边种爱带嚟真正嘅快乐？
“有耶和华作为上帝，噉样嘅人先算有福！”——诗篇144:15
1． 点解话我哋而家生活喺一段特别嘅时期？
而家我哋生活喺人类历史中一段特别嘅时期。就好似圣经所预言，耶和华正召集紧“一大群人……系从所有国族、部族、民族、语言嚟嘅”。呢啲人嘅数目超过800万，佢哋成为一个“强盛”嘅国族，“昼夜喺［上帝］嘅圣殿里面敬奉佢”。（启示录7:9，15；以赛亚书60:22）从来都未试过有咁多人爱上帝同爱弟兄姊妹。
2． 一啲唔爱上帝嘅人表现出点样嘅爱？（请睇吓课文开头嘅图片）
2 不过圣经预言到，今日一啲唔爱上帝嘅人会表现出一种被扭曲嘅爱，呢种爱反映出自私嘅态度。使徒保罗写道:“到咗最后嘅日子……人必专爱自己，贪爱钱财……爱享乐唔爱上帝”。（提摩太后书3:1-4）呢种以自我为中心嘅爱同基督徒所表现嘅爱完全相反。人以为追求自私嘅目标就能得到真正嘅快乐，但系噉样嘅爱反而令呢个世界充满“难以应付”嘅情况。
3． 呢篇课文会分析乜嘢？点解？
3 保罗知道呢种自私嘅爱会传染人，会危害基督徒嘅属灵健康。所以，佢警告基督徒要“避开”嗰啲表现错误嘅爱嘅人。（提摩太后书3:5）不过，我哋唔能够完全避免同呢啲人接触。噉我哋可以点样保护自己免受呢种世俗态度所影响，从而取悦我哋充满爱心嘅耶和华上帝呢？我哋比较一下上帝嘅爱同提摩太后书3:2-4所描述嘅爱有乜嘢分别，就可以帮助我哋衡量，自己有冇表现出真正使人满足同快乐嘅爱。
爱上帝抑或爱自己？
4． 点解适当噉爱自己系冇错嘅？
4 保罗话:“人必专爱自己”。噉系咪话爱自己系错嘅呢？唔系。爱自己系正常亦都需要嘅，因为耶和华将我哋设计成噉样。耶稣话:“要爱人如己”。（马可福音12:31）如果我哋唔爱自己，就唔会爱其他人。另一节经文话:“丈夫应该爱妻子，就好似爱自己嘅身体 噉。爱妻子就系爱自己 嘞。从来冇人恨恶自己嘅身体，只会喂养爱护”。（以弗所书5:28，29）所以，适当噉爱自己系冇错嘅。
5． 你会点样形容嗰啲专爱自己嘅人？
5 提摩太后书3:2提到专爱自己。呢种爱唔系一种正常、健康嘅爱，而系一种自私、被扭曲嘅爱。一个专爱自己嘅人会自视过高。（请读罗马书12:3）佢哋最关心嘅就系自己，而好少去关心其他人。出现问题嘅时候，佢哋往往会推卸责任。一个圣经评注讲到嗰啲专爱自己嘅人就好似一只“刺猬……佢会卷成一个球噉，用自己柔软嘅毛嚟取暖……但系佢嘅尖刺就会对住人。”呢啲以自我为中心嘅人唔会得到真正嘅快乐。
6． 我哋爱上帝会得到乜嘢好结果？
6 有啲圣经学者认为，保罗之所以先提出专爱自己，系因为呢种态度会引致之后佢所提到嘅其他态度。不过，爱上帝嘅人会结出好唔同嘅果实。圣经将爱上帝同“喜乐、和平、耐心、仁慈、良善、信心、温和、自制”呢啲特质联系埋一齐。（加拉太书5:22，23）诗篇执笔者话，“有耶和华作为上帝，噉样嘅人先算有福！”（诗篇144:15）耶和华系快乐嘅上帝，佢嘅子民都反映出呢种特质。另外，专爱自己嘅人只系会谂自己可以得到乜嘢，而耶和华嘅仆人就好乐意为其他人付出，所以佢哋好快乐。（使徒行传20:35）
我哋可以点样避免成为专爱自己嘅人？（请睇第7段）
7． 有乜嘢问题可以帮助我哋分析自己对上帝嘅爱？
