第2章
上帝嘅王國喺天上誕生
1,2． （甲）世界歷史上發生咗乜嘢前所未有嘅重大事件？（乙）人睇唔到呢件大事發生，點解係好平常嘅呢？
你有冇諗過，生活喺歷史上一個重大嘅轉折時期係點嘅呢？唔少人都曾經諗過。就算你真係生活喺噉樣嘅時期，又有冇機會親眼睇到，嗰啲促成世界改變嘅重大事件呢？可能未必。歷史記載咗好多改朝換代、政權更替嘅内容，但係促成呢啲改變嘅事件，往往都係喺幕後策劃嘅。換言之，歷史上好多事都發生喺宮廷、密室、政府機關等等呢啲唔係一般人可以隨便出入嘅地方，呢啲事好多人都唔知道，但係就會影響到千萬人嘅生活。
2 噉世界歷史上發生咗一件前所未有嘅重大事件，你又知唔知呢？呢件大事係人睇唔到嘅，不過就會影響到千萬人嘅生活。係乜嘢大事呢？就係上帝嘅王國喺天上誕生咗。呢個王國係上帝喺好耐之前就應許嘅彌賽亞政府，好快就會將撒但世界嘅整個制度徹底毁滅。（請讀但以理書2:34,35,44,45）既然人睇唔到上帝王國嘅誕生，噉係咪話，耶和華唔想俾人知道呢件事呢？定係佢喺事前已經幫助佢嘅忠貞子民做好準備，迎接上帝王國嘅誕生呢？等我哋嚟睇吓。
“我要差我嘅使者出去，佢會喺我面前修直道路”
3-5． （甲）瑪拉基書3:1提到嘅“立約使者”係邊個？（乙）“立約使者”嚟視察聖殿之前，有乜嘢事發生？
3 耶和華喺古代就定意佢嘅子民做好準備，迎接彌賽亞王國嘅誕生。點解噉講？請睇吓瑪拉基書3:1嘅預言：“睇吓！我要差我嘅使者出去，佢會喺我面前修直道路。你哋所尋求嘅主宰必會忽然嚟到自己嘅殿，你哋所喜愛嘅立約使者亦會一齊嚟。”
4 喺現代，至高主宰耶和華幾時嚟視察喺屬靈聖殿地上院子裏面敬奉佢嘅人呢？瑪拉基嘅預言指出，耶和華會同“立約使者”一齊嚟。呢位“立約使者”係邊個呢？就係上帝應許嘅彌賽亞君王耶穌基督。（路加福音1:68-73）佢登基作王之後，就嚟視察同埋熬煉上帝喺地上嘅子民。（彼得前書4:17）
5 瑪拉基書3:1一開始提到嘅“使者”又係邊個呢？喺彌賽亞君王臨在之前，呢位使者所預表嘅人早就已經出現咗。1914年之前幾十年，有冇人喺彌賽亞君王面前“修直道路”呢？
6． 瑪拉基預告有一位“使者”會先嚟幫上帝嘅子民做好準備，應付前頭要發生嘅事。呢位“使者”指嘅係邊啲人？
6 呢本書講述耶和華嘅子民振奮人心嘅現代歷史。我哋回顧呢段歷史，就可以揾到以上問題嘅答案。19世紀嘅下半世紀，有名無實嘅基督徒為數衆多。但有一小群人忠於上帝，佢哋所做嘅事表明自己係唯一嘅一群真基督徒。呢群人後來叫做聖經研究者，當中帶頭嘅係查爾斯·羅素同佢嘅同工。呢啲帶頭嘅弟兄就好似瑪拉基預告嘅“使者”，為上帝嘅子民提供屬靈嘅指引，幫助佢哋做好準備，應付前頭要發生嘅事。下文會講吓，瑪拉基預告嘅“使者”喺四方面幫助上帝嘅子民準備妥當。
按真理崇拜上帝
7,8． （甲）喺19世紀，邊啲人開始揭露靈魂不死嘅教義係錯誤嘅呢？（乙）羅素同佢嘅同工仲揭露咗邊啲錯誤嘅道理？
7 聖經研究者努力研讀聖經，禱告求上帝指引；佢哋辨明聖經嘅真理，得出一致嘅結論，就記錄落嚟，然後出版。千百年來，一般教會一直處於屬靈嘅黑暗當中，佢哋嘅主張大部分都源自異教。一個典型嘅例子就係靈魂不死嘅教義。到咗19世紀，經過仔細查考，幾個誠心研究聖經嘅人睇出靈魂不死嘅教義冇聖經根據。亨利·格魯、喬治·斯特森同埋喬治·斯托爾斯都寫咗好多文章，亦都發表過一啲演講，大膽揭露靈魂不死嘅教義係撒但所講嘅大話！ a佢哋嘅研究對羅素同佢嘅同工産生咗深遠嘅影響。
