢祷告，千祈唔好低估噉样做嘅价值。喺呢种情绪咁唔稳定嘅情况下，可能你会觉得好难通过祷告嚟表达自己嘅谂法。但只要你流露出真实嘅情感，就算流住眼泪为佢恳切祈求，都一定可以舒解佢嘅悲痛。“有时啲姊妹嚟安慰我，”达琳回忆话，“我会请佢哋为我作个祷告。佢哋祷告嗰时，通常一开始都唔知讲啲咩好。不过每次讲吓讲吓，佢哋嘅语气就自然咗好多，讲出最由衷嘅祷告。佢哋坚强嘅信心，佢哋嘅爱同关怀，使我信心大增。”
继续提供安慰
17-19． 点解我哋要继续提供安慰？
17 每个失去亲友嘅人经历悲痛嘅过程都好唔一样。一般嚟讲，最初嗰几日好多亲戚朋友都会去探访慰问佢哋，不过大多数人都唔能够继续留喺佢哋身边。所以，之后我哋都应该拨出时间，继续提供安慰。“真朋友时刻显出爱心，好似兄弟为共患难而生。”（箴言17:17）无论一个人要用几长时间去平服悲痛嘅心情，基督徒同工都可以成为佢哋长久嘅安慰来源。（请读帖撒罗尼迦前书3:7）
18 周年纪念日、某啲音乐、相片、活动或者甚至一种特别嘅气味、声音、季节都可能会触发失去亲友嘅人一阵阵嘅心痛。一个人失去配偶之后，一开始要单独做某件事嗰时可能会觉得好难过，例如参加大会或者耶稣受难纪念聚会。“本来我谂住太太去世之后嘅第一个结婚纪念日我会非常难过，”一个弟兄话，“的确好唔容易。不过，有几个弟兄姊妹安排咗个小交往，邀请几个我最好嘅朋友一齐参加，令我唔使咁孤独。”
19 我哋要记得，失去亲友嘅人唔系只有特别嘅日子先需要鼓励。“通常，就算唔系特别嘅日子，得到帮助同陪伴都系好有用嘅，”尤尼亚解释话，“呢啲咁宝贵又令人惊喜嘅时刻，俾到我好大嘅安慰。”当然，我哋唔可能为佢哋完全消除悲痛，或者填补心灵上嘅空虚，不过我哋通过实际嘅行动去帮助嗰啲失去亲友嘅人，可以喺一定程度上为佢哋带嚟安慰。（约翰一书3:18）嘉贝回忆话:“我非常感激耶和华，因为仁爱嘅长老陪我走过艰难嘅每一步。我真系感受到耶和华用佢嘅双手慈爱噉揽实我。”
20． 点解耶和华嘅应许系一个好大嘅安慰来源？
20 当“所有喺纪念墓入面嘅人……听见［基督］嘅声音，就出嚟”嘅时候，一切嘅哀伤都会被消除，我哋会得享永久嘅安慰！（约翰福音5:28，29）耶和华的确系赐一切安慰嘅上帝！佢应许“一定会永远吞灭死亡。至高主宰耶和华要擦去所有人面上嘅眼泪”。（以赛亚书25:8）将来，我哋唔再需要“同哭泣嘅人一齐哭泣”，因为到时，地上所有人都会“同欢乐嘅人一齐欢乐”。（罗马书12:15）
^ 8段 圣经最后一次提到约瑟，系耶稣12岁嗰时。当耶稣施行佢第一个奇迹，将水变成酒嘅时候，圣经冇提到约瑟在场，之后嘅记载亦都冇再提到约瑟。后来耶稣俾人钉喺苦刑柱上，佢将妈妈马利亚交托俾使徒约翰照顾。如果当时约瑟仲在生，耶稣就好可能唔会噉做。（约翰福音19:26，27）
^ 11段 仲可以参考，诗篇20:1，2；31:7；38:8，9，15；55:22；121:1，2；以赛亚书57:15；66:13；腓立比书4:13；彼得前书5:7。好多人都从呢啲嘅经文得到安慰。
^ 14段 请参考《守望台》2010年11月1日刊“效法耶稣，安慰丧亲的人”。