7 一个人点样知道佢系咪爱自己过于爱上帝？请考虑吓腓立比书2:3，4嘅劝告:“凡事都唔好好辩争胜，唔好自命不凡，要谦卑，睇其他人比自己优越。各人唔好只系顾住自己嘅事，亦要顾及其他人嘅事。”我哋可以问吓自己:“我有冇喺生活上听从呢个劝告？我系咪尽力遵行上帝嘅旨意？我有冇主动帮助弟兄姊妹同其他人？”为其他人付出有时唔容易，因为付出系需要不断努力同自我牺牲。但系噉做能够得到宇宙至高统治者嘅认可，有乜嘢可以比呢个更能够使我哋快乐呢？
8． 对上帝嘅爱推动一啲人点样做？
8 由于爱上帝，一啲基督徒甘愿放弃高薪嘅职业，想为耶和华作更多服务。住喺美国嘅埃丽卡系一个医生，佢冇喺医学方面追求更大嘅成就，而系选择做正规先驱，佢同丈夫曾经去过几个国家服务。谂翻转头，佢话:“我哋喺外语地区帮手，有好多美好嘅经历，亦都结识咗好多朋友。我哋嘅生活变得多姿多彩。我依然系一个医生，但系而家我将大部分嘅时间同精力用嚟教导人认识耶和华同帮助弟兄姊妹，呢个使我嘅内心得到真正嘅喜乐同满足。”
天上嘅财宝定系地上嘅财宝？
9． 点解贪爱钱财嘅人唔会真正快乐？
9 保罗话人会“贪爱钱财”。若干年前，爱尔兰一位先驱同一个男子谈及上帝。呢个男子拎出佢嘅银包，攞住啲钱，举高，跟住话:“呢个就系我嘅上帝！”虽然好多人都唔承认自己爱金钱同嗰啲用钱买得到嘅嘢，但系佢哋对钱财嘅睇法同呢个男子一样。圣经警告话:“贪爱银子嘅人，有咗银子亦唔会满足；贪爱钱财嘅人，收入再多都唔会知足。”（传道书5:10）呢啲人总系想要更多钱，佢哋不断追求财富，结果将自己刺得“遍体鳞伤”。（提摩太前书6:9，10）
10． 关于富有同贫穷，圣经提到乜嘢？
10 当然，我哋人人都需要钱。因为钱可以喺某程度上保护人。（传道书7:12）但系一个人只系满足到生活嘅基本需要，佢会唔会真正快乐呢？绝对会！（请读传道书5:12）雅基嘅儿子亚古珥话:“求你使我既唔贫穷亦唔富有，等我可以开怀食分俾我嘅食物”。我哋好明白点解佢话唔想贫穷。佢继续解释话，佢担心由于贫穷就受引诱去偷窃，结果羞辱耶和华嘅名。但系点解佢唔祈求上帝使佢富有呢？佢话:“免得我饱足之后就唔认你，话:‘耶和华系边个？’”（箴言30:8，9）你可能会谂到有啲人信赖自己嘅财富过于信赖上帝。
11． 关于金钱，耶稣提出乜嘢劝告？
11 一个爱金钱嘅人唔能够取悦耶和华。耶稣话:“一个人唔能够做两个主人嘅奴隶。佢唔系讨厌呢个，钟意嗰个，就系忠于呢个，轻视嗰个。你哋唔能够又做上帝嘅奴隶，又做财富嘅奴隶。”佢讲呢句之前亦都话:“你哋唔好再为自己喺地上积存财宝，地上有蛾蛀，有锈蚀，亦都有贼挖洞嚟偷。你哋要为自己喺天上积存财宝，天上冇蛾蛀，冇锈蚀，亦都冇贼挖洞嚟偷。”（马太福音6:19，20，24）
12． 过简朴嘅生活点样使我哋更好噉为耶和华服务？请举例。
12 好多人都发现，过简朴嘅生活使佢哋更加开心，亦都使佢哋有更多时间为耶和华服务。住喺美国嘅杰克卖咗间大屋同佢盘生意，因为佢知道自己噉样做先能够同太太一齐做先驱。佢话:“我觉得真系好难去放弃一间咁靓嘅屋同喺郊区嘅物业，不过以往咁多年来，我返到屋企一谂到工作上嘅难题就觉得好烦。而我太太系一位正规先驱，佢就成日都好开心。佢同我讲，‘我嘅老板系最好嘅！’而家我都系一位先驱，我哋两个一齐为同一个老板工作，佢就系耶和华。”
我哋可以点样避免成为贪爱钱财嘅人？（请睇第13段）
13． 我哋点样知道自己对金钱嘅真正睇法？