8 呢一小群聖經研究者發現，同靈魂不死有關嘅其他教義，例如話好人上天堂，壞人落地獄；上帝用地獄永火嚟折磨壞人嘅呢啲講法，唔單止好難理解，而且係錯誤嘅。羅素同佢嘅同工通過文章、傳單、書本、小册子同埋喺報章上面發表嘅傳道演講，大膽噉揭穿呢啲謊言。
9． 關於三位一體嘅教義，《錫安嘅守望台》點樣講？
9 聖經研究者仲指出，一般教會所推崇嘅三位一體教義，唔係以聖經為依據嘅。1887年，英語版《錫安嘅守望台》話：“聖經清楚表明，耶和華同我哋嘅主耶穌唔係同一個個體，佢哋各自存在。聖經亦都明確噉指出耶和華同耶穌係乜嘢關係。”文章接住講：“三一神論（意思係一神共有三位、三位共為一神）竟然備受推崇，而且廣為大衆接納，真係不可思議。呢一切表明乜嘢呢？表明教會瞓得好淰，連自己俾仇敵用錯誤主張，好似鎖鏈噉鎖住，都完全唔知道。”
10． 點解《守望台》話1914年係個重要嘅年份？
10 通過雜誌嘅全名《錫安嘅守望台與基督臨在嘅先聲》可以睇出，呢本雜誌着重講有關基督臨在嘅預言。編寫文章嘅忠心受膏基督徒睇出，但以理預告嘅“七期”，係同上帝將會喺咩時候實現佢對彌賽亞王國所定嘅旨意有關嘅。喺19世紀70年代，佢哋早就已經指出“七期”會喺1914年結束。（但以理書4:25；路加福音21:24）嗰時，我哋嘅弟兄雖然未完全明白呢個重要年份嘅意義，但依然將自己所知道嘅聖經真理廣傳開去，對後來嘅人影響深遠。
11,12． （甲）羅素弟兄對聖經真理有清晰嘅了解，佢將功勞歸俾邊個？（乙）1914年之前幾十年，羅素弟兄同佢嘅同工所成就嘅事有幾重要？
11 羅素同呢啲忠心嘅同工一齊鑽研聖經，發現咗上面提到嘅重要真理，而且對呢啲真理有清晰嘅了解，但係佢哋從來都冇將功勞歸俾自己。羅素將功勞歸俾嗰啲喺佢之前尋求真理嘅人。最重要嘅係，佢將功勞歸俾耶和華上帝，因為上帝知道應該喺乜嘢時候，將佢子民需要認識嘅真理教導佢哋。羅素同佢嘅同工努力將真理同謬誤區分開嚟，顯然得到耶和華嘅賜福。隨住時間過去，佢哋同一般教會嘅差異越來越明顯。
羅素弟兄同佢嘅同工捍衛聖經真理
12 1914年之前嘅幾十年，呢啲忠心嘅男子一直努力捍衛真理，佢哋所成就嘅事，真係令人欽佩。回顧以往，英語版《守望台與基督臨在嘅先聲》1917年11月1日刊話：“好多人因為相信地獄永火同埋其他錯誤嘅道理，覺得好驚，而家佢哋已經擺脱咗恐懼嘞。……四十幾年前，真理好似潮水噉不斷上漲，越漲越高，直到彌漫全地。反對者企圖阻止真理傳遍大地，就好似用掃把將湧過嚟嘅海浪掃翻落大海噉，簡直就係白費心機！”
13,14． （甲）瑪拉基預告嘅“使者”點樣為彌賽亞王國嘅君王修直道路？（乙）從呢啲生活喺百幾年之前嘅弟兄身上，我哋學到乜嘢呢？
