親愛嘅王國傳道員：

請想像一下，喺1914年10月2日星期五早上，你同布魯克林伯特利家庭嘅其他成員一齊聚集喺餐廳，坐喺自己嘅座位度等羅素弟兄。冇幾耐，餐廳嘅門開咗，羅素弟兄行入嚟。佢好似平時噉停低腳步，笑住同大家打招呼話：“咁多位，早晨！”不過，有啲唔同嘅係，佢冇即刻行到自己嘅主席位，而係拍咗幾下手，發表咗一個令人振奮嘅宣布：“外邦人嘅日期已經結束；外邦列王嘅日子已經滿咗喇！”真係好開心啊，因為呢一日你已經等咗好耐嘞！現場嘅每一位伯特利成員都好興奮，熱烈噉鼓掌，掌聲不絶於耳。

 羅素弟兄作出呢個激動人心嘅宣布，到而家已經一百年嘞。自從宣布之後，上帝嘅王國取得嘅成就，係幾咁輝煌啊！耶和華通過呢個王國逐步煉淨同埋培訓佢嘅子民。1914年，上帝嘅子民只有區區幾千人，今日已經超過800萬嘞。你從上帝王國提供嘅各種培訓得到咗乜嘢益處呢？

今日，我哋經常聽到弟兄話：“耶和華嘅天上戰車正喺度前進緊！”呢句話講得冇錯。其實，自從1914年以來，象徵耶和華天上組織嘅戰車一直都喺度飛速前進。我哋仔細閲讀呢本書，就可以睇出呢一點嘞。王國傳道員用咗好多創新嘅方法將王國嘅好消息傳遍全地，例如報章、宣傳遊行、幻燈片、見證卡、留聲機、廣播甚至互聯網。

由於耶和華賜福，我哋而家能够以超過670種語言嚟出版吸引人嘅聖經書刊，而且免費分發。無論喺富裕嘅國家，定係喺資源有限嘅地區，都有志願人員作出犧牲，參與王國聚會所、大會堂、分部設施嘅建築工程。當有災難發生嘅時候，充滿愛心嘅弟兄姊妹就會即刻救助受災嘅信徒，佢哋的確“為共患難而生”。（箴言17:17）

有時候，教士同其他人反對我哋，“以法令謀害”我哋。不過，事實一次又一次噉表明，反對者嘅錯誤舉動“反而有利於傳揚好消息”。呢一點，大大增强咗我哋嘅信心。（詩篇94:20；腓立比書1:12）

你哋係主人嘅“僕役”，我哋好榮幸可以同你哋一齊共事。我哋好愛你哋每一個人。我哋祈求上帝，希望呢本書幫助你哋更加珍視自己嘅屬靈産業。（馬太福音24:45）

祝安好！

你哋嘅弟兄

耶和華見證人中央長老團