13 如果想知道自己对金钱嘅真正睇法，就需要诚实噉问吓自己:“圣经提到关于金钱方面嘅原则，我系咪真系相信而且应用出嚟？揾钱系咪我一生中最重要嘅事？我重视物质多啲，定系重视同耶和华、同其他人嘅关系多啲？我系咪真系相信耶和华会照顾我？”我哋可以肯定上帝唔会令信赖佢嘅人失望。（马太福音6:33）
爱耶和华抑或爱享乐？
14． 对享乐有平衡嘅观点系乜嘢意思？
14 圣经预言，今日好多人会“爱享乐”。我哋会以平衡、合理嘅观点睇自己同金钱。同样，我哋亦都需要以平衡嘅观点睇享乐。耶和华唔系想我哋做一个苦行者，或者避开一啲使人快乐又有益嘅活动。圣经鼓励上帝嘅忠仆话:“你即管欢欢乐乐噉食嘢，开开心心噉饮酒，因为上帝已经悦纳你所做嘅事。”（传道书9:7）
15． “爱享乐”系乜嘢意思？
15 提摩太后书3:4提到追求享乐嘅人会弃绝上帝。请留意，经文唔系话人爱享乐多过 爱上帝，因为呢种讲法表明人多少都仲系爱上帝嘅。经文话佢哋“唔爱 上帝”。一位学者解释:“经文绝对唔系话佢哋仍然对上帝有某种程度嘅爱，而系话佢哋完全唔爱上帝。”对于嗰啲爱享乐嘅人嚟讲，呢个系好严厉嘅警告！圣经形容“爱享乐”嘅人就好似俾“享乐掳去”一样。（路加福音8:14）
16，17． 喺享乐方面，耶稣立下咗乜嘢榜样？
16 耶稣喺享乐方面有平衡嘅观点。佢参加过一个“婚宴”同一个“盛宴”。（约翰福音2:1-10；路加福音5:29）喺婚宴现场，由于冇足够嘅酒供应，耶稣就施行奇迹将水变成酒。喺另一个场合，有啲自以为义嘅人批评耶稣贪食好酒，不过耶稣清楚表明呢啲人并冇平衡嘅观点。（路加福音7:33-36）
17 不过，耶稣并冇将享乐视为佢一生中最重要嘅事。佢将耶和华放喺首位，亦都毫无保留噉为其他人服务。为咗拯救人类，佢甘愿喺苦刑柱上痛苦死去。耶稣提到跟从佢嘅人话:“人因为我嘅缘故，侮辱你哋，迫害你哋，用各种邪恶嘅话诬蔑你哋，你哋就有福嘞。要欢喜雀跃，因为你哋喺天上嘅奖赏系大嘅。喺你哋之前嘅先知，人都系噉样迫害佢哋。”（马太福音5:11，12）
我哋可以点样避免成为爱享乐嘅人？（请睇第18段）
18． 有边啲问题可以帮助我哋分析自己爱享乐到乜嘢程度？
18 我哋可以点样分析自己爱享乐到乜嘢程度？我哋可以问吓自己:“对我嚟讲，娱乐系咪比聚会同传道更重要？为咗事奉耶和华，我愿唔愿意牺牲一啲自己钟意嘅娱乐？喺选择娱乐活动嘅时候，我有冇考虑耶和华嘅观点？”如果我哋真系爱上帝，就会尽力避开一啲肯定或者有可能令佢不悦嘅事。（请读马太福音22:37，38）
快乐之道
19． 边啲人唔会有真正嘅快乐？
19 人类已经经历咗六千年嘅苦难，而撒但嘅世界好快就会结束。今日地球到处都系专爱自己、贪爱钱财同爱享乐嘅人。呢啲人只会谂佢哋想得到嘅嘢，将自己嘅欲望睇得比乜嘢都重要。噉样嘅人永远都唔会有真正嘅快乐。不过，正如诗篇执笔者所讲:“边个倚靠雅各嘅上帝帮助，又仰望耶和华佢嘅上帝，边个就有福嘞！”（诗篇146:5）
20． 爱上帝点样使你快乐？
20 耶和华嘅子民当中洋溢住对佢嘅爱，而且我哋人数每年都有增无减。呢个证明上帝嘅王国正施行统治，好快就会为我哋带嚟难以置信嘅福分。如果想得到长久、真正嘅快乐，我哋就要遵行上帝嘅旨意，取悦最伟大嘅耶和华。爱耶和华嘅人会永远快乐！喺下一篇课文，我哋会讨论自私嘅爱所引发嘅不良态度同特质，跟住会比较呢个同耶和华嘅仆人所表现嘅特质有乜嘢分别。