13 請諗一下：喺上帝嘅子民當中，有啲人連耶穌同佢天父耶和華嘅身份都分唔清；有啲人以為不死嘅生命係所有人自然就會得到嘅，而唔係上帝賜俾少數受膏基督徒嘅寶貴禮物；有啲人相信上帝用地獄永火嚟折磨人，落入地獄嘅人永遠都得唔到解脱。如果上帝嘅子民繼續俾呢啲錯誤嘅道理蒙蔽，到咗基督開始臨在嗰時又點可以做好準備呢？當然冇可能。瑪拉基預告嘅“使者”的確為彌賽亞君王修直咗道路，呢一點係毫無疑問嘅。
14 噉我哋呢？從呢啲生活喺百幾年之前嘅弟兄身上，我哋學到乜嘢呢？就好似佢哋噉，我哋要喜愛閲讀聖經，努力鑽研上帝嘅話語。（約翰福音17:3）呢個世界注重物質享受，喺屬靈方面越來越貧乏，但願我哋唔會受世界嘅影響，對靈糧嘅熱愛有增無減！（請讀提摩太前書4:15）
“我嘅子民啊……要從佢裏面出嚟”
15． 聖經研究者慢慢睇出乜嘢呢？（另見腳注）
15 聖經研究者教導話，真基督徒必須脱離所有同世界友好嘅教會。1879年，英語版《守望台》提到嘅“巴比倫教會”，指嘅係乜嘢呢？係歷代教宗，定係羅馬天主教會？幾百年來，基督新教嘅唔同教派一直認為，聖經預言提到嘅“巴比倫”係天主教會。但係，聖經研究者慢慢睇出，現代嘅“巴比倫”包括所有鼓吹錯誤道理嘅教會。點解噉講呢？因為呢啲教會都用上文提到嘅謊言作為教義。 b一段時間之後，上帝組織嘅出版物越來越明確噉指出，“巴比倫教會”裏面誠心正意嘅人應該點樣做。
16,17． （甲）《千禧年黎明》第3卷同《守望台》提出乜嘢勸告，促請人同錯誤嘅宗教斷絶關係？（乙）點解呢個勸告初時唔係咁有效？（見腳注）
16 就以1891年出版嘅《千禧年黎明》（英語）第3卷作為例子，呢本書提到上帝會捨棄現代嘅“巴比倫”，話：“呢個複雜混亂嘅宗教制度會全部被捨棄。”跟住仲話，“凡係唔認同‘巴比倫’嘅錯誤主張同宗教習俗嘅，而家就要離開佢”。
17 當時，有啲人嘅名仲係留喺教會嘅名册上面，佢哋為自己辯解話：“我完全認同真理，亦都冇點去教堂嘞。”英語版《守望台》1900年1月刊提出勸告：“呢種‘一腳踏兩船’嘅做法係咪啱嘅呢？上帝所要求嘅服從係咪只係噉呢？……上帝會唔會接受同鍾意噉嘅行為呢？當然唔會。試諗吓，一個人加入某個教會，就等於公開同嗰個教會訂立咗一個約。佢應該遵守呢個約嘅全部規定，直到佢……公開噉聲明自己退出教會為止。”隨住時間嘅過去，呢個勸告嘅措辭越來越强烈。 c耶和華嘅僕人一定要同錯誤嘅宗教斷絶一切關係。
18． 點解人一定要從“大巴比倫”裏面出嚟？
18 請諗吓，如果當時冇人經常發出警告，促請人離開“大巴比倫”，又點會有一群受膏嘅基督徒喺地上做好準備，為啱啱登基嘅君王基督效勞呢？基督徒一定要擺脱“大巴比倫”嘅枷鎖，先至可以按靈同真理崇拜耶和華。（約翰福音4:24）同樣，今日我哋有冇決心唔俾錯誤嘅宗教玷污自己呢？願我哋時刻服從上帝嘅命令：“我嘅子民啊……要從佢裏面出嚟”。（請讀啟示錄18:4）
聚集起嚟崇拜耶和華
19,20． 《守望台》點樣鼓勵上帝嘅子民聚集起嚟崇拜耶和華？
19 聖經研究者教導話，真基督徒一有機會就應該聚集起嚟崇拜耶和華。 真基督徒唔單止要脱離錯誤嘅宗教，仲要用正確嘅方式嚟崇拜上帝。《守望台》從一開始就鼓勵讀者聚集起嚟崇拜耶和華。例如，喺英語版《守望台》1880年7月刊，羅素弟兄提到佢嘅一次巡迴演講，佢話自己參加過嘅聚會非常鼓舞人心。佢鼓勵讀者將自己參加聚會嘅經歷寫喺卡片上面寄俾《守望台》，其中一啲經歷會登出嚟。點解噉做呢？“我哋想知道……主點樣祝福你哋，亦都想知道你哋有冇繼續同信仰一致嘅人聚集起嚟。”
1909年，喺丹麥嘅哥本哈根，查爾斯·羅素同早期嘅一群聖經研究者合照
20 1882年，英語版《守望台》刊登咗一篇叫《齊聚一堂》嘅文章。呢篇文章强調基督徒要聚集喺一齊，“互相交流，彼此鼓勵同强化”。文章話：“有冇學識或者才能並唔重要，重要嘅係出席聚會。每個人要帶自己嘅聖經、紙同筆，如果有參考書，例如《聖經詞語索引》，亦都可以帶埋嚟。首先揀一個課題；跟住禱告求上帝賜聖靈指引我哋明白探討嘅資料；然後閲讀、思考、對比經文。噉樣，你哋就一定可以明白真理。”
21． 關於聚會同牧養工作，我哋可以點樣效法美國賓夕法尼亞州阿勒格尼市嘅會衆？
21 聖經研究者嘅總部辦事處設喺美國賓夕法尼亞州嘅阿勒格尼市，喺嗰度工作嘅弟兄聽從聖經嘅吩咐聚集起嚟，係我哋學習嘅好榜樣。（請讀希伯來書10:24,25）一位年長嘅弟兄查爾斯·卡彭，細個嗰陣參加過呢啲聚會。好多年之後，佢回憶話：“我仲記得當時大會堂嘅牆上面寫住一節經文，‘只有一位係你哋嘅老師，就係基督；你哋全部都係兄弟’。呢節經文經常喺我嘅腦海裏面迴響——耶和華嘅子民當中確實冇教士同平信徒嘅分别。”（馬太福音23:8）卡彭弟兄又話，聚會嘅内容發人深省，弟兄姊妹深受鼓勵，羅素弟兄仲付出好大嘅努力去牧養會衆嘅每個成員。
22． （甲）聖經鼓勵基督徒舉行聚會，忠心嘅基督徒有乜嘢反應？（乙）我哋從佢哋身上學到乜嘢？
22 忠心嘅基督徒效法總部嘅弟兄，聽從指引聚集起嚟。喺美國嘅俄亥俄州、密歇根州同其他州，會衆陸續成立。後來，喺成個北美洲以至其他國家都成立咗會衆。試諗吓：當時忠心嘅基督徒如果冇受到教導，聽從聖經嘅吩咐聚集起嚟崇拜耶和華，真係可以為基督嘅臨在做好準備咩？當然唔可以。噉我哋呢？我哋亦都應該下定決心，唔錯過聚會，盡己所能同弟兄姊妹一齊崇拜耶和華，喺屬靈方面互相鼓勵。
熱心傳道
23． 《守望台》點樣清楚指出，所有受膏基督徒都一定要傳講聖經嘅真理？
23 聖經研究者教導話，所有受膏基督徒都必須傳講聖經真理。1885年，英語版《守望台》話：“每個受膏基督徒都應該謹記，自己受膏係要向人傳道（以賽亞書61:1），亦即係蒙召去傳講好消息。”1888年，英語版《守望台》勸勉話：“我哋嘅使命非常清楚……如果我哋忽視自己嘅使命，揾藉口推託，就係懶惰嘅僕人，表明自己唔配受上帝膏立。”
24,25． （甲）羅素同佢嘅親密同工唔單止鼓勵人傳道，佢哋仲點樣做呢？（乙）汽車仲未普及嘅時候，派書者點樣向人傳道呢？
24 羅素弟兄同佢嘅親密同工唔單止鼓勵人傳道，仲開始印製《聖經研究者傳單》（英語），後來叫做《舊神學季刊》。《守望台》嘅讀者收到傳單之後，免費向公衆分發。
我哋應該認真噉諗諗：“傳道工作係唔係我生活嘅重心呢？”
25 喺嗰個年代，投身全時服務嘅人稱為派書者。上文提過嘅查爾斯·卡彭就係其中一位。佢回憶當年話：“我嘅傳道地區喺賓夕法尼亞州。為咗接觸地區裏面嘅每户人家，我照住美國地質調查局印製嘅地圖，就可以行匀縣市嘅每一條路。我會用三日時間喺鄉間傳道，請人預訂《聖經嘅研討》（英語）呢套書。之後，我會請一架馬車將書送過去。我經常喺農夫嘅屋企過夜。嗰時汽車仲未普及。”
一個派書者。請留意車身上面嘅“歷代圖表”
26． （甲）點解上帝嘅子民一定要傳道先可以為基督嘅統治做好準備？（乙）我哋應該要認真諗吓乜嘢問題？
26 要向人傳道，早期嘅聖經研究者一定要有熱心同勇氣先至得。如果當時嘅真基督徒冇受到教導，明白傳道工作非常重要，又點可以為基督嘅統治做好準備呢？事實上，傳道工作就係基督臨在嘅一個重要特徵。（馬太福音24:14）傳道工作可以拯救生命，上帝嘅子民要做好準備，就一定要以呢件工作為生活嘅重心。今日，我哋應該認真噉諗吓：“傳道工作係唔係我生活嘅重心呢？我願唔願意作出犧牲，全力參與呢件工作呢？”
上帝嘅王國誕生嘞！
27,28． （甲）使徒約翰喺異象裏面睇到乜嘢？（乙）上帝嘅王國誕生之後，撒但同邪靈有點樣嘅反應？
27 1914——意義重大嘅一年終於到嘞。呢一章開頭提到，嗰一年喺天上發生嘅大事，世上嘅人根本睇唔到。不過上帝就通過異象，俾使徒約翰睇到喺天上發生嘅事，呢啲事有象徵嘅意義。約翰睇到“天上出現一個大異象”。呢個異象裏面嘅“女人”懷孕，“生咗個男孩”。呢個“女人”就係上帝天上嘅組織，由靈體構成。異象裏面嘅呢個“男孩”將要“攞鐵杖當牧杖管轄所有國族”。不過，呢個孩子一出世，就“被提到上帝同佢嘅寶座嗰度”。天上有大聲音話：“我哋上帝嘅救恩、力量、王國，仲有佢所立嘅基督嘅權柄，而家都實現咗”。（啟示錄12:1,5,10）
28 毫無疑問，約翰喺異象當中睇到彌賽亞王國嘅誕生。呢個的確係一件輝煌嘅大事，但係撒但同邪靈好唔開心。佢哋同米迦勒（基督）所率領嘅忠心天使爭戰。結果點樣呢？聖經話：“大龍被掟咗落去。大龍就係最初嘅蛇，叫做魔鬼，又叫撒但，迷惑咗普天下嘅人。佢被掟落地上，佢嘅天使亦都同佢一齊被掟落去。”（啟示錄12:7,9）
1914年，聖經研究者開始認出基督預告嘅徵象，知道佢已經喺天上臨在
29,30． （甲）彌賽亞王國誕生之後，地上嘅情況有乜嘢改變？（乙）天上嘅情況又有乜嘢改變？
29 喺1914年之前幾十年，聖經研究者早就指出，從嗰一年開始，世界嘅局勢會變得動盪不安。不過，佢哋從來都冇諗過自己嘅推測會咁準確。正如約翰嘅異象顯示，撒但會變本加厲危害人類社會：“地同海有禍嘞，因為魔鬼知道自己時日無多，就非常憤怒，落到你哋嗰度。”（啟示錄12:12）1914年，第一次世界大戰爆發，基督臨在執掌王權嘅徵象開始喺全球應驗。呢個制度亦都到咗“最後嘅日子”。（提摩太後書3:1）
30 不過，天上就充滿喜樂，因為撒但同邪靈以後都冇辦法再返翻天上。約翰記述：“所以，天同住喺天上嘅，你哋都歡欣啦！”（啟示錄12:12）天上潔淨之後，上帝喺地上嘅子民會點樣呢？彌賽亞王國嘅君王耶穌又會採取乜嘢行動呢？呢一章開頭提到，“立約使者”基督會做嘅第一件事，就係熬煉上帝喺地上嘅僕人。點樣熬煉呢？
考驗時期
31． （甲）關於上帝子民所受嘅熬煉，瑪拉基預告咗乜嘢？（乙）呢個預言幾時開始應驗？（另見腳注）
31 上帝嘅子民要經受嘅熬煉絶對唔容易忍受。瑪拉基預告：“佢來臨之日，邊個能够受得住呢？佢出現之時，邊個能够企得穩呢？佢會好似冶金工人嘅爐火，像洗衣工人嘅肥皂。”（瑪拉基書3:2）瑪拉基講得好啱！從1914年開始，上帝喺地上嘅子民接二連三噉遇到好大嘅考驗同困難。第一次世界大戰期間，聖經研究者當中有啲遭受到殘酷嘅迫害，有啲仲俾人韞咗入監。 d
32． 1916年之後，上帝嘅組織内部發生咗乜嘢衝突？
32 上帝嘅組織内部亦都發生咗衝突。1916年，羅素弟兄去世，嗰時佢只有64歲。上帝嘅子民當中，好多人接受唔到呢個事實。有啲人將過多嘅注意力集中喺一個模範人物身上，幾乎到咗崇拜佢嘅地步。但係，羅素弟兄從來都唔希望其他人崇拜佢。唔少人以為，羅素去世之後，上帝就唔會再啟示人明白真理嘞。有啲人甚至心生怨恨，唔肯跟隨上帝嘅組織一齊前進。呢種唔合作嘅態度引起分裂，導致叛道。
33． 上帝子民所期望嘅事冇實現到，佢哋有乜嘢反應呢？
33 聖經研究者面對嘅另一個考驗係，佢哋所期望嘅事冇實現。雖然《守望台》確切指出外邦人時期會喺1914年結束，不過啲弟兄就唔清楚嗰一年到底會有乜嘢事發生。（路加福音21:24）佢哋以為，基督會喺1914年接佢嘅受膏“新娘”去天上，同佢一齊作王。佢哋嘅期望落空咗。1917年年底，《守望台》指出，歷時四十年嘅收割時期會喺1918年嘅春季結束。不過，傳道工作並冇停落嚟。1918年春季過咗之後，傳道工作繼續擴展。《守望台》話，收割時期確實結束咗，接落嚟，會係拾取遺落莊稼嘅時期，屬靈嘅工作會繼續落去。雖然係噉，好多人仲係大失所望，唔再事奉耶和華。
34． （甲）1918年，上帝嘅子民面對邊啲極大嘅考驗？（乙）點解啲教士以為上帝嘅子民已經“死咗”？
34 1918年，上帝嘅子民要面對一個極大嘅考驗。接替羅素帶領上帝子民嘅盧述福，同埋另外七個擔任重要職責嘅弟兄，俾當局拘捕。佢哋受到唔公平嘅審訊，被判長期徒刑，韞喺美國佐治亞州亞特蘭大市嘅聯邦監獄裏面。有一段時間，上帝子民嘅工作似乎完全停止咗。啲教士高興到不得了，心諗：“帶頭嘅”已經俾人捉咗，布魯克林嘅總部又關門，傳道工作喺美洲同歐洲到處受到攻擊，嗰啲乞人憎嘅聖經研究者已經“死咗”，威脅解除嘞。（啟示錄11:3,7-10）呢啲教士真係大錯特錯！
復興時期
35． （甲）耶穌點解容許門徒經受磨難？（乙）耶穌點樣幫助佢哋？
35 敵視真理嘅人根本唔知道，耶穌之所以容許門徒經受磨難，係因為耶和華要“好似煉淨銀子嘅人”噉樣熬煉佢哋。（瑪拉基書3:3）耶和華同耶穌深信，忠心嘅人一定經得起火一樣嘅考驗而得到煉淨，可以更好噉為君王效勞。事實表明，從1919年初期開始，上帝嘅靈所成就嘅一切，係敵人點都諗唔到嘅。忠於上帝嘅人竟然“企起身”，好似翻生一樣！（啟示錄11:11）嗰時，基督委任咗“忠信睿智嘅奴隸”（由一小群受膏男子組成）負責帶領上帝嘅子民，喺適當嘅時候分發靈糧。噉樣，末世徵象嘅一個重要特徵就應驗咗嘞。（馬太福音24:45-47）
36． 有乜嘢表明上帝嘅子民喺靈性上好似翻生一樣？
36 1919年3月26日，盧述福弟兄同幾個同工獲得釋放，佢哋一離開監獄，好快就安排喺同一年嘅9月舉行大會。佢哋仲計劃出版第二本雜誌，叫做《黃金時代》（英語）。呢本雜誌係為咗傳道而設計嘅，會同《守望台》一齊分發。 e喺同一年，上帝嘅組織亦都出版咗《通報》（英語），就係今日嘅《傳道與生活聚會手册》。呢份刊物從第一期開始就强調要多啲向人傳道。的確，自從1919年以來，上帝嘅組織越來越重視逐户傳道工作，鼓勵弟兄姊妹親自去宣揚上帝嘅王國。
37． 1919年之後，有啲人做咗咩事表明佢哋叛離上帝嘅組織？
37 基督繼續通過傳道工作熬煉佢嘅僕人。對高傲自大嘅人嚟講，傳道係卑微嘅工作，有失身份。唔肯去傳道嘅人最後就離開忠心嘅弟兄姊妹，大家各行各路。1919年之後，一啲叛離上帝組織嘅人心懷怨恨，不惜誹謗同埋中傷耶和華嘅忠僕，甚至同反對者聯手迫害佢哋。
38． 基督嘅門徒可以跨過難關，獲得勝利，表明咗乜嘢呢？
38 基督嘅門徒雖然遭受攻擊，但繼續喺靈性上進步，人數越來越多。佢哋跨過嘅每一個難關，獲得嘅每一次勝利，都係確鑿嘅證據，表明上帝嘅王國真係喺度統治緊。如果唔係上帝通過佢嘅兒子同彌賽亞王國，大力支持佢地上嘅僕人，而且賜福俾佢哋，淨係靠呢一小群唔完美嘅人，又點可以一次又一次噉戰勝撒但同呢個邪惡嘅制度呢？（請讀以賽亞書54:17）
盧述福弟兄從監獄出嚟之後唔到半年，就喺大會上發表咗一個激動人心嘅演講
39,40． （甲）呢本書有乜嘢特色？（乙）研讀呢本書對你有乜嘢益處？
39 喺接落嚟嘅篇章裏面，我哋會睇吓上帝嘅王國喺天上建立之後嘅一百年期間，喺地上成就咗啲乜嘢。呢本書嘅每一篇會講吓上帝嘅王國喺某方面已經成就或者將要成就嘅事。每一章都有個温習欄，俾大家可以諗一諗，上帝嘅王國對自己嚟講有幾真實。好快，上帝嘅王國就會嚟到，將惡人惡事鏟除，使地球成為樂園。最後兩章會講吓到時有啲乜嘢事會發生。噉研讀呢本書對你有乜嘢益處呢？
40 撒但千方百計要削弱你嘅信心。但係，耶和華要加强你對上帝王國嘅信心。你有信心，就可以抵擋得住撒但嘅攻擊，亦都可以堅定不移。（以弗所書6:16）所以，我哋鼓勵你用心研讀呢本書，時不時問吓自己：“對我嚟講，上帝嘅王國係唔係真實嘅呢？”終有一日，所有活着嘅人都會睇到上帝嘅王國統治天下。如果你相信上帝嘅王國係真實嘅，就會忠心耿耿、竭盡全力為呢個王國服務。你對王國嘅信心越大，就越有機會得享王國嘅福分。
a 關於格魯、斯特森同埋斯托爾斯嘅見解，詳見《耶和華見證人——上帝王國的宣揚者》45-46頁。
b 聖經研究者睇出，一定要脱離所有同世界友好嘅宗教組織。不過有好多年，佢哋繼續將嗰啲仲未脱離教會，而又聲稱獻咗身俾上帝、對贖價有信心嘅人當成基督徒弟兄。
c 聖經研究者早就勸人脱離教會。當時呢個勸告唔係咁有效，一個原因係佢哋以為勸告只係適用於基督嘅“小群羊”，亦即係14萬4000人。呢本書第5章會講吓，喺1935年之前，聖經研究者以為，啟示錄7:9,10提到嘅“大群人”包括埋一般教會嘅信徒，佢哋嘅數目多到難以計算；呢“大群人”喺現行制度嘅終結時期擁護基督，所以得蒙獎賞，喺天上居次要地位。
d 英語版《黃金時代》（現稱《警醒！》）1920年9月刊係一期特刊，内容講到第一次世界大戰期間，聖經研究者喺英國、德國、美國同加拿大慘遭迫害，而且舉咗好多實例。有啲聖經研究者受到嘅迫害非常殘酷，令人震驚。喺呢場大戰之前嘅幾十年，聖經研究者好少受到噉樣嘅對待。
e 有好多年嘅時間，《守望台》主要向“小群羊”嘅成員提供靈糧。